EVVUS

12/22 做冬我地下午放假, 公司呢個福利真好!!

我2:00先走, 做埋D野然後去EVVUS接受佢地0既皮膚consultation..

其實Evvus已經約左我好多次, 响電話度又冇講清楚佢地係做咩treatment, 所以約左好多次我都放左飛機 (跟住就唔上心)....

今次見早放, 就一於上去睇下係咩冬冬啦...

原來... 佢地係sell一d我好有興趣知道0既野!!!!

1. ACR細胞再生療程 -

令細胞再生, 修補衰老受損的肌膚, 令肌膚回復青春健康... 方法好得意, 要响手臂度抽血, 然後將血小板精華分解出黎, 因為血小板受到激化之後, 生長因子就會釋放出黎, 將呢d血小板精華注入肌膚0.2mm皮層, 激活沉睡0既幹細胞, 咁肌膚0既組織, 外觀, 功能都會奇蹟地自動收復再生... 真的好厲害, 不過我諗我唔需要做d咁勁0既treatment住囉, 十年後啦, 我諗到時我會有興趣... 一個療程大約hkd40,000.00

2. OBAGI -

功效係"將肌膚回復透白零色斑", 唔駛做treatment, 只需要用醫生配比你0既護膚品, 由洗臉至搽面, 防晒都齊哂架0刺, 每套hkd3xxx, 可用到2-3個月, 期間每3-4個星期返去搵醫生覆診, 整個療程唔會超過半年, 皮膚就會變得白白, 又冇哂色斑...

3. BOTOX -

呢個係我最感興趣0既一個, 而家都越黎越普遍, 可以做响面部同小腿, 打完支針, 舊肌肉會縮細左, 大概係麻醉佢令佢用唔到, 如果我打咀嚼肌, 塊面會瘦好多... 如果打面, 只用一支BOTOX, 費用係HKD5xxx, 如果打小腿, 因為每隻小腿有三舊肌肉, 每隻要打一支, 咁即係total hkd11000.... 打完之後可維持6-9個月, 不過就算之後唔再打, 舊肌肉都唔會變返以前咁大, 因為話哂舊咀嚼肌已經鍛鍊左幾十年...

佢地仲有laser同透明質酸療程, 醫生建議我打botox縮細塊面同打透明質酸拉長個下巴, 咁我就會變左瓜子口面0刺!!!

完全冇後悔上黎聽, 好得意, 真的大開眼界, 可惜, 我暫時仍未接受到做botox响塊面度, 我驚人地話我整容呀!!! 如果我有好多多餘錢, 我會考慮打小腿...

Evvus位姐姐一d都唔hardsell, 可能佢知我似運吉卦, 但佢依然好有耐性解答我d問題, 真的要讚!!

聖誕化粧舞會

12/21原本係一個大日子, 係妹妹期待已久0既X'MAS PARTY, 但亦都係宣道面試0既大日子, 上次因為IN民生, 我決定放棄妹妹學校旅行, 最終結果都係唔收, 所以我決定唔再放棄妹妹0既歡樂時光, 就照舊參加X'mas party啦!!!

原本以為妹妹會好雀躍咁起身準備, 點知懶訓0既佢都係唔肯起身, 仲話唔返學, 唔參加party, 佢自己响屋企添, 哈, 比佢笑死...

攪左好耐先肯準備, 換完衫叫做精神左, 開始好開心有得返學參加party0刺...

臨急臨忙, 行行下先記得影相... (一臉不願意0既樣..)




返到學校, ricky扮左聖誕老人, 妹妹竟然驚.... 於是老師們帶佢箭步上去...

其他小朋友有D扮雪人, 天使, 亦有D冇扮, 我認為, 响D咁特別0既日子, 真的要花少少心機去令小朋友開心, 見到個個同學仔都咁靚而自己又冇得扮, 感覺一定好唔開心架...

返到屋企, 嫲嫲話妹妹唔肯除衫, 哈哈, 真的未試過, 可想而知佢著住係幾開心呢!!

