好恐佈, 嚇死媽媽....

呢排, 妹妺開始變成一隻鸚鵡, 人講乜佢又講乜, 無論响屋企(跟我地講), 响舖頭(跟SALES講), 响餐廳(跟其他食客講), 都不停重覆人地0既說話...

星期六, 妹妹抱住個公仔, 放佢响梳化, 一路講: "妖! 疴左屎! 妖!!", 我嚇一嚇, 點解妹妹會咁講0既??? 平時我地都唔會妖佢疴屎架喎?! 我冇出聲, 因為, 照計, 呢D衰野, 越叫佢唔好講佢就會越鍾意講, 唔理佢佢可能會慢慢唔記得講...

尋日朝早, 爸爸落左去買早餐, 我地開youtube睇barney, 妹妹又突然對住個mon話:"chiu(同超差唔多啦!)! chiu! 唔岩呀!! chiu! chiu! chiu!" 個chiu字仲講得多過真係要講0既野, 我好驚呀, 最終忍唔住話佢唔可以咁講...

好彩今日暫時未有驚嚇語句, 嚇死我0刺!! 以後要小心講野呀!!

為紫菜還是為啖氣??

尋晚, 媽媽一餐飯, 由7點半食到9點半…

開頭, 妹妹一定要媽媽陪住睇卡通片, 唔要爸爸陪, 要坐响媽媽大脾上睇, 放低一齊坐响梳化都唔得…

食飯只要媽媽餵, 但只食左大約1/3碗飯, 隔左一陣開始扭要食紫菜…

媽媽話: 又食? 頭先咪話食完唔再食囉?

爸爸話: 正餐你又唔食, 淨係掛住食紫菜, 唔得呀!

妹妹開始喊, 死扯住媽媽唔放(唉! 呢D時候又唔搵爸爸…), 狂喊, 好激動, 喊到成個人濕哂, 塊面紅哂…

爸爸仍然堅持: 唔得呀! 我地就係就得你太多!!

媽媽抱住妹妹, 氹佢: 我知道你好想食紫菜, 但你唔食正餐係唔得架, 一係你食埋D飯, 媽媽即刻拎比你食!! (Dr. Poon教0既野大派用場!!)

但係妹妹唔肯, 好似咩都聽唔到咁, 只狂叫我stand up! 去攞紫菜!!

媽媽知道妹妹諗咩, 平時都係咁食, 做咩今次突然唔食得喎!!

媽媽再嘗試同妹妹講: 咁啦, 你食兩啖飯, 即刻攞紫菜! (妹妹你食啦, 咁大家都易落台啦!!)

妹妹咁硬頸, 當然唔會就範…

媽媽退一步: 唔好食紫菜啦, 不如媽媽比粒開心果你! (都唔肯, 唔似你喎李梓丹…)

一係落去兜個圈? 唔要!!!

妹妹繼續狂喊, 己經半個鐘… 似乎唔再係為紫菜咁, 係為啖氣, 因為其他好味野佢都唔肯再要…

媽媽唔想再糾纏 (是失敗了嗎?), 最終, 比左一小角紫菜妹妹…

但係妹妹覺得唔夠(一小角, 媽媽你玩我嗎?), 一路將紫菜塞入口, 一路大嗌: 大塊d!!!

其實好好笑, 但又要忍住…

媽媽即刻將妹妹塊紫菜搶返, 好嚴肅地問: 你食唔食??

妹妺好認真, 好冷靜咁答: 食!

於是媽媽比返塊紫菜妹妹, 然後行開…

妹妹食完紫菜, 捉住媽媽: 我想食飯!!

媽媽突然好感動, 鼻酸一酸 (其實喊到咁, 媽媽係有點心痛, 因為佢己經喊到野都講唔到...), 你咁乖0既??

媽媽即刻餵左妹妹一啖飯, 點知…….

妹妺即刻推媽媽, 大嗌: 去攞紫菜!!!! (吓??????)

原來頭先講0既野佢係聽到架, 為左再食紫菜, 佢食多一啖飯!!

媽媽唔可以食言, 當然要比紫菜啦…

食完, 再提媽媽要去兜個圈, 媽媽真係服左你!!!

鼻發炎

妹妹傷風咳已經好耐好耐, 耐到我都唔知有幾耐...

