婆婆生忌

7/21

 

好抱歉, 因為我掛住傾電話, 遲左出門口, 所以大家只可以求其食越南野, 冇飲茶…

 

去到歌連臣角3:00, 因為打風, 真係一滴風都冇, 我從未試過出咁多汗, 淨係企响度都濕哂, 肥妹D頭髮會滴汗出黎, 好似洗完頭咁, 好攪笑…

 

好抱歉, 婆婆, 我地陪唔到你咁耐, 因為再企就會中暑0刺…
好乖0既妹妹, 一句怨信都冇, 錫哂你呀!

 

去北角阿佳屋企, HEA一陣, 再去東寶店小二食飯…

 

途中見到雙彩虹呀…

 

 

啤啤佢...

同婆婆食團年飯

1/14

少有地今年一月要返兩個星期六, 唉, 真係好眼訓…

放工行程超級急趕….

1:30PM 返到屋企, 湊埋阿女即刻出門口去北角

2:10PM 去到阿佳屋企, 原來媽咪都係岩岩到, 媽咪買左老趙午餐比我地

食完野, 大家一齊搭的士去歌連臣角, 約左三舅父佢地一齊同婆婆做節…

計返, 我地正常應該係今日同婆婆做節的, 媽咪買左婆婆最鍾意食0既眉豆粥同粉包, 婆婆而家應該有胃口食啦! (如果真係食到的話, 呢個真係一個謎)…

今次唔知點解, 今日紀念花園D花有好多蜜蜂採花蜜… 奇怪, 每次黎都唔見有蜜蜂, 但妹妹尋晚突然問我歌連臣角會唔會有蜜蜂, 我仲話應該唔會添, 哈哈, 點知今日就起碼有幾十隻…

婆婆, 我地年初二再黎同你拜年呀!!

之後, 大家去左東大街老媽甜品

OPERA - 味道比想像中普通...

芒果拿破崙 - 好正!!! 

焦糖燉蛋 - 為妹妹而設的, 好好味!!!!

下次我要去安利試鮮油奶多呀!!!

夢見婆婆

1/7

尋晚我第一次夢見婆婆....

婆婆佢返左黎, 佢話可以以後都响度, 我好開心, 以後都可以一齊…

我摸摸婆婆, 婆婆0既身體唔算冰凍, 但冇溫暖, 婆婆0既味道都唔見左, 感覺好似有D唔同左…

不過唔緊要, 只要係婆婆返左黎, 我都好開心…

個夢好得意, 冇其他屋企人, 阿佳只出現左一陣, 反而有另一個阿婆黎幫我地執屋, $910今次唔駛比, 因為係上一次淨落, 仲有好多古怪野…

今晚比我發多次婆婆就好了…

B仔去過歌連臣角, 幫我影左張相, 婆婆相框0既金邊己經補返, 見到張相, 忍唔住响公司喊左起黎, 真係好掛住婆婆呀…

妹妹發現了

12/1

尋晚妹妹訓唔著, 大家傾偈...

妹妹話想數人, 一路數..... 數到太婆...

妹妹: 太婆响邊度?

我: 上左天堂

妹妹: 咁返屋企未?

我: 未呀, 我地下次去歌連臣角探佢, 好嗎?

妹妺: 好呀, 咁佢唔返黎?

我: 佢會响天堂等大家, 第二時婆婆姨婆佢地都會去, 我地好耐之後都會去架...

妹妹突然問: 你做咩呀??

我奇怪: 冇野呀!

妹妹: 你有時會喊嘛! D大人講嗰時有時會喊....

好得意, 妹妹己經發現到我地為左婆婆唔開心了....

撒灰大日子

11/30

今日係婆婆撒灰大日子...

今日之後, 婆婆所有身後事就會辦妥, 希望婆婆在天見到會滿意同欣慰...

CONNIE比D骨灰我0既時候, 我攬住, 個感覺好古怪, 最後一次攬住婆婆, 但婆婆已經變成一堆灰...

一個月後打呢篇BLOG, 眼淚仲係不停流, 心痛0既感覺會持續到幾時?

