恭喜發財!

恭喜發財!! 祝大家虎年行大運, 身體健康, 一本萬利!!

岩岩踏入虎年, 希望我真係如ming哥所講會開始行個小運啦!!

虎年0既開始我心情唔錯, 一來婆婆尋日出左院返屋企過年, 二來我又有10日假期陪住李梓丹增進感情, 李梓丹好可愛, 响屋企成日一路睇住碟一路唱歌跳舞, 睇佢真係好睇過電視0既賀年節目呀!

今晚發生左件趣事, 我同老公出左去大埔中心買d必需品同埋晚餐, 返到屋企見到李梓丹响度喊, 奶奶話佢食食下粥就喊起上黎, 唔知做乜, 我地怕佢唔舒服, 搵耳探幫佢探下熱, 咦! 果然係發燒喎! 100.4度, 大家心情即刻變得非常沉重, 諗住嗱嗱聲食埋野就帶佢去仁安.... 雖然係發燒, 但妹妹個額頭, 手手腳腳, 面仔都係涼浸浸, 一d都唔似發燒, 我懷疑係因為佢食粥同喊令到佢個人興左啫, 不過我一路不停咁幫佢探熱, 雖然有時有跌到落99度幾, 但始終都係有d燒, 不過額頭依然涼0既, 表現都唔似唔舒服喎, 好奇之下, 我探一探我自己, 咦! 我都發燒?! 連老公都發燒喎!!!! 哈哈!! 再用水銀探熱針幫妹妹探多次, 一d事都冇, 一場虛驚, 真係笑死人, 但探熱針都可以壞0既, 如果真係去左醫院先知冇事就攪笑0刺! 哈哈..... 跟住不停比老公責怪點解唔買個好d0既探熱針....

金潮

尋晚去左葵芳同老公食飯, 試左前兩日報紙介紹0既金潮, 一心諗住都唔方多人得去邊, 點知門口人頭湧湧, 我地等左差唔多半個鐘先有得食....

好可惜, 枱枱都有order0既花甲湯岩岩好賣哂, 好想喊呀!!!

呢個係鮑汁雞腳, $30有六隻, 因為太肚餓, 所以食淨一隻先有心機影相...

冇花甲, 唯有試試蟶子湯, $58比花甲貴10蚊, 湯同一般胡椒湯冇分別, 如果多d胡椒會仲好, 而蟶子就比佢煲到冇哂味, 不過有好多架, 廿隻都有呀!!

醬汁排骨, 味道幾好, 老公好鍾意食, 不過我就一般, 好大煲, 兩個人食真係有d吃力, 我食左大約3-4舊, 最後比老公食哂, 勁呀!!!

呢個黃金蝦係佢地0既招牌菜$68, 滿心期望, 點知d蝦好細隻, 好一般咋喎!

加埋兩支汽水, total $214, 飽到不得了, 老公話下次要同老爺奶奶一齊黎....

麗港城迦南

今日朝早9:30去麗港城迦南INTERVIEW, 原本諗左好耐究竟去好定唔去好, 因為迦南冇國際班, 同我0既要求有D出入, 但聽綺玲個舊同事講佢D仔女讀緊都覺得唔錯, 上網SEARCH過D評語都唔錯咁, 所以辛苦D都決定去....

老公每次都會提議奶奶一齊去等我唔駛咁辛苦, 但我每次都堅持自己同妹妹去, 因為奶奶一齊去妹妹一定唔聽話, 成日痴住奶奶, 而事實上, 之前考幾間我覺得表現都不太差的.... 但今次知道迦南有學校同課程簡介, 兩個家長去會好d, 所以我今次叫左奶奶一齊去.... 果然不出我所料, 妹妹事事唔合作, 雖然佢冇痴住奶奶, 但奶奶坐响隔離, 佢當堂成個人唔同咋, 咩都唔肯做, 麻麻煩煩咁... 最後老師要同我傾幾句, 叫奶奶同妹妹玩住先, 奶奶仲同妹妹行開左玩, 我諗9成都唔會收, 除非其他小朋友performance仲差d啦, 哈哈...我諗機會都好微, side左時間同心機添....

返到屋企, 我實在太攰0刺, 奶奶3點幾開始得閒d, 叫我自己訓一陣, 呢個簡直係一個恩賜! 因為呢年幾以黎我都未試過一日訓得夠, 訓得好, 今次由3點幾開始訓, 雖然中途醒過好多次, (因為妹妹成日扭計, 佢對住奶奶真係比較扭計d) 訓到8:30, 呢幾個鐘真係比我叉左好多電呀!

