小冬中風

10/31

尋晚同老公, 妹妹去左尖沙咀SHOPPING, 食埋DINNER大約10點返到紅磡...

一落車, 老公收到BB來電, 原來BB打左幾次我都MISS左, BB話小冬有古怪...

佢返到屋企, 發現小冬行唔到, 個身又向右傾, 不停喘氣, 可能有事...

我落車0既地方好近BB屋企, 即刻返去睇下...

最近0既經驗話我知, 原來當個人緊張時, 跑係唔會扯蝦的 (平時追巴士跑幾步我都會扯蝦...)

返到屋企, 摸摸小冬, 小冬成日伸手好似想要我抱咁, 但我唔敢抱佢, 怕整親佢呀...

我坐响度, 佢踏上我大脾, 平時冇咁乖架...

至愛0既雞條都冇興趣, 一定有事了....

爸爸沖左少少奶比佢飲, 佢一聞到D奶好似好想避開咁, 佢一定好唔舒服...

決定去麥花臣診所, 0個度有夜診...

响的士度, 小冬好似好驚咁, 好唔正常, 對眼好似成日响上望咁, 我都好驚...

後來靜左落黎, 攬住左BB隻手...

搭的士途中, 响梳亞道見到一間24小時0既診所, 情況緊急, 我地決定落車睇呢間, 點知, 入面居然冇人, 打電話入去又冇人聽, 唉, 冇人就唔該唔好開燈啦, 害死人0刺!!!

好彩有的士, 我地又即刻上車, 好快去到麥花臣...

醫生檢查時, 小冬都唔識反抗, 平時0既小冬, 一見到獸醫就好惡想咬人...

醫生檢查過, 話小冬中風, 小冬眼珠係不停上下跳動, 身體又側傾, 醫生話好多老狗都會...

不過醫生話康復機會係60-70%, 咁都好D...

另外, 小冬心臟0既雜音, 已經有4-5級, 最高6級...

因為小冬食唔到野, 要留院吊鹽水, 希望佢呢幾日食得返野, 咁就可以返屋企了...

以後小冬都可能會行得唔好, 咁要小心照顧, 縮細佢0既活動範圍, 同埋用多D毛巾墊以免受傷...

小冬要留院, 我地要走0刺, 小冬望住我地, 其實都唔係好忍心走呀...

聽日都係唔去剪頭髮0刺, 放工去睇下佢....

獨食...

10/27

今晚放工返到屋企, 爸爸同妹妹沖緊涼, 但妹妹唔肯洗頭, 响度糾纏左好耐, 呢排妹妹都係咁, 成日唔肯去沖涼, 到沖時又多多問題...

最後我同左妹妹沖, 爸爸氹佢快D沖完比粒糖佢...

出到黎, 我比左一包三角形包裝0既花生味M&M妹妹, 妹妹話同我一齊食, 但我要食飯, 於是叫佢留返D比我食...

哈哈, 由放第一粒入口之後, 再唔諗住分比其他人LU...

爸爸唔想佢食哂成包, 叫佢分D比大家...

妹妺即刻走去梳化度:"唔得!!" (呢排咩都話唔得..)
 
"我要食哂!!" (出到街都係咁架, 肉酸呀..)

"你唔食得呀, 你咳呀!!" (我地平時講架喎..)

"你地唔乖呀, 冇得食!!!" (老師平時係咁講嗎?)

"你地乖D, 我星期日買比你地食好唔好?? 好!!" (wakakakaka, 我地都未答, 你就幫我地答埋...)

有野食, 就冇人性0刺...

我的白雪公主

10/25

 

呢個星期五就係學校HALLOWEEN影相日...

今日LUNCH去左H&M, 真好, 响呢度比我搵到鞋同頭COOL襯白雪公主裙, 又平又靚, 又唔駛再周圍搵…

 

返到屋企比妹妹試下先, 對鞋好似岩岩好咋, 奶奶怕太細對, 但妹妹話岩著, 唔痛, 貪靚鬼, 都唔知係唔係…

 

影返張相先… 哈哈… 扮女仔呀…

 

之後唔肯除返落黎囉…

返工了...