好彩有CONNIE幫我地打點一切, 我地真係冇經驗, ON居居咁...

石廠0既人安碑, 個碑好靚...


撒灰儀式開始, 由幾個舅父負責撒...

回歸自然, 撤灰响紀念花園都係一個好選擇, 婆婆應該會覺得好舒服...

一個月了...

11/22

今日係婆婆離開我地0既一個月, 我响公司OT, 8點幾先放工返屋企...

好掛住婆婆啊....

DISNEY城堡

11/12

今晚妹妹話想開DISNEY一個城堡, 我真的唔想開, 諸多藉口, 但今次見妹妺態度好強硬, 應該避唔到...

但冇理由咁順攤0既, 於是我問佢, 拆左盒玩具玩完之後放响邊, 妹妺話同其他玩具一齊放...

但其他玩具太多, 放唔到咁多野喎, 一係先掉一D玩具啦...

妹妹竟然好合作, 即刻動手執波波池, 好聽話...

好積極, 好少見佢咁積極, 哈哈...

但係, 執執下, 又唔知做乜訓左响入面玩喎, 點呀? 快D啦李小姐!!




最終妹妹決定掉呢D玩具, 主要係WINNIE THE POOH, 妹妺原來不知不覺地變心了, 唔再鍾意WINNIE THE POOH..... (為左呢張相, 我仲跌壞左部電話添...)




就係為左呢個城堡, 好野! 終於可以開0刺...

化身蝴蝶

11/6

呢排三舅父屋企每晚都會出現飛蛾, 細細隻的...

尋晚媽咪話我知, 尋日下晝响廁所發現一隻蝴蝶, 响近地下的一個角落...

媽咪見到之後, 就叫埋二姨去廁所望, 之後蝴蝶就飛走了...

媽咪話, 應該係婆婆怕媽咪驚, 所以見到佢地兩個之後, 就走左, 唔再逗留....

孝服

11/6

距離婆婆出殯只有一個星期, 今日要買埋孝服0刺...

原來唔駛去殯儀館附近買架, 我地响紅磡市政街市買左....

一套$98, 比朗屏平好多喎...

不過冇妹妹SIZE, 唯有求其買件白色衫同衭, 我諗都OK的...

D衫完事後就要掉, 所以我地全部都會著白飯魚...

和傻妹一起的星期六

11/5

今日同妹妺全日都要出街呀...

妹妺呢幾日又玩返一個由出世玩到大0既BB公仔, 今日出街都要放响背囊帶埋出去...

我地先去土瓜灣JOIN埋BB, 妹妹行左三分一就唔肯行, 抱住佢真係好攰呀...

終於見到BB同小穎0刺, 真好, 多兩個人分担下....

响附近食點心, 然後去買狗罐頭比小冬食, 聽BB講小冬由尋晚返到屋企到而家都唔肯食野, 又成日訓响度唔郁, 佢地仲一度懷疑小冬死左, 真有少少担心...

上到去, 小冬見到咁多人, 又成個精神哂喎, 好想同我地玩, 又肯食少少野, GOOD!!!!

雖然小冬仲係向右傾, 但有時行路都幾快, 我有信心佢慢慢會好返既...

我地會多D黎同你玩架刺, 等你開心D!!!

妹妹同BB, 小穎夾BAND, 又結他, 又搖鼓, 又沙鎚, 妹妹好開心, 我就好眼訓...

好晏0刺, 我地要起程去婆婆屋企0刺...

個袋好重, 搭的士去火車站...

的士行到一半時, BB來電, 話妹妹既背囊漏左冇拎, 哎呀, 乜咁唔小心呀, 算啦, 我地下次先攞返啦...

話比妹妹知, 同佢講細古古會幫佢保管住先, 妹妹話好...

雖然妹妹話好, 但開始捽眼, 想喊了...

問佢係咪想返去攞, 佢話係, 邊喊左出黎了...

好吧, 叫司機哥哥返轉頭, 今日撞到個好後生0既司機, 呢個哥哥問唔中就安慰下妹妹, 好好人...