燒鵝大王

12/20 (mon)

唔係成日去深水埗, 亦麻麻地鍾意去, 因為0個度好多麻甩佬...

但其實深水埗好多野食...

今次我地揀左燒鵝大王, 因為上次見到d燒鵝好似好靚咁, 好多人食, 連OL都唔介意坐响街邊張枱度食...

一碟只係30左右, 老公揀左燒鵝飯, 我貪心, 揀多樣, 叉鵝飯...

好彩我揀雙拼, 因為除左燒鵝好味之外, 叉燒都好好好好味!!!

因為太好味, 我差唔多食哂成碟, 好驚人!!!

聖誕服

12/20 (MON)

12/21就係妹妹學校0既聖誕化粧舞會, 但妹妹0既聖誕衫仲未準備好, 真徬徨!!!

放工相約爸爸去深水埗玩具街度買, 好彩, 好容易就買到, $69一套, 好平呀!!!

d質地唔差, 但始終响玩具街買, 真唔放心未洗過就比妹妹著, 但已經冇時間可以洗0刺...

於是唯有用消毒野噴哂會直接掂到妹妹皮膚0既部份(e.g.頸, 手腕), 然後再用風筒吹乾...

希望妹妹可以靚靚咁出席聖誕party!!

HAIR CUT + CHRISTMAS GIFT FOR KAYLEE

12/18 (SAT)

妹妹個頭又試控制唔到, 我地响聖誕前去修剪一下...

剪髮前....

剪髮中....

剪髮後0既相响爸爸部手機度, 我懶得搵....

妹妹一剪完髮就衝入隔離0既TRU, 我都打算買聖誕禮物比佢...

原本我計劃送部laptop比妹妹, 點知佢一見到呢筒泥膠就攬住唔放, 個大力士攬左呢筒野不停係咁跑...

爸爸就買左呢份, 妹妹好鍾意呀, 日日都攞出黎玩...

12/17 2010 Annual Dinner of MGA

嘩, 十日前既野都未寫, 又唔想偷懶, 今次真係要長話短說先得...

12/17係我地MGA一年一度0既annual dinner, 今年响美心皇宮攞, 雖然唔算豪, 但總比舊年0既德興好好多0刺...

我地4點放, 有人去酒樓打麻雀, 有人返屋企, 有人去行街, 而我就利用呢個時間去坐機, 然後返德福行一陣(响zara買左件衫)...

annual dinner人人最期待0既就係禮物啦, 開席前阿雄每枱派左張抽獎list, 咦, 得14份0既?? 我即係問佢係咪有第二頁, 佢話冇喎, 吓??? 最後0個5份仲要係watson's coupon $400, 唔係啩....

當然, 頭四份(都係我想要0既...)都冇我份啦... 我只收到table prize - jusco $500 coupon + cash $1200, 都算唔錯啦...

聖誕飾物設計比賽

有一日, 妹妹個功課套夾左張通告, 話學校有個聖誕飾物設計比賽, 希望各位家長同小朋友一齊做, deadline係12/17....

呢樣野真係考起零藝術天份0既我....

諗左兩個星期, 都諗唔到可以做咩....

doris lee建議: 搵個銀色波波, 然後痴對翼上去, 就變左隻天使啦...
爸爸建議: 用四張紙剪左聖誕樹0既形狀然後痴埋, 就變左棵3d聖誔樹啦...

直至12/15, 即deadline前兩日, 我的起心肝去大眾買左d材料, 其實係亂買一通, 因為根本就唔知道自己想做乜...

當晚我並無開始, 因為返到屋企妹妹已經訓著左...

到12/16晚, 我都一樣係夜返, 妹妹又訓左, 咁我唯有自己做啦...

但.....究竟做咩好呢?????

上網參考下人地d作品先... 有人做3D飾物, 幾誇張都有...

而我, 就參考左一個做聖誕環0既飾物...

