星期六

9/24

 

今日妹妹0既婆婆, 細古古同小穎姐姐來訪, 媽媽去左買壽司同腸粉返黎食…

 

妹妹一見到D鰻魚壽司就搶住食, 哎呀, 但呢間壽司舖媽媽未食過, 都唔係太放心比佢食呀, 但佢一見到己經自己夾, 仲要食左兩舊, 買左5舊, 佢想霸住唔比人夾呀, 自私鬼呀!!!

 

佢地走哂之後, 我地去黃埔哂相 (用黎做功課, 媽媽呢個懶鬼開始覺得煩, 好似好多野做咁呀, 每個星期唔係有特別功課 E.G.中秋節功課, 要貼相, 然後寫低同小朋友0既對話, 一係D功課就要做實驗, 例如用幾個杯倒唔同份量0既水然後敲擊, 比小朋友知道咁樣會有唔同0既高低音…), 然後買禮物比ALVIN哥哥, 媽媽响反斗城睇左好耐, 然後再去TRENDY LAND睇, 最終都係返反斗城買左份益智玩具同反斗車王UNO, 哈, 唔知ALVIN哥哥鍾唔鍾意玩呢??

 

妹妺買完份禮物, 成日都想拆, 同佢解釋係送比ALVIN哥哥, 佢又話不如叫ALVIN哥哥拆黎一齊玩, 哈哈, 點講你先明呀???

 

食完飯, 帶左妹妹去屋企附近0既和黃公園, 個公園好大, 我地行左好耐都未搵到SIR SIR, 妹妹可能有D驚, 不停話:”好似冇SIR SIR架"

九唔搭八

9/21

婆婆呢排好古怪,好多野我地都聽唔明…

今日去探佢, 佢坐响度個身會不時抽搐, 問佢係咪凍, 佢話唔係, 係因為張床太薄….. (?????)

上星期日去探佢, 佢問我幾多點, 我話12點幾, 佢好驚訝:”咁夜0刺, 快D返屋企啦!!!” (日夜不分了)

今日佢問幾多點, 我地話8點3, 佢又話:”哦, 3點幾呀…” (….)

無端端又除左個夾手指, 兩隻手拎黎拎去, 又唔夾返, 佢一定唔係故意0既, 因為佢係一個好乖0既婆婆…

泰壹泰

9/20

原來老公之前己經自己去食過…

我覺得好扺, 好好味呀…

海南雞飯 - D雞好滑, 但D飯唔夠香(睇D色都感覺到吧!)

阿華田豬脾飯 – 我又唔覺有阿華田味喎… 不過因為好多皮, 一路食一路補充骨膠原, 又好味又有益(對皮膚ONLY..)

 

夾埋汽水都係$77埋單, 抵!!

完成了兩張貼紙咭

9/19

尋日係阿JOE生日, 我地今晚同佢去稻香慶祝生日...

我先去PHYSICAL做團購買0既LASER, 比佢地屈左買3支透明質酸, 不過又真係幾好用喎, 一支做LASER時用, 另外兩支就拎返屋企用, 只用到兩日咋, 愛上左透明質酸呀!!!

返到屋企8點, 妹妹訓左喎, 嫲嫲話佢食完飯, 响嫲嫲洗緊碗0既時候自己入房訓左, 嘩, 呢個舉動真係未試過! 勁呀!!

嫲嫲先落去攞位, 妹妹响呢個時候就醒左0刺, 佢話要貼埋D貼紙然後開玩具, 係, 我真的應承過貼滿貼紙就可以拆一份禮物...

妹妹揀左JOHN叔叔送0既TINKERBELL捉棋... 唔肯落去HOTPOT, 最後都係玩下玩下咁先氹到佢落去...

貼紙奬勵己經完成左兩張, 要妹妹做0既野都有好大進步, 睇黎呢個方法幾有效喎...

  

不過, 大頭蝦0既妹妹成日都唔記得叫我貼貼紙, 傻瓜!!

今晚妹妹想我陪佢訓, 但因為我要沖涼, 佢又拒絕左爸爸好意, 最後自己訓左, 好叻呀! 今日做咩咁乖0既???

