視察老人院

9/30
媽咪今日下晝要去攞藥, 原來佢之前行路行唔直係因為輕微中風先兆, 好彩有睇開醫生, 醫生開左D預防中風0既藥比媽咪食... 唉, 原來媽咪都老了, 我地一直都專注婆婆0既病, 都有少少忽略左媽咪, 真對不起!!
今日唔知做咩, 遇著個好詳細0既醫生, 正常詳細係好0既, 但今日媽咪約左我一齊去元朗睇老人院, 我地4:30仲响紅磡, 人地話要6點前
原本仲計劃睇三間 - 兩間基德, 一間好旺, 可惜, 去到第一間基德己經係5:45, 睇完都6:15, 第二間基德負責人己經走左...
呢間基德响大榮華酒樓附近, 交通算方便, 不過樓下條街唔係咁乾淨....
上到去, 唔算新, 但算整潔, 起碼冇上網D人講0既老人院尿味...
單人房要$8400, 申請綜緩唔知可以批幾多津貼呢??
呢間係甲一級0既院舍, 任何時候都有護士响度, 又有醫生註診, 呢樣野都幾緊要...
同埋佢地唔可以請外勞, 個個員工都要响香港住滿7年, 呢樣都放心DDD...
婆婆行動不便, 住單人房一定好悶, 又少人會經過, 唔舒服有冇人睇到架???
响大廳見到有D婆婆坐响度, 但不見得開心, 可能個個都係身體有事, 多數婆婆都唔出聲, 見到我地眼望望咁..
要睇多幾間先可決定...
今日好早呀, 6:30就到醫院探婆婆, 婆婆又冇尿疴0刺, 呢兩個星期都要靠插尿喉排尿, 一除就冇得疴, 究竟咩事?
婆婆自己都好担心, 成日話冇得疴尿會死, 佢好緊張, 今晚成日叫我地唔好走, 要等到姑娘幫佢插返尿喉先走得... 佢成日覺得冇人响度d姑娘就唔會理佢... 婆婆, 事實唔係咁架... 我覺得博愛0既姑娘己經算幾好0刺...
婆婆話佢好唔舒服, 唔識形容, 而家過一日好似過一年咁, 我聽到都覺得心酸, 除左氹佢, 都唔知可以講咩...
真的好無奈, 以前婆婆一個人照顧7個仔女, 而家老左, 7個仔女都照顧唔到佢, 要住老人院, 諗起都唔開心, 原來人老左就係咁, 周身病痛, 見到有d婆婆要插胃喉, 好痛苦咁, 突然好怕老呀...

P.S. 好奇怪, 之前姑娘話肺癆藥唔可以一日唔食, 一漏左就要重新再食過個療程.... 婆婆今晚嘔左一粒藥出黎, 話比姑娘知, 佢話唔會補食, 寧願食少好過食多, 又話食少一粒唔緊要, 又會咁0既????