放假一天等柜黎...

8／16

尋晚妹妹咳到嘔，唉，嫲嫲張新床褥呀..

過返黎訓又冇嘔喎，但就成晚咳，我都不停醒..

好彩今日攞左假,因為阿蟹D柜今日黎砌, 要有人响度睇住...

嫲嫲同妹妹去睇醫生, 預計應該趕到返黎搭校車0既..

點知, 12：00先睇完，12：30先返黎，趕唔到搭校車，唯有搭的士返學啦.... 妹妹話要去我地同姑姨婆一齊去嗰度，其實咪又係stafford!  不過呢個係佢對STAFFORD一個好印象, 有次佢同我同姑姨婆一齊去係好開心0既...

今日我比左美人魚同魚魚玩具比妹妹帶返學校, 有個伴MA!!! 妹妹沿路問我可唔可以入埋去，我又唔想打沉佢, 唯有話唔知可唔可以入喎，要問問老師先...

原來間間學校都開左學係咁塞車架, 我地遲左5分鐘, 又多燈位，又多校車，心急死人0刺!!!

入到學校見到miss ng, 妹妹即刻幫我問MISS NG媽媽可唔可以入去，不過MISS NG聽唔到, 冇答佢....

MISS NG提我, 係時候要走0刺, 妹妹開始喊，係咁叫媽媽, 媽媽.. 唉, 好心痛, 但都冇辦法啦...

返到屋企, D柜已經裝緊0刺... 呢隻色順眼好多....

 

 

4:30落去接妹妹，校車未到, MISS FUNG電話黎, 佢話妹妹今日好攰, 扒响度訓著左, 係呀, 因為佢食左藥呀...

同MISS FUNG講妹妹依然唔開心, MISS FUNG話隔離位講普通話0既小朋友仲喊緊, 而另一邊隔離位就好静, 唔出聲 (哎呀!!) 不過原來一年會調幾次位, 咁都好D...

MISS FUNG建議我每個星期抽一日接妹妹放學, 等佢開心D...

妹妹落車0刺, 冇喊喎, 不過成面都係鼻血!!!!! 姨姨話佢係岩岩攪個鼻所以流血喎, 仲話係特登唔幫佢抺留返比我睇 (.....)

上到去同蟹哥哥玩左一陣...

柜裝好, 大家準備落去食飯...

點知, 妹妹突然捱唔住, 七點鐘突然要訓...

我地唯有自己去食飯啦, 好彩近近地去兩合，一坐低嫲嫲就打黎話妹妹嘔，叫我上去搵衫...

唉, 又係嘔落嫲嫲張床度, 尋晚嘔完反轉左張床褥, 今晚又嘔埋另一邊.....
今晚一個重要任務, 就係要清潔新柜，執野到2：00都只執左三分一咋...

今晚戴芷蕎媽咪MSG我, 傾下傾下大家交換左電話, 可以下次一齊出黎玩喎!!!

P.S. 自從上星期姑姐帶左佢去旺角睇藍精靈之後, 我地每次講旺角呢兩個字, 妹妹都會問係咪睇藍精靈… 今日妹妹問我嫲嫲去左邊, 我話旺角, 妹妹即刻碌大對眼望住我, 我知佢諗咩, “嫲嫲自己去睇藍精靈?????”, 我即刻澄清嫲嫲去旺角攞D野, 唔係睇藍精靈, 佢先冇野咋…