肺癆????

7/27

今日5點零如常打電話比媽咪問佢婆婆0既情況, 媽咪話佢未到醫院, 但三舅父去到就搵唔到婆婆, 姑娘話佢响隔離病房, 因為有肺癆, 唔探得!!!

媽咪後尾响病房外同婆婆通過電話, 佢話婆婆條氣好喘, 又食咩嘔咩, 唉, 好担心~~

原來係5月份拎痰去化驗而家先有結果, 下? 要兩個幾月先知佢係肺癆.....

夜晚約左AGNES個同事攞燈, 等左好耐都未黎, 突然接到媽咪個電話, 佢响度喊, 佢話婆婆打比佢, 話就黎死, 叫佢去見佢最後一面, 我聽見個心卜卜跳....

打去問左姑娘咩情況先, 有個男護士答我, 其實婆婆情況OK, 所有野正常, 不過可能情緒問題....

護士好好人, 過左探病時間都比我地去探婆婆, 我攞完盞燈就即刻趕去元朗, 去到已經十點...

我同講電話0既男護士唔响度, 另一個姑娘唔比我地入去, 講真, 如果要傳染, 我地一早就傳染左啦, 唔駛等而家啦, 姑娘話其實佢都係, 後尾佢都比我地入, 好好...

我地戴左口罩, 姑娘話其實呢D普通口罩都隔唔到婆婆0既病菌, 隻菌好勁, 就算距離三呎以外都冇用...

見到婆婆喊, 我地都忍唔住, 只有安慰佢, 盡量解釋比佢知點解要被隔離...

其實, 我最怕係婆婆心情影响會令佢病情惡化...

見到婆婆有D梳打餅, 突然靈機一觸, 人地大肚婆嘔都係食梳化餅, 婆婆可以試下喎!

真好, 婆婆食哂一包都冇事呀!!!!

探左半個鐘, 係時候要走, 婆婆心情都好D了, 希望佢會OK啦, 見到佢真係好心痛...

聽姑娘講, 肺癆起碼要食半年藥, 副作用好多, 會令到佢瘦, 好担心....