妹妹由星期五開始病, 由星期六晚開始狂咳...
日頭都冇事, 夜晚一訓著就開始咳, 佢好容易咳到嘔, 佢一咳我就醒, 幫佢掃掃背脊, 又睇下佢有冇嘔, 有冇副被...
如是者狂咳左兩晚, 我好似冇訓過咁, 星期一返到公司, 一見到D字(e-mail)對眼就好想合埋, 真的好眼訓...
唔知係咪放左三日假, 妹妹又開始夜訓0刺, 尋晚佢又唔肯訓, 11點飲奶, 12點幾都未訓到, 仲要周圍玩, 同一本書睇三次... 我响氹佢訓0既途中就己經訓著唔知幾多次...
最後嫲嫲攪掂左佢, 但繼續狂咳, 嫲嫲抱走左佢照顧佢, 我終於有覺好訓0刺...
妹妹你快d好返啦!!
星期日因為冇去創價INTERVIEW, 我地响大埔活動… 太太流鼻血, 妹妹跟嫲嫲去左黃大仙睇一睇佢, 不過好快就返左黎…
妹妹著對對鞋都話痛, 可能頂趾了 (實質度又好似未頂喎), 當務之急係去大埔中心ADIDAS買過對返學運動鞋…
6:15出發, 先攞D衭去改...
妹妹要彈兵乓波, 跟住行去新開0既CAKE SHOP, 撞到阿LU, 佢地D CAKE又幾好味喎, 有D九龍城FEEL…
妹妹一去到大埔中心就話要去樂園(冒險樂園), 我都知走唔甩架0刺, 冇所謂, 買完鞋去玩一陣先食飯啦…
去到鞋舖, 我拎起對鞋, 妹妹好快話:”唔好!!”, 我拎第二對, 佢都係話唔好:”去樂園啦!!”
去左樂園先都冇所謂0既, 橫掂都係响隔離啫…
玩完兩個保齡球, 得返一個金幣, 比妹妹掟彩虹, 又比佢掟中左20張票喎…
叫妹妹走, 佢當然冇咁順攤啦, OK, 响戶口攞多10個金幣 (我同爸爸都分別開左戶口呀!)…
玩最後一樣野時, 我好鄭重咁同妹妹講:”玩完呢舖就走, 好嗎?”, 妹妹答:”好呀!!”
其實睇得出妹妹跟本就冇心機玩, 又唔投入…
係時候走0刺, 妹妹仲要求玩掟籃球, 媽媽爸爸當然唔掣啦…
妹妹開始扭計, 我同爸爸都唔理佢, 自顧自離開樂園, 妹妹就响度大喊, 又要追住我地, 又要顧住想入返樂園, 佢呢個唔知顧得邊樣0既傍徨樣, 其實都幾攪笑…
周圍D人都笑妹妹, 包括隔離南風閣餐廳0既姐姐, 路過0既倒垃圾嬸嬸, 同埋其他路人…
妹妹不停喊住話:”玩多一陣!!”, 媽媽心軟, 同佢講真係玩多一舖咋喎, 然後攞多左10個金幣…
點知, 玩完一個掟籃球, 佢又要玩隔離0個部相同0既掟籃球, 妹妹, 你係咪玩野??
冇得玩又黎狂喊了… 剛剛有路過0既叔叔望住佢, 我就話:”連叔叔都笑你呀!”
知醜呢! 妹妹突然話要去洗手間, 想呢埋之後當冇事嗎?
OK啦, 就去洗手間啦, 洗手間响樂園隔離…
入到去, 妹妹仲有少少喊, 我諗住同佢洗下手…
點知, 剛才南風閣0既姐姐同倒垃圾0既嬸嬸都响廁所裡面喎… 一個話:”嘩! 你仲喊緊呀?”, 另一個又話:”玩完就算啦, 下次再玩過嘛!!”