用左大半個鐘完成, 做完之後, 我竟然放在响張枱度都搵唔到, 你話幾唔起眼....

不過爸爸安慰我, 佢話如果太靚就唔似小朋友做啦, 咦, 又係喎!!

第二朝妹妹醒左, 我比妹妹過目, 好彩妹妹好例牌地答左句"靚!"

不過, 奶奶一見到, 講左句: "人地掛哂出黎啦!! 人地一座座雪人咁架!!", 吓?? 一座座??? 咁我呢個咪....

算啦, 志在參與, 我下次會加倍努力架0刺...

agnes b chocolate

12/15 - 上個星期三的下午

呢排好想好想食朱古力, 但係要好味道0既朱古力, 公司有m&m's同三角朱古力, 但一d興趣都冇....

0係好想好想之際, 有間廠突然送左d朱古力禮盒上黎, 嘩!! 有我份呀!!

好大盒呀, 入面有一盒朱古力同一隻rabbit, 好靚, 攬住好舒服....

原來响某一日, 廠0既女仔突然問我0個個係仔定女, 原來佢地打算仔就送杯, 女就送rabbit, 真係有心思呀!! 因為佢係送比妹妹0既, 我前幾日拎左返屋企, 而家佢成為左妹妹0既陪訓妹仔二號....

原來agnes b朱古力係好好味0既, 次次經過都想買黎試0個隻一大塊果仁朱古力, 竟然都响我面前出現左, 我叫doris幫我分成小塊, 方便大家食.. um!! 果然係好好味呀!!

Lalaloopsy

好喜歡公司0既新出品Lalaloopsy, 超可愛!!!!

上次Agnes幫我執到個返黎, 我放左响枱面陪我做野, 好開心!!

上星期三 (12/15), 佢又比左個我, PD某同事幫佢儲左一套mini, 佢有一個多左, 比左我, 好呀!! 好開心呀!!!

mini baby而家坐响我個mon上面, 好靚!!!!!

同妹妹影返相合照先....

朗豪坊HELLO KITTY

12/14 星期二, 我約左綺玲坐機, 因為奶奶要去醫院探老爺, 唯有將妹妹交比我... 好彩阿敏可以幫我湊住妹妹啫, 真係好, 妹妹不但只跟佢, 仲同佢好FD添, 返到屋企都仲講住"敏姨姨"!!

坐完機, 我地原本想行街, 由太子搭巴士去朗豪坊, 但最終都冇乜點行, 只行左ETE同REBEANCO, 好想買個袋呀, 可以用黎襯西裝褸0既袋...

行到四樓, 好多HELLO KITTY呀, 妹妹好鍾意, 不過影相都依然係唔望鏡頭囉...

用iphone唔夠光影出黎真係麻麻地...

美肌18

同事極力推介呢隻美肌18, 其實我已經唔係第一次有人介紹....

同事話食左4日就覺得白左, 皮膚好左, 個人冇咁攰, 食左一個月左右仲覺得d肉firm左添....

美白同firming我都好需要, 佢講到咁神奇, 我當然唔執輸即刻去萬寧買返兩盒試下啦...

hkd298/盒, 可以食兩星期, 我買0既時候, 萬寧個架度有coupon, 每盒減左$10, 0個日買健康滿500蚊仲有張萬寧50蚊coupon送添!!

買兩盒0既原因係因為憑兩個盒上0既barcode就可以去換一樽維他命c, 呢隻野配合維他命c效果會顯著好多....

第一次遊海洋公園

上星期日 (12/12), 我地猶豫不決左一個鐘頭, 最終決定去海洋公園玩, 因為海洋館响1/2開始就會close0刺...

一開始, 兩父女影返張相先...

同海獅(是海獅嗎?)影相...

水母館, i like it!!! 好靚好靚!!!! 妹妹一開始有d驚...

出到去, 忍唔住買左隻水母公仔, 而家住左响公司....

