英藝playgroup

十月份的插班生不可以有家長陪同返學, 媽媽實在很擔心, 怕妹妹會好驚, 覺得媽媽將她遺棄在一個陌生的地方, 她一定會好傷心....

所以...媽媽又不惜花了千多元報讀學校的playgroup, 由9月8日開始, 每星期上兩堂, 直至返學, 給妹妹熟習一下環境, 又可以先學習一下和外籍老師溝通, 到時正式返學便容易適應一點....

其實, 英藝的playgroup價錢算便宜, 星期六每堂$220, 但會上兩個鐘, 計起來和協康會價錢差不多, 不過協康會真的教得很好, 希望英藝都是一樣吧....

報名後, 我們到協康會上堂, 這學期第一堂原來很多小朋友(包括我們)都缺席了, 今堂很齊人, 但有一半都是新面孔, 當中有位小朋友很明顯是感冒中, 間中會打乞痴和咳, 還打乞痴到老師派給他的公仔上, 這個就是我唯有不滿意的地方, 為什麼這個家長不可以為其他人設想呢?

放完個暑假, 妹妹返playgroup明顯講多左野, 不過依然多事, 成日企起身... 張姑娘攞左一d公仔出黎, 因為妹妹企左起身, 所以姑娘最後先比佢揀, pooh pooh, eeyore, piglet都比人揀左, 最後得返瑞比同隻鴨鴨咋, 妹妹考慮左一陣, 揀左瑞比, 但個樣明顯係唔開心, 妹妹, 下次要聽話唔好亂企起身0刺....

今日0既勞作就係呢幅畫0刺, 綠色手係媽媽, 橙色手係妹妹, 基本上幅畫都係媽媽整, 妹妹0既貢獻就係比隻手媽媽畫囉, 仲有明顯搗亂0個兩筆.....

明明姑娘識叫妹妹做丹丹, 點解D貼紙全部都係"李梓彤"0既??

呢個學期有禮物送喎, 妹妹話"姑娘車車"....

今日妹妹講左好多次"契媽游水呀?", 我諗妹妹一定好想游水, 但冇辦法0刺, 最快都要過埋生日先有時間去搵契媽0刺....

古古來訪...

尋晚大舅舅送完舅母返屋企, 就上黎探妹妹一陣....

妹妹太耐冇見舅舅0刺, 一開始好怕醜, 仲好似好驚好想呢埋咁添, 樣都變埋... 不過大約一分鐘後, 妹妹開始笑, 開始又熟落返, 仲開始招呼來賓添....

妹妹將自己0既玩具好大方咁逐件攞出黎比舅舅玩, 又介紹佢貼响柜上面d貼紙公仔比舅舅認識, 好忙好忙, 一陣又入房攞d書比舅舅睇, 又叫埋爸爸一齊參予, 呢d舉動, 媽媽覺得好得意, 好欣賞啊!! (不過, 其實媽媽咩都欣賞的!!)....

Reenex CPS Treatment 第三次

呢排太忙, 一陣又要同妹妹去睇醫生, 一陣又約朋友, 做完第二次CPS treatment成個月都未做第三次（原本應該兩星期做一次架!), 美容師打黎話如果我再唔做, 就變左係要維修唔係保養架0刺, 於是的起心肝尋晚就做左第三次treatment....

美容師先比我試做佢地隻Laser - 冷凍光學膠原再生療程, 佢幫我試做對眼, 我即刻問佢攞塊鏡黎照下先啦, 睇下做完會唔會有咩唔同左ma...hehe....不過美容師話唔駛照0刺, 因為第一次係唔會見到效果架...ho....

美容師sell我話如果想皮膚keep得好d, 應該响做CPS同時做埋LASER, 佢地呢個LASER係1540波長, 同普通美容院0既1064唔同,佢地呢個先可以打入真皮層, 除左可以改善皺紋, 鬆弛, 缺水, 疤痕同粗大毛孔之外, 仲可以幫助骨膠原增生添… 老實講, 呢排我見到自己塊面好似瘦左, 但其實感覺上係骨膠原流失多d呀, 除左唔夠油唔夠水之外, 塊面一d彈性都冇, 突然覺得自己老左呀…

聽到佢話個laser可以增生骨膠原, 真係好吸引, 不過以我而家0既狀態, 又似乎暫時唔駛做laser喎, 於是我用左”好窮”黎推左美容師, 都係等我儲多d斑, 多d皺紋, 同多d錢先啦, 哈哈…

不過美容師一見就睇得出我平時有捽眼, 因為我眼頭明顯多d紋… OMG! 真係比佢講中呀! 果然係PRO呀, 我晚晚沖涼都慣性要捽一輪架, 唔捽個心同對眼都會好痕架, 唔得0刺, 我真係要改改呢個壞習慣…

