勁歌熱舞 - POKER FACE

有一日同陳主任傾開電話, 佢話比我知每朝早佢地都會跳舞令小朋友精神起黎... 佢地最近跳0既係lady gaga - poker face...

嘩, 冇諗過會跳lady gaga囉, 勁喎...

於是我有一晚就播左比妹妹聽, 佢聽到都好開心, 仲跳起舞黎添!!

自此之後, 佢間中都會叫我播, 有時我播歌, 有時响youtube開個mv黎睇...

今日, 妹妹突然興起, 又叫我開0刺, 今日仲大大話話聽左起碼5次, 佢話: 我好鍾意聽架!!

平靚正便當

尋日sick leave之後返工, 勁勁勁多野做呀!!! (不過其實阿姐已經幫我做左好多, 我知佢好夜先走, 真係唔該哂...

)

lunch時去吉之島買野返公司食, 順便買d乾糧for食藥...

我鐘意食兩餸飯, 但今日望黎望去都冇野岩心水, 於是行左去bento express...

比我發現左呢d好平0既便當, 呢個係三文魚炒飯+南巒炸雞, $30咋, 再加一杯野飲, 都係$33!!!

三文魚炒飯原本係有少少乾, 但因為有側邊0個d沙律醬, 味道突然提升一百倍, 好味道!!

炸雞都好好味呀!!!

原本已經食緊, 都特登舖返好影返張相先...

即刻介紹比同事啦, 同事都話好抵呀!!

以後會多d幫襯...

L'elan Vital美顏卸妝油

呢個月ECOSWAY有呢隻卸妝油做緊促銷, 好平, $99兩支, 每支140ml...

店員話好用, 咁信佢一次啦, 衰極都係$99啫...

第一次用, 未識控制, 覺得d油好快鯨左咁, 同我平時用開0個d唔同...

第二日再用, 當d油鯨左之後, 隻手濕一濕水, 再捽, 就乜都乾淨哂0刺...

假期時劃左eyeline同mascara, 都一樣落得好輕鬆....

good, 要趁5/15前再去入貨呀!!

跌親

星期四晚, 爸爸媽媽都病左, 所以趁嫲嫲同妹妹去唱K可以早D訓, 訓訓下, 聽到妹妹响廳度喊, 咩事呢? 出去睇下先...

當時已經12點, 原來嫲嫲同妹妹响街跌親, 嫲嫲當時抱住妹妹, 叉錯腳跪左落地下, 妹妹受驚喊左一陣.... 返到屋企嫲嫲換左條短衭出黎, 妹妹見到嫲嫲兩邊膝頭哥都損左流血, 所以喊左出黎, 係咁叫嫲嫲搽藥膏...

我出去安慰妹妹, 睇得出妹妹真係好唔開心... 佢僕响我度喊, 一路都唔起返身...

我同妹妹講, 咁唔好要嫲嫲咁辛苦0刺, 要乖乖地, 媽媽幫你沖涼啦...

一路沖涼, 妹妹都冇笑過...

每次嫲嫲响佢面前出現, 佢都會催促嫲嫲搽藥膏, 好可愛!!!

沖完涼, 妹妹堅持要同我訓, 但因為我地都病緊, 房裡面滿佈病菌, 好怕會傳染比佢啊...

抵抗力差

星期三下晝同星期四都SICK LEAVE左, 睇左兩個醫生, 雖然係唔同0既病, 但佢地兩個都不約而同咁話係我抵抗力差, 唉, 乜我真係咁弱咩? 我平時又唔覺吖...

不過幾個月黎, 真係好似成日要食抗生素, 又成日發燒, 仲細咩? 成日發燒...

要諗諗辦法先得, 要有好0既身體, 先由飲食同生活習慣開始著手....

飲食 - 無肉不歡0既我, 要開始食多D菜, 生果, 要少D甜食, 少凍飲, 少街外食物...

生活 - 要多休息(盡量吧, 難), 希望可以多做運動, 多到郊外呼吸新鮮空氣...

大戶屋

4/25

離開動植物公園之後, 我地搭23號巴士落CWB...

時間尚早, 應該唔難搵位...

一於去試我咁耐都未食過0既大戶屋啦...

妹妹响巴士度已經訓著左, 去到餐廳都未起身...

但當我地話佢知有野食時, 佢就好快醒左0刺, 仲好精神添!!!

爸爸叫左個醬燒雞肉飯+凍烏冬....

而我就叫左滑旦雞肉飯(又係雞肉)....

兩樣都好好味呀!!! 不過爸爸個雞肉好味d.... 而我個旦又好好味喎....

妹妹有爸爸0既烏冬加雞肉再加我個定食0既一碟紫菜... 正呀... 食哂D紫菜, 我地問WAITER哥哥要多D, 佢都好好人再比, hehe....