10/24
今日要返工了, 出門口前, 同婆婆講聲:”我返工0刺!”
我會努力加油架0刺!
返到公司, D同事好關心, 有心呀!
返工令心情好D, 雖然個心都係成日諗住, 但起碼唔駛一直諗落去, 越諗越唔開心…

DORIS送左兩隻公仔比我, 三姐妹坐埋一齊, 我諗起屋企的三姐妹...

左起: 媽咪, 大姨, 二姨...

放工時間到了, 正常呢個時間可能要趕去醫院探婆婆, 但係… 而家唔駛0刺…
枱頭D MEMO紙依然寫住”復康巴士”, 係之前提自己記住幫婆婆申請, 而家… 唔駛LU…
枱面仲有好多紙係紀錄同醫生電聯時寫低婆婆0既情況, 呢D我都會好好KEEP起…
返屋企睇下妹妹學畫畫學成點, 返左屋企對住妹妹都幾好, 唔會有時間比我唔開心…
妹妹幅畫好靚喎…

老師話妹妹而家識填顏色唔會填到好出界, 有少少進步, 呢點我見佢做功課都有同感…

 

老師又話妹妹會自己提出想畫咩, 好得意… 佢話妹妹上一堂一見到老師就即刻話佢想畫貓貓, 今次老師話畫HALLOWEEN, 妹妹話幅畫要有人, 所以原本南瓜下面0既糖變左畫一個人响度…

 

呢幅就係上一堂畫0既貓貓0刺... 我比較鍾意呢一幅...



然後我地整啫喱, 又食野, 好忙啊!!

 

靜落黎時, 己經11點幾, 寫下BLOG, 又要訓0刺…

婆婆的照片

10/23

婆婆離開後, 我地各自响手機度搵到婆婆一D相, 即刻用WHATSAPP交換, WHATSAPP真係好好用!!!

呢D相, 係婆婆响醫院同我傾電話時影的....

 

 

落公園散步, 婆婆好開心!!



阿佳SEND左呢張相出黎, wakakaka, 我地好細個, 婆婆同媽咪都好後生... 我好核突呀, 燶左咁0既?

為婆婆辦理身後事

10/23

尋晚3:30先訓, 今朝8點幾又醒左, 個心好痛好痛, 從來未試過, 原來親人離開係會有呢個感覺...

一路諗, 一路喊, 今日又實眼腫腫了…

究竟婆婆而家响邊呢? 好掛住佢呀…

佢係咪真係會去到天家架? 突然個腦泛現左一幕, 婆婆對眼未睇到野, 對腳未行到, 坐左响醫院, 又冇人理, 好無助呀~~

另一幕, 婆婆响條白濛濛0既路上, 唔識路, 周圍咩都冇, 點算呀? 點行好??

好驚.. 點算呀???

妹妺醒了, 我同佢講今日要去幫太婆做D野, 我話太婆去左好遠0既地方… 妹妺咩都唔識, 問我:”跟住喊呀?”, 因為我正在喊緊…

再傾左幾句, 佢叫左爸爸入黎, 然後話要玩玩具, 佢叫爸爸:”你叫媽媽唔好喊啦..”, 然後拎起個玩具, 同我講:”你喊你冇得玩0刺!!”, 然後出左去… 哈, 老師响學校係咪咁樣?

約左1點去寶福紀念館辦婆婆喪禮, 尋日聯絡時, 佢地問用咩儀式, 我真係唔識答, 婆婆決左志, 但屋企人拜神, 於是佢地建議拜神.. 不過我都知, 基督教儀式係冇可能, 如果提出只會攪大件事, 比舅父阿姨鬧…

基本上, 只要過兩日將張臨時死亡証交比佢地, 佢地就會幫我地跟進埋其他文件, 今日連壽衣, 棺木都己經揀好哂, 基本上都冇太多野要準備了...

我地揀左個80人禮堂, 因為呢個禮堂新好多, 靚好多…

定左11/13守夜, 11/14上山... 然後照婆婆遺願將骨灰放响紀念花園, 我地星期六就周圍去視察環境...

而家大家努力著手搵搵婆婆生前靚相先…

幫婆婆攪掂左件事, 佢見到應該放心D了, 婆婆交比我地0既事, 我地每次都盡力做好架! 放心!!

返到屋企, 訓左45分鐘, 實在太攰0刺…

聽日要收拾心情返工了, 要加油, 振作呀!!!