嘩! 咩事? 呢D係咩人? 妹妹頭先太激動, 一定留意唔到呢D人啦… 無端端又比人話, 於是响廁所又嚎哭起黎…
出到廁所, 我抱起妹妹向波鞋舖方向行, 妹妹一路扭, 直至入到鞋舖先收聲 (因為鞋舖人多, 佢都幾要面架..)…
佢一定係覺得好委屈啦, 仲索緊… 姐姐問咩事, 我話比姐姐聽, 佢又好慘咁喊起上黎, 都係我衰, 唔應該周圍唱你0既…
糾纏左咁耐, 原來己經9點幾, 大家飯都未食, 又冇帶片, 妹妹玩到漏尿, 呢HEA到爆…
以後見到冒險樂園, 都要運路走!!
妹妹呢排返學已經冇再喊, 仲成日講住"返學!! 返學!!", 又成日唱住學校D歌...
例如有:
我問妹妹平時返到學校同老師講咩, 佢話:"打電話媽媽!! 打電話爺爺!!", 哈哈, 返到學校都掛住我, GOOD GIRL!!
今朝(妹妹6點鐘又起左身..), 我帶妹妹返學, 每次响學校門口比妹妹揹返書包時, 妹妹都會同我講BYE BYE, 今日都不例外... 妹妹行入學校之後 (而家自己行0刺, 好乖!!), 我亦不例外地望住妹妹0既背影直至佢上完樓梯消失响我眼前之後我先會離開, 今日, 妹妹入到學校, 搓完潔手液之後, 竟然向出面望(第一次!!), 佢望到我, 同我揮手同飛吻, 完全冇扭計諗住走人, 好乖, 當時真的覺得好感動, 個鼻又酸左一酸, 妹妹又大個女左0刺!
星期三 (11/24), 我一早起身, 要响返工前去宣道幼稚園交FORM...
我7:00起身, 到7:30我就叫醒奶奶幫妹妹準備返學 (我要早出去, 唯有麻煩奶奶早D起身幫手啦), 點知我臨出門口, 比妹妹發現在, 佢响房度撲出黎捉住我唔比我走, 佢要我帶佢返學...
我唯有拿拿林幫佢準備然後一齊出門口啦, 一直到等的士0既地方, 妹妹都唔比奶奶抱, 奶奶就唔知咩事黑左面0刺, 係唔耐煩嗎?
有的士0刺, 奶奶入去先, 然後從我手抱走妹妹, 然後關門, 妹妹露出一副好驚0既樣, 好焦急係咁叫媽媽, 個情景突然變得好淒涼, 但我真係有事做, 唯有狠心走左...
去到宣道大約8:40, 排左大半個鐘先交到表, 期間唯有打比阿DICK講低要遲少少返啦, 好彩阿DICK係個通情達理0既人...
交完宣道, 順便去埋金巴倫, 之前唔知點解冇報到, 之後好多人問我有冇報, 攪到我有少少後悔, 好彩佢地而家仲收最後輪0既後備生申請, 黎開九龍塘, 當然唔好放過呢個機會報埋啦...
金巴倫校舍好舊, D職員冇制服, D衫唔多整齊, 同妹妹學校差好遠喎, 不過呢D都係門面野啫...
佢地即刻排左INTERVIEW時間比我, 11/27 9:30AM, 呵呵, 11/27, 呢日兩間INTERVIEW, 旅行諗都唔好諗咯...
今日要去鑽石山靈糧堂面試, 又要特登請假, 我d假就黎冇哂0刺!! 好慘呀!!! 點解d學校編排星期五叫人去面試架??
尋晚同家姐一路傾電話, 一路諗住搵返封面試信出黎, 弊!! 點解搵唔到0既????? 好驚!! 即刻收線搵, 翻天覆地咁搵左兩個鐘都搵唔到, 死啦!! 點算????
爸爸都幫我搵左一次, 結果都係冇.... 唉~~ 點算??
最後, 我地決定去到學校話唔記得帶, 我諗ok卦...
自責左成晚, 點解咁重要0既野都可以唔見架??
今朝起身, 正在準備中, 突然個腦浮左個e-mail出黎, 咦! 呢間學校只send左個e-mail比我咋喎, 冇信架!! 車!! 點解我咁低能架??
打比爸爸講呢件事, 爸爸安慰我, 咁多野要記, 唔記得呢樣有乜出奇呢?? oh... 老公, 你真好!!
