偷食..

5/21

呢個為食貓, 竟然偷食放响雪柜入面用黎搽面包0既芝士醬...
講過好多次, 芝士醬唔等於芝士架...

驗眼

5/18
媽媽攞左半日假陪妹妹去驗眼, 今次要嫲嫲幫忙帶妹妹去理大眼科中心會合, 因為工作忙好遲先離開公司, 去到妹妹已經驗緊眼0刺...

媽媽先登記一下資料先, 然後佢地就帶媽媽去搵妹妹...

妹妹個樣好愉快喎, 佢梗係覺得好好玩!!

妹妹已經完成左基本0既驗眼, 即係用部機驗左有冇近視, 散光之類...

然後姨姨帶我地去另一間房幫妹妹0既眼球影相, 妹妹好合作喎!!

再到視光師0既房間, 視光師uncle好nice喎, 佢地好有愛心, 令妹妹感覺好舒服…  
媽媽坐响側邊, 影左幾張相…

 
UNCLE對小朋友好有辦法, 佢用玩遊戲0既方式, 有時又玩變魔術, 令妹妹好合作做到所有驗眼0既程序, 好勁啊!!
 
妹妹一路驗, 好細隻0既字都睇到, 對眼唔似有事呀, HEHE….

 

最神奇0既地方, 就係UNCLE攞左個正方形物體出黎, 上面佈滿細細個圓形0既圖案, 就好似TEST色盲0個D圖咁, UNCLE問妹妹見到D咩, 佢每一面都見到, 但媽媽同嫲嫲就一D都見唔到, UNCLE再提醒我地見唔見有字浮左出黎, 我地都係睇唔到, 原來呢個係TEST立體感0既, 估唔到, 原來係我地兩個對眼有問題…
 
驗左一個鐘, 結果有了, UNCLE話妹妹對眼好健康, 視力好好…

 

不過佢呢個年紀應該有2XX度遠視, 而家只有1XX度, 所以要小心第時容易有近視…
 
因為媽媽同UNCLE講妹妹鍾意捽眼, UNCLE拎左本公主簿出黎, 比妹妹睇入面係空白0既, 然後叫妹妹應承公主以後唔捽眼, 再打開, 入面即刻出現好多公主, 嘩! 但妹妹似乎ON居居, 唔知佢個心諗緊咩呢???
 
出到RECEPTION準備比錢離開, 妹妹响度玩玩具玩到唔願走呀…

最後要影返張相留念...

媽媽咬梳化

5/17

媽媽尋日因為支豆漿飲得太耐而腸胃炎, 又疴又嘔又發燒....

爸爸見媽媽咁唔舒服, 同妹妹講媽媽肚痛, 因為咬梳化....

妹妹第二日放學又同嫲嫲講, 媽媽食梳化....

唉, 媽媽唔係小吉呀...

一額汗的迪士尼一天遊

5/15

因為要夾哂屋企人0既假期, 所以呢次迪士尼計劃左好耐...

終於黎到呢一日0刺, BUT同事話呢一日岩岩係一個特別日子, 買左年票0既人可以帶三個人免費入場, 買平日年票0既人呢一日都可以入場, 嘩, 似乎真係會勁勁勁多人喎...

天氣預測不太好, 會有幾陣雨, 不過起碼唔駛哂呀, 博下啦!!

大家朝早8:30就起身, 我同爸爸準備緊時妹妹突然自己醒左, 仲話係去迪士尼, 下?? 我地冇同你講過喎, 你點知架?? 仲諗住比個驚喜你添....

浩浩蕩蕩我地一行五人先落大家樂食早餐

然後搭車去荔景同姑姐會合...

因為老人家動作緩慢, 我地足足遲左半個鐘, 姑姐尋晚玩完通宵都準時, 我地真係唔好意思呀, 見到姑姐前, 我地教妹妹同姑姐講:"SORRY呀! 我地遲左少少! (然後錫一啖姑姐...), 冧一冧, 應該會化解到佢0既怒氣, 不過, 雖然練習左十幾次, 妹妹見到姑姐都係冇講到, 反而回程時突然就講左出黎喎...

嘩, 一入到迪士尼就見到mickey同minnie0刺!!

咦, 比預計中少人喎, 真係好少人, 可能個個都怕落雨, 岩哂, 連自由人都冇乜先奇喎,,,,

行下行下, 先玩左太空飛碟... 開頭妹妹都驚驚地, 後尾佢掛住控制高低, 感覺應該ok...

然後, 我地排史迪仔, 排左20分鐘....

入到去, 爸爸同妹妹坐左响最前0既地下度, 點知好大個史迪仔出現, 嚇到妹妹要出返去, 唔肯玩....

咁算啦, 我地出去睇巡遊啦...

