好攰呀....

尋日奶奶同我地一齊返PLAYGROUP, 因為之後我地要趕去齊齊0既生日會... 照舊我同爸爸一齊同妹妹玩, 奶奶就坐响側邊, 嫲嫲响度, 妹妹有救星, 完全唔專心唔投入, 不停去搵嫲嫲, 咁嫲嫲唯有落街行下啦, 點知妹妹都依然成日指住度門嗌嫲嫲, 唔肯玩...

放左學同嫲嫲响樓下會合, 跟住就趕去齊齊0既生日會0刺, 我地3:15離開學校, 但人地生日會4:30就完, 我地趕頭趕命由佐敦去到葵興, 再搭的士去到荃灣沙咀道0既MC當當....

妹妹仲細, 唔識同小朋友玩 (其實我覺得妹妹根本就唔鍾意同小朋友玩), 我地都係坐响度食下野, 之後嫲嫲去九龍城揼骨, 我地一家三口就去CITYWALK行下....

趁機比妹妹練習下, 佢都不知幾開心, 又唔肯比人拖, 要自己行, 商場地下都仲OK0既, 街就唔好0刺, 因為佢仲未行得穩, 隨時仆低.... 練習左一陣, 佢好似己經有少少進步0刺, 有時可以行好長0既路(我認為好長囉..)都唔跌低, 努力呀妹妹!!! 你好快就會成功0架0刺!!!!

不過離開商場之後, 妹妹都堅持要落地行, 勁扭計, 又係好難對付架.... 攪到我同爸爸兩個勁攰....

係喎... 唔記得講, 方方都己經收左妹妹0刺, 輝舅父今日幫妹妹去交留位費, 唔該哂呀!!!!

見左john個老婆0刺!!

今日我, 奶奶同妹妹一行三人去到將軍澳協康會度見阿john個老婆, 路程都幾遙遠, 九巴建議我地搭74x由大埔去到觀塘市中心再轉98A去總站落, 行過對面就係裕明苑, 但落左車之後, 我地完全搵唔到裕明苑, 打去協康會問左之後, 沿路再問人D人都唔知裕明苑响邊, 真奇怪.....

幾經辛苦終於搵到0刺, 聽阿JOHN講, 佢老婆星期六日會帶小朋友PLAYGROUP, 中間會有D時間FREE D.... 我地入到間房, 入面好多玩具, 妹妹不知幾開心, 周圍行周圍爬, 不停玩車玩波... 佢幫妹妹檢查過後, 話肌肉D張力基本上冇問題, 其實小朋友0既張力係比大人低, 而妹妹都係屬於偏低, 但又唔係有問題... 經過一輪觀察, 佢覺得妹妹行路好似D BB岩岩初學行咁, 係因為太少練習, 應該每日同佢去公園行多D, 又比佢行下樓梯, 試下練兩個星期睇下有冇好轉, 如果冇改善就要CHECK下係咪小腦影响平衡0既問題了...

離開左之後, 我地嘗試比妹妹落地行, 方法係就咁抆住少少衣領, 唔駛扶, 但試過落地之後, 妹妹就開始响邊都想落地LU, 我諗係正常0既, 妹妹又去到另一個階段0刺..

好似有d進步喎...

呢兩日妹妹行路好似有d進步喎, 不過都依然有左腳內八字0既問題, 希望會改善到啦....

有d擔心呀, 妹妹行路有問題呀....

尋日返playgroup時, 阿may突然同我地講, 覺得妹妹行路姿勢好怪, 唔似其他小朋友, 建議我地同佢多d行樓梯練習下, 希望兩個星期後會有改善....

其實我地一直都覺得妹妹學行路0既進度好慢, 己經差唔多兩個月, 但仍然成個醉酒佬咁, 又行得大步, 行幾步就跌低. 今日阿may講完之後, 我再多d觀察佢, 發現佢隻左腳成日行行下就內八字, 然後就一定跌低, 尋晚响屋企行得好差呀, 幾步就跌...好擔心.....

雖然個心好擔心, 但我都冇同爸爸表達我0既感受, 因為講左大家就仲會更加擔心同唔開心.... 妹妹半夜要飲奶, 飲完我個人醒哂訓唔著, 於是用手提上網search下d資料, 見有d bb都係行得唔好, 總括黎講都係要多d練習....

突然諗起john個老婆係做物理治療, 佢話幫我問下佢老婆, 仲應該可以安排星期六抽時間見一見妹妹, 真係好開心呀, 爸爸話我遇貴人, 哈哈!!

130蚊的士錢....

好眼訓呀, 連續幾晚唔夠訓, 今日終於都唔知醒起身0刺....shit.....

 

妹妹6:30飲完奶訓返, 因為我怕鬧鐘6:45响會嘈醒妹妹, 所以將個鬧鐘放左入被竇唔駛咁嘈, 點知...可能我訓住左個鐘, 個鐘响唔到, 我一有知覺時己經8:15, shit!!! 當然唯有飛的啦, 8:59上車, 遇著個慢慢慢司機, 9:20先落車, 攪到早餐都冇得食, 仲搭左130蚊添呀, 好心痛!!!