而妹妹就買左隻penguin, 佢今朝話要送比姐姐喎... (邊個姐姐???)

今次0既目的 - 海洋館, 小丑魚好靚呀!!!

好大條魔鬼魚呀!!! 成架飛機咁...

妹妹似乎冇乜太大興趣, 睇左一陣, 佢話::"不如去樂園啦!!"

食完野, 排隊玩摩天輪０既時候妹妹訓左, 到上摩天輪0個刻就醒, 好大風, 好凍, 我地一D都唔ENJOY....

對妹妹黎講, 都係玩下拋波波遊戲開心....

有一大一細聖誕公仔收穫, 佢地叫做哥哥同弟弟, 妹妹攬住唔放...

纜車... 似乎大人比小朋友開心咁0既???

玩騎魚魚, 呢個妹妹好鍾意!!!

周圍都好有聖誕氣氛, 呢棵聖誕樹上面有人唱聖誕歌, 好特別...

金魚館, 點解要post呢張相? 因為呢條魚比妹妹話:"好肥呀!!"

有得同孫女玩騎木馬, 嫲嫲仲開心過妹妹喎...

夜晚d聖誕樹好靚啊!!

影返張相先...

雖然妹妹响海洋公園0既表現唔似太開心, 但直至今朝佢都仲回味緊....

- 有好大條魚魚架!!
- 游得好快!!
- 玩船船, 好犀利呀!!
- 望住爸爸笑!!

guy's bday dinner - 吉壽

12/8, 我地一家人又有機會坐埋一齊食飯0刺!!! 好喜歡年尾, 因為好多機會可以同屋企人相聚!!!

今次係慶祝guy生日, 好可惜李智恆又試放唔到工黎唔到...

guy特別揀左吉壽放題, 因為媽咪鍾意食放題同自助餐!!

先黎刺身, 算有好多款, 但冇媽咪最鍾意0既赤貝... 刺身中最好味0既係三文魚, 好肥美...

雪花牛柳, 一般...

天婦羅同其他炸物, 唔錯!

蒜茸青口, 我覺得幾好味, 其他係雞亦同和牛串, 我食0個串和牛有d鞋同un...

食到好飽, 但枱面仲有咁多野, 好彩最後都清哂!!

179蚊都算係咁, 款式算多, 而且上菜快, 又完全冇漏單!!

壽星仔... 唔知原來如book位時同佢講有人生日會有壽司旦糕送, 現場仲會黑左添, 真失敗... sorry... 都係我冇做好功課之過....

無事0刺, 變返正常小朋友...

尋日11點, 我就打去學校叫陳主任放學後打比我, 我想了解下李梓丹0既情況...

陳主任一直都冇覆電話, 屋企又有突發事要早走, 我都冇左件事...

今朝9點幾, 陳主任回電0刺..

陳主任話李梓丹尋日好左好多, 已經回復正常!!! (真好!!)

不過呢, 呢兩日得知, 其實李梓丹响學校係頗為坐唔定0既一個, 除左係細b專注力比較弱0既關係, 佢身為女孩子, 都真係比較坐唔定, 因為通常男孩子先會咁樣, 佢都頗特別... 不過雖然佢坐唔定, 但塊面都會向住老師, 都會聽到老師講野... (都好彩!)

至於學習表現方面, 老師話佢係一半半, 因為經常病, 不在狀態, 但如果佢在狀態的話, 佢係冇問題的... 唉, 呢樣都唔知點控制, 返左兩個月學已經sick leave左10日...

希望1月份0既評估週, 妹妹唔會係最差成績0既d啦...

異常舉動..

今日下晝陳主任打比我, 話Kaylee今日好古怪...

Kaylee今日返學時候完全冇聽書, 同老師完全冇互動...

全部時間都响度捐枱底!!!

陳主任怕佢撞親, 又怕佢比同學仔亂腳踩死, 於是將佢放响地下0既軟墊度...

點知, Kaylee就响地墊度係咁典, 係咁卒...

