妹妹返學第二天

尋日放學後, 妹妹响屋企表現得好開心, 不停咀唱歌同講野, 不過每次我問佢聽日媽媽再湊返學好唔好, 佢都話”唔愛!!”…. 所以, 我同爸爸一致認為, 妹妹第二日返學一定喊….

 

今日又係差唔多8點半起身, 今次刷完牙洗完面妹妹都精神好多喇….

 

逢二, 四我地要著運動衫, 紅扑扑好醒神喎…

 

 
我地今日好早, 9點鐘就到左學校, 要等15 MINS先可以上去, 呢個時候, 媽媽就幫妹妹影下相, 妹妹又同同學仔打下招呼, 握下手咁, 似乎都OK喎…..

 
好喇! 9:15喇! 大家上樓梯, 妹妹行左幾級就唔願行, 要媽媽抱抱… 好啦, 媽媽抱埋今日, 聽日你要自己行哂喇!

妹妹就係行呢條樓梯上去返學....

 
上到樓上, 媽媽比妹妹自己行入去, 妹妹向住D sir sir進發, 老師話: 入課室都有得玩架!!
 
呢個時候, 妹妹開始想喊, 因為知道即將同媽媽分開….
 
跟住嬸嬸抱起佢, 妹妹狂喊, 唔知係嬸嬸唔夠力定費事整親佢, 佢將妹妹放左响地下, 妹妹典左兩野, 嬸嬏又將妹妹抱返起, 妹妹一邊大叫媽媽, 一邊大喊, 唉, 好慘呀, 媽媽心痛死….
 
除左妹妹之外, 基本上每個小朋友同媽媽分離0既時候都有喊, 不過妹妹就最激動…. 嬸嬸抱住佢, 佢仲要掙扎, 好驚佢會撞親….
 

落到樓下同爸爸講起, 真係有d想喊呀…

 
今次唔行咁遠食早餐0刺, 怕一陣學校打黎…. 不過, 我又plan左, 唔好咁容易就接返佢, 如果唔係佢就成日覺得喊就可以走…. 希望學校唔會打黎啦, 好驚佢會掙扎整親呀…
 
食緊個太興早餐, 突然有個電話打黎, 係26字頭, 好緊張, 即刻聽, 對方問: “係咪李梓丹家長呀?”, 個腦突然浮起妹妹撞穿頭0既情景, 好驚呀!! 點知對方又講, 想問下我會唔會報協康會黎緊呢期0既PLAYGROUP, 真係比佢嚇死呀…
 

今日時間都算過得幾快，話咁快就10：45，我起程去買小禮物比妹妹，零食物語未開，我响惠康買左蝦條同欣欣杯...

 
今日我早左10分鐘到學校，可能因為今日啲小朋友喊得勁左，門口已經有好多家長等緊喇！
 
夠鐘，我又係第一個上去（平時又唔見動作咁快喎！），上緊樓梯，已經聽到佢地响度唱緊abc, 跟住又唱twinkle twinkle little star，好似好開心咁喎！接左妹妹，妹妹個樣都係麻麻地開心，不過冇喊，個主任（我諗係主任卦）話妹妹冇喊喎，咁都好啲！
 
返左兩日學都冇人同我講過妹妹嘅情況，所以我留低等主任得閒先，佢同我講妹妹算係好ok, 老師會响呢個星期之後同我傾，要等佢地觀察下先...

返到屋企, 見到妹妹書包入面多左本野....

仲做左一頁添....

同妹妹講 "聽日又返學咯!", 妹妹依然答: "唔愛! 屋企, 嫲嫲!!"