努力努力...

又到一年一度報學校0既時間0刺, 今年我好懶, 到而家都只係報左7間, 可能因為已經讀緊N1啦....

因為唔知自己出年會住邊區, 於是我又再每區揀一D, 最終諗住報十幾間, 諗起D文書工作就慘0刺....

好辛苦地先攪掂左7間...

鑽石山靈糧 - 係我第一間報0既, 因為可以上網報, 所有野都係upload, 好方便!! 我仲會報埋馬鞍山同藍田....

九龍城靈糧 - 呢間係私校, 朋友同事都話好好, 即刻報左....

民生 - 私校, 一條龍, 如果入到就可以打左個底, 唔駛怕將來派到差0既小學.... 爸爸响民生讀過小學, 唔知收0既機會會唔會高d呢???

創價 - 雖然我唔鍾意呢個日本教, 但呢間幼稚園攞哂獎, 辦學理念同教學方法都備受好評, 仲要勁多人報, 咁當然要試下啦!!!

根德園 - 寄左信去攞申請表...

york - 呢間英文出名勁, 所以想試下....佢地好似好寸咁, 申請表爸爸0個欄一開始係揀"先生/博士/教授", 嘩, 好階級觀念下喎!! 爸爸媽媽讀邊間小學, 中學, 大學都要填, 感覺上我報屋村地址會唔多著數, 但我唔理0刺, 如果咁巴閉的話, 唔鍾意收咪唔好收囉....

黃大仙潔心會 - 網上話呢間响黃大仙區算好, 我只係報黎預防第二時搬去黃大仙啫...

仲有好多未報, 要加倍努力先得0刺!!!