妹妹又試好緊張, 爺爺比佢騎膊馬, 佢兩隻手捉緊爺爺0既頭髮, 個pat pat越坐越低, 叫佢出去同tinkerbell影相又唔敢, 哈哈...



睇完就去食lunch先, 途中見到有姐姐玩遊戲同攞框框影相, 佢又好有興趣, 咁又係, 呢樣唔駛驚ma....

corner cafe, 呢個係妹妹0既午餐, 不過妹妹都冇乜點食...

食完, 妹妹話要去買bubble, 唉, 又係bubble.....

返去fantasyland, 先玩騎木馬, 好開心呀!!

再玩pooh pooh.....

妹妹都係驚, 好彩有嫲嫲抱住.... 玩完出黎, 妹妹要我抱, 一抱起佢, 佢就話:"唔駛驚..", 可想而知佢真係驚, 只係死頂咋...

小飛象... 每次妹妹都指定邊個同佢坐, 今次佢揀左爺爺...

妹妹好想同tinkerbell影相, 但可惜已經截隊, 失望!!

咁我地去搵其他公仔影相啦, wakakaka, 人少真係好, 隻隻都好快排到...

排我地前面0既一位小妹妹, 同pooh pooh拖住手影相, 我地鼓勵妹妹都一樣咁做, 最終妹妹成功了, 但知道佢其實好驚...

minnie好靚靚啊...

pluto一野就踎低攬住妹妹, 妹妹已經少少變左樣... 影完之後, pluto叫我地自己走, 留低妹妹, 我話比妹妹知, 妹妹嚇到變哂樣, 佢真係好驚...

開始自然d, 識攬住唐老鴨, 媽媽比10個叻你呀!!!

離開夢想花園, 我諗妹妹真係一額汗....

坐火車環繞迪士尼一周, 仲以為妹妹會訓添, 點知冇....

返黎玩埋咖啡杯, 就係時候食晚餐然後睇煙花....

煙花咁震撼, 妹妹竟然唔覺得興奮, 仲睇得好唔專心添, 不時周圍望...

回程時, 當然係訓左啦, 亦起唔到身沖涼, 嘩, 咁臭, 聽日點返學呀???

知道妹妹雖然冇表現得好開心, 但其實佢係好鍾意0既, 之後一定會成日提, 迪士尼而家已經成為佢最鍾意0既地方0刺...

六週年結婚紀念日...

原本以為老公會唔記得呢個日子, 今年亦諗住靜靜地過唔特別出街慶祝, 點知老公早幾日突然自已提起, 雖然記錯日子, 但都總算有心呀....

我地冇大肆慶祝, 只安排去食飯睇戲...

又好好彩, 老公今晚好早放工, 我地仲可以趁機去shopping一番...

响underground有收穫, 不過, d sales手腳太慢, 累我地要跑住去戲院, 仲遲左10分鐘入場...

第一次去isquare ua睇戲, 好舒服呀, 套戲劇情雖然簡單, 但都拍得幾好睇, janice man好靚女, 黃秋生演技一流, 不過張可頤好老呀...

睇完已經9:45, monster sushi冇人等位, 正! 不過眼闊肚窄, 最後兩個都攬住個肚走...

簡單but happy的週年紀念...

終於搵到菠蘿仔0刺!!!!

5/13

妹妹自從睇完奇鸚嘉年華之後, 對菠蘿仔一見鍾情, 好想擁有mcdonald菠蘿仔0既玩具....

前幾日, 妹妹又响度依依哦哦, 媽媽突然諗起思契契好似識人响mcdonald做, 於是叫妹妹自己同思契契講.... 不過原來思契契同佢朋友已經好耐冇聯絡, 佢唯有幫我地食下mcdonald睇下換唔換到, 媽媽要提醒思契契去到mcdonald記住講bulu仔, 唔係菠蘿仔呀!

思契契將呢件事話左比佢同事知, 又咁好彩有人咁岩送隻菠蘿仔比佢喎, 哈哈, 世上點會有d咁橋0既事架?!

好開心呀, 妹妹見到一定好開心, 要比個驚喜佢先得!!

今日菠蘿仔到手, 夜晚同妹妹玩緊其他玩具時, 我地趁佢唔為意將菠蘿仔同寶珠一齊放响枱上面, 妹妹好快就發現....

妹妹仲玩緊公仔, 突然..... 咦......

唔識做反應, 好似唔相信眼前0既野咁...

嘩... 哈哈哈... 又驚又喜咁呀!

好開心! 攬住菠蘿仔唔捨得放....

打電話多謝思契契先, 妹妹唔駛人提, 不停咁講多謝...

幫菠蘿仔影返張單人照先...

呢晚, 妹妹就同左菠蘿仔, 寶珠一齊訓... 