好0刺, 細古古已經拎左落黎, 麻煩哂呀!!!

妹妹拎完之後, 以為佢會開心返啦, 但係完全冇囉....

一直都想喊想喊咁, 我於是問佢, 係咪驚會唔見左BB? 佢邊答係又邊喊左出黎, HAHA.... 拎返就唔駛喊啦....

我問佢如果攞唔到BB, 估下BB又會唔會驚驚, 妹妹話:"佢會有人理架0刺...", 但又繼續喊喎, 哈哈, 即係點??

响西鐵沿途訓左, 抱住妹妹由朗屏站行去婆婆家, 好攰好攰....

妹妹真係好似重左好多喎...

差唔多到, 但我真係頂唔住, 唯有叫醒佢:"到0刺, 彈波波0刺..."

妹妹醒左, 都肯行去書局彈波波, 鬆口氣呀...

上到沒有婆婆的婆婆家, 感覺好古怪, 坐响婆婆張床度, 見到佢0既枕頭, 其他野已經比佢地掉哂, 真的要咁快掉嗎??? 捨得嗎??? 真的唔明白.... 好彩我之前快手攞左兩樣紀念品....

雖然以前婆婆都唔係太多野講, 但冇左佢呢個主角, 真係好似冷清左, 呢個屋企, 到婆婆身後事攪掂, 舅父同阿姨走左之後, 大家都會好少返黎, 唔捨得呀...

每次離開時, 都會大叫返入去同婆婆講多次BYE BYE, 今次離開都差D衝口而出叫出黎...

10/22 係婆婆離開0既日子, 好想每個月22號都約埋屋企人一齊聚下, 呢段時間, 响親人聚會當中特別覺得溫暖...

不過每個月22號似乎難安排D, 希望每個月都可以做到啦, 約埋三舅父一家聚會下...

二姨整左越南薄餅, 好地道0既菜式, 好味道!!!

但係應該唔岩妹妹口味吧, 於是我地同妹妹落去買野食...

又唔肯行, 真係忍唔住問佢:"你對腳生黎做咩架???", 妹妹:"唔係行囉...", 嘩, 會唔會寸左少少先... 再問:"咁對腳用黎做咩??", 妹妹:"我都唔知用黎做咩..."

妹妹不斷提醒記住要拎走背囊, 大古古話幫佢孭住先, 咁就實記得, 然後講笑話一係大古古帶BB返屋企幫妹妹照顧佢, 妹妹即刻又喊, 好担心BB比大古古攞左...

同大古古一齊行去搭西鐵, 妹妹又要人抱, 大古古抱佢, 話不如帶埋妹妹返屋企, 妹妹即刻拒絶, 隔左一陣佢問我:"媽媽一陣會唔會攞返我架?", 哈哈, 信以為真添...

搭搭下西鐵, 又黎了, 突然攬左我, 唔出聲, 好唔開心咁, 又比我估到, 問佢係唔係怕大古古會帶佢返屋企, 又即刻喊住答:"係呀!!", 咩事呀你今日? 做乜突然咁担心架...

轉的士返屋企, 小姐的焦慮症又黎0刺, "媽媽記得帶埋我落車....", 你怕媽媽唔帶你返屋企嗎??? 又喊:"係呀!!!!", 好攪笑, 究竟今日做咩, 攪到我都有少少担心自己帶唔到佢返屋企, 嚇死人呀...

婆婆回魂夜

11／2

今晚（11／3凌晨）3：00-5：00係婆婆回魂嘅時間，媽咪同二姨會去三舅父家，我地怕婆婆返到黎見到冇人唔開心，所以計劃去婆婆家訓一晚...

媽咪一直都唔贊成，叫我地唔好去，最後徵詢殯儀公司，佢地話間屋冇房，冇遮冇掩唔係咁方便，婆婆係鬼魂，我地會嚇親佢，同埋牛頭馬面都一齊黎，我地响廳度訓唔係咁好，佢話婆婆想見我地，自然會搵到我地。但我搬左屋婆婆唔識路架喎！佢話牛頭馬面自然會帶到佢黎...

