陳主任來電

LUNCH時, 陳主任來電...

陳主任話怕家長日唔記得同我講, 要而家講左先, 因為都幾funny...

- 尋日考數學時, 老師random比左幾個數字妹妹認, 有1, 2, 5, 8, 10... 1同2, 妹妹講英文, 但5同8, 妹妹就講廣東話, 10字就時認到時認唔到, 老師只識少少廣東話, 以為妹妹講個5字係"唔"字, 唔通係唔想做? 唔識? 好彩陳主任响度, 佢話返比老師聽妹妹只係講廣東話... 於是佢地比妹妺用英文做counting, one, two, three, four, five!, 但之後, 妹妹仍然係再講廣東話"5"字, 哈哈!

- 今日考中文, 普通話老師都唔知妹妹講緊咩, 原來妹妹又係講廣東話, 哈哈, 學校係學普通話架喎... 不過最衰有時媽媽响屋企都會用廣東話黎教, 所以佢考試又講廣東話... 又好彩陳主任識聽, 只要認岩左, 廣東話都會當佢岩0既...

- 陳主任話其實妹妹都幾叻, 大部份都做到, 叫我唔駛担心, hehe... 咁我就放下心頭大石0刺...

- 陳主任問我, 妹妹係唔係好鍾意食零食, 哈哈!! 佢梗係响學校都好為食呢! 原來佢課室有個載有零食0既盒, 每一日妹妹都會用好溫柔0既聲線同陳主任講:"食糖糖?", "食棉花糖?", "食薯片?"等等, 其實其他小朋友都會咁樣做, 但妹妹就係每一日囉... 跟住陳主任會問佢:"咁你乖唔乖架? 乖先有得食架!", 妹妹就會用燦爛0既笑容黎回答:"乖呀! 好野!", 然後跑返自己個位坐低等食, 哈哈! 為左食, 佢係咩都會做架!! 而其他小朋友都因為佢而有零食食0刺, 好野!!

- 陳主任仲讚, 呢排妹妹早左返學, 要keep住, 因為妹妹每日都要用半個鐘頭黎回魂, 如果遲到錯過左早操時間, 咁佢就會學少左野... 咁呢排妹妹又真係好乖0既, 除左媽媽都早左起身之外, 佢亦冇扭計, 冇喊, 又肯刷牙, 非常合作, 陳主任話可能因為之前成日病, 所以特別扭計d,  希望繼續keep住啦...