111111

11/11

今日係2011年11月11日, 六條一, 我付出了我的第一次, 就係去針炙...

話說我右手手腕已經痛左一段時間, 第一次睇左個旺角0既骨科, 佢比左D消炎止痛藥我, 食完眼訓到完全做唔到野...

食哂D藥有少少好轉, 不過唔敢再食佢D藥0刺, 同埋, 我覺得個醫生有少少亂咁黎, 不太專業...

經阿敏介紹去左睇林敬熹醫生, 佢間醫務所好靚, 一入去就鍾意左... HEHE

佢.... 年少有為, 又後生, 又叻, 個人又NICE, (差D變左我偶像呀... 哈哈哈), 一睇就知我咩事, 話我隻手0既骨好鬆, 同埋軟骨都有事...

但睇一次實在太貴, 我睇一睇, 照下超聲波, 電一電, 就收左$2600...

佢比左個護腕我戴, 叫我做野同湊女就戴住佢...

呢排係有好轉喎...

醫生話下次覆診再睇下情況, 可能要打葡萄糖胺或血小板刺激軟骨生長...

嘩, 但係好貴架, 要成萬幾蚊呀....

同事建議我先去做下針炙...

都好喎, 約左今日去油蔴地睇馬師傅...

佢係我奶奶同姑仔睇開的, 姑仔坐骨神經痛, 針左兩次就好返, 好神奇咁喎...

等0既時候, 見到佢幫人落針, 好可怕, 好似好痛咁喎...

馬師傅都幾多人幫襯, 佢為人勁風趣, 睇0既過程都唔似睇緊醫生, 成日講笑...

不過佢話我唔可以針住, 因為我血氣唔好, 心唔夠力(即心血少), 睡眠質素低, 而家應食左3劑藥先睇下可唔可以針...

隻手0個度, 佢幫我入左一次位, 又係好似好D喎, 但幾時會再移位, 佢話就要睇佢功力...

其實, 我成日要抱阿女, 又做家務, 就算移返位都好正常啦...

但係佢話我係條刃帶有事, 唔係軟骨喎, 兩個醫生都好似好叻咁, 究竟邊個先岩呢???

但係馬師傅講0既野又好似好準咁喎, 佢話我"頭腦好清醒, 理解能力強, 同埋第六感都好強....", 佢講得咁準, 我冇理由唔信佢啦, 佢0既推斷應該冇錯!! wakakakaka...

針炙唔成, 馬師傅只收左$50診金, 開左藥單比我自己去執藥...

下星期五再覆診...