成日訓覺時鼻水倒流, 攪到成晚咳, 睇見佢就辛苦... 不過又唔明點解朝早又起到身, 仲好精神添, 難為我成晚都冇乜點訓, 朝早又要同佢一齊起身...

見咁耐都唔好, 不如試下阿牛介紹0既趙長成醫生啦, 以前個個醫生都唔發現, 係呢個醫生先發現到牛仔個心有小小問題, 好似好勁咁呀!!

尋日朝早打去book, 竟然全日都已經full左, book左今日下晝4點...

上網睇過, 個個都要等起碼兩個鐘先有得睇, 不過一次攪掂, 好勁...

於是我地做足準備, 帶定相機諗住掛完號就去下街先返黎睇啦!!

姑姨婆掛住妹妹, 想睇下佢點, 約左我地响嘉賓樓下等...

4點鐘去到, 登記完佢竟然話半個鐘有得睇, 咦! 咁可以响度等喎...

嘩! 我地真係好彩呀!! 最終竟然只等左12分鐘!!! 除左樓下胡少文之外, 從未試下咁快有得睇醫生, 好感動呀!!!

趙長成醫生好好人, 好nice, 佢驗查完一輪之後, 話妹妹個鼻發炎...

於是我問: 咁係咪即係鼻竇炎呀? (因為程程最近都鼻竇炎)

趙醫生: 鼻竇要三歲先會有, 冇鼻竇好難會有鼻竇炎, 等如我唔會有子宮癌一樣...

佢話個鼻敏感令到氣管都唔好, 而家要先醫好個鼻, 其他問題就會解決... 但因為太多因素, 要醫好係好難0既事, 只好盡量令佢好d...

跟住, 醫生講左好多野, 要我地返去做功課...

1. 床頭床尾所有毛公仔, 玩具, 書都要通通拎走...

2. 每4日換一次床單, 兼要用熱水洗...

3. 檢查一下屋企0既塵, 如果抺左之後三日先有塵, good!! 如果兩日有塵, 就要山d窗, 如果一日就有塵, 咁就可能要用空氣清新機0刺... 等我留意下先, 但我感覺上係一日囉...

4. 夜晚唔好用奶樽飲奶 (好難好難!!), 同埋其實兩歲都應該戒奶樽, 而家仲用奶樽就要打pat pat啦, 不過唔係打妹妹pat pat, 係打媽咪pat pat!! Oh no!!!

5. 同埋根本唔好飲咁多奶 (妹妹最鍾意食奶喎!!), 因為過多旦白質係會令人敏感的, 奶入面0既營養其實响其他食物已經有... 一歲以上0既小朋友, 唔需要再飲奶粉, 其他牛奶已經ok, 奶唔應該係主要食糧, 係drink, 唔係milk... 二號三號大仔奶粉其實係呃人的, 人奶係最好0既奶, 咁有冇二號人奶, 三號人奶呢??? (哈哈, 醫生講得好好笑!!)

6. 夜晚唔可以飲湯, 因為老人家煲0既湯都係寒0既, 清熱0既, 妹妹係寒咳, 所以夜晚唔好飲, 涼茶都唔好飲, 然後醫生再數左幾十種唔食得0既野, 包括一d清熱0既野, 同埋一d中藥(我最近買0既川貝粉都唔得呀~~)

7. 妹妹0既氣管係寒, 腸係熱, 即係涼野又唔食得, 熱氣野又唔食得, 今次慘0刺...

醫生為左氹妹妹比佢檢查個鼻, 比左一包餅佢, 原來醫生準備左好多自己PACK0既獸形餅, 每包幾粒+1個金弊朱古力用黎氹小朋友, 又真係幾細心!!

反而等攞藥等左起碼15分鐘, 有5種藥要食呀, 包括抗生素... $490, 好貴呀!! 醫生話一個星期後如果冇事就OK, 未得就再返去搵佢...

妹妹頭先第一次食藥, 而家訓左超過一個鐘, 一聲咳都冇喎, 唔通真係咁勁!!

很窩心的一刻

話說年初四嗰日我想同妹妹沖涼時, 抱住妹妹比濕滑0既地下扇到 (都係妹妹啦, 未沖涼就玩水玩到一地濕哂), 好彩妹妹冇事, 只係嚇親狂喊 (比爸爸一粒黑加侖子糖攪掂返), 而我就都係撞親背脊同隻腳, 冇乜大礙...

