尋找快樂

2011年2月3日星期四

2011大年初一

今日係大年初一, 希望今年我同我身邊0既人日日都開心!!!

同埋... 身體健康... 因為... 妹妹年初一就發燒0刺...

可能係因為尋晚返屋企時訓著左所以冷親都唔定, 今朝鼻水多左, 好扭計, 原來發燒呀!!!

只係少少燒, 37.8度, 飲左退燒藥之後就比佢訓覺, 但佢一直都訓得唔好...

姑姐, 姑婆佢地黎拜年, 妹妹一聽到佢姑姐黎左, 即刻彈起身, 成個人精神哂, 仲唱歌跳舞比姑姐睇添...

之後大家出左黃大仙同太太拜年, 坐左一陣都係返屋企比妹妹休息下好0刺...

帶左相機, 都冇乜影相添...

kitty書包內的寶物

妹妹好鍾意攪自己個kitty書包, 然後揹住再拎埋mickey umbrella, 巴斯光年保齡球同Halloween棉花糖扮出街...

咁究竟kitty書包入面又放左d咩呢?

今日趁妹妹訓左晏覺, 偷睇下先....

嘩, 除左濕紙巾之外, 仲有30蚊同mickey錢呀!!! 原來妹妹好有錢架!!

前面0個隔放左支潤唇膏, 出走都要顧住潤唇, 真貪靚!! 佢放响前面0個隔, 就同平時放响書包前面0個隔一樣喎...

一晚兩場團年飯 + 犘士花市

尋晚係有史以黎最忙0既年三十晚, 因為我同媽咪溝通上出現左少少誤會, 攪到尋晚要走兩場食團年飯, 攪到兩邊都食得唔盡興添...

我地8點幾先去到紅磡家食飯, 好熱鬧, 我地有8個人食, 爸爸知道我地返去食飯仲好緊張, 之前打定電話問我想食咩, 我諗佢應該都幾開心!!

妹妹再遇小冬, 兩個都好想同對方玩, 小冬好鍾意妹妹, 係咁搵機會狂吻妹妹, 其實妹妹都有少少驚, 每次小冬錫完妹妹塊面, 妹妹都會用手抺一抺, 但我見小冬冇惡意, 都唔太緊張, 冇太隔開佢地, 直至小冬想un妹妹, 哈哈...

我地食到9:30就要走0刺, 要趕下場, 飛的過黃大仙客家好棧同老公屋企人做節, 好忙...

下次我一定會安排得好d, 唔會再係咁0架0刺...

食完飯我地去摩士花市, 我地行錯路, 行左個大圈先到入口, 入到去仲要勁多人, 其實又係得兩行, 妹妹未開始有得行就已經好眼訓0刺...

最終妹妹又買左個氣球, 今次好冷門地佢要買nemo, 好大個, 講完價都要$63...

同埋一隻閃閃戒子...

屋企已經細, 仲多兩個氣球....

條魚响天花板度游, 真攪笑....

為新年作出準備...

尋日係第一日放假, 原來做左人媽媽之後, 過年前係會更加忙, 好多好多濕星野要準備...

嫲嫲話妹妹冇暖0既衫, 於是我經過新達kingkow幫佢買左件, 半價, 好扺!!!

妹妹仲有傷風咳, 原本打算再睇多次醫生, 但爸爸提出其實可以去藥房配藥, 因為其實次次醫生比0既藥都係一樣啫, 爸爸又講得好有道理喎...

我揀左我一向認為比較穩陣0既漢成藥房, 平時冇留意, 原來真係好多人配藥架, 有d人攞住6-7包藥黎配, 都係45蚊, 嘩, 好平呀!! 仲有d人好似睇醫生咁, 同藥房人員講出自己病徵, 然後就會配到藥食...

我配藥水, 等左好耐, 我配左兩份藥水, 比醫生0既大支, 夾埋都係$120咋!!! 比睇醫生平左$340!!! 又唔駛等!!!

買面包(妹妹最愛0既腸仔包)比妹妹食, 然後返屋企樓下買定d尿片, 點知原來pampers特級棉柔斷左貨, 行左兩間都冇, 個心開始驚驚地添!!!

好彩萬寧話6點之後有貨啫...

撲完一輪已經兩點幾, 屋企大把野未執, 好彩妹妹訓左, 我可以加快速度, 攪掂之後再同妹妹準備出去做節...

2/2 大埔墟花市

今日係妹妹最後一日返學, 我又最後一日返工, 我提議叫埋嫲嫲同妹妹出黎食飯, 跟住去大埔墟行花市...

妹妹成兩歲幾, 都未行過花市, 一定要同佢去見識下啦!!! 維園太遠又多人, 都係近近地好0刺....

去0既過程一D都唔愉快, 妹妹百厌到不得了, 唔比人抱, 又亂咁走, 激到爸爸都黑左面...

好辛苦地先行到去目的地, 妹妹一見到D氣球同風車, 興奮到嘩嘩聲, 不停"嘩", 不停讚嘆"好靚呀!!!"...

呢個花市細到呢... 得兩行, 又唔多人... 我地行過左D氣球同風車, 諗住行哂先返轉頭買比妹妹, 可能妹妹見到個個都渣住氣球, 自己又冇, 好唔開心, 眼濕濕個咀又左右郁郁下, 個表情笑死我地, 爸爸抱住佢睇唔到, 真係可惜呀!!!

最後當然返轉頭買啦, 氣球就唔買0刺, 因為屋企已經有一個, 今次買左個蜜蜂風車, 都幾靚呀...

2/1 新年團拜活動

呢日係妹妹學校0既新年團拜活動, 每位小朋友都要準備三樣野:

1. 著新年衫 - 媽媽响寶靈街買左, 98大元...
2. 賀年花一支 - 嫲嫲見到朋友買左一扎銀柳, 於是問朋友攞左一支...
3. 少量賀年食品 - 婆婆每年都幫媽媽買油角, 就比幾個妹妹帶返學校啦!

返學前, 同妹妺留張倩影, 妹妹心情好好, 仲話支銀柳係"薯條"!