我地因為時間太趕 (都係我唔好, 掛住做D無謂野耽誤左時間), 我地搭左的士去 (SIDE錢呀!!), 去到岩岩好, 10:55, GOOD!!
等左一陣, 老師帶我地入個課室度玩玩具, 玩左幾個字, 其實都有D悶, 因為玩黎玩去都係積木....
跟住去另一個PLAYROOM, 每一個老師負責觀察一位小朋友, 家長盡量令小朋友玩多D, 講多D野, 不過李梓丹就表現一般....
再去另一個課室, 小朋友圍圈, 有位老師帶唱歌同做動作, 開正李梓丹0個瓣呀!!! 不過, 世事無絕對, 今次李梓丹又唔想做喎, 淨係想拖住我, 哈哈!!
其實呢間學校比我感覺幾好, 雖然舊, 但學校每一條走廊, 每一幅牆, 每一個角落都係比小朋友學野0既地方, 好豐富, 我覺得小朋友可以學到好多野...
不過不幸0既係李梓丹表現麻麻, 同呢間學校冇緣, 算吧, 呢D係天意!!
放棄YORK, 希望冇錯啦....
原本YORK安排左李梓丹今日下晝面試, 早幾日收到YORK0既信通知, Admission form上面只有日期, 冇時間, 冇小朋友姓名, 打去問, 佢地第二日先覆....
原本好buy York英文勁, 但請教過john(佢個仔讀緊), 佢並唔建議我地讀, 佢話佢已經洗濕左個頭, 費時成日轉校....
john話出年york會叫家長買債劵, 以我所知, 其實有多出名0既學校都會咁樣做, 但李智恆覺得, york並未到呢個層次, 所以唔值, 呢間學校咁勢利, 佢叫我唔好去in....
不過, 呢間又唔去, 0個間又話收左都唔讀, 似乎都冇乜邊間淨, 突然有少少心慌慌0既感覺添...
因為九龍靈糧堂排左我地星期五interview, 局住要請假一天.....
計劃好哂星期五密密麻麻0既行程, 估都估唔到, 星期四晚返屋企時奶奶打黎話妹妹發燒, 吓??? 又發燒??? 仲要39度幾, 0個一刻只係諗, 可能要同妹妹去醫院....
返到屋企, 8:30, 妹妹已經訓左, 睇黎真係好唔舒服....
諗住幫佢再探下熱, 好彩比我發現奶奶冇加膠套响個探熱針度, 咁係會影响出黎0既溫度架!! 其實妹妹真係發燒, 不過只係38度....
第二朝約左媽咪同家姐去整指甲, 今次早左一個星期整, 因為個豹紋真係唔可以見人囉.... 就算呢次靈糧堂in唔到, 我都要為星期日0既根德園作準備....
朝早7點幾, 妹妹竟然醒左, 冇發燒之餘仲鬼打咁精神, 橫掂都起左身, 响屋企玩不如返學參加生日會!! 妹妹响車度已經唱哂生日歌咁, 咁開心, 決定岩左啦!!
原來生日會有好多禮物拎返黎架!! 有balloon, 玩具球拍同埋一堆零食呀!!
約左媽咪响大埔火車站等, 而家姐, 最終係放左飛機0既...
我整左個好斯文0既色, 又成熟d, 岩哂interview!!
細佬(幫我整指甲0既男仔)話前一晚買左inception, 好呀, 我都未睇過, 點知, 唔專心咁睇原來係完全唔知佢做緊咩, 於是叫細佬轉睇維多利亞一號, 嘩, 好血腥呀!!!
細佬突然問我地食左飯未, 然後留左我地响度食飯, 哈哈!! 好攪笑!! 可以試下d家鄉野, 雖然簡單, 但有d都幾好味呀!! 我地食飯0既話題係super junior....
計劃3:30由大埔起行, 先去德望約時間interview(偷雞失敗, 諗住側側膊郵寄唔親身交form, 點知...), 然後去九龍靈糧堂interview.... 點知, 妹妹訓極都唔醒, 醒左又扭計要嫲嫲一齊出去, 哈哈, 糾纏左好耐, 最終我地一行四人飛的出發直接去靈糧堂, 因為已經冇時間再去德望lu...