婆婆離開了

10/22

今朝8:30醒左, 訓唔返...

11:00打過比媽咪, 媽咪話岩岩到左醫院, 但未見到婆婆...

12:30同BB一齊去食野然後再去...

途中, 媽咪打黎, 佢話今日婆婆血壓去到120, 好左好多, 但問醫生, 佢話係假象黎, 唔好信, 要睇面色...

舅母0既朋友上黎睇婆婆, 叫媽咪呢兩日要睇住婆婆...

對面床0既婆婆12點幾過左身, 我記得, 尋晚我地仲响度睇佢部機D數字, 點知今日就走左...

搭西鐵去到元朗站, 剛行出車, 媽咪電話黎, 我個心諗係婆婆有事定係媽咪叫我地買野呢?

媽咪好急咁叫我地快D去, 婆婆唔得了!!!

我即刻大力推BB快行, 然後大家衝去搭的士...

途中打比阿佳, 但阿佳冇聽, 即刻打比ZOE, 好彩佢有聽電話...

肥妹己經到左...

我地好快去到病房, 婆婆己經冇哂反應, 塊面好黃, 臉都凍了, 只擘大口呼吸...

媽咪佢地話要將婆婆伸直, 唔可以將佢隻手拎出被外, 於是我地伸隻手入去拖住婆婆, 婆婆隻手都凍了...

不停同婆婆講野, 希望佢等埋二姨, 幾個鐘頭後就到0刺!!

婆婆心跳同血氧己經跌左好多, 好驚....

媽咪打比大舅父, 响電話同婆婆講野...

我都打比奶奶, 叫妹妹唱歌比太婆聽...

小穎不斷祈禱, 我不斷叫婆婆, 同佢講野, 叫佢等埋, 要精神呀, 唔好訓呀...

大姨同媽咪成日提我地, 唔好比自己0既眼淚滴到婆婆, 亦唔好太大聲叫婆婆, 怕佢走得唔安落...

婆婆呼吸越黎越慢, 有時會停左唔呼吸, 唔得呀, 婆婆你抖氣呀, 呼吸呀...

知道婆婆一定等唔到二姨了... 點解會咁???

三舅父都未到呀, 婆婆你等埋三舅父先走呀...

一路摸住婆婆, 婆婆心跳好強勁...

媽咪一睇部機, 心跳去到211....

媽咪話今日對面婆婆心跳去到二百幾, 然後好快就跌到0, 婆婆又係咁, 唔得0刺...

三舅父終於趕到, 佢冇跑入黎, 我地好忟, BB大聲喝佢先跑入黎...

婆婆停左呼吸0刺, 婆婆放鬆D, 唔駛怕, 要勇敢呀!! 唔駛担心呀... BYE BYE 0刺, 我地第二時再見呀, 你記住我地個樣呀, 前面0既路好易行, 你會睇到野, 會行到路, 响天國可以跳舞添呀, 第二時我地再見面, 十幾人圍住一齊跳舞!!! 

部機唔再顯示到數字...

其間有一下, 婆婆個身體好似洩左一下氣咁, 但我不太肯定, 因為動作不太大, 但呢一下以後, 婆婆冇再呼吸過...

有時部機會突然有返D數字, 傻豬, 你唔捨得走嗎? 唔怕啊, 你唔响度, 我地大家會互相照顧, 會成日見面, 會買你最喜歡0既野食, 就當同緊你一齊食... 燒肉, 面線, 雞亦尖, 鼓油豬肉, 家鄉雞... 第時我地再見面, 你要煮豉油豬肉呀, 我要兩隻蛋架...

慢慢, 我地都肯定婆婆走左0刺, 不過我地一直陪住婆婆, 一直摸住, 好唔捨得啊...

姑娘黎用另一部機CHECK婆婆, 話婆婆應該己經冇心跳, 但因為個身仲暖, 所以搵醫生黎睇下...

醫生(不過唔係葉醫生)好耐之後先黎, CHECK完之後, 只講左句OK就算, "OK"即係代表咩?????

聯絡左B仔, 約左佢同事聽日傾殯儀0既事...

再陪多婆婆一陣, 婆婆直至離開時, 個樣都係好好睇0既, 我婆婆係最靚0既婆婆...