好攰呀....

尋日奶奶同我地一齊返PLAYGROUP, 因為之後我地要趕去齊齊0既生日會... 照舊我同爸爸一齊同妹妹玩, 奶奶就坐响側邊, 嫲嫲响度, 妹妹有救星, 完全唔專心唔投入, 不停去搵嫲嫲, 咁嫲嫲唯有落街行下啦, 點知妹妹都依然成日指住度門嗌嫲嫲, 唔肯玩...

放左學同嫲嫲响樓下會合, 跟住就趕去齊齊0既生日會0刺, 我地3:15離開學校, 但人地生日會4:30就完, 我地趕頭趕命由佐敦去到葵興, 再搭的士去到荃灣沙咀道0既MC當當....

妹妹仲細, 唔識同小朋友玩 (其實我覺得妹妹根本就唔鍾意同小朋友玩), 我地都係坐响度食下野, 之後嫲嫲去九龍城揼骨, 我地一家三口就去CITYWALK行下....

趁機比妹妹練習下, 佢都不知幾開心, 又唔肯比人拖, 要自己行, 商場地下都仲OK0既, 街就唔好0刺, 因為佢仲未行得穩, 隨時仆低.... 練習左一陣, 佢好似己經有少少進步0刺, 有時可以行好長0既路(我認為好長囉..)都唔跌低, 努力呀妹妹!!! 你好快就會成功0架0刺!!!!

不過離開商場之後, 妹妹都堅持要落地行, 勁扭計, 又係好難對付架.... 攪到我同爸爸兩個勁攰....

係喎... 唔記得講, 方方都己經收左妹妹0刺, 輝舅父今日幫妹妹去交留位費, 唔該哂呀!!!!

見左john個老婆0刺!!

今日我, 奶奶同妹妹一行三人去到將軍澳協康會度見阿john個老婆, 路程都幾遙遠, 九巴建議我地搭74x由大埔去到觀塘市中心再轉98A去總站落, 行過對面就係裕明苑, 但落左車之後, 我地完全搵唔到裕明苑, 打去協康會問左之後, 沿路再問人D人都唔知裕明苑响邊, 真奇怪.....

幾經辛苦終於搵到0刺, 聽阿JOHN講, 佢老婆星期六日會帶小朋友PLAYGROUP, 中間會有D時間FREE D.... 我地入到間房, 入面好多玩具, 妹妹不知幾開心, 周圍行周圍爬, 不停玩車玩波... 佢幫妹妹檢查過後, 話肌肉D張力基本上冇問題, 其實小朋友0既張力係比大人低, 而妹妹都係屬於偏低, 但又唔係有問題... 經過一輪觀察, 佢覺得妹妹行路好似D BB岩岩初學行咁, 係因為太少練習, 應該每日同佢去公園行多D, 又比佢行下樓梯, 試下練兩個星期睇下有冇好轉, 如果冇改善就要CHECK下係咪小腦影响平衡0既問題了...

離開左之後, 我地嘗試比妹妹落地行, 方法係就咁抆住少少衣領, 唔駛扶, 但試過落地之後, 妹妹就開始响邊都想落地LU, 我諗係正常0既, 妹妹又去到另一個階段0刺..

好似有d進步喎...

呢兩日妹妹行路好似有d進步喎, 不過都依然有左腳內八字0既問題, 希望會改善到啦....

有d擔心呀, 妹妹行路有問題呀....

尋日返playgroup時, 阿may突然同我地講, 覺得妹妹行路姿勢好怪, 唔似其他小朋友, 建議我地同佢多d行樓梯練習下, 希望兩個星期後會有改善....

其實我地一直都覺得妹妹學行路0既進度好慢, 己經差唔多兩個月, 但仍然成個醉酒佬咁, 又行得大步, 行幾步就跌低. 今日阿may講完之後, 我再多d觀察佢, 發現佢隻左腳成日行行下就內八字, 然後就一定跌低, 尋晚响屋企行得好差呀, 幾步就跌...好擔心.....

雖然個心好擔心, 但我都冇同爸爸表達我0既感受, 因為講左大家就仲會更加擔心同唔開心.... 妹妹半夜要飲奶, 飲完我個人醒哂訓唔著, 於是用手提上網search下d資料, 見有d bb都係行得唔好, 總括黎講都係要多d練習....

突然諗起john個老婆係做物理治療, 佢話幫我問下佢老婆, 仲應該可以安排星期六抽時間見一見妹妹, 真係好開心呀, 爸爸話我遇貴人, 哈哈!!