煮飯仔 - 照燒雞扒, 煎廣島蠔, 魚香茄子

9/18

嫲嫲湊左妹妹去馬灣玩, 我同爸爸難得有一日可以休息下!!

冇人打擾之下煮左個飯…

照燒雞扒, 見個汁煮極都未杰, 我又心急, 加多左兩次糖, 哈哈, 結果好甜, 我諗妹妹實好鍾意食…

煎廣島蠔, 我都係心急架0刺, 都未得就不停試下反隻蠔, 最終爛鬼哂,試下搽D蜜糖又更加痴哂鑊… 呢隻算係最靚0既一隻, 不過老公竟然話幾好味喎, 佢係咪氹我咋??

魚香茄子, 買唔到淘大魚香茄子醬, 李錦記唔好味0既… L

食完飯媽咪上左黎坐, 十點幾都未等到妹妹返, 可惜…

好轉好轉!!!!

9/18

今日照舊中午時間去探婆婆, 因為打左去水針同用左呼吸機, 婆婆好返好多, 精神好多了, YEAH!!!

原來一入院時醫生有幫婆婆打去水針, 但因為去水針對個腎唔好, 所以之後冇再打, 而婆婆就變得好辛苦...

婆婆一見到我, 就叫我同佢走, 又話要除左個手套, 後尾姑娘有除哂呢D野比婆婆食個LUNCH先…

婆婆好叻呀, 食哂成碗粥, 真係覺得好安慰…

婆婆夜晚的情況

9/16

傍晚阿佳打黎, 話醫生睇完婆婆之後, 將氧氣機轉做口罩式等婆婆吸多D氧氣, 但原來婆婆吸得唔好, 血氧係咁降, 所以即刻轉大機, 唉, 即係好似上次危急時用0個D...

後尾姑娘打黎, 佢話婆婆覺得D氣衝埋黎好唔舒服, 抆爛左個MASK幾次, 佢地冇辦法, 唯有幫佢對手綁住, 唉, 好慘, 婆婆一定喊, 好可憐...

手印

9/17

應承左妹妹玩手印, 一次半次, 我地冇去特登買FINGER PAINT, 只用廣告彩玩....

呢隻就係妹妹隻手0刺, 妹妹好開心呀!!!

婆婆真的好唔舒服

9/17

決定中午12點嗰轉去睇下婆婆, 好怕佢唔舒服又冇人理, 點都好, 喘氣時有個人掃掃背點都會舒服D...

醫生打黎, 話婆婆有好轉, 冇咁喘, 個肺都清左D, 但...尋晚見到佢比入院時仲辛苦得多喎...

妹妹好唔開心, 連同姨婆們飲茶都唔肯去, 要同我响屋企, 講左好耐, 最終妹妹接受左, 因為我應承返黎同佢玩手印, HEHE...

真好彩有去到, 見到婆婆, 婆婆坐响度喘氣, 冇蓋被, 手腳冰冷, 冷親就弊0刺...

有飯黎, 婆婆唔舒服食唔到, 好彩氹下氹下佢都食到大半碗, 唉, 唔食又點有力量對抗病魔呢???

好唔想走, 佢真係太唔舒服0刺... 尋晚同今日都有同姑娘講婆婆好唔舒服, 姑娘好好, 會即刻幫婆婆量血壓同血氧, 但兩次都話情況OK... 點解仲咁喘架呢???

好奸呀!!

9/16

而家實施緊貼紙獎勵計劃, 我覺得都幾WORK, 妹妹真係幾在意d目標0既…

 

而家0既目標係:

 

1)      夜晚响媽媽房訓, 唔扭計

2)      做個有禮貌0既好孩子

 

前兩日, 妹妹想開你D生日禮物玩具, 我同佢講, 如果儲齊哂咭上面0既貼紙就可以拆一份, 聰明的妹妹, 即刻諗到可以GET到多D貼紙0既方法, 佢問, 如果一陣去太婆屋企唔扭計, 係咪可以多一個貼紙? 呢個根本唔响目標裡面, 不過既然都係好0既表現, 我都應承左佢…

 

直至尋晚, 只欠4個貼紙咋, 仲有兩日就可以拆禮物了!

