女人真善變

2/28

  

今日妹妹的舊同學QQ媽媽邀請我地出席四月舉行0既生日會..
妹妹又有機會見到舊同學0刺!!

唔知陳主任會唔會去呢? 嵐嵐又會唔會去呢?

記得妹妺初初轉讀STAFFORD時, 日日喊住要返去”廣福村幼稚園”,
又喊話九龍塘冇嵐嵐, 廣福村有嵐嵐, 喊到我心都UP埋..

點知, 今日將呢個消息同妹妹講, 妹妹竟然問:”係咪新嗰個嵐嵐呀??”,
因為STAFFORD又有個嵐嵐, 同妹妹又係FRIEND 0既…

仲話佢鍾意新嵐嵐, 唔鍾意舊嵐嵐, 唉, 估唔到佢咁善變,
吹漲呀!!

飛行棋

今晚姑姨婆黎一齊食飯, 嘩, 又多個人同妹妹玩, 真開心!!

爸爸叫媽媽放工去買飛行棋, 佢指示左媽媽去一間超UP DUP文具店買, 最後只買到最古舊款0既飛行棋....

唔緊要啦, 都一樣玩得好開心呀!!!

老三火煱

今日原本計劃留守紅磡0既… 後來奶奶提議同老公 & MAP慶祝生日…

MAP的朋友開了間火煱店, 都己經好耐了, 大家都未試過, 就今晚試下啦…

深水埗老三, CHECK OPENRICE先知原來40個好, 0個唔好, 嘩! 即時興趣大增呀!!!!

BOOK左8點, 去到要等位, 等左半個鐘, 好肚餓呀…

無無聊聊, 互影...

 
坐定定, 未有得食, 又影....



先黎個老鴨湯底, 每人一碗, 佢地話好正, 但我就覺得太咸了, 可能係因為用黎打邊爐, 味濃左D…

火煱料好新鮮, 我食個不停…

魚卜..


牛肉, 好有牛肉味, 正!

牛胸爽, 好味...


打邊爐, 妹妹主力食牛肉同蜆, 今晚兩樣都好新鮮! 仲有個醉雞丸, 係佢地招牌菜之一, 好味道...


平時我係唔食鵝腸0既, 佢地係咁話好食, 我當然要試一條啦, 勁肥美甘香, 好好味呀! 原來係佢地每日搵人响大陸拖落黎, 香港好難食到咁好味0既鵝腸...


忌廉丸, 個樣同街市D丸冇分別, 但點解我未見過? 入面好似忌廉磨菇湯...

第二輪, 再叫左好多野, 勁!

食到10:30, 我地一家三口都應該先走0刺, 但朋友準備左一樣又一樣0既煎炸美食比妹妹, 哈哈,最後我地11:00先走… 

好難的"大"字..

妹妹而家開始學寫字, 每次做功課只會寫幾次, 我相信咁樣練習唔夠吧…

所以, 我每次都會另外準備一張白紙比妹妹寫多D…

妹妹好樂意, 一, 上, 下, 日, 田, 佢都寫到呀!!! 仲會教爸爸寫添!!!

直至今日, 遇到波折呀!!!

原來個”大”字對佢黎講係好難寫…

佢自己知道寫得唔好, 不停要練, 又唔比我捉住佢隻手寫, 最後因為寫唔到而喊起上黎…

好可憐, 我諗我要花多D心機去教佢先得…

做老師

今日放工返到屋企, 成個地下都係玩具!!

妹妺話佢係老師, D玩具返緊學...

杏林

尋日放工去左杏林做第一次treatment…

第一次, 我揀左叉背同叉腳, 叉0既功效會好D...

我因為腰又痛, 腳又腫, 比佢叉到瘀哂…

佢地話我對腳係水腫同氣腫, 膽經好漲, 因為食無定時, 膽經個位, 一叉落去就感覺到好痛, 而家瘀到好似比人打咁, 郁一郁都痛呀…

膝頭後係主要0既淋巴位, 我都好漲…

叉完之後, 背同腳都鬆哂, 腳都輕左好多, 不過… 呢個效果可以維持幾耐呢?

我明白呢D野係要KEEP住做先有效, 但我咁懶, 應該每兩星期至一個月先會做一次…

下次試下推身先…

真相大白

尋晚老公發現妹妹銀包入面有$150, 佢估係妹妹响我銀包攞0既, 講完一輪大家就算, 冇再追究, 後來我响佢銀包攞返D錢…

今日MISS FUNG打黎, 佢話我交買VCD通告但冇交錢, 吓? 冇理由!!!我明明夾好左…

我即刻又諗到整個故事0刺, 笑死我0刺!!!

話說嗰日嫲嫲去左街, 妹妹叫我比10蚊佢比嫲嫲買魚…

我話我冇$10, 因為要交錢比學校買VCD…

嫲嫲返黎, 妹妹突然同嫲嫲講:”我一陣有錢比你架0刺!!”

原來…. 佢就攞左交VCD 0既$160, 一張$10比嫲嫲, 另一張$50同一張$100就放入自己銀包…

竟然係咁!!! 笑死左呀!!!

jawbone bluetooth

10日前見到團購有JAWBONE BLUETOOTH賣, 好搶手, 我買時淨返黑色咋...

就當係情人節禮物送比老公啦...