妹妹訓醒之後情緒好唔穩定, 可能因為唔多舒服啦, 就算去in, 都唔方會收囉...
去到靈糧堂, 嘩, 駛唔駛咁多人呀?? 人山人海喎!!
我同妹妹先去玩sir sir同車車, 間學校好舊, 連d車同sir sir都好舊, 因為落雨, 又多人, 攪到好似周圍都濕笠笠, 污污糟糟啦....
到我地5點鐘0既人排隊0刺!! 我地派婆婆排住先, 我地就玩多一陣, 而嫲嫲, 就去學校出面迴避一下, 費時妹妹扭計....
原來排左咁耐(起碼15mins)都只係為搭一部lift上五樓, 之後0既程序非常繁複, 攪左成個半鐘, 最慘就係我大部份時間都要抱住李梓丹小姐....對手就黎斷0刺....
唔知係人多定係地方太大, 我地等同周圍行0既時間真係好多, 好side時間呀!! 等等下妹妹仲懶洋洋咁, 興興地, 好似又發燒....
等得太耐, 妹妹終於响臨interview時唔耐煩, 扭計要搵嫲嫲0刺, 弊!!!
好彩, 妹妹好快比我攪掂, 呢個時候老師就要李梓丹入房0刺....
interview0既過程如下:-
老師帶我地入課室, 叫我地坐低....
妹妺突然大聲話:"唔該姨姨!!", 姨姨??????? 我呆左..... 呢個老師年紀介乎姐姐同姨姨之間, 但妹妹居然唔叫老師, 叫左姨姨.....
老師好似聽唔到:"你講咩呀?"
妹妹又講:"唔該姨姨!!!!", 於是我即刻同老師講:"佢話唔該喎!!"
老師話:"哦!! 你話唔該先, 乖0刺!!"
老師: "你叫咩名呀?"
妹妹唔答....
老師:"咁你係咪叫梓丹呀?"
妹妹: "梓丹!!"
老師:"你個名咁好聽0既?? 丹丹呀??"
妹妹:"丹丹!!"
老師:"咁你係唔係叫丹丹呀?? 係唔係呀??"
妹妹:"丹丹!! 丹丹!!" (oh...答錯了...)
比老師發現左, 問我妹妹係咪唔舒服, 我答:"係呀, 有少少傷風....", 老師話:"係囉.. 有d鼻塞呀..."
然後老師响個布袋度拎左個橙同架車出黎....
老師分別指住個橙同架車問係咩黎, 李梓丹淨係答左橙, 問架車時突然啞左....
老師叫佢將架車推比老師, 大家推黎推去幾下咁啦, 咁佢都有做....
老師問佢個鼻响邊, 佢突然捉住我隻手, 可能係想叫我走, 好彩老師即刻轉叫佢指媽媽個鼻, 佢做左, 然後口, 眼, 耳仔都做左....
老師拎本書出黎, 叫佢認圖, 認左十幾個, 佢全部認到....
但中途, 認認下圖, 老師突然拎轉背攞左張紙巾比我, 原來妹妹流左條鼻水出黎呀, oh...點解會咁架???? 個幾鐘都冇流過鼻水, 點解而家係流呀?????
抺完鼻水, 妹妹突然捉住我叫我走, 佢話要去搵嫲嫲.... oh...shit.... 老師即刻攞盒蜂蜜星星出黎問佢要唔要, 哈哈, 好彩個為食貓即刻ok返... 認埋d圖, 等老師同我講完幾句就say bye bye走人....
其實d問題係勁淺, 只係睇個小朋友0個一刻0既情緒, 有時真係控制唔到...
然後我地又去左另一個地方等 (等呀等~~) 好彩今次我地有蜂蜜星星食住等...
去見校長, 校長話佢地今年收左1300個申請, 但上, 下午班再加埋全日班都只係得大約100個位, 哈哈, 咁應該都冇行架0刺...
離開時已經6:30, 德望已經關門, 可能呢個係神0既意思, 因為我之前一直都諗緊報唔報, 因為佢地係天主教學校, 而家唔駛諗啦...hehe....
跟住我就同婆婆趕去食生日飯, 妹妹病左, 唯有跟嫲嫲返屋企lu....
