尋找快樂: 行程緊密的十一假期

2011年10月8日星期六

行程緊密的十一假期

10/1

尋晚妹妹好早訓. 今朝8點幾就摷我起身睇書, 救命呀~~~
我戴埋眼鏡對眼都係濛到睇唔到書, 好攰好攰~~~

後來我地玩尋日學校送0既串字遊戲, 妹妹好有興趣喎, GOOD!!!

食早餐, 妹妹食完半隻烚旦, 再食朱古力奶+脆脆早餐, 見我食月餅佢又話要食, 有冇咁勁呀??? 仲要霸左三舊(即3/8), 死霸爛霸其實咪又係食唔到!!! 哼!!!
有一日, 妹妺突然問奶奶, 點解姑姨婆唔唔去佢生日會, 嘩, 竟然突然會諗起喎!!!
奶奶同佢姑姨婆講, 於是相約姑姨婆去彩雲邨好彩飲茶, 妹妹自從返下晝班好少可以飲茶, 嘩, 今日見到一枱都係脆卜卜0既野, 仲唔勁食咩!! 炸雲吞, 乳鴿, 頭抽焗魚腩, 一路食一路係咁笑!!!
妹妹好鍾意姑姨婆, 見到佢好開心, 仲有禮貌到不得了, 開口唔該姑姨婆, 埋口又唔該姑姨婆, 真係頂佢唔住呀~~
姑姨婆應承同妹妹去搭船船, 而我就趁機去元朗JOIN埋媽咪同阿佳, 點知由彩雲邨去到尖東塞左個幾鐘, 咩事呀??? 結果我只可以直接去醫院探婆婆...
婆婆右手同右腳都痹, 右手今日仲要遞高就痛, 放低就酸, 攪到個人覺得好舒服...
媽咪話婆婆成日講講下就偏咀, 我就覺得婆婆好叻0刺, 比在我又何止偏偏咀, 我諗我喊左九年0刺...
三舅父同舅母見到婆婆咁辛苦, 尋日同媽咪講不如唔好食肺癆藥, 大家都好心痛呀, 不過... 醫生之前講過, 點計都係醫好過唔醫0既..
下晝媽咪同阿佳睇左幾間老人院, 都係覺得基德好, 我諗多數都會入呢間0刺...
再問埋醫院社工同醫生意見就決定0刺...
今日我要早D走, 因為趕住返屋企睇煙花, 應該係話, 趕返去睇下屋企睇唔睇到煙花先岩, wakakakaka..
媽咪同我一齊返去, 响元朗西鐵站見到有間SHOP就黎執笠, 入去買左4件衫+1個袋比媽咪同奶奶, 夾埋都係$145, 哈哈, 唔係$1450呀, 係$145咋, 哈哈, 平都笑呀!!!
返到屋企岩岩9:00, 煙花岩岩開始放呀....
原來煙花係放到咁低架, 雖然都睇到大半, 但有少少失望, 如果放高D就好0刺...