 

但妹妺真係好想拆玩具 (還好, 佢唔敢自己私自拆), 佢問嫲嫲可唔可以拆, 嫲嫲話要問媽媽喎, 妹妹竟然話媽媽話可以拆, 好彩打到黎, 同佢解釋要乖乖儲齊貼紙先有得拆佢都接受...

十萬個弊呀!!!!!

9/16

搭搭下車, 媽咪竟然發現到......

我有...... 條..... 白頭髮呀~~~~~~~~~

唉, 真係唔認老都唔得呀......

天鴻燒鵝飯店

9/16

探完婆婆, 媽咪, BB, 小穎同我一齊去左元朗天鴻燒鵝飯店食飯, 呢間好多好評架, 好想試好耐0刺...

係一間好UP DUP 0既飯店...

入面FULL哂, 我地坐門口一張圓枱...

叫左半隻鵝, 熱辣辣真係好好味呀...

同埋一碟醉雞....

再加一碟菜, 大家都食到好飽....

探左婆婆

9/16

探左婆婆了, 佢好唔舒服呀, 不停喘, 攰到連眼都唔擘大, 頭腦都唔清醒...

我去到醫院行緊去床位時, 媽咪佢地話比婆婆知我到左, 婆婆依然合埋眼, 但就張開兩隻手想攬我咁, 佢好唔舒服, 見到真心痛...

唔知點解, 佢一直講住個橙, 成日問個橙食左未, 拎左未, 其實第一個到0既媽咪都未見過個橙, 應該係醫院0既姨姨想比佢食, 但佢想留返比舅母, 但講左好多次, 媽咪話佢講左成十次都有...

我地留到八點幾, 見到佢咁樣, 真係唔放心走...

呢張係院牧送比婆婆0既咭, 真多謝院牧成日去探佢, 同佢傾偈...

古怪古怪

9/16

探左婆婆了, 佢好唔舒服呀, 不停喘, 攰到連眼都唔擘大, 頭腦都唔清醒...

我去到醫院行緊去床位時, 媽咪佢地話比婆婆知我到左, 婆婆依然合埋眼, 但就張開兩隻手想攬我咁, 佢好唔舒服, 見到真心痛...

唔知點解, 佢一直講住個橙, 成日問個橙食左未, 拎左未, 其實第一個到0既媽咪都未見過個橙, 應該係醫院0既姨姨想比佢食, 但佢想留返比舅母, 但講左好多次, 媽咪話佢講左成十次都有...

我地留到八點幾, 見到佢咁樣, 真係唔放心走...

呢張係院牧送比婆婆0既咭, 真多謝院牧成日去探佢, 同佢傾偈...

妹妹生日

9/14

 

今日係妹妹正日生日, 嫲嫲同爸爸買左三個旦糕仔比佢, 等埋我同婆婆返黎一齊切旦糕, HEHE! 旦糕係妹妹揀0既, 真開心!!

 

P.S. 己經第二次0刺, 响部NOTEBOOK入面搵到異物, 上次搵到個兩毫子, 今次又發現被人塞左隻髮夾入去, 妹妹, 你真作惡多端呀!!!

全身積水

9/14

 

今朝打比媽咪, 佢話婆婆自己決定放棄睇眼, 而家直接入院,  因為實在太辛苦…

 

醫生話佢全身都積水, 唉, 又嚴重左一步了, 好驚…

全日個心都好實, 好驚, 好唔放心, 點都要過去睇睇先得...

今日有媽咪, 肥妹同我探婆婆, 有個小器鬼居然因為我去而唔去探婆婆, 唉...

經過醫生0既治療, 婆婆手腳都冇咁腫0刺, 好開心! 見到婆婆個樣都冇尋日咁辛苦了, 咁都安樂D...

原來婆婆幾個鐘都冇小便, 媽咪然後先諗起婆婆尋晚都冇, 可能因為咁樣又差D, 以後又知多樣0刺... 醫院幫婆婆插尿喉,
放左D尿應該會舒服D...