決定唔去之後個人好失落，婆婆係咪真係會黎到架？

一經過啲窗，我就向窗出面講，提醒婆婆今晚記住黎搵我，唔知佢聽唔聽到呢？

提媽咪將啲祭品放好啲，咁先可以睇到婆婆有冇返過黎...

去左睇小冬，返到屋企已經十二點，一點先上床訓，距離婆婆返黎只有兩個鐘咋！

今晚決定唔拉埋窗簾訓，希望婆婆容易搵到我啦！加油呀！記住要黎呀！

其實話就話訓，但點可能訓得好吖！一有聲個人就會醒一醒，迷迷糊糊咁諗下係咪婆婆返黎，但又唔敢大動作，怕嚇走佢...

今朝醒左，諗返尋晚，我諗婆婆未必有黎過，啲聲應該係我敏感啫..

定係婆婆响我不知不覺間黎左，睇完我同妹妹走左我都唔發現？

今朝返到公司就打比媽咪問佢咩情況，佢原來响天水圍飲緊茶，佢返到朗屏打比我，佢話婆婆真係有返黎，碗上面嘅飯有啲跌左去附近嘅齋菜碟度，同埋啲鴨旦亦有唔整齊嘅跡象...

尋晚去天水圍過夜，佢地仲話比媽咪知，呢幾日都有飛蛾响度出現，婆婆以前响天水圍住左十幾年，自然識路返去啦...

飛蛾日頭响屋外逗留，夜晚先入屋，仲會跟肥妹細妹入廁所沖涼，又會飛落細妹嘅手腳度...

咁媽咪尋晚有冇見到飛蛾呢？媽咪話婆婆尋晚回魂返左朗屏，所以冇响天水圍屋企出現，又係喎...

到今朝，三舅父又响門外見到飛蛾了...

返工了...

10/24
今日要返工了, 出門口前, 同婆婆講聲:”我返工0刺!”
我會努力加油架0刺!
返到公司, D同事好關心, 有心呀!
返工令心情好D, 雖然個心都係成日諗住, 但起碼唔駛一直諗落去, 越諗越唔開心…

DORIS送左兩隻公仔比我, 三姐妹坐埋一齊, 我諗起屋企的三姐妹...

左起: 媽咪, 大姨, 二姨...

放工時間到了, 正常呢個時間可能要趕去醫院探婆婆, 但係… 而家唔駛0刺…
枱頭D MEMO紙依然寫住”復康巴士”, 係之前提自己記住幫婆婆申請, 而家… 唔駛LU…
枱面仲有好多紙係紀錄同醫生電聯時寫低婆婆0既情況, 呢D我都會好好KEEP起…
返屋企睇下妹妹學畫畫學成點, 返左屋企對住妹妹都幾好, 唔會有時間比我唔開心…
妹妹幅畫好靚喎…

老師話妹妹而家識填顏色唔會填到好出界, 有少少進步, 呢點我見佢做功課都有同感…

 

老師又話妹妹會自己提出想畫咩, 好得意… 佢話妹妹上一堂一見到老師就即刻話佢想畫貓貓, 今次老師話畫HALLOWEEN, 妹妹話幅畫要有人, 所以原本南瓜下面0既糖變左畫一個人响度…

 

呢幅就係上一堂畫0既貓貓0刺... 我比較鍾意呢一幅...



然後我地整啫喱, 又食野, 好忙啊!!

 

靜落黎時, 己經11點幾, 寫下BLOG, 又要訓0刺…

婆婆的照片

10/23

婆婆離開後, 我地各自响手機度搵到婆婆一D相, 即刻用WHATSAPP交換, WHATSAPP真係好好用!!!

呢D相, 係婆婆响醫院同我傾電話時影的....

 

 

落公園散步, 婆婆好開心!!



阿佳SEND左呢張相出黎, wakakaka, 我地好細個, 婆婆同媽咪都好後生... 我好核突呀, 燶左咁0既?

