2011年2月10日 星期四

為紫菜還是為啖氣??

尋晚, 媽媽一餐飯, 7點半食到9點半


開頭, 妹妹一定要媽媽陪住睇卡通片, 唔要爸爸陪, 要坐响媽媽大脾上睇, 放低一齊坐响梳化都唔得


食飯只要媽媽餵, 但只食左大約1/3碗飯, 隔左一陣開始扭要食紫菜


媽媽話: 又食? 頭先咪話食完唔再食囉?


爸爸話: 正餐你又唔食, 淨係掛住食紫菜, 唔得呀!


妹妹開始喊, 死扯住媽媽唔放(! D時候又唔搵爸爸…), 狂喊, 好激動, 喊到成個人濕哂, 塊面紅哂


爸爸仍然堅持: 唔得呀! 我地就係就得你太多!!


媽媽抱住妹妹, 氹佢: 我知道你好想食紫菜, 但你唔食正餐係唔得架, 一係你食埋D, 媽媽即刻拎比你食!! (Dr. Poon0既野大派用場!!)


但係妹妹唔肯, 好似咩都聽唔到咁, 只狂叫我stand up! 去攞紫菜!!


媽媽知道妹妹諗咩, 平時都係咁食, 做咩今次突然唔食得喎!!


媽媽再嘗試同妹妹講: 咁啦, 你食兩啖飯, 即刻攞紫菜! (妹妹你食啦, 咁大家都易落台啦!!)


妹妹咁硬頸, 當然唔會就範


媽媽退一步: 唔好食紫菜啦, 不如媽媽比粒開心果你! (都唔肯, 唔似你喎李梓丹…)


一係落去兜個圈? 唔要!!!


妹妹繼續狂喊, 己經半個鐘似乎唔再係為紫菜咁, 係為啖氣, 因為其他好味野佢都唔肯再要


媽媽唔想再糾纏 (是失敗了嗎?), 最終, 比左一小角紫菜妹妹


但係妹妹覺得唔夠(一小角, 媽媽你玩我嗎?), 一路將紫菜塞入口, 一路大嗌: 大塊d!!!


其實好好笑, 但又要忍住


媽媽即刻將妹妹塊紫菜搶返, 好嚴肅地問: 你食唔食??


妹妺好認真, 好冷靜咁答: !


於是媽媽比返塊紫菜妹妹, 然後行開


妹妹食完紫菜, 捉住媽媽: 我想食飯!!


媽媽突然好感動, 鼻酸一酸 (其實喊到咁, 媽媽係有點心痛, 因為佢己經喊到野都講唔到...), 你咁乖0??


媽媽即刻餵左妹妹一啖飯, 點知…….


妹妺即刻推媽媽, 大嗌: 去攞紫菜!!!! (??????)


原來頭先講0既野佢係聽到架, 為左再食紫菜, 佢食多一啖飯!!


媽媽唔可以食言, 當然要比紫菜啦


食完, 再提媽媽要去兜個圈, 媽媽真係服左你!!!


1 則留言:

  1. TROUBLE TWO 係甘樣架呀,  你地要企硬呀 !
    [版主回覆02/12/2011 00:43:00]係呀, 真係超級TROUBLE呀...

    回覆刪除