阿女, 地墊都污糟架! 又怕佢塊面爆拆, 於是陳主任又幫佢抺面搽cream, 呢個動作重覆左幾次...

無論地墊, 玻璃, 木門, 甚至陳主任0既大脾, 一埋去就係咁卒! 咩事??

連見過咁多小朋友0既陳主任都覺得奇怪, 怕佢唔舒服, 叫我今晚留意下佢...

打比嫲嫲問佢有冇異樣, 嫲嫲又話冇喎...

返到屋企, 正常都不得了, 冇事發生過咁喎...

問佢:"陳主任話你今日成日捐枱底喎, 你係咪搵野呀? 做咩捐枱底呀?"

開頭唔應我, 問多次, 佢個樣係比人講中左0既樣, 然後伸手搣我個咀.. 哈哈...

希望Kaylee冇野啦, 再觀察下先...

唔肯起身返學

可能呢兩日天氣比較涼, 妹妺唔願起身...

尋日我自己都遲左D, 湊完妹妹返學之後, 要搭的士返工, $143呀!! 好貴呀!! 好心痛呀!!

今日天氣再凍D, 為免又遲到, 我今朝勁知醒, 準備好哂, 就到妹妹0刺!

點知妹妺唔肯起身, 唔肯比我抱起, 又叫我換返衫...

咁幫佢換左片先啦, 然後咋咋帝帝幫佢著祙, 哈哈! 喊到七彩, 咩事?

OK, 咁刷牙先啦... 又唔肯, 攬住我變左隻樹熊...

己經8:10, 功課又未做, 又未準備返學...

跟住爺爺放工返黎, 話一齊落去搭車, 妹妹先願意準備...

返到學校己經8:45, 唉, 我又遲大到0刺, 今次不能接受再搭的士0刺, 唯有打返公司話遲少少返啦...

病

嫲嫲尋日發燒, 爸爸又病, 咩事? D病好似不停咁圍繞我地...

為左唔好傳染比妹妹, 佢地好乖咁戴左口罩...

希望今次妹妹叻女D, 唔好又惹返啦!!

妹妹的九龍城

奶奶生日, 呢排比較多節目...

星期一朋友們同佢慶祝生日, 去左九龍城NEWAY, 我一放工就去0個度接返妹妹...

一見到妹妹, 嚇左一嚇, 點解成面都係血?

奶奶話佢用手指撩個鼻, 整到流血...

妹妹將D血整到成塊面都係, 成隻花面貓咁, D血都己經乾哂, 點解唔幫佢抺? 係咪大家掛住玩跟本就冇理到佢?? 見到咁樣, 我心痛到不得了啊...

奶奶落樓下屈臣氏買濕紙巾, 我同妹妹慢慢行落去...

去到屈臣氏門口, 又唔見左嫲嫲0刺, 打極電話都冇人聽, 我地唯有企响度等...

企企下... 妹妺突然大發現!!!

"九龍城呀!! 九龍城呀!! 九龍城响呢度呀!!!" 佢指住下一層狂嗌!!!

咁岩佢指住0個個方向有個牌寫住"九龍城XXX", 嘩! 唔係卦! 你唔係識認呀?

原來佢指住0既係下一層0既冒險樂園, 呢度就係佢平時成日要去0既"九龍城"!! 乜原來個九龍城得咁細架咋, 哈哈!!

約左爸爸响又一城等, 我地要走0刺!! 但妹妺狂喊, 一定要去"九龍城"玩波波, 又想騎馬馬, 佢一喊, D鼻水又連埋血一齊流出黎, 見到就心痛... 最後我決定唔去剪頭髮, 比妹妹响度玩...

有個姐姐真開心!

妹妹好鍾意d差唔多年紀0既小朋友, 一見到就會同佢地打招呼...

