曳

1/17

估唔到, 妹妹己經識得咁做, 唔知好嬲定好笑…

今晚妹妹去到零食部睇零食, 其中一盒金莎得返一粒, 妹妹話爸爸食哂…

然後佢自己攞左, 話要食…

但咳咳唔可以食, 你應該知道吧!!!

妹妹堅持…

糾纏左一陣, 我話如果佢自己拆開粒金莎, 我就掉落垃圾筒… 叫佢自己放返入個盒, 聽日好返D先食…

唉, 受軟唔受硬0既妹妹, 繼續堅持要食, 雙手渣住粒金莎响身後唔比返我…

糾纏左一陣, 妹妹一手將粒金莎好快地放左入口, 原來佢雙手响身後面拆紙…

嗰一下, 我真的想笑出黎, 我諗我個咀有郁左, 真係好好笑…

但要堅持啊!!!  加油呀媽媽!!!

我幫佢抺乾淨隻手, 然後唔理佢, 話佢唔聽話, 我唔開心, 以後都唔同佢玩, 然後走入房摺衫…

佢好驚, 喊住跟住入黎, 話佢要我, 咁你以後都乖啦, 又話唔得…

講黎講去, 都唔肯話以後會乖, 但又要我… (咁即係搵我笨啫..)

講唔掂唔理佢, 佢又喊嗌唔好, 佢解釋佢真係好想食, 佢好驚爸爸會食左…

哈哈… 爸爸幾時變成一個同小朋友爭野食0既惡魔架???