正常做laser會痛, 但佢話呢部機有冷凍功能, 所以皮膚只會覺得凍唔會痛, 果然, 眼咁敏感0既部位都冇覺得痛喎… 不過今日同同事講起, 佢就話我試眼實在太危險0刺…

之後美容師就正式幫我做個cps, 同上次一樣, 兩邊面做20度, T字位角質層比較厚0既就做30度, 今次噴中和液時我都冇再遇溺0刺…

做完之後覺得塊面滑左, 鼻同鼻側邊0既污糟野都少左好多… 雖然佢幫我敷左個水份MASK, 但趁住岩岩去完角質皮膚可以勁吸收營養0既時候, 沖完涼我都即刻敷左個CHEAP CHEAP我的美麗日記MASK, 呢個MASK真係好平, SASA同卓悅都做緊特價, 唔駛$50一盒, 日日敷都唔肉痛啦, 之前雜誌都有講過話好, 我仲分左D比媽咪用添, HEHE… 要靚係要付出代價0既, 妹妹第一次見媽媽敷MASK, 指住媽媽嗌”哎呀!!”, 短短20 mins, 妹妹已經哎呀左近10次, 媽媽真係有hard feeling囉….

今朝起身, 皮膚仍然係白滑左d, 估唔到係返到公司, 隔離位同事都話我今日個妝好靚喎 (呵呵!), 其實我比平時仲化得薄左呀, 哈哈! 有d開心添, 但唔知呢個效果可以keep到幾耐呢??

 

Talking Tom

前幾日爸爸download左個iphone app - talking tom比妹妹玩, 入面有一隻貓, 可以比奶奶佢飲, 可以打到佢暈, 佢又識跟人講野, 好得意!!

開頭我地試比妹妹睇, 我地玩完一輪, 佢開始同貓貓講野, 佢不停望身邊0既野去諗話題: "pooh pooh!", "豬豬", "有電腦呀!", 又去攞個bb公仔塞埋個iphone度叫隻貓貓抱抱, 當左隻貓貓係朋友, 尋晚仲同貓貓講"玩車車咯喎!!"

沒有嫲嫲的日子

呢個星期差唔多日日都唔夠訓，好不容易捱到星期五，但咁岩嫲嫲又要去澳門，所以呢個星期七日我係同busy同sleepy中渡過，不過總括黎講並冇想像中辛苦....

星期五 (8/13)

一放工就要立即返屋企，因為嫲嫲要搭8點半船呀...

星期六 (8/14)

- 妹妹9點就起身, 都唔明點解食左藥0既妹妹都一樣訓咁少, 我對眼都未擘得大, 妹妹就已經拖我出廳玩….

  

- 呢日, 我決定留响屋企, 準時餵妹妹食藥, 比佢有充足0既休息, 妹妹下晝訓左3個鐘呀...

- 直到夜晚先同妹妹去大埔附近食飯, 路經彈乒乓波0既地方, 妹妹又用1蚊中左條電話繩,好勁呀!!

  

- 我地去左御八築地食, 媽媽最愛0既三文魚腩刺身又賣哂, 有d失望添… 叫左鰻魚飯同什錦烏冬比妹妹食, 妹妹好鍾意食鰻魚, 不停話要食…

星期日 (8/15)

- 約左阿sir 1點响佐敦工聯會等, 我地11點幾先食早餐, 時間好趕呀, 爸爸動作好慢, 11:45仲上網又唔換衫, 媽媽開始有d忟…

  

- 妹妹响巴士度訓著左, 點知去到課室, 爸爸將妹妹個頭撞左埋牆, 妹妹撞到醒左, 好彩冇喊, 嚇死左媽媽…

  

- 阿sir再go through左少少, 妹妹岩岩訓醒, 都冇精神攪攪陣, 一直伏响爸爸膊頭休息, 直至走, 先同阿sir講”bye bye叔叔”

- 妹妹大腦有224億個腦細胞, 一般人只有140-180億, 唔好以為妹妹好勁, 其實香港地營養好, 二百幾億都係好普遍架...

- 原來, 左腦掌管理性(傳統學習), 而右腦掌管感性(想像同藝術方面), 妹妹左腦多正箕紋, 代表呢方面容易受影響, 幫佢搵一間好學校好緊要, 同埋長大交朋友都要緊要...

- 爸爸肚餓, 去附近八王子醫肚, 爸爸叫左特濃粟米拉面, 好粟米味, 我就麻麻地, 爸爸就覺得好味…

  

- 爸爸提議叫條鰻魚及一隻溏心旦, 妹妹真係不愧食開魚, 鰻魚0既骨仔佢都可以lun到出黎, 好勁呀!! 妹妹仲好好眼, 見到用黎墊住隻旦0個張紫菜, 堅持要食...

