超強颱風鮎魚上星期經過香港, 仲以為星期六0既澳門之行會cancel.... 成個星期都响度考慮帶唔帶妹妹去, 爸爸似乎偏向唔想帶, 因為夜晚可能會出去飲酒, 但我就寧願帶, 一餐半餐酒唔飲都冇所謂啦....
最後天公造美, 我地如期出發...
今次係為慶祝肥仔哥哥生日所以去澳門0既, 多謝佢0既邀請, 同埋免費0既威尼斯人酒店房, 我地一家三口分配到一間房, 訓得好舒服呀!!!
臨出發前, 我帶妹妹去睇次醫生先, 因為仲有d傷風同咳, 醫生話, 呢個時期0既小朋友有個俗稱叫做鼻涕蟲, 成日都會有兩條鼻涕响個鼻度, 同埋又要返學, 真係好難會完全好返哂, 叫我唔好期望咁高, 我聽到覺得好好笑, 妹妹加入左鼻涕蟲0既行列呀...
妹妹見到醫生, 即刻同醫生講:"坐船船喎!!!", 妹妹, 唔係而家坐, 係睇完醫生一陣先坐呀!!
我地揀左去順德碼頭搭, 阿飲教我地去明星度買飛, $120一張, 平左$26!!
諗住比妹妹响船度訓, 點知失哂預算, 妹妹唔肯訓, 咁成個下晝都只係响巴士訓左幾個字咋....
去到澳門, 我地先去威尼斯人搵魚旦舅父, 安頓好再落去行下, 見到妹妹行路特登古靈精怪咁, 就知道佢好開心!!
見未到時間食晚飯, 我地去左官也街一趟, 食左莫義記甜品, 我同妹妹食木糠布丁, 爸爸食大菜糕(唔該要最大0個隻!! 佢真係好鍾意食.....), 然後路經沙度娜, 又食多次木糠布丁(嘩..... 原本都係諗住黎呢度架, 不過的士司機話氹仔冇, 所以先去左莫義記)....
我地晚餐响西環咖喱屋食, 都幾好味.... 最特別係呢個燒乳豬飯, 不過我食一舊就滯左0刺...
大家同肥仔哥哥影張相先.... 又係木糠, 我至愛, 但已經飽到食唔到0刺.....
食到十點幾, 我地同妹妹返左酒店先, 妹妹响的士已經訓著左....
涼都冇沖, 只係幫佢抺個身, 沖支奶比佢好訓d.... (我帶左三個奶樽呀!!)
妹妹又訓左, 時間尚早, 我將d野執返好, 咦! 有熨斗喎, 一於熨下衫啦....
然後跳上床打一陣機, 一點鐘就訓0刺....
不過生保床我訓唔到, 不停醒, 又怕妹妹凍親....
4點幾醒一醒, 爸爸仲未返.... 會唔會跌野架? 記唔記得房號呢? 打個電話比佢? 唉, 算啦, 費時好似好煩咁啦....
突然爸爸返黎0刺, 我都唔知幾多點lu....
7:30, 妹妹醒左, 突然叫嫲嫲, 開始喊.... 我即刻用魚旦舅父, phoebe姐姐同屁屁黎引佢, 佢即刻收左聲, hehe.... 跟住我地走過隔離床同爸爸一齊訓, 又訓多兩個鐘...good!!
9:30, 正式起身, 幫妹妹沖個白白先, 妹妹揀左响浴缸沖, 咁大個浴缸, 妹妹好開心, 不停話:"自由式, 自由式"!! 沖完涼仲講左好多次"bye bye白白"!!
爸爸好叻呀, 10點起身同我地準備落去食野, 呢個時候魚旦舅父都過黎0刺....
食左呃人錢0既foodcourt, 再到已經去過0既官也街行下, 妹妹買左個切旦糕玩具.... 買完又話想買喜羊羊保齡球, 我唔肯, 佢攬住個玩具越行越遠, 真激死...
最後一餐我地去左十月初五街0既毛記飯店食飯, 期間發生左一段小插曲....
妹妹玩玩下iphone, 唔小心跌左落地下, 十幾個人不知幾齊心, 一齊大聲"哦!!!"妹妹, 妹妹好驚, 又係0既, 平時都係咁跌, 都未試下咁多人一齊話佢, 我同爸爸即刻氹佢, 叫佢唔駛驚....
妹妹驚完, 我諗佢開始嬲0刺, 仲要好嬲0個隻.... 佢隻閃電手伸左出黎搶碗碟, 想掉落地下, 幸好我搶得切, 掉左落地就麻煩0刺.... 妹妹嬲到狂喊, 不停大叫"搵爺爺!!!搵爺爺!!!".... 我同妹妹行開去第二張枱度坐, 但似乎都平熄唔到佢0既怒火, 於是我地落街行下, 又買左個木糠布丁比佢食, 佢一路喊, 一路話要搵爺爺同玩sir sir, ok ok, 我地行去睇下有冇sir sir啦....
行行下, 我扮唔記得左攞返d玩具同餅餅, 同佢上返去拎, 奇蹟地上到去又ok喎... 我地可以繼續食野0刺!!!
最後我地搭5點船返香港, 然後返大埔同嫲嫲爺爺食飯....
一見到嫲嫲同爺爺, 兩日都好乖0既妹妹突然變左另一個人, 扭計扭到想打佢呀...好恐佈.....
