今日媽媽好勞碌, 由早到晚都好忙, 冇停過, 又抱左妹妹好耐, 對手而家好似唔係自己0既咁.....
今日帶左妹妹返PLAYGROUP, 己經幾個星期冇返(SIDE哂D錢!!!), 開頭因為手足口病所以唔返, 有時又因為我病所以冇返, 如果唔係李姑娘前幾日打黎叫我交下期學費, 我諗我都冇乜動力返, 因為每次返學都好攰, 行0既路太多, 又熱, 所以成日搭左的士, 變相個PLAYGROUP又貴左好多0刺....
今期原來有一半0既同學仔都係唔識0既, 預計妹妹會好似初初返0既時候咁, 成日走黎走去, 點知, 一入到去妹妹坐得好定, 唔駛媽媽捉住都可以好專心坐响度聽張姑娘講野, 張姑娘都有讚妹妹呀!(你好叻叻呀!!!) 不過後來妹妹發現左個SIR SIR, 就成日行去搵SIR SIR0刺, 鬼咩, 頭先行過見到SIR SIR又冇得玩, 而家見到梗係流哂口水啦!!!
返左呢一堂, 令我又好有決心要返落去, 因為妹妹响呢度學指令, 學規矩, 對佢好有幫助, 咁返多兩堂我地就會放暑假, 直至8/21先再開始返, 人地NURSERY都係8月開學, 我地未有得返唯有返下PLAYGROUP啦, 好過冇....
今日返學一入到課室, 有位小朋友响度喊, 佢叫做蔡倩汶, 短短50分鐘內(我地遲左到, 所以得50分鐘囉)佢己經喊左無數次, 張姑娘冇就佢架, 唔知點解每次佢玩遊戲行到個SIR SIR0個度就會大喊起黎, 張姑娘唔比佢玩住架, 要佢坐响度等佢自己喊完先, 張姑娘仲叫佢嫲嫲要狠心D, 我都覺得係呀, 某程度上佢一定係比人縱壞左啦, 呢個方法可以用下....
放學又經過SIR SIR, 妹妹好想玩, 媽媽因為返學前經過時應承左妹妹, 唔可以食言, 所以比妹妹玩左5分鐘, 妹妹好乖, 聽到媽媽話去契契度玩玩具, 就同SIR SIR BYE BYE.....
每次妹妹一放學就會好快訓著覺, 可能上堂好消耗體力(媽媽都覺得呀!!), 今次都唔例外, 好辛苦地行到680巴士站之後妹妹就訓著左(其實全程都差唔多係媽媽抱
妹妹响差唔多落車時醒左, 一醒即刻指住窗出面話"玩E個!!!", 但我唔見到有野玩喎, 妹妹你係咪發夢呀????
去到契契屋企妹妹仍然好ON居, 好耐之後先清醒返, 今日有好多小朋友呀
有ALVIN - 佢今日做咩成日喊呢? 真係喊左好多次喎.....
有程程 - 佢真係好似一個0靚模呀, 好可愛, 好彩, 妹妹差D同佢撞衫呀!! 又好似黃色靚D喎, 有少少後悔添.... HEHE.....
有多多 - 佢細過妹妹兩個月, 識講好多野, 好叻女, 又好乖, 有個做老師0既媽媽真係唔同D!!!
有EDDIE0既姪仔 - 佢講左一句"唔明點解佢細個就一定要讓佢", 我有少少驚訝, 佢只得5歲就識講呢D野, 而家D小朋友真的好厲害....
妹妹其實唔係好識同佢地玩, 但佢成日都想參與, 又好興奮, 都幾好笑!!!
妹妹今日冇乜點扭計, 今朝想打我但見我個兇樣即刻轉為摸我, 佢真係有聽我教唔可以打人, 摸下就得!! 妹妹其實你都幾乖吖!!
尋日爸爸要返工, 妹妹同媽媽, 嫲嫲, 太太, 姑姨婆先响黃大仙茶, 再上太太屋企得一得, 然後去葵芳等爸爸放工….
妹妹响荔景站訓左, 媽媽同佢响新都會starbucks等爸爸, 妹妹好好訓, 媽媽就响度煲youtube d化粧video…..
妹妹醒左之後响公園玩左一陣, 但可能岩岩訓醒, 冇乜心機玩, 到7點比人趕走…..
落樓下噴水池玩一陣, 妹妹見到有姐姐玩緊bubbles, 好開心, 生猛哂0刺!!! 玩到人地姐姐d bubbles都冇哂, 好啦, 同姐姐講拜拜, 我地去換片&食飯先….