為婆婆辦理身後事

10/23

尋晚3:30先訓, 今朝8點幾又醒左, 個心好痛好痛, 從來未試過, 原來親人離開係會有呢個感覺...

一路諗, 一路喊, 今日又實眼腫腫了…

究竟婆婆而家响邊呢? 好掛住佢呀…

佢係咪真係會去到天家架? 突然個腦泛現左一幕, 婆婆對眼未睇到野, 對腳未行到, 坐左响醫院, 又冇人理, 好無助呀~~

另一幕, 婆婆响條白濛濛0既路上, 唔識路, 周圍咩都冇, 點算呀? 點行好??

好驚.. 點算呀???

妹妺醒了, 我同佢講今日要去幫太婆做D野, 我話太婆去左好遠0既地方… 妹妺咩都唔識, 問我:”跟住喊呀?”, 因為我正在喊緊…

再傾左幾句, 佢叫左爸爸入黎, 然後話要玩玩具, 佢叫爸爸:”你叫媽媽唔好喊啦..”, 然後拎起個玩具, 同我講:”你喊你冇得玩0刺!!”, 然後出左去… 哈, 老師响學校係咪咁樣?

約左1點去寶福紀念館辦婆婆喪禮, 尋日聯絡時, 佢地問用咩儀式, 我真係唔識答, 婆婆決左志, 但屋企人拜神, 於是佢地建議拜神.. 不過我都知, 基督教儀式係冇可能, 如果提出只會攪大件事, 比舅父阿姨鬧…

基本上, 只要過兩日將張臨時死亡証交比佢地, 佢地就會幫我地跟進埋其他文件, 今日連壽衣, 棺木都己經揀好哂, 基本上都冇太多野要準備了...

我地揀左個80人禮堂, 因為呢個禮堂新好多, 靚好多…

定左11/13守夜, 11/14上山... 然後照婆婆遺願將骨灰放响紀念花園, 我地星期六就周圍去視察環境...

而家大家努力著手搵搵婆婆生前靚相先…

幫婆婆攪掂左件事, 佢見到應該放心D了, 婆婆交比我地0既事, 我地每次都盡力做好架! 放心!!

返到屋企, 訓左45分鐘, 實在太攰0刺…

聽日要收拾心情返工了, 要加油, 振作呀!!!

婆婆離開了

10/22

今朝8:30醒左, 訓唔返...

11:00打過比媽咪, 媽咪話岩岩到左醫院, 但未見到婆婆...

12:30同BB一齊去食野然後再去...

途中, 媽咪打黎, 佢話今日婆婆血壓去到120, 好左好多, 但問醫生, 佢話係假象黎, 唔好信, 要睇面色...

舅母0既朋友上黎睇婆婆, 叫媽咪呢兩日要睇住婆婆...

對面床0既婆婆12點幾過左身, 我記得, 尋晚我地仲响度睇佢部機D數字, 點知今日就走左...

搭西鐵去到元朗站, 剛行出車, 媽咪電話黎, 我個心諗係婆婆有事定係媽咪叫我地買野呢?

媽咪好急咁叫我地快D去, 婆婆唔得了!!!

我即刻大力推BB快行, 然後大家衝去搭的士...

途中打比阿佳, 但阿佳冇聽, 即刻打比ZOE, 好彩佢有聽電話...

肥妹己經到左...

我地好快去到病房, 婆婆己經冇哂反應, 塊面好黃, 臉都凍了, 只擘大口呼吸...

媽咪佢地話要將婆婆伸直, 唔可以將佢隻手拎出被外, 於是我地伸隻手入去拖住婆婆, 婆婆隻手都凍了...

不停同婆婆講野, 希望佢等埋二姨, 幾個鐘頭後就到0刺!!

婆婆心跳同血氧己經跌左好多, 好驚....

媽咪打比大舅父, 响電話同婆婆講野...

我都打比奶奶, 叫妹妹唱歌比太婆聽...

小穎不斷祈禱, 我不斷叫婆婆, 同佢講野, 叫佢等埋, 要精神呀, 唔好訓呀...

