玩野的一天

今日妹妹不停玩野, 仲要玩到好盡添....

朝早起身, 一醒就喊, 嫲嫲抱住都唔收聲....

叫佢刷牙, 喊左一餐先肯刷....

同佢換校服, 穿到一半又要除返出黎, 話:"唔返學, 要換衫去搵爺爺", 從來都未試過要去搵爺爺, 係咪玩野????

見到我攞對黑鞋出黎, 又再喊得勁D, 係咁話:"收埋呀!!", 我當然唔會理佢啦....

係咁趕我走:"媽媽返工, bye bye(加個飛吻), 下次見!!", 真係唔知好嬲定好笑....

去到門口, 想同佢著鞋, 勁喊, 跟住要搵嫲嫲, 最後嫲嫲唯有即刻洗面換衫一齊去啦...

0個時已經係8:15, 我趕唔切返工0刺, 唯有叫嫲嫲帶佢返....

我吩咐左嫲嫲記住一將妹妹交比老師就即閃, 妹妹當然係狂喊啦, 不過嫲嫲都好醒, 冇心軟....

放左學, 當然又係喊, 不過我都慣0刺, 唔喊到訓响度就算啦....

下晝我放假要同妹妹去做回港証, 準備星期六過澳門...

返到屋企, 嫲嫲就要出去睇醫生0刺, 我個心一直都諗緊, 爺爺嫲嫲出去妹妹肯定又勁喊一餐.... 點知, 哈哈, 又估佢唔到喎, 佢只有少少想喊, 一氹就冇事0刺....

我地去到火炭入境處做回港証, 坐下坐下, 突然有人走埋黎喎, 咦, 玲契契?? 又會咁岩0既????? 原來佢幫佢老細個女攞身份証, 真係橋呀!!!

本回港証好醜樣呀!!

回程時, 去到火炭站, 臨入閘時, 妹妹突然話唔要搭車, 叫我行返轉頭....

原來佢要同御龍山出面0個兩隻馬影相, 真多多事實..... 好啦, 咁我地行返過去影相啦....

又係佢話要影相, 但永遠都唔望鏡頭囉..... 我地仲衰過d自由人, 連隻咁0既馬都影一餐....

然後.... 妹妹都仲未肯走, 話要入去商場"彈彈彈", 我初時聽唔明, 只氹佢去到大埔火車站去睇kitty精品....

然後... 佢繼續係咁"彈彈彈!!", oic, 彈ping pong波!!! ok ok....見你咁乖就同你去啦, 不過要去大埔中心先有得彈呀... (其實我好攰0刺)

响火車, 妹妹同一個姐姐打招呼, 一直打到人地大學站落車 (打咁耐招呼, 攪到阿姐姐都開始唔知點回應佢好....)

人地落左車, 佢就唔肯企0刺, 我抱住佢, 佢bok响我膊頭度好靜, 突然有跌左野0既聲, 擰轉頭望原來妹妹响我個袋度靜雞雞偷餅食, 哈哈, 跌左個盒落地比我發現左, 其他人都笑佢.... 可能比人笑, 佢即刻冇哂心機, 挨住我唔出聲直至落左車....

好攰, 最好就可以返屋企啦... 不過又唔可以食言, 於是我再問多次李梓丹仲去唔去彈波波, omg!! 佢居然答好!! 咁我地要搭另一架車去大埔中心.....

點知, 最玩野0既事就發生左, 半路, 食食下餅0既妹妹突然要我抱, 然後又好突然咁訓左....好明顯又係玩我啦, 仲要side十幾蚊搭的士返屋企.....

唔知今日玩完我未呢?? 希望今晚可以平安無事啦....