個背脊仲暖, 同埋好濕, 佢流左好多汗, 所以D水腫都冇哂...

隻手都己經好重0刺, 人離開左, 個身體真係會好重的...

執埋婆婆D野, 有D我地要拎黎留念的...

摸左婆婆咁耐, 我隻左手留有婆婆0既氣味!! 如果可以比我留低埋呢個氣味就好了...

姑娘話要同婆婆換件紫袍, 然後入箱, 問我地要唔要送婆婆去殮房, 當然送!!!!

原來呢一刻係最唔捨得, 媽咪叫我同婆婆講一路好走, 我到最後一刻先喊住講, 唔講再冇機會同婆婆講野0刺...

忍唔住大哭起黎, 對唔住, 我真冇用, 成日都做大喊包...

阿佳提議上返七樓病房多謝D姑娘, 因為D姑娘真係好好... 經過見到婆婆訓0既6號床, 己經空左, 個感覺唔知點形容...

返朗屏婆婆屋企, 入到去, 坐响婆婆張床, 睇下婆婆平時用0既物品, 諗返以前婆婆响屋企0既日子...

我攞左婆婆每日用0既保溫杯同差唔多用哂0既雙飛人, 婆婆每次搽雙飛人都會覺得舒服好多... 以後見到呢D野, 就好似到婆婆一樣...

大家傾下聽日有咩特別問題, 然後去JOIN埋二姨DINNER....

夜欄人靜一個人時, 個心好痛, 原來婆婆對我地真的好重要, 冇左婆婆個心好似冇左一忽咁, 好辛苦, 唔知而家婆婆响邊呢? 做緊咩呢? 識路去天家嗎?

婆婆的最後一星期 - 10/21

10/21

今朝差唔多十一點去到醫院, 基本上而家我地幾多點去探都得, 探通宵都得, 姑娘叫我地要多黎陪婆婆...

好多醫生巡緊房, 姑娘叫我响出面等, 11:10再禁鐘...

葉醫生都响度, 真好, 一陣可以問下佢婆婆0既情形...

等等下, 阿佳, BB, 媽咪同大姨都黎左...

葉醫生出黎0刺, 佢話婆婆今日又差左少少, 血壓低左, 如果血壓再低就唔得0刺...

吊左鹽水但冇尿疴, 因為個腎都己經壞埋, 去到最後就係個腎, 咁就冇辦法了, 冇得返轉頭了...

雖然預左唔會有好轉, 但聽到呢D說話個心好UP....

仲未入得, 我地落CANTEEN食野先...

12點入到病房, 叫婆婆但婆婆冇反應, 望真D, 婆婆棚假牙都想甩出黎, 因為牙肉都萎縮了, 又一個症狀應驗了...

想幫婆婆攞副假牙出黎, 但一掂副假牙, 婆婆個咀就合埋, 明白了, 婆婆想要, 唔好除0刺...

見到婆婆冇哂反應, 又唔郁, 只有呼吸, 忍唔住係咁喊...

睇黎婆婆真係就黎要走0刺...

婆婆真係冧得好快，前幾日仲講到野，突然就差得咁快，相信係因為四舅父嘅走，精神冇左記託，就支持唔住了...

阿佳提出個好主意, 就係致電外國0既舅父同姨姨, 叫佢地响電話講出想同婆婆講0既說話, 錄低播返比婆婆聽...

搵到大舅父, 二姨, 沙田姨...

後來四舅父都搵到了, 雖然佢真係好九唔搭八, 但婆婆聽到佢把聲都會好開心0既...

我地都有同婆婆講, 放鬆D, 唔駛怕, 我地會乖, 唔駛担心我地架0刺...

婆婆真係咩都聽到架, 每逢我地有人黎叫佢一聲, 或者播錄音比佢聽, 佢心跳都會加快好多, 証明婆婆真的聽到, 只係做唔到反應啫...

越晏婆婆塊面就越紅腫, 姑娘話佢地冇野可以做到, 婆婆慢慢仲會更加腫添...

對手都腫哂... 唉...

今日CALL齊大家黎探婆婆, 要珍惜機會, 真係唔知聽日仲有冇得見架...

8點幾, 大家都走0刺, 只有我地幾姐弟, 等埋爸爸黎...