然後, 做咩都同佢地一齊做...

連玩泥膠都同佢地一齊玩....

要求多多

5/13

妹妹今日放學後, 拉嫲嫲去學校隔離0既富山食日本菜, 妹妹已經唔係第一次有呢個要求, 妹妹真係識食...

然後要去彈波波...

見到有呢d玩具賣, 硬要嫲嫲買比佢, 佢話要同爺爺一樣喎, 比佢笑死...

返到屋企拎住個鎚仔呢度揼, 0個度揼...

PIXAR 25 YEARS OF ANIMATION

5/10

今日我地去左沙田文化中心睇PIXAR 25週年0既展覽, 估計妹妹都會有興趣, 因為佢都有睇過Toys Story, Nemo同蟲蟲特攻隊...

我地4點幾去到, 估唔到都好多人排隊喎...

可惜爸爸失策, 帶相機唔帶咭, 今次唯有用電話影相...

場外有認識0既蟲蟲...

又有巴斯光年...

終於入到去0刺, 每人送一pack memo紙...

反斗車王... 幅畫好靚呀...

大家都喜歡0既胡迪呀!!

入到展覽館, 介紹左3D卡通片0既製作過程, D畫真係好靚好靚, 好羡慕D人有咁高0既藝術天份呀...

仲有toys story幻燈箱呀...

妹妹似乎都係最鍾意睇NEMO, 成日响0個度唔肯走...

仲有套3D影片, 不過我睇到遊左魂...

中心另一D場館有其他展覽, 我經過問爸爸有冇興趣睇, 到下一個場館妹妹又學人問有冇興趣, 好攪笑, 佢真係時時刻刻都留意住人地講咩, 跟住就講返出黎...

門外有好大個巴期光年同胡迪呀, 當然要影相留念!

哈哈... 仲有好多隻三眼仔呀...

又搽???

5/12

d指甲油留左响妹妹對腳度兩日, 要抺左佢0刺!!

妹妹當然唔掣啦!!

爸爸氹佢, 而家先抺左, 星期六再去買藍色黎搽, 咁妹妹又變得好願意0刺...

一路幫佢抺, 佢又一路整d洗甲水同缷粧棉, 仲倒到周圍到係添...

到今日我放工返屋企途中, 嫲嫲打比我, 話妹妹扭計要搽指甲油, 訓左响地下... 不過嫲嫲同佢講媽媽返去先幫佢搽...

我一返到去, 妹妹就問我支藍色指甲油响邊, 下?? 我未買喎...

咁妹妹就話要搽red.... 我冇乜點理佢....

妹妹醒左, 知道發脾氣未必有用, 佢用左第二個方法, 死lur....

"媽媽, 我想搽指甲呀!", "媽媽, 我想搽red呀!!", "媽媽, 我都未搽!!" 呢幾句話講左好多次, 終於, 我真係幫佢搽左, 佢又好開心0刺...

有樣學樣之搽指甲

5/10

尋晚睇過芷晴姐姐0既facebook video, 有一段係芷晴姐姐响化粧品counter搽指甲油, 妹妹睇完同我講佢又想搽, 我當然冇理佢啦...

今日妹妹又再睇, 睇完又再要求搽指甲, 仲要問完又問, 問完又問.... 是但啦, 咁我搵下有冇指甲油先啦...

做左咁耐gel甲, 仲點會有指甲油响度喎.... 點知, 世事無絕對, 又比我搵到支未開封0既, 仲要唔係cheap cheap0既指甲油, 好啦, 算你好彩啦...

我只肯幫妹妹搽腳, 指甲油都好快乾, 妹妹覺得好靚喎, 好開心!! 

見到佢好小心奕奕咁行, 怕整花d指甲油, 真係好可愛!!

好啦, 之後我地出街....

搭搭下車, 妹妹突然除左隻鞋出黎, 再次讚嘆: "好靚呀!", 哈哈, 比佢笑死!! 

睇睇下展覽, 可能見悶悶地, 企响度又除一除隻鞋望下...

到夜晚沖涼, 我幫佢用海綿刷下隻腳, 佢反應好大, 即刻縮, 邊叫"唔好呀!", 然後仲要檢查下有冇甩到, 哈哈! 駛唔駛咁緊張先!!!

有樣學樣之疴POO POO

5/9

星期日去完戴芷蕎生日會, add左幾位同學仔媽咪0既facebook, 其中一位係妹妹口中成日提起0既芷晴姐姐...

我開左芷晴姐姐d相同片比妹妹睇, 其中一張係芷晴姐姐坐响廁所度, 張相寫住"肚痛中", 我解釋比妹妹聽芷晴姐姐响度做緊咩, 估唔到, 當晚妹妹就响廁所順利完成左第一次大大, 芷晴姐姐0既影响力果然大!!!

