放假還是九龍灣....

今日行程係到mega box買妹妹返學用0既長袖內衣同祙褲.... 有左妹妹之後, 覺得mega box絶對係一個一家大細0既好去處....

首先我地响德福哂相先, 因為聽日要交一張相比老師做圖工用....

原來我地一家三口係勁少全家福架, 梗係啦, 平時一係爸爸"手查"機, 一係媽媽"手查"機, 咁點會有全家福呢...

搵到一張較近期0既, 但妹妹係冇望鏡頭0既.... 點算?? 唔理0刺, 哂左先算啦...

响快圖美哂完, 個心硬係覺得唔舒服, 有乜理由比張唔望鏡頭0既相黎做圖工???

我地決定即時搵人幫我地影一張, 終於搵左快圖美0既姐姐幫我地影, 哈哈....

除左我肥左d, 同埋個景怪左d之外, 張相都幾靚呀!!!

唔知係咪因為咁, 爸爸醒覺, 今日同我地兩個影多左好多合照.... 不過妹妹依然唔鍾意望鏡頭, 好難影到呀...

等唔到位飲茶 (妹妹好想食牛肉, sorry!), 我地去左Delifrance醫肚, 食少少野, 其實好快就會食晚飯....

妹妹食粟米.... 有一下, 佢唔小心將兩粒粟米筆左出去, 佢好自然咁衝口而出"呀! sorry!!", 我覺得好好笑, 佢d語氣好似個大人!! 哈哈!!

然後上小朋友最鐘意0既9樓啦... 嘩, 好大隻bear bear呀!!

循例都要玩下sir sir啦, 但mega box越黎越多人, d哥哥好恐佈, 玩sir sir都危險左好多....

一心諗住去mother care買底衫同祙褲, 點知兩樣都賣哂, 唉, 我呢個媽媽總係咩都遲過人.....

唯有去jusco睇下啦, 好彩都比我買到....

不過, 原本想買d去街衫比妹妹, 竟然睇唔中, 難得難得呀...

6:15我地就到左味吉, 而家妹妹早左食飯, 我地成日食完夜d又食好多零食, 今次實肥呀...

極濃豬骨湯叉燒拉面(特大) - 佢d旦好好味, 平時我食lunch就算同同事share都要叫多隻旦確保個個都有旦食... 

美國牛肋肉讚歧烏冬 - 牛肋肉分開上, 已經食過幾次, 依然覺得唔錯, 不過好似好滯咁... 唔明點解爸爸會話唔夠食...

另外叫左個照燒雞亦都好好味... 妹妹似乎最鍾意食個烏冬....

因為mega box多一家大細去, 响我地周圍都有好多枱有小朋友, 妹妹就好忙咁不停同人地打招呼, 親善大使又黎0刺...

行程到了尾聲, 我地去德福攞埋相就返屋企0刺....