王中之王 - 貓山王

我係一個榴槤迷, 不過我都係今年先知道原來馬來西亞有D24同貓山王呢兩種榴槤, 今年5月份响SOGO買左D24, 百幾蚊得幾舊, 味道仲令我大失所望.... 而家係貓山王當造時間, 上個月一田有得訂, 第二日我打去都已經被訂哂, 我呢D C9心態就梗係更加想食啦....

尋日放工, 諗住入去MARKET PLACE睇下有咩生果買比妹妹食, 點知行行下, 我竟然同貓山王相遇, 個SALES係咁SELL我, 叫我買個$400, 嘩, $400一個榴槤 ($100/LB, 隔離泰國榴槤都係標緊$6.9/LB咋喎), 仲要係好細個(但已經响0個埋野裡面算圓潤多肉0架0刺), 我真係唔捨得食囉..... 我同個SALES講等我諗下先, 跟住話比老公知(佢最怕榴槤, 但佢都冇反對, 佢知我真係好想試), 再睇下其他野先, 又買下車厘子 ($24.8/LB, 原來好扺, 早知買多磅啦), 點知對腳最後都係行返埋去, 仲將呢個價值$408的貓山王買左......

沿路行去搭車途中, 好心痛, 個腦突然彈出呢句話: 不可一, 不可再.... 係呀, 如果上左癮, 仲貴過吸毒呀....
雖然個榴槤咁細個, 但對我黎講已經好重.... 搭巴士又冇位坐, 可能我個樣太辛苦, 隔離個男仔好好心咁叫我將袋野掛响佢個位0既扶手度, 佢真係好好人呀, 不過....我心領0刺, 因為我驚D榴槤味攻親佢呀....
為左呢個榴槤, 代價真大, 拎到背痛, 又暈車浪..... 返到去, 連飯都唔係幾食得落.... 但老爺就話我係留肚食榴槤, 唔通我真係潛意識留左肚???
一開, D肉好黃, 好似好好味咁喎.....
拎起, 睇唔出原來D肉好稔架, 不過又唔濕.... 食落, 好甘香, 味道好濃, 係我好鍾意0既苦味, HEHEHE......好好味, 個人當堂開心哂, 食完佢去洗碗都洗得好開心呀.....

之前諗住人一世物一世, 試一次就夠, 但食完之後, 我決定左每年都要起碼食一次呀!!