花花面包

2014年9月9日

 

同事借左呢個整花花面包0既工具比我, 我地就趁中秋節假期响屋企試下啦!

 

方法好簡單, 只要將工具放响白面包上面, 壓出黎再將面包圍返個花花形就可以0刺!

 

整左四個, 有啲靚有啲唔靚... 技術好參差, 哈哈...

 

將牛油同糖掃响面再焗, 變左脆脆花形面包!

 

妹妺讚好味呀!

 



煮飯煮到一頭煙

唔好睇少呢四樣好簡單0既餸, 要一路教功課一路煮真係唔簡單呀~~

已經熱, 講兩句唔明, 煎煎下魚餅都要熄火教左先, 教到忟, 越黎越高音, 越黎越大聲, 嚇到妹妹喊... oh no....

下次知道要做功課就唔煮飯了...

B仔雞亦尖

B仔雞亦尖係婆婆好鍾意食0既, 我地以前都成日買比婆婆食, 而家自已整, 一路整一路回憶起婆婆, 唔知佢而家點呢?

好想整好耐0刺, 趁今日早早地可以去街市買雞亦尖, 希望成功啦!

其實真係超容易, 只嫌唔太夠辣, 唔鍾意食辣0既人士就岩哂0刺...

烏龍的白酒煮蜆

今晚煮乜餸? 不如試下ANNE教的白酒煮蜆吧!

離開街市先發現唔記得買蔥, 唉, 算吧! 應該影响不大吧!

呢個乾蔥, 切出黎點解唔似洋蔥會散開0既? 咁奇怪???

煮完出黎, 爸爸話呢D係蒜頭喎! 下! 原來我買錯左! 好烏龍呀! 初哥煮餸真係咩都會發生架! 哈哈!

好彩, 呢個烏龍並冇影响D蜆0既鮮味, 好味道!

我又黎檸檬醋

尋日好好彩買到靚0既檸檬, 即刻去埋百佳買醋同冰糖, 可惜買完先知百佳0既白醋係冇醋0既成份, 激死呀! 呢個就係我貪平0既後果0刺...

今朝起身就浸0刺, 呢個樽只需要三個檸檬, 平盒冰糖同一支醋...

浸完唔記得影相, 夜晚返到屋企D糖已經溶哂LU...

自製塩麴 - 收成了!

終於等到第七日，我的自製塩麴完成了！

好想快啲煮餐飯，可以試下，hehehe!

自製塩麴

塩麴用黎醃肉實在太好用, 急凍野都可以變得好好味!

買現成的塩麴實在太貴, 我決定學人自己做!

今次用200g米麴 + 65g塩 + 300cc水

第二朝d水已經收哂, 好緊張, 希望成功吧!

滑滑蒸水旦

今晚終於試左呢個滑滑蒸水旦0刺, 好成功!

 

真係好滑, 妹妺勁鍾意食呀!

 

 

今次用左三隻旦, 加一盒細雞湯..

 

攪勻然後隔渣,  封鍚紙水滾大火蒸3分鐘..

 

熄火焗20分鐘..

 

成功!

住家飯之鹹旦蒸肉餅+梅菜蒸菜心豆腐

今日開始實行五二減肥法, 每逢星期一同星期四我會只食500KCAL, 今日撞岩天氣咁凍, 真係好難頂....

原本諗住帶個蘋果返公司做早餐, 點知唔記得攞, 經過祥興就買左4個, 點知返到公司食左幾啖先發現個心係爛架, 好驚呀!!!

好肚餓呀! 到午餐6菜食, 食完好似冇食過咁呀, 冒險再切個蘋果, 咦, 呢個又冇事喎, HEHE...

太餓了! 忍唔住食左兩粒朱古力, 應該唔係好大問題吧!

好期待, 放工即走返去買餸煮飯, 自己煮就可以有多D野食啦!

鹹旦蒸肉餅

我第一次整咋, 整完點解D肉咁實呢? 經過一輪研究之下, 我諗買返黎0既肉碎都係要再剁先OK呀, 同埋下次要加多D水... 雖然實左D, 但味道冇問題, 所以老公都食左半個呀! 淨返半個帶返黎帶飯啦!

梅菜蒸菜心豆腐

買左石澳梅菜心, 果然好味道呀! 用百福蒸煮滑豆腐, 毫無難度又好味...

好期待聽日0既早餐呀! 好掛住菜肉飽!!!