又好味又經濟, 三個人食唔駛200蚊, 凍飲都係$10杯, 仲平過茶記呀!!

復活節假期第四天

4/25

今朝妹妹一擘大眼, 就問我: "睇菠蘿仔??"

我: "係bulu仔呀~~"

妹妹: "睇bulu仔???"

我: "淨係可以睇一次架咋, 遲d先睇另一套啦..."

妹妹: "咁去廸士??? (廸士~~), 廸士尼有mickey, minnie, 白雪公主, toy story, 胡廸, pooh pooh, 豬豬, 有好多公仔架..."

我: "好啦, 下個月同你去啦...."

妹妹:"咁去游水???"

嘩, 朱多要求......

最終, 我地決定去動植物公園....

先搭307去中環, 然後搭的士去動植物公園...

呢個動植物公園, 我印象中未去過... 原來比我想像中多野睇同值得去...

上網D人講到同小朋友去好辛苦, 但我又唔覺喎... 只係一開頭0個條斜路, 妹妹唔比爸爸抱, 我抱住妹妹行行下, 一路扯蝦, 感覺好似爬山咁.....

呢度有好多唔同品種0既馬騮... 

呢隻馬騮有個BB攬住架, 佢攬得好實, 媽媽(妹妹話係爸爸喎..)周圍走, BB都唔會跌落黎, 勁!!

呢隻馬騮, 成日捉籠出面0既昆蟲黎食...

嘩, 好大隻猩猩呀!!!

仲有好多turtle...

假0既豹, 妹妹個樣好似驚驚地....

好多標本....

雀雀, 呢隻係紅鶴, 顏色好SHARP...

仲有金剛鸚鵡呀, 菠蘿仔呀!!

睇完雀雀我地就差唔多走0刺... 都好多野睇呀, 妹妹好開心!!

復活節假期第三天

4/24

今日終於到妹妹第一次入場睇戲0既大日子!!!

最緊張0既係爸爸, 講左N咁多日, 又講左NNN咁多次, 妹妹已經聽到冇乜反應...

因為之前响Mcdonald換左個奇鸚嘉年華0既玩具, 妹妹堅持要睇呢套戲...

我地2:00PM去到奧海城...

哈哈... 點解呢個小妹妹咁歎0既...

一去到戲院, 先同thomas影張相...

買定爆谷同汽水以防妹妹唔專心... 妹妹有爆谷, 鏡頭都唔識望....

差d唔記得買眼鏡....

入到去, 套戲即刻開始做, 妹妹好緊張, 攬住筒爆谷都唔識食, 一路望住個screen未郁過...

比想像中好, 妹妹一直好專心睇, 因為係3D戲, 睇睇下我都覺得攰, 幫妹妹托高副眼鏡, 比佢望一望正常野, 點知佢兩次都即刻將副眼鏡放返低, 真的好鍾意睇咁喎...

妹妹好乖咁睇哂成套戲, 抵錫!!!! 完場之後我地問佢好唔好睇, 佢話好睇, 咁我話下次再睇另一套啦, 佢即刻係咁問我睇邊套, 好似想而家即刻去咁, 哈哈....

套戲0既主角叫BULU仔, 妹妹叫佢做菠蘿仔!!!

想離開奧海城時, 見到佢地有個function, 係比人影電影海報....

無無聊聊又玩左幾個字...

下一站去左美麗華D-MOP, 冇收鑊, 同左妹妹去九龍公園玩一陣SIR SIR, 經過mcdonald, 妹妹扭計話要食, 妹妹都好少扭計呢樣野, 我地呃佢冇位, 點知佢原來好醒目, 指住張空枱話"有位呀!!", 妹妹已經大個女0刺, 邊有咁容易呃呢??

每次去九龍公園, 妹妹見到人地游水都會好想游, 今晚佢睇完之後問我:"媽媽, 你鍾唔鍾意游水呀??", 妹妹, 你問得好大個呀!!

一陣賴尿呀!!

4/24

尋晚等緊小巴返屋企時, 爸爸想咬妹妹pat pat, 我喝住: "一陣賴尿呀!!", 因為妹妹冇鴨片....

今日搭車時, 爸爸又想咬妹妹pat pat, 今次妹妹自己喝住爸爸: "一陣賴尿呀!!"

復活節假期第二天

4/23

今日同妹妹去太婆屋企, 呢排妹妹响屋企已成功戒片 (除訓覺外), 今日出街, 我都冇同妹妹鴨片, 妹妹好成功, 一直都冇賴尿, 响太婆屋企有去廁所...

不過返屋企途中, 妹妹响小巴度掛住玩電話, 唔小心賴左篤尿响我大脾度, oh... 又會臨尾香0既...