有一晚我地落車行緊返屋企, 妹妹見到有個哥哥(其實人地係姐姐黎, 不過個樣同衣著都十足十一個哥哥), 即刻叫哥哥, 人地爸爸媽媽即刻澄清:"姐姐黎0架!"

我地路經一個籃球場, 每次如果個球場冇關門妹妺都要入去跑下跳下, 今次都唔例外啦! 姐姐見我地入左去, 佢都要入黎, 妹妹就同姐姐兩個係咁响個球場入面跑, 妹妹係咁跟住姐姐, 姐姐跑佢又跑, 姐姐停佢又企响姐姐隔離, 好開心, 好得意!!

兩個都跑到咳, 要停0刺, 我地一齊行返屋企啦!

姐姐今年四歲, 拖住呢個兩歲0既妹妹, 好開心, 因為佢好想做姐姐好耐0刺!!

呢個妹妹都好開心喎! 好少見到佢呢個開心樣, 平時行路唔穩陣0既妹妹比姐姐拖住行得十分好, 行樓梯仲不知幾快添(因為姐姐冇乜點就佢, hehe), 見到佢地, 真係又有d感動, 感覺到evangel成日講0個種amazing...

是但啦!!

呢個時期0既小朋友有時突然講d野出黎真係好好笑...

兩個星期前有一次我同妹妺搭巴士, 有班師奶上車, 不停掉位, 又嘈, 呢個又話唔好坐呢度, 0個個又話不如同邊個坐之類, 嘈死人...

妹妺一直望住佢地, 突然講左句:"唉, 是但啦!", 班師奶太嘈聽唔到, 但就笑死左隔離0既我囉...

上星期日晚, 我地响荃灣食米線, 老闆問我地個餐要咩菜:"有芥蘭, 菜心, 生菜......", 點知妹妹突然答:"是但啦!!"

好難甩身..

妹妹而家大個女0刺, 知道我地去街好好玩, 我地真係好難甩身...

星期六晚出去同阿雪, phoebe食生日飯, 我事先下晝己經同妹妹講定我夜晚要去食飯, 當然妹妺聽完好似冇咩反應咁...

到夜晚嫲嫲話同佢沖涼同食粥, 佢開始扭計0刺, 耍手擰頭話:"我同媽媽食飯呀!"

魚旦舅父先黎我地屋企, 得一陣再過大埔超級城攞旦糕.. 大家都知甩唔到身, 所以諗住魚旦舅父先走, 點知妹妺要痴住魚旦舅父, 仲同爸爸媽媽bye bye添...

最後要出動嫲嫲同埋魚旦舅父一齊去攞車, 兜個圈返返樓下, 而我同爸爸就落去同佢地再會合...

星期日因為去醫院探amanda, 見妹妹未好返哂, 費時再帶佢去醫院, 所以又要走佬...

呢次簡單d, 嫲嫲同妹妹响房度玩, 掩埋少少門, 我地就趁機走, 不過爸爸又緊張啦, 好大力關門, 即刻聽到妹妹喊....

好陰功呀! 連續兩日比人遺棄, 媽媽以後都盡量會帶埋你去架0刺!!

老點...

太多野未寫0刺, 有D想放棄, 但又唔想MISS左任何妹妹0既成長片段, 一於趁响公司LUNCH時寫得幾多得幾多啦...

老點.... 呢排妹妹真的超級十分鍾意老點人...

去樂基INTERVIEW, 落左車, 我好自然咁望下應該行邊面, 妹妹就指住一邊講:"0個邊呀!! 係0個邊呀!!", 好似識路咁...

上星期日响荃灣參加完齊齊表哥0既生日party之後, 妹妹話"不如去樂園啦!!", 然後狂老點帶路:'呢邊呀!", "係呀係呀!! 呢邊! 呢邊!", 哈! 你識咩???

 

ECOSWAY

今朝一早我就去左學校, 陳主任叫我去幫KAYLEE攞校褸, 怕佢下星期凍冇得著, 兼且佢都想同我傾下計, 好啦, 於是我10點就出發...