馬年大年初六 - 親子日

呢兩日唔駛拜年, 今日妹妹提議去冒險樂園, 都好吖, 橫掂都好耐冇去, 一於兩母女親子活動...

聚寶坊有新野影相, 幾COLORFUL呀...

冒險樂園玩左一陣其他野, 就夠鐘去玩波波池...

當中發生一件小插曲, 就係一夠鐘玩波波池, 妹妹就朝住波波池一支箭咁跑去, 而我只係行過去, 行到去我見唔到妹妹, 因為實在太多人, 我知唔會唔見佢0既, 點都係响呢度附近, 行到盡頭就搵唔到, 唯有行返轉頭睇下啦, 一轉身就見到妹妹眼濕濕, 好慌張咁向我呢個方向跑, 但佢原來係睇唔到我呀, 當見到我時, 佢就攬住我喊, 好驚, 仲喊左好耐添, 唉, 之前教佢唔見媽媽要鎮定, 企定定等媽媽黎搵佢, 似乎一驚起黎都係做唔到喎...

玩完我地去食左個前所未有咁大份0既KFC, 好飽好飽....

所以晚餐都食唔到, 我只煮左個焗雞脾意粉比爸爸食, 一個人份量我竟然快手落哂成罐醬汁, 好彩爸爸都覺得好味啫...

煮飯仔 - 照燒雞扒, 煎廣島蠔, 魚香茄子

9/18

嫲嫲湊左妹妹去馬灣玩, 我同爸爸難得有一日可以休息下!!

冇人打擾之下煮左個飯…

照燒雞扒, 見個汁煮極都未杰, 我又心急, 加多左兩次糖, 哈哈, 結果好甜, 我諗妹妹實好鍾意食…

煎廣島蠔, 我都係心急架0刺, 都未得就不停試下反隻蠔, 最終爛鬼哂,試下搽D蜜糖又更加痴哂鑊… 呢隻算係最靚0既一隻, 不過老公竟然話幾好味喎, 佢係咪氹我咋??

魚香茄子, 買唔到淘大魚香茄子醬, 李錦記唔好味0既… L

食完飯媽咪上左黎坐, 十點幾都未等到妹妹返, 可惜…

芝士牛肉薯餅

6／25

Doris lee早幾日教左我整芝士牛肉薯餅，話佢囡囡勁鍾意食，呢樣野聽落岩哂妹妹食呀，因為芝士，牛肉同薯仔都係妹妹鍾意食嘅野...

首先將薯仔烚熟，千祈唔好買大陸薯仔喎，於是我响一田買左澳洲新薯，但係點解好似煮極都唔淋嘅？ 唔通"新薯"出現左問題??

去皮，好吃力地將啲薯仔顏爛，然後加入已經炒熟嘅牛肉碎同芝士整成一個個波波，oh... 但因為啲薯仔唔夠淋，整唔到波波喎... 算啦，咁成塊餅黎煎啦，一路煎一路散，失敗，不過，我都照比妹妹食... 好攪笑，妹妹食左好多野，唔肚餓，只食到少少，佢話佢飽, 叫我下次再整過...

妹妹好快就訓左，我趁有時間將淨返嘅材料再整一次，今次煎得好睇左啲... 加油呀，下次一定要更好味呀！

晚餐 - 炒菠菜 + 洋蔥豬扒 + 蒸水蛋

今晚放工急急腳返屋企接力湊女, 死啦, 好多野都未做哂架...

循例要快, 買餸要快, 煮都要快, 但今晚失敗左....

三個餸煮左一個鐘多d, 仲要煮煮下餸先發現唔記得煲飯, wakakakaka!!!!!! 好彩個飯煲有快煮功能, D飯都仲配合到, 爸爸一返黎岩岩好有得食, yeah!!!

炒菠菜 - 一早諗定今晚要食菠菜, 突然好想食菠菜.... 早知炒哂一斤啦, 攪到得返少少帶飯咋...

洋蔥豬扒 - 差唔多7點, 幫襯開0既豬肉檔已經冇哂梅頭, 於是行左去第二檔.... 同阿伯講要梅頭豬扒(係咪應該咁講呢??), 阿伯問:"住趴??", 呆左, 講多次啦, 佢都仲係"住趴", 咁唯有話係啦, 希望佢唔係玩我啦...