大姨同媽咪成日提我地, 唔好比自己0既眼淚滴到婆婆, 亦唔好太大聲叫婆婆, 怕佢走得唔安落...

婆婆呼吸越黎越慢, 有時會停左唔呼吸, 唔得呀, 婆婆你抖氣呀, 呼吸呀...

知道婆婆一定等唔到二姨了... 點解會咁???

三舅父都未到呀, 婆婆你等埋三舅父先走呀...

一路摸住婆婆, 婆婆心跳好強勁...

媽咪一睇部機, 心跳去到211....

媽咪話今日對面婆婆心跳去到二百幾, 然後好快就跌到0, 婆婆又係咁, 唔得0刺...

三舅父終於趕到, 佢冇跑入黎, 我地好忟, BB大聲喝佢先跑入黎...

婆婆停左呼吸0刺, 婆婆放鬆D, 唔駛怕, 要勇敢呀!! 唔駛担心呀... BYE BYE 0刺, 我地第二時再見呀, 你記住我地個樣呀, 前面0既路好易行, 你會睇到野, 會行到路, 响天國可以跳舞添呀, 第二時我地再見面, 十幾人圍住一齊跳舞!!! 

部機唔再顯示到數字...

其間有一下, 婆婆個身體好似洩左一下氣咁, 但我不太肯定, 因為動作不太大, 但呢一下以後, 婆婆冇再呼吸過...

有時部機會突然有返D數字, 傻豬, 你唔捨得走嗎? 唔怕啊, 你唔响度, 我地大家會互相照顧, 會成日見面, 會買你最喜歡0既野食, 就當同緊你一齊食... 燒肉, 面線, 雞亦尖, 鼓油豬肉, 家鄉雞... 第時我地再見面, 你要煮豉油豬肉呀, 我要兩隻蛋架...

慢慢, 我地都肯定婆婆走左0刺, 不過我地一直陪住婆婆, 一直摸住, 好唔捨得啊...

姑娘黎用另一部機CHECK婆婆, 話婆婆應該己經冇心跳, 但因為個身仲暖, 所以搵醫生黎睇下...

醫生(不過唔係葉醫生)好耐之後先黎, CHECK完之後, 只講左句OK就算, "OK"即係代表咩?????

聯絡左B仔, 約左佢同事聽日傾殯儀0既事...

再陪多婆婆一陣, 婆婆直至離開時, 個樣都係好好睇0既, 我婆婆係最靚0既婆婆...

個背脊仲暖, 同埋好濕, 佢流左好多汗, 所以D水腫都冇哂...

隻手都己經好重0刺, 人離開左, 個身體真係會好重的...

執埋婆婆D野, 有D我地要拎黎留念的...

摸左婆婆咁耐, 我隻左手留有婆婆0既氣味!! 如果可以比我留低埋呢個氣味就好了...

姑娘話要同婆婆換件紫袍, 然後入箱, 問我地要唔要送婆婆去殮房, 當然送!!!!

原來呢一刻係最唔捨得, 媽咪叫我同婆婆講一路好走, 我到最後一刻先喊住講, 唔講再冇機會同婆婆講野0刺...

忍唔住大哭起黎, 對唔住, 我真冇用, 成日都做大喊包...

阿佳提議上返七樓病房多謝D姑娘, 因為D姑娘真係好好... 經過見到婆婆訓0既6號床, 己經空左, 個感覺唔知點形容...

返朗屏婆婆屋企, 入到去, 坐响婆婆張床, 睇下婆婆平時用0既物品, 諗返以前婆婆响屋企0既日子...

我攞左婆婆每日用0既保溫杯同差唔多用哂0既雙飛人, 婆婆每次搽雙飛人都會覺得舒服好多... 以後見到呢D野, 就好似到婆婆一樣...

大家傾下聽日有咩特別問題, 然後去JOIN埋二姨DINNER....

夜欄人靜一個人時, 個心好痛, 原來婆婆對我地真的好重要, 冇左婆婆個心好似冇左一忽咁, 好辛苦, 唔知而家婆婆响邊呢? 做緊咩呢? 識路去天家嗎?