戒片 - 成功了一點點....

尋日嫲嫲同我講, 而家妹妹識得响痰罐噓噓, 突然好有進步喎, 唔通返學三日就學識???

尋日成功左兩次, 爸爸話如果成功就會有獎勵, 每次我地都比新紫菜妹妹食 (以前食開四洲紫菜, 最近轉食韓國ACE紫菜, 因為味較淡, 鈉亦較少, 我地稱之為"新紫菜")...

今日, 起左身冇耐, 媽媽幫妹妹除左塊片片, 問妹妹要唔要噓噓, 妹妹話好...

放妹妹落痰罐度, 妹妹好努力咁疴, 但疴唔到, 仲喊起上黎添!!! 哎呀! 咩事呢?? 妹妹個樣好痛苦, 媽媽立即諗起會唔會尿道炎呢???

媽媽抱起妹妹, 氹下佢, 但妹妹堅持要再試, 好不容易妹妹終於疴到0刺!!!

媽媽即刻讚一讚妹妹啦, 點知, 原來呢個係一個陰謀黎架~~ 妹妹即刻問媽媽攞新紫菜, 原來佢咁努力疴就係因為想食新紫菜!!! 哈哈哈!!!!