見d豬扒咁細塊, 我買左5塊, 切成15小塊... 食譜指示要用大火先煎熟, 原本我以為好簡單啦, 點知因為我有成15塊, 當我放哂15塊落隻鑊度之後, 第一塊已經就黎lone(可能係我落左蛋白醃0既關係吧), my god!!! 煎完一陣仲要加埋洋蔥再煮架!!!

個食譜, 所有調味料同醃料都冇份量, 我唯有求求其其, 是是但但, 好彩出黎個味道都仲ok...

不過個樣就衰得好緊要.... (仲要用iphone影, 一pat野咁, 哈哈)
同埋老公一食就話唔係梅頭, 只係普通豬扒... 咁我算有比人呃嗎??? 5塊$33啊..

蒸水蛋 - 第一次睇明明未得架喎, 點知炒完個菜就已經老得滯, 只有最上面大約1cm是滑的, 下面好多窿窿啊!!

妹妹响我煮餸時, 已經食左一包粟米百力滋, 兩粒開心果, 一粒芝士同一樽益力多, 結果晚餐佢完全唔想食, 只係幫襯左幾啖....

相反老公就食左兩碗飯(佢話佢好肚餓), 結果我要再蒸一碗飯先有飯帶...

和妹妹一起晚餐 - 蕃茄炒旦 + 媽咪秘製雞亦

今日雪柜除左蛋, 好似冇咩可以正正經經煮餐飯比妹妹食...

LUNCH已經食左蘑菇湯腸仔通粉, 晚餐如果都食冇益野似乎太過份了...

於是, 落街買左雞亦同蕃茄, 煮飯同妹妹一齊食...

看似好平, 但點知買醬料又買左80蚊, 哈哈...

target半個鐘內完成兩個餸+蒸飯, 可惜, 超時足足15分鐘啊....

好懶惰的蕃茄炒蛋 - 原本諗住切粒0既, 但切左幾下又開始冇心機了... 諗住挑走蕃茄核, 等個賣相好少少, 點知又係懶左... 咁少少野又居然用咁大隻碟喎...

媽咪秘製雞翼 - 呢個係跟玲契契之前比我0既食譜, 好簡單, 時間關係, 好心急開飯, 如果唔係可以再煮耐d, 等佢再入味d...

紫菜肉鬆面飽

放假悶悶地, 唔知食咩早餐好...

買左方飽, 但芝士醬又冇哂, 點算呢??

最後我地試左紫菜肉鬆, 妹妹勁鍾意!!

食到我唔比佢再食, 太多0刺....

失敗的日式滑旦牛肉飯

4/17

超級核突!!!

我呢個煮餸白痴, 跟住食譜整都整到咁, 真係衰得好高難度... hehe....

食譜係教煮兩人份, 咁我要三人份, 當然將所有材料都X 1.5倍啦, RIGHT? 得出0既結果, 就係太多水, 唔夠甜.... 亦因為太多水, D旦汁落到個鑊度就同D水混埋左.... 慘不忍睹....

好彩雖然好樣衰, 老公話味道冇問題, 而我就覺得太淡0刺...

雖然好失敗, 但煮左0既超級多飯都食哂, 佢地真好人, 竟然連妹妹都支持我, 食左好多!! 

尋日同小廚神阿佳同大廚神媽咪講起, 原來三人份0既調味料唔係二人份0既1.5倍喎, OMG!! 不過個道理我而家仲未明, 我實在太不懂變通了

不過, 我決定....一個月後會再試, 我一定要煮到一個成功0既牛肉飯出黎.... 

煮...

3/9 (星期三)

奶奶湊左妹妹出街食飯, 我見放工冇野做, 於是返屋企煮飯, 順便可以帶飯...

兩個人食, 只煮兩個餸...

1. 煎豬扒 - 街市醃埋, 好好味架, 又方便, 只係煎就得... 不過3塊豬扒唔係塊塊都好淋, 蝕左...

2. 魚香茄子 - 個樣好似幾好咁呀, 哈哈!! 我第一次煮, 不過當然用現成0既魚香茄子醬啦... 味道呢.... 就應該加多D水, 因為原來D茄子勁快索水, 同埋咸左少少... 原來切茄子都有技巧, 一D粗一D幼結果有D唔夠淋... 呢個下次可以再試, 因為好快攪掂, 我整到咁都唔難食, 只食淨幾條...

煲左4碗飯, 諗住食完先留飯啦, 點知老公一開始就食左兩碗, 我食左一碗多d, 淨返0既老公筆埋黎食, 原來佢唔知我未留飯, 夾硬食埋費時side, 一場誤會...