又病

LUNCH時奶奶通知我妹妹唔舒服, 咳得好緊要, 奶奶冇比妹妹返學…

唉, 真唔開心, 點解妹妹不停要睇醫生, 好心痛啊…

今日奶奶約左覆診湊唔到妹妹, 即刻打比媽咪叫佢幫手湊住妹妹先,好媽咪半個鐘就到, 效率真快!!!! 又一次感受到媽咪住得近0既好處…

今日由我自己帶妹妹去睇醫生, 陳少儒都幾好人呀, 有問必答, 又斯文,並唔係佢地講到咁寸喎…

醫生話今次妹妹係感冒, 應該係返學比人感染, OH NO…. 感染一下,又接近$500….

路經金魚舖, 入去問下, 先知原來開缸過程需要有魚, 冇魚就冇亞摩尼亞, 養唔成菌架… 立即買左9條魚仔, 佢話呢D魚開缸都未必會死, 橫掂幾蚊條, 就試試吧…

媽咪仲落街買埋野返黎整越南檬粉比我地食, 我地食檬粉, 妹妹食腸粉, 我覺得腸粉好味D呀!!

嫲嫲買餸錢

今日我地留响屋企, 因為RAINBOW會黎做DEMO…

今次RAINBOW送左一個煲比我地, 佢聲稱烚旦烚菜都唔駛落水, 咁D營養就唔會落哂D水度…

老公睇完覺得部機幾WORK, 但我覺得太貴了, 都係等遲D妹妹讀完幼稚園先考慮啦…

自從上星期某一日我煮左個柴皮豬扒之後, 奶奶就日日都煮飯, 呢D叫因禍得福, HEHE!!!

而妹妹就每日會問我攞10蚊, 佢話係比嫲嫲買魚…

今日妹妹又問我攞, 但我咁岩冇10蚊紙, 我就同佢講, 我張10蚊紙用左黎交去學校買VCD…

妹妹好懊惱…

嫲嫲出街返黎, 買左D小食一齊食, 食食下, 妹妹突然同嫲嫲講:”我一陣會有錢比你架0刺!”

大家都覺得好好笑, 老公話好似收陀地, 嫲嫲即刻澄清完全冇同過妹妹講呢D野…

今晚一家人去左稻香打邊爐, 叫左好多野, 最終打包左幾碟返屋企, 哈哈…

SESHA ADVANCED ANTIOXIDANT CREAM

尋日上網無意中見到SESHA呢隻牌子, 個網係介紹佢0既千元眼霜, 但係, 一睇我就記得呢個牌子, 因為我都有一盒存貨!!!!

即刻搵返出黎睇, 原來CREAM黎, CHECK過原來呢個牌子係貴野黎, 上網買減左價都要HKD990!!!

好貴啊!!! 成千蚊一盒CREAM, 仲要得30ML...

不過, 用落始終都係覺得REJEUNE好用D喎... 

傾密偈

妹妺越黎越講得多野, 尤其係POO POO同沖涼時, 最多野同我講…

今晚佢講左好多野比我知…

1.    班上有兩位新同學, 叫葉葉同JAMES, 佢地响MISS FAN嗰班轉過黎的… 我問:”佢地百唔百厭架?”, 妹妹話:”唔百厭, 我地個個都乖架, 係得JACKSON百厭架咋…”

2.    而家變左ELEPHANT GROUP…

3.    我問:”咁而家你同邊個坐呀?”, 妹妹話同JACKSON, 仲話MISS FUNG叫佢照顧JACKSON…. 不過JACKSON成日走左去, 仲走左去MISS HAU嗰班…

4.    佢話MISS FUNG話佢有留心, 佢邊講邊好開心有人讚佢, 好可愛…

5.    今日放學响校車同左黃帝坐 (皇帝????), 冇得同DAISY坐, 佢唔開心, 佢話:”我同DAISY坐架MA! 我要同DAISY做朋友架MA!”, 我叫佢同姨姨講, 佢話佢有講, 但姨姨話:”唔得! 唔得! 唔得!”

P.S. 發現妹妹對中文係有興趣D, 佢會肯練習寫中文字, 可能多數都係直線, 容易寫D!

神奇的木賊草

妹妹門牙有一撻啡色野, 己經好耐...

我嘗試用指甲幫佢刮走, 但都唔成功...

唔知會唔會係蛀牙呢???

計劃要去睇下牙醫先得...

返到公司同同事講起, 有位同事話如果係漬, 可能木賊草可以幫到手喎... (上網SEARCH過先知真名叫木賊草, 我仲以為係木刷草添..)

好平, 响藥材舖買兩蚊一大包, 佢今日就帶左幾條比我...

平平無奇的樣子...

先用溫水浸幾個字, 然後就咁刷落D牙漬度...

好神奇!! 估唔到!! 三幾下就甩左0刺!!!

真係笑死我, 容易到不敢相信呀!!! 好後悔唔記得影低刷牙前刷牙後添....

妹妹又變返個靚女0刺!!! 

原來..... 木賊草又名節節草，接骨草，筆筒草 . . .

益肝膽明目, 又可治腸風, 止痢, 婦人月水不斷, 痔疾出血...

亦可作清潔用途, 煮食器具, 熨斗... 所以又有人叫做木刷 (原來都岩喎, 哈哈)

2012情人節

今年情人節冇打算要點樣慶祝, 因為由一月頭開始己經好多街去, 好多飯食, 完全冇意欲要搵特別野食…

妹妹都係我情人, 呢一日當然唔可以遺棄佢, 响PIZZA同壽司當中, 我地揀左PIZZA同KFC葡撻, 買返屋企食…

情人節平平淡淡地渡過…. HAPPY VALENTINE’S DAY!!!

冇0刺冇0刺....

今朝起身己經唔見左兩條學校0既金魚, 連黑色嗰條都被吸左埋去個濾水器度, 冇0刺冇0刺…

夜晚老公再換一次新水, 而家重新開始, 希望以後會養得好D啦…