不過, 我都覺得第一次算好叻架0刺, hehe....

爸爸講鬼故??

4/22

妹妹一路睇卡通片都一路會問問題, 今日爸爸同妹妹一齊睇三隻小豬0既故事...

平時妹妹都成日睇呢個故事, 爸爸今日一路講, 妹妹一路聽, 點知聽聽下..... 妹妹突然覺得好驚喎.... 驚到走左入房訓响床, 爸爸叫我入去安慰下佢, 佢想喊, 同我講佢要訓覺0刺....

哈哈... 咩事令到小妹妹咁驚呢? 莫非爸爸將三隻小豬變成鬼故??

復活節假期第一天

4/22

今日係媽咪同妹妹第一日假期, 妹妹一起身就話要做功課....

然後.... 就成本假期作業都做好左....

哈哈... 打破左我地以往假期最後一日先開始趕功課0既慣例, good!!!

今日冇出街, 我地响屋企休息一天...

忟爆

4/21

今日超級忟呀!!!

1. 平時校兩個鬧鐘, 今日兩個都唔响, 原來一個我唔記得校, 一個就唔知做咩唔响... 唉... 遲哂到...

2. 為左星期日同妹妹去睇戲, 李智恆已經煩左我好多日, 上次最後明明講好如果唔睇3D就唔駛咁急買, 點知今日又打黎話我仲唔買, 喂, 你都好難捉摸啫... 仲有, 我返工唔係成日都可以咁得閒上網預訂戲飛囉, 咁得閒打比我催我不如你自己搵下???

3. 下晝miss左媽咪0既call, 放工返緊屋企先得閒覆, 原來婆婆又試好唔舒服, 好暈, 可能冷親, 不過食完成藥之後已經好返好多... 媽咪話婆婆有少少腳腫, 我好懷疑, 正常如果遵照醫生吩咐一定唔會腳腫, 腳腫代表已經肺積水, 又或心肺都積水, 唔逐樣問媽咪都唔會講, 原來婆婆每日飲0既水係比規定0既多出一倍!!!!!! 明知唔可以仲點解要做呢??? 成日因為飲水太多又要入醫院有咩意思呢?? 我嬲嬲地不停話媽咪, 然後教佢點樣去分配飲水, 講講下佢都冇心機同我講, 收我線...

因為已經過左醫院姑娘0既工作時間, 我留左言, 佢地真係好, 一早就打比我, 我叫佢幫我同媽咪了解多d, 勸佢唔好比咁多水婆婆飲, 佢都好樂意咁做, 講完仲再打比我講返, 真好交帶!!

4/21

4/21

呢一日係學校復活節party, 尋日响學校做左個勞作拎返屋企...

頭髮好零亂啊....

入面有皺紙同朱古力復活旦...

開開心心去party!!

唔好味的板長壽司

4/19

原來已經有兩個月冇做facial, 唔怪得知d皮膚好似唔多掂咁啦...

做完岩岩老公都黎到tst.... 先去lcx bread n butter攞件衫.... 係之前無聊响fb度like左bnd0既專頁, 佢地有一日就通知我話我係幸運兒, 叫我去攞件衫, 哈哈哈, 咁似騙案0既? 但原來真係有得攞架喎... 不過係一件舊款0既冬季tee....

正在頭痛晚餐食咩之際, 路經板長, 冇人等位 (真慘~~), 老公問我夠唔夠胆食, 我當然夠! 為左食, 我咩都唔怕架!!

餐牌標明每種食材0既來源, 原來仲有好多响日本黎, 千葉懸, 愛知懸都有...

如果好味, 一餐半餐輻射壽司都可以接受, 可惜, 呢一餐, 好似冇乜邊樣好味, 係樣樣都冇乜味...

NO GOOD!

4/19

今日嫲嫲打電話比我問野, 妹妹搶住同我講....

"頭先跌左美味棒, 跟住行返轉頭買!"

原來佢放學食完一個美味棒, 第二個食食下跌左落地, 要嫲嫲行返轉頭買...

********************************************************************

夜晚同佢做功課, 呢日有三樣功課, 嘩, 咁多0既...

兩樣填色+一樣劃線...

其實妹妹唔係咁鍾意填色, 我諗佢覺得悶... 填色功課都係我同佢一齊揀色, 一齊做, 做做下佢都冇乜心機.... 填完第一樣, 我問佢填得靚唔靚, 佢擰擰頭: "NO GOOD!", 然後就逃走左去嫲嫲房, 訓响嫲嫲隔離睇電視...

仲有兩樣功課, 當然要捉返佢出黎啦, 佢就望住我係咁講NO GOOD, NO GOOD, 比佢激死...