媽咪今日同我講婆婆响屋企唔肯食面包, 成日要食粥, 今日見到婆婆再同佢講多次, 以後响屋企都好似响醫院咁食三餐爛飯, 其他時間肚餓就食面包, 希望佢肯聽話啦!!

臨走時, 其實好想同婆婆祈禱架, 但又怕唔知點同媽咪肥妹講叫佢地行先, 最後冇做到, 唉, 好似有D內疚咁... 唔知婆婆會唔會都等緊我同佢祈禱呢???

婆婆腳腫

9/13

 

今日我地去探婆婆, 佢對腳好腫呀, 又腫又痛…

 

其實早兩日都己經係咁, 媽咪提議入醫院, 但婆婆拒絕, 佢好想9/14去眼科覆診, 因為隻眼做完手術, 而家都一樣咁濛…

 

BB同小穎好努力咁幫婆婆按摩, 希望會好D…

 

婆婆好想試下自己企, 但對腳完全冇力…

 

唉, 真担心, 婆婆又喘多左, 我去左4個鐘, 只有1.5個鐘係冇喘咋…

中秋節 - 玩燈籠

9/12

今日係妹妹農曆生日呀...

妹妹要著中國特色衣服返學, 上星期同佢响寶齡街買左呢件旗袍, 哈哈, 我覺得都幾靚呀... 返到屋企一於影返D相先...

然後廣發祝賀短片比有WHATSAPP的親友!!!

今晚小穎姐姐攞左佢隻珍藏”灰兔”黎, 加埋細姨姨送0既POOH POOH燈籠, 我地一齊向高山公園進發…

路經紅磡廣場, 有少少佈置, 入去影左相, 妹妺問隻灰兔係咪要返返去入面, 好好笑…

 

原來今年高山公園冇FUNCTION, 我地唯有去球場玩…
 

入到去, 妹妹見到有D姐姐响度玩, 佢話要同佢地一齊玩…

 

其實我覺得好尷尬, 但好彩姐姐好好人, 仲比左D螢光棒妹妹玩, 妹妹好開心呀!!

 

回程, 妹妹堅持要攞埋灰兔返屋企, 真不好意思, 攞左小穎姐姐0既珍藏…

中秋節 – 接放學

9/12

 

今日係中秋節, 亦係妹妹舊曆生日, 我公司放半晝, 逢節日就覺得公司好好!!

 

返左屋企HEA左一陣, 決定去接妹妹放學, 氹下佢開心!!

 

不過呢個行動並冇得到爸爸0既支持, 佢話: “佢咁曳你仲氹佢開心???”

 

3:45出門口, 先去銀行, 然後搭2號VAN仔去九龍塘…

 

OH… 平時都好多位, 今日做乜會FULL哂???

 

等到4:20先上到車, 正常15分鐘都可以落車的, 岩岩好…

 

點知, 4:45仲响VAN仔上, 好徬徨, 點算好? 阿女4:45放學架…

 

仲要行起碼10分鐘先到學校喎!!

 

阿女從未試過冇得搭校車, 又冇人接, 佢會唔會驚驚呢?

 

終於4:50落車, 經又一城行出去, 見到有的士, 諗都冇諗就跳左上去…

 

我同司機講, 施他佛道, 其實好近架, 不過我好趕時間…

 

去到附近, 超塞車, 想點呀???? 今日真係勁多人親自接小朋友放學, D車塞住哂…

 

決定落車行過去 (其實係半跑的…)

 

未行到課室, MS FUNG己經認得我 (其實我地從來未當面傾過偈, 唔通我地兩母女真係似樣?? HEHE), MISS FUNG大叫KAYLE! 媽咪黎接你0刺!!

 

KAYLIE好叻, 冇喊, 不過MS FUNG話KAYLIE要求打電話比我, 哈哈…

 

我地一路行去又一城, 妹妹今日好乖呀, 一直行到地鐵站, 我應承佢買HAAGEN DAZ比佢食…

 

返屋企時, 嘩! 小巴站勁長龍呀, 好誇張… 我地唯有唱歌打發下時間…

 

妹妺响小巴上訓著左, 落車抱佢返屋企個人都己經虛脫左0刺…

 

原本諗住買餸煮飯0既計劃要取消…