我地今餐食delifrance, 妹妹都食左好多野, 佢坐响度玩將其他碟0既野筆落自己個碗度, 成餐飯我地都食得好舒服, 正呀!! 食完飯, 我地先去toilet洗手, 而家妹妹夠高用小朋友0既水喉自己洗手0刺, 人細鬼大0既妹妺梗係好開心啦, 可以學大人喎! 哈哈! 妹妹一開始就將隻手掌放到最高, 向上禁住個水龍頭, 咁d水咪噴到周圍係囉.... 媽媽教妹妹應該點洗, 仲捉住佢對手教佢洗, 點知佢唔聽教, 特登都要再玩, 好啦! 今次扺死0刺, 噴到一面都濕哂, 妹妹成個人都呆左, 笑死媽媽呀!!!! 連附近有個女人都忍唔住笑左出聲, 哈哈!!!
妹妹瘀事一籮籮, 但都有叻0既一面0既, 話說媽媽响妹妹出世時買左一套little einstein0既dvd比妹妹睇, 妹妹一直都麻麻地鍾意, 直至呢排先成日拎黎睇... 套碟有二十幾隻, 隻隻都一樣, 碟上面冇圖畫, 得d字唔同, 但妹妹呢兩日識得摷返同一隻world animal出黎, 仲同我講睇"AN毛", 嘩, 媽媽覺得你好勁呀!!!!
尋日放工去左Reenex做左第一次CPS療程，我太多野做趕唔切走，遲到左20分鐘，真不好意思····
影左相先做treatment，但佢唔俾張相我睇返，話響相機睇得唔清楚，同埋都未做treatment，睇都冇用，佢地會唔會做手腳架？
做treatment連敷mask大約45分鐘，噴中和液時我仍然好似浸親咁，好緊張，好惹笑···
做完基本上唔駛再做facial，只要搽野搽得岩, 勤D敷MASK就OK, 可以去做FACIAL, 但唔好針清, 因為CPS己經可以溶解D黑頭粉刺, 針清仲更加令毛孔擴大, 污糟野好快又積聚返....
美容師話我D皮膚偏乾, 唔夠油, 要搽D比較滋潤0既SKIN CARE, 佢話搵次我可以睇下佢地D PRODUCT, 嘩, 肯定好貴啦, 我一定盡量避!!
做FACIAL時除鞋, 先發現對鞋個底爛左, 仲要好嚴重0個隻, 好驚呀! 會唔會行行下斷左架? 好彩隔離有i.t.(我第一次素顏行i.t., 幾驚撞到熟人..), 我買左兩對鞋, 不過好後悔呀, 我覺得我買錯左呀, 應該買三對先岩, 第三對有7折呀!!!!
今日不停落雨, 我地冇去街, 決定响屋企休息下....
下晝妹妹响嫲嫲房訓晏覺, 我同爸爸响房訓, 後來嫲嫲要出街, 將妹妹抱左過黎訓, 咁好啦, 我起身比你地兩父女溫馨下啦!!
當妹妹起身時, 發現隔離0個個唔係嫲嫲, 即時喊, 仲發脾氣添... 我話比佢知嫲嫲去左街, 佢即刻走去門口大嗌, 好激動, 好嬲, 好唔開心, 我地掂下都唔得, 都唔知攪乜....
無論我地攞力力, 攞糖糖出黎, 妹妹都唔理, 淨係訓响地下喊.... 我地試下開BARNEY睇, 佢想睇, 但佢又要喊, 裝下喊下咁, 好似唔太work咋喎.... 最後原來係play along 2呢隻碟攪掂左佢, 我地三個好低b地一齊唱"I'm running, look at me, I'm running....."一面周屋跑, 終於妹妹好開心, 再唔記得喊0刺....
夜晚妹妹趁我地冇留意佢, 將一個柜入面0既野倒哂落地下, 再將入面包抺手紙全部抆哂出黎, 好嚴重, 於是我同爸爸一齊執, 我走埋去執時, 妹妹竟然打我, 大胆! 媽媽都敢打? 於是我打左佢隻手一下, 佢竟然還手添(雖然係笑住, 但都唔岩呀!), 今次我打佢兩下手仔, 哈! 佢呢個野真係唔怕痛喎, 再還手, 今次我打完佢兩下就即刻的起佢上梳化坐, 唔睬佢, 同爸爸繼續執野, 佢應該知道自己唔岩, 走返落黎幫手執, 我同爸爸只敢偷偷地講同偷笑, 仲講定唔睬佢一陣間, 等佢知衰..... 佢有過黎掂我地, 爸爸話左佢兩句, 我就當佢透明..... 到後來KFC外賣黎左, 爸爸攞葡撻比佢食, 佢竟然攞黎比我食(真的未試過, 得一個都比我喎...), 算你啦, 識得氹返媽媽, 之後成晚都好乖呀!!
P.S. 今晚見到妹妹自己用匙羮筆野食有進步, 好感動, 好開心呀!!!!
