生人勿近之地獄黑仔王

5/3

唔明白點解一個人可以黑成咁, 黑到有d想匿埋, 好怕會黑親身邊0既人呀...

1. 今日係復活節假期後第一日返學0既日子, 我呢個媽媽竟然唔知醒, 妹妹返到學校已經8:40, 又錯過左做早操時間0刺...

2. 去完圖書館借書還書, 好肚餓, 買個早餐上車食... 點知响茶餐廳出黎, 就見到一架64k走左, 跟住足足等左25分鐘, 熱到出哂汗, 凍檸水變熱檸水... 點解?? 咁大間巴士公司都要蝦我?? 燥爆, 老公打黎見我咁火, 咩都唔敢講, 好怕會遭殃...

3. 婆婆約左11:15睇醫生, 我10:20先响大埔上到車, 好驚趕唔切呀!! 好心急!!!

4. 好彩比我趕到, 但..原來今日超多人, 等到12:45先有得睇, 嘩! 我1:45要返到公司喎!!

5. 睇完拿拿林搭的士去新元朗中心轉巴士, 1:30仲响元朗, 又好心急0刺.... 原本可以趁住呢段車程訓一覺, 而家遲大到, 心急到訓唔到...

6.  2:15先落車, 急急去買個mcdonald lunch, 再急急腳返公司... 對腳勁痛, 點解呢? 明明舊年著冇事架喎! 而家起左個pork!

7.  2:25總算返到公司了, 坐低一路睇e-mail一路食lunch, 突然朋友來電問野, 一收線, 我個雙層芝士孖寶唔知做乜自己碌左落地下, 好肚餓喎! 我咬左一啖咋~~

心情燥到爆, 我知自己塊面一路黑到放工...