  

- 原本同爸爸去葵芳整部PSP, 但突然接到婆婆電話, 我地決定改變行程, 先去探公公, 然後探小冬, 再同婆婆一齊返大埔…

  

- 妹妹識講”HELLO公公!”, 公公好開心呀!!

  

- 妹妹天不怕地不怕, 落地同小冬玩, 但小冬並唔係一隻普通0既狗仔呀, 佢係一隻會咬人0既狗, 所以爸爸媽媽都有少少驚… 媽媽比一D長D0既雞條妹妹餵小冬(因為怕小冬咬到妹妹手指呀!!), 點知, 妹妹居然將長0個條比左爸爸, 自己攞左一粒比綠豆更細0既雞條碎食小冬, 哈哈, 嚇死媽媽呀, 好彩小冬冇咬到妹妹咋… 玩玩下, 婆婆同爸爸都喝住, 唔好再餵0刺, 小冬已經食左兩個星期0既份量0刺, OH… 不過妹妹第一次同狗狗玩, 好似好開心呀, 臨訓前同佢講返佢都笑得好開心!!

- 搭車返入大埔, 經過黃大仙, 妹妹竟然認得路, 問我"搵太太呀?"!!

- 沿路妹妹講左好多次SIR SIR, 呢度又"有SIR SIR喎!!", 0個度又"有SIR SIR喎!!", 感覺到佢真係超級想玩SIR SIR囉.... 落車0既巴士站隔離有個好難得乾淨又人少0既廣福公園, 未落車妹妹已經示意要去0既, 今次點都唔會走得甩...

- 咁岩有小朋友响度玩妹妹0既至愛 - 吹BUBBLE, 妹妹勁開心, 不停追住D BUBBLE邊走邊笑, 成個傻婆咁, 哈哈.... 再有哥哥仔加入, 幾個小朋友一齊玩, 好可愛, 好美妙0既景象!!

- 玩到所有哥哥都走哂, 妹妹玩到一身汗, 仍然未肯走...

- 同妹妹去公園玩係一件好辛苦0既事, 唔單止要睇住佢, 仲要一齊玩, 玩SIR滑梯妹妹要爸爸媽媽SIR先 (好彩人少, 如果唔係都幾尷尬), 有窿又要媽媽捐 (個窿係FOR小朋友, 大人捐個姿勢好古怪喎..)... 玩左一個鐘, 妹妹終於肯走0刺... 好開心, 終於可以返屋企歎冷氣..

- 經過籃球場, 妹妹又要入去, 有哥哥响度打緊波, 妹妹只會响側邊跳下, 笑下, 今次媽媽第一次入去, 妹妹拖住媽媽一齊玩, 算啦, 見人少, 就同你跳一陣啦...

- 行到一半, 奇怪0既事又發生0刺.... 今次妹妹停响度要潛爸爸衭袋攞銀包, 攞到就好開心喎, 即刻諗住攞D錢出黎, 媽媽搶過黎响入面攞左十蚊比妹妹, 妹妹攞住十蚊比爸爸抱返, 但行行下佢突然要落地, 拖住媽媽向一個分叉路行去, 媽媽好想知妹妹要去邊, 所以叫爸爸同婆婆上樓先...

- 原來....妹妹帶媽媽去7-11呀, 入到去, 妹妹一直行去雪柜好用力咁要開門, 媽媽幫佢開左, 佢就指住D支裝可樂, 7-UP, 橙汁, 不停講"呢個! 呢個! 呢個!", 最終揀左支COKE ZERO, 拎住走去收銀處放低, 又將媽媽手上0既10蚊紙放上去收銀處, 呢個舉動真係好好笑!! 媽媽忍住笑, 同妹妹講"你都唔飲得, 不如買第二D啦!", 妹妹於是係咁攞糖, 媽媽話"你咳咳喎!!", 妹妹邊放低D糖, 邊講: "咳咳, NO!!", 好攪笑!! 最終媽媽揀左幾條媽媽腸比妹妹....

- 返屋企即刻幫呢隻鹹蛋沖涼, 然後煲粥比佢食, 岩岩煲完, 妹妹就扭計要媽媽抱, 一抱起就訓著左0刺....

今朝起身, 先發現原來係咁攰, 返公司條路好似行左一個鐘咁, 上地鐵站條樓梯行到喘氣, 好似上山咁, 真係攰到嘔....

好好笑的妹妹

妹妹沖涼都攪笑過人, 用個膠盤仔當帽戴, 仲懶得戚咁添....