寶石球榴槤

5/9

放工返屋企路經market place, 入去買d生果先...

買左蘋果同香蕉, 正想走之際, 見到有人開緊榴槤, 又走埋去睇睇...

其實尋晚响b仔已經食左榴槤班cake同榴槤布甸(兩樣都好好味!!), 今日唔應該再買啦!!

不過, 呢隻榴槤叫寶石球榴槤, 係我未見過0既, 又深色, 都算大個喎...

價錢都唔算平, 標價$88/KG, 呢pack得4舊, 要26.2!!

不過我係一個榴槤迷, 未食過0既榴槤, 一定要買黎試下0既!!

食落, 個感覺係.... 有冇攪錯呀? 粒核咁大0既???

真係好大架...

不過味道就幾好, 有少少我鍾意0既甘味, 不過, 始終都係貓山王正好多....

價錢平貓山王一半, 但我都寧願食貓山王好過, 講講下, 又試好掛住添, 哈哈!!

玩出火

今晚妹妹突然撩爸爸, 爸爸就扮老虎抱起妹妹要咬佢pat pat...

玩完, 妹妹要爸爸同媽媽玩, 爸爸唯有都將媽媽抱起, 作狀要咬...

媽媽比人抱起左, 其實有少少驚, 於是乎就大叫啦...

玩完, 爸爸放返媽媽落地, 媽媽先發現原來妹妹僕左响梳化度...

今次慘了, 一定係嚇親0刺... 媽媽即刻將妹妹抱起...

妹妹攬住媽媽大聲喊左出黎, 一邊大叫, 佢一定係好驚, 佢從來都未試過咁大叫法...

喊完一輪, 妹妹話要訓覺, 每次妹妹驚都會想訓覺...

妹妹仲驚左爸爸, 爸爸埋怨媽媽, 將佢呢兩日經營返黎0既感情都破壞哂...

媽媽陪左妹妹一陣, 妹妹連媽媽都唔要, 叫媽媽出去, 後來去左嫲嫲度訓...

希望今晚唔好發惡夢啦, 真唔好意思啊...

婆婆又湊妹妹放學0刺...

今日嫲嫲要去觀禮, 原本佢建議妹妹唔好返學, 我呢個做媽媽0既當然唔太願意啦...

但因為太婆經常唔舒服, 開頭都冇諗可以搵婆婆幫手... 點知, 咁岩太婆就响星期六入左醫院, 咁婆婆順理成章可以幫忙湊妹妹了...

婆婆放學前已經買定美味棒, 豆漿同乳酪比妹妹, 然後同佢一齊渡過左愉快0既幾小時...

婆婆問妹妹聽日放假媽媽會唔會帶佢去街, 妹妹答: 會呀, 會搭巴士去探太婆, 太婆唔舒服呀!!!

嘩, 估唔到妹妹會將太婆唔舒服呢件事放响心上, 太婆知道一定好開心!!

探左婆婆0刺..

尋日同李梓丹參加完同學仔生日會之後, 返屋企執埋D野就同奶奶出發去探婆婆...
奶奶話婆婆入左咁多次醫院都冇去探佢, 好似好冇禮物咁, 於是今次同我一齊去...
見到婆婆, 佢精神都算OK, 坐左响度同我地傾左好耐... 不過後尾因為條氣又好喘, 唔想再講野, 所以趕左我地走...
同左姑娘講我想醫生打比我講下病情, 醫生一早9點幾就打比我, 真好人!
佢話婆婆個心跳時快時慢, 所以有時會好喘, 同埋因為之前食開0既心臟藥停左, 呢隻藥雖然改善左心跳快, 但慢0個方面就嚴重左, 再食落去驚婆婆會突然心跳停左玩完...
佢會同心臟科醫生再商量(乜佢唔係心臟科醫生咩???), 睇下好唔好幫婆婆加個起駁器改善心跳慢...

第一次參加同學仔生日會

今日妹妹第一次參加同學仔生日會...

2:15妹妹同爸爸媽媽一行三人黎到大埔富善邨麥當勞, 首先同壽星女戴芷蕎打個招呼同送禮物先...

個個小朋友見到薯條就開心, 個個都唔客氣坐埋人地度搶食...

仲有麥樂雞...

同主角影返張相先...

遊戲時間, 李梓丹都係ON居居, 唔多識玩...

切蛋糕, 小朋友最有興趣, 因為個個都想吹CANDLE...

收到大會送0既禮物袋, 入面0既玩具大家玩得好開心喎!

開心到咁樣...

圍住條柱跑, 又好開心喎...

夠鐘走0刺, 壽星女仲有下一場呀..

呢位係媽媽比較熟悉0既同學仔 - 芷晴, 兩個拖住走...