然後9點幾老公同爸爸走先, 我決定今晚留夜D...

我地三姐弟同小穎四個人留到1點, 叫姑娘再量量血壓先, 93 - 51, 好過今日晏晝少少啦, 咁我地都放心返屋企...

努力呀! 聽日再見呀!!! 你一定要等到二姨黎見你最後一面呀!!!

婆婆的最後一星期 - 10/20

10/20

尋晚搵定套衫, 怕突然醫院打黎要出去, 好彩唔需要用到…

一早打比去病房問姑娘婆婆0既情況, 咁阿佳再決定攞唔攞假, 不過… 姑娘好掘咁話:”我地唔可以响電話度講病情架! 有咩事會打比你地0架0刺!!!”, 真冇人情味, 鬼唔知有事你會打比我咩??? 但等得你通知, 我地都唔知趕唔趕得切啦…

於是… 大家決定返工先…

小穎WHATSAPP, 話院牧去過探婆婆, 叫婆婆但婆婆冇反應, 可能好攰, 晏D會再去睇佢…

媽咪未夠12點就到0刺, 佢話婆婆今日又差左, 媽咪叫左一聲婆婆, 婆婆擘大對眼, 但對眼只有一條線咁大, 到大姨再叫時, 婆婆己經冇反應, 己經冇力再做反應….

尋日婆婆手腳都有郁, 仲會起到少少身除氧氣罩, 又會講話要飲水, 但係今日冇郁過, 咩都冇做過…

轉左比100%濃度氧氣，血氧去到100%...

媽咪尋日朝早己經通知哂各兄弟姊妹…

二姨己訂機票, 星期六到香港…

大舅父未答覆, 佢尋日話盡快, 怕呢個星期趕唔到, 要下星期…

媽咪搵唔到四舅父, 舅母話會叫舅父打返比媽咪, 但到而家都冇影…. 究竟係舅父自己唔覆定係舅母冇通知舅父呢???? 無論如何, 我叫左媽咪再打多次, 盡盡努力吧!

今日都係3:30走, 我今日選擇搭巴士, 咁可以响車度訓一陣...

都好快, 5:05就到醫院...

沙田姨黎左...

叫婆婆, 佢好似有少少郁, 但唔肯定.... 但塊面瘦左好多, 冇哂水腫...

三舅父, 舅母, 媽咪同大姨都黎左0刺, 大家傾左幾句, 再望一望, 婆婆塊面又腫返哂, 又紅, 三舅父都見到, 點解會咁?

婆婆左手凍, 右手暖, 右腳凍, 左腳暖, 又代表D咩?

婆婆好間唔中會擘大眼, 但對眼冇焦點, 佢應該係睇唔到野... 佢每次擘大眼, 我地都即刻哄埋去, 爭取機會同佢講野...

婆婆有時好似想講野咁, 但又講唔到, 婆婆你想講咩呀?

婆婆有D冒汗, 不過只係少少, 唔算嚴重... 換片時, 我地响出面坐住等, 舅母的同事姨姨同我地講, 婆婆出汗代表就黎走, 叫我地陪佢多D....

陪婆婆0既時間過得好快, 話咁快就8點, 我決定唔走住, 於是我同BB一齊繼續坐, 同婆婆祈下禱, 傾下偈令婆婆冇咁悶...

9:30阿佳都黎左, 我地一直坐到10:45, 要換片0刺, 我都係時候返屋企...

我同阿佳決定聽日唔返工0刺, 早D黎睇婆婆...

佢地兩個送我去搭車, 順便食野, 一陣再返醫院...

一路行, 其實有D想唔走, 好想今晚就留响度呀...

最後, 我都係返左屋企...

小穎兩日都冇黎, 問BB, 原來小穎不斷祈禱, 佢有信心再見到婆婆時婆婆係精神的, 好多謝你為婆婆做0既一切, 無論如何, 婆婆會知道的...

返到屋企, 上網搵資料, 搵到臨終前的症狀同護理, 其實有好多己經出現左, 我諗真係要勇敢去接受了, 最重要就係比婆婆覺得安心, 响餘下0既時間過到快樂...

原來聽力係最遲消失0既, 我聽日會講多D開心野比婆婆你聽, 等我啊!!!