去到學校, 居然陳主任唔响度, 因為元朗分校有人冇返, 佢去過去頂替喎...

嫲嫲又同左妹妹去公園玩, 咁我趁機自己歎個早餐啦!!

去KFC0既途中, 路經ECOSWAY, 醒起李智恆話佢地個羊奶沐浴露好好用, 於是入去睇下...

呢支羊奶沐浴露唔知係奶奶定阿姨買, 入到去睇, 1000ml會員價先係幾十蚊, 好扺, 有refill, 750ml $3x, 仲扺!!

望下望下, 原來屋企好多野都係來自ecosway!!

佢地d野真係好平, 佢地每個月都有野做促銷, 建議我每次只focus响紅色牌 (減價貨), 又喝住我唔好買咁多住, 試下先... 哈哈! 佢地真係老實...

師奶心態, 平就想買... 唔覺唔覺, 連入會費$60, 我total買左$400野..

不過裡面包括左兩支酵素液, $23x, 佢話除左促進新陳代謝, 令身體健康之外, 如果食飯前飲可以減肥, 食飯後飲可以增肥, 可以減肥啱哂我, 趁促銷買左兩支, 一支比左奶奶試...

樂基

聽聞樂基每級只有一班, 因為有N1, K1便更少位比外來考生, 咁.... 究竟去黎做乜呢???

算啦, 唔去又唔知點咁....

完全冇心機去考, 冇悉心打扮, 妹妹今朝落去公園玩0個條牛仔衭, 著埋去INTERVIEW, 只換左件比較斯文0既上身...

好彩冇比心機準備啫...

落左車仲要行一段路先去到學校, 妹妹唔肯行, 我攰到中途想放棄...

一路行, 妹妹不停咀唱歌同講野...

去到學校, 唔駛點等, 填完份問巻就可以上去IN...

今次用普通話考, 老師問"你叫什麼名字?", 問左好多次, 我亦翻譯左好多次, 妹妹都係啞左咁...

老師攞D咭出黎, 問佢邊個係蘋果, 邊個係橙, 跟住邊隻係青蛙, 明明識架喎, 但個樣勁猶豫, 搵黎搵去都敢認0個隻青蛙, 好好笑...

到老師拎隻MINNIE出黎, 問邊度係眼, 鼻, 咀, 呢D其實係N10既題目囉, 真的意想不到, 妹妹隻手指痙攣左, 離遠又伸唔直咁指, 好好笑, 我真的忍唔住笑!!!

到臨走, 妹妹先比較大聲咁講THANK YOU老師, BYE BYE老師...

冇所謂, 表現如何我都唔太CARE, 考唔考到係天意, 係緣份黎0既, 我一D壓力都冇, 所以真的覺得好好笑!!

由到達學校至離開, 只用左20分鐘, 勁!!!

考完我地直接離開學校, 一踏出學校門口, 妹妹就大大聲聲講:"李梓丹!!!", "MINNIE鼻鼻!!", 哈哈哈哈!!!! 我真係比你笑死, 你正一傻婆黎!!!

My poor Lilly Tikes Doll

呢個係我好鍾意0既一個公仔, Little tikes出品, 好多年前阿john比我0既, 已經停左產好耐... 好靚女, 好鍾意佢!!

一直都只比妹妹隔住個盒黎玩, 禁佢隻手會講野的...

點知妹妹大個女0刺, 開始有要求, 佢話要拆出黎玩!!! 我唔捨得呀!!!

爸爸不嬲都係廿四孝老豆, 個女有要求, 當然即刻答應!!! (仲要係趁我沖涼時應承!!) 我响無選擇之下唯有就範, 仲幫佢地拍照留念添....

妹妹開頭都好珍惜個公仔, 攬住好開心咁...

但過左一陣, 佢已經將個公仔遺留响地下度, 我執起比佢坐响梳化頂...

到第二日, 佢依然响梳化頂, 冇人理!!! 好慘呀!!!!