尋日嫲嫲驚驚地話要幫妹妹沖, 不過妹妹唔肯, 激死...

到今日, 我又再抱住妹妹去沖涼, 我想坐落張登仔時, 妹妹用好溫柔0既聲線同我講:"小心呀吓! 小心!", 然後再指住地下話:"小心呢度呀!!".... 呢個假期差唔多日日24小時湊住佢真係好辛苦, 身心俱疲, 但呢一句說話突然比我好窩心0既感覺啊!!

大年初四 - da契契屋企拜年

年初三打完邊爐返到屋企好肚痛, 第二日都仲係唔舒服...

妹妹0既姑婆一家黎拜年, 妹妹訓左, 招呼唔到大家添...

訓到成4:30都未醒, 冇辦法0刺, 要摷醒你0刺, 我地遲大到0刺...

妹妹全日都唔肯食野, 搭車時開始肚餓0刺, 要食腸仔飽...

去到da契契屋企, 見到契妹tiana0刺!! tiana而家兩個月, 眼仔碌碌好得意喎!!

眾契契同tiana影返張合照先...

妹妹成日好想同tiana玩喎, 仲唱歌比佢聽添...

dinner食pizza hut, 街外野妹妹都係麻麻地, 只係食左少少野... 而媽媽就唔知點解, 勁食, 勁食又勁食...

爸爸早走去同學團拜, 我地食完飯就過去join佢一齊返屋企, 去到岩岩有魚食, 妹妹都食左d....

2/5 大年初三 - 牛叔叔屋企拜年

大年初三, 我地去牛叔叔屋企團拜...

我地夾埋小朋友有廿幾人, 原本有諗出去酒樓攪, 但因為小朋友多, 去酒樓唔化算, 最後我地都係去返牛叔叔屋企...

叫左家姐幫我攞牛肉, 最好味0既攞唔到, 今次都係食住次一級0既安格斯先啦...

跟住相約牛叔叔同魚旦舅父去沙田一田買壽司刺身... 路經d公仔, 妹妹要停低影相...

魚旦舅父&phoebe姐姐買左迪士尼髮夾比我地, 夾左幾靚女!!

大人賭錢, 小朋友玩玩具, 妹妹突然識踩單車喎, 好叻呀!!

2011大年初二 - 節目多籮籮

今 日係大年初二, 妹妹竟然7點起左身, 尋晚我成晚留意住佢有冇發燒 (好怕係豬流感呀!! bok bok同connie都中左, 令我都有d驚...), 佢又副被, 又要飲奶, 又要飲水, 又要換片, 7點起身, 我真係招架唔住囉!! 但冇人幫手, 我唯有頂硬上, 不過不停釣魚啫...

中午去左黃大仙同太太, 姑姐飲茶...

我地响樓下影左幾張相, 一上到去就有位0刺, 不過姑姐同joe叔叔等左成個半鐘呀, 好誇張, 辛苦哂, 咁今餐當然係我地請啦!!

.

同姑姐影返張相先...

跟住我地去婆婆屋企拜年, 妹妹又有得同小冬玩0刺...

越玩越熟落, 妹妹訓埋响度同小冬玩...

跟住... 小冬又黎0刺, 狂咀妹妹, 今次仲錫咀添, 好好笑!! 不過爸爸一知道咗, 即刻喝住快d搵濕紙巾抺咀!!

小冬著左新年衫, 幾靚仔!!

下一站就係太婆元朗家, 好多人同妹妹玩, 妹妹不停扮倒水比zoe姐姐同細姨姨飲, 玩左好耐...

姐姐要飲橙汁, 妹妹放個橙入個杯度扮橙汁... d生果比妹妹玩到淋哂, 最後大家努力食哂佢...

又到睇barney時間, 妹妹不嬲响屋企都成日捉住我地同佢一齊唱歌跳舞, 不過捉得呢個黎0個個又走左, 所以通常都係得爸爸媽媽會陪佢玩, 今次咁多人响度, 仲個個都肯陪佢癲, 哈哈! 真係岩哂0刺!!

妹妺一向都好鍾意安排人做野, 今次我地有7個大人, 佢一陣又叫我地sit down, 一陣又要stand up, 完全要照足哂barney入面0既動作, 又要我地排隊手拖手, 好好笑...

最衰張咭唔夠memory, 爸爸只拍到少少, 好可惜呀!!!