復活旦及飾物設計比賽

4/18

一見到呢D通告就頭痛, 因為我呢個媽媽真係美術白痴黎架... 以前讀書時, 真係好多勞作都欠交, 勁扣分...攞成績表有一年老師只FOCUS响"點解美術都可以唔合格"0既問題度, 結果返到屋企比媽咪打左一餐...

為左妹妹, 唔識都要死頂啦... 我地去左屋企附近0既大眾買材料, 哈! 又會比我買到兩隻發泡膠做0既旦, 咁就好做好多啦...

返到屋企, 做完功課同閱讀報告, 即刻開工...

學校鼓勵環保D, 所以我用食完0既朱古力紙盒做籃, 再用絲帶包好..

發現用紙包住復活旦比較難, 於是叫爸爸落樓下買一排水筆返黎, 點知, 水筆變左廣告彩, 咁大陣仗, 嚇左我一跳!!!

爸爸負責油底色, 但廣告彩原來好難乾, 呢度乾時0個度又印到, 最後要用風筒吹先攪得掂...

然後到我畫圖案, 嘩, 好難啫... 好彩有妹妹突然話買0既閃閃膠水... 但D膠水, 一用風筒吹即刻化開哂, 想點??

好醜樣0既成品...  (有D縐紙架, 不過唔知點解影唔到...)

搭搭下lift, 個handle已經爛左, 哈哈, d野跌到一lift都係!!!

失敗的日式滑旦牛肉飯

4/17

超級核突!!!

我呢個煮餸白痴, 跟住食譜整都整到咁, 真係衰得好高難度... hehe....

食譜係教煮兩人份, 咁我要三人份, 當然將所有材料都X 1.5倍啦, RIGHT? 得出0既結果, 就係太多水, 唔夠甜.... 亦因為太多水, D旦汁落到個鑊度就同D水混埋左.... 慘不忍睹....

好彩雖然好樣衰, 老公話味道冇問題, 而我就覺得太淡0刺...

雖然好失敗, 但煮左0既超級多飯都食哂, 佢地真好人, 竟然連妹妹都支持我, 食左好多!! 

尋日同小廚神阿佳同大廚神媽咪講起, 原來三人份0既調味料唔係二人份0既1.5倍喎, OMG!! 不過個道理我而家仲未明, 我實在太不懂變通了

不過, 我決定....一個月後會再試, 我一定要煮到一個成功0既牛肉飯出黎.... 

不想外出的星期日

4/17

今日唔想去咁遠, 妹妹又多功課做, 我地都係留响大埔啦...

哎呀, 臨出門口, 百厭星又著爸爸對鞋....

12:30, 先去大埔中心食個brunch先...哈哈..邊有咁正吖, 只不過係早午餐一齊食啫...

經過樓下0既公園仔, 又要停低玩一陣...叫爸爸媽媽玩千秋, 佢自己就去坐一陣喎...

路經新開0既滿腹, 午餐好抵, 超合乎經濟原則喎...

開張期內, 每人送兩件三文魚壽司, 可能因為太耐冇食壽司, 我覺得都幾好味呀, 不過比爸爸笑, 紙咁薄0既三文魚, 都話好食...

午餐 - 叉燒拉面, 得少少餸, 不過隻溫泉旦幾好味呀, 好似個飽飽咁好靚!

午餐 - 滑旦吉列豬扒飯, 妹妹都係鍾意食飯多d... 呢個飯都唔錯....

再去樂園, 呢樣係冇得走0既, 妹妹一去大埔中心就會識路去樂園...

再到一田逛逛, 因為咁岩今日有hello kitty...

想再到大眾同百佳買野, 點知妹妹一到超級城就一支箭勁跑, 因為佢要去坐車車....

我响後面跟住佢, 連爸爸都賣甩左... 佢跑得好快, 完全冇理到爸爸媽媽响邊度, 太過份了.... 於是我故意少少匿埋, 佢一走到車車度, 發現見唔到我, 即刻向後跑返轉頭, 佢應該都覺得自己跑得太快了, 所以冇細心搵過我就跑返轉頭...

跑到一半, 我見佢用手抺眼, 我諗佢開始喊0刺...

再跑到佢開始賣甩我0既地方, 見唔到我, 立即大喊, 大叫媽媽!! 我諗佢一定好驚0刺!!

其實我只係企响距離佢兩步0既地方, 只係佢太慌, 察覺唔到我...

我行埋去, 扮哂野... "我唔見左你呀! 你知唔知我搵你呀?? 你去左邊呀??", 跟住乘機教訓佢一餐... 然後沿路間中都提起呢件事, 希望佢會深刻d啦...

買呢樣, 買0個樣, 返到屋企已經5:30, 嘩, 仲有好多野做喎...

功課 - 未做...

閱書報告 - 未做....

復活節勞作 - 都未做喎....