大個女點可以露點架, 整D煙遮一遮先....

影完相之後, 妹妹就扭計要媽媽同佢繼續玩水, 仲要媽媽都戴埋一份添....

妹妹最喜愛的玩意之一: 貼紙

為博紅顔一笑, 媽媽尋晚放工响大埔買左d貼紙比妹妹玩, 妹妹亂痴一通都己經好開心!!

妹妹近期新寵 - 巴斯光年&胡迪, 妹妹果然好開心!!

ABC & 123 - 玩貼紙都不忘認下字

剪髮

上星期日爸爸自己出左去同b仔睇衫, 但後來臨急臨忙先叫埋我地出, oh…半個鐘可以幫自己同妹妹準備好出門口, 簡直係好驚人0既紀錄, 女人為左買野真係咩都得…

出門口前, 妹妹响媽媽個袋摷左個奶樽出黎, 出門口都堅決要邊飲邊行, 媽媽响走廊同妹妹糾纏, 妹妹好硬頸, 媽媽企响度同妹妹講: “你要楂住個奶樽咁你自己返屋企啦, 媽媽自己去0刺, 你唔好去!!”, 妹妹回頭走黎捉住媽媽隻手, 旨示一齊繼續行…. 媽媽唔肯, 好用力先搶到妹妹手中0既奶樽, 妹妹好激動, 喊哂…. 吵鬧聲驚動到附近一間冇關門0既鄰居, 姨姨問: “妹妹唔肯行呀??”, 媽媽答: “唔係呀, 佢要楂住個奶樽邊飲邊行呀!!”, 哈哈, 扺比姨姨話: “唔得架, 好醜怪喎..”, 冇諗過妹妹會有咁0既反應, 佢即刻呢埋媽媽後面, 哈哈, 知醜呢??直至媽媽叫妹妹同姨姨bye bye, 妹妹先現身bye bye….

下晝, 我地去左魚旦舅父度整電話, 魚旦舅父幫妹妹剪頭髮, 開頭, 妹妹唔知做咩事, 好似好乖咁, 咁魚旦舅父就極速幫妹妹剪左幾下…

但幾十秒之後, 妹妹開始唔掣0刺, 掙扎, 走人…

直至夜晚, 先成功幫到妹妹影到呢張岩岩蠶蠶0既完成圖…

餵藥水

小朋友最怕飲藥水, 尤其係李梓丹呢一類小朋友, 最怕人迫佢, 比人灌過, 以後見到藥水就喊定先, 仲因為灌藥而嬲左嫲嫲….

病己經辛苦, 仲要比人箍住, 鍊住個口黎灌藥, 李梓丹真係喊到好似比人灌毒藥咁, 做槍手0既爺爺同嫲嫲都覺得好心up…

妹妹又大個左, 比人灌唔開心之餘, 又識吐返出黎, 天一半地一半咁, 飲到幾時先好返?

媽媽唔忍心, 所以每次餵藥都搵其他辦法, 問過姑娘, 佢地有一d suggestion:-

1.    溝落水度比妹妹飲, 媽媽成功左喎! 但到嫲嫲試又唔得….

2.    溝奶係ok的,但每日只可以match到一次餵藥時間, 就係夜晚0個餐, 夜晚又可以熄左燈先比支奶佢, 咁佢就睇唔出支奶其實己經溝到變哂色啦, 哈哈…

3.    咁其餘兩次點飲呢? 姑娘話可以溝落d果汁度, 媽媽即刻去買左d現成0既果汁, 雖然貴, 但為左妹妹感覺好d, 貴d都要架0刺….

呢$9一支, 好貴呀….

嫲嫲倒左半樽果汁+藥水落奶樽比妹妹, 好有警覺性0既妹妹一睇就覺得係藥水, 死都唔肯飲, 又失敗左….

媽媽返到屋企, 攞左淨返0個半樽黎飲, 邊讚”um!幾好味喎!”, 比妹妹, 妹妹都唔上當, 仲指住樽野問媽媽”甜甜?”(甜甜即係藥水), 媽媽答:”唔係甜甜黎架, 係果汁, 你睇, 有apple, 有子子(提子)架!”然後媽媽再飲多啖, 山埋蓋放响枱上面, 冇再叫妹妹飲, 比d耐性, 呢個感覺好似釣魚咁…. 冇幾耐, 果然有魚上釣, 妹妹自己去攞黎飲, 後尾仲差唔多飲哂添 (不過最後一啖比妹妹倒左落件衫度…)

嫲嫲第二日就照辦煮碗呃妹妹上釣, 果然好和平咁餵左藥, 妹妹之後仲要求添飲呀!!

所以今日媽媽放工又要去入貨0刺…..