上天總算對我不薄, 感謝天父!!

感謝天父! 將我從谷底帶返出來見到陽光, 尋晚心情真係差得好緊要, 好難先訓到, 跟住亦跟得唔好, 今朝妹妹未醒我都自己醒左, 好耐都未識過一起身有呢種响谷底0既感覺, 好唔開心, 好傍惶, 唔知點算咁....

起左身之後, 發現原來尋日收到一封信未拆, 係回郵信封黎, 一拆開真係有驚喜! 係英藝SEND信黎話已經收左妹妹讀N1上晝班, 好開心呀! 真的! 呢件事令到我個人即刻開朗返好多!!

本來今日下晝同妹妹返第一堂DR. POON PLAYGROUP, 點知頭先佢地打黎話因為爆水管佢地大廈浸左部LIFT, 今日PLAYGROUP取消, 真係好失望, 妹妹返學成日都遇到阻滯, PLAYGROUP就冇所謂, 第二時返學真係唔好咁樣呀, 一定要順順利利呀!!!

可能尋晚妹妹比我影响, 佢都訓得唔好, 所以頭先食完粥就開始扭眼訓, 到而家已經訓左兩個鐘0刺... 都係好事黎, 因為可以比我有機會執下野, 又比我搵得返之前BACKUP 0既相, 好彩啫, 之前好擔心會唔見左, 呢D由2002-2007年0既相, 真係好珍貴, 唔可以唔見架... 

好大的脾氣!!

尋日朝早咁早就起身, 又全日周圍去, 直至去到阿婆屋企都係訓多個幾鐘, 我諗佢真係幾攰架, 所以响返屋企途中就訓左, 返到屋企我地諗住同佢沖涼啦, 點知叫極都唔醒!! 又黎0刺, 越想佢醒就越唔醒! 最終爸爸勁攪佢, 終於有反應0刺, 不過今次反應勁大囉, 合埋眼喪喊左幾個字, 真係嚇死人!  又係0既, 訓訓下比人攪醒0既滋味一定唔好受... 最後我地都係放棄左, 幫佢換件衫抺抺面就比佢訓... 不過有D擔心, 因為第二朝又係要早起身返PLAYGROUP....

8點鐘開始叫醒妹妹沖涼, 當然又係一樣啦, 叫左幾個字先醒, 而家已經咁樣, 第二時返學都唔知點算呀!! 最終咪遲到囉, 今次我地去左紅磡都會商場0既CECES(幼聯), 原來而家0個度開左好多間PLAYGROUP喎,,, 妹妹依然集中唔到, 開頭都好D, 自從我唔比佢執人地食淨0既半塊餅開始佢就扭計0刺, 成日要爸爸抱, 唔肯返埋位, 不過算啦, 都係試堂啫...

返完學之後, 我地去左黃大仙同妹妹個太嫲飲茶, 太嫲好錫妹妹架, 不過成日太肉緊不自覺地傷害到妹妹, 今次又大力咬左妹妹一啖, 妹妹無端端比人咬, 梗係喊啦, 心痛死我, 我好自然就抱住妹妹行左去, 妹妹好可憐呀! 最後太嫲都走埋黎同妹妹講SORRY, 我諗佢都好尷尬....

IN左兩間0刺...

今日要IN兩間NURSERY, 做媽媽0既我勁緊張, 尋日勁咪幼稚園天書入面0既面試攻略, 李小姐0既命運就我手上, 好大壓力添!!

首先最重要0既係有充足0既精神, 如果bb唔夠訓, IN緊扭眼訓响度喊一定死梗, 我TARGET妹妹尋晚要12點前訓, 今朝8點起身都係得8個鐘, 其實都唔夠架... 但點知, 世事往往就係咁, 每次我越心急想妹妹訓, 佢就越係唔想訓, 今次都不例外, 我地終於糾纏到1:30先訓到....以為咁今朝妹妹一定唔想起身啦, 點知又唔係喎, 我8點鐘起身, 去完茅廁出黎就發現妹妹己經醒左, 仲鬼打咁精神, 呢個小BB, 尋晚訓左6個半鐘咋, 唔好話佢, 我呢個大人都覺得辛苦啦...

我地9點鐘出門口, 諗住早D去到學校, 因為今日要IN兩間, 第一站係10:00沙田嘉德麗, 第二站係11:30大埔英藝, 好擔心會趕唔切去第二場, 唯有早D去到嘉德麗睇下會唔會早D有得IN啦...

我地買埋乾糧比妹妹之後就搭的士向沙田進發, 大約9:30到達, 己經有好多小朋友响度邊玩邊等INTERVIEW, 因為都幾多人話呢間學校好, 所以我對佢期望都幾高架, 不過一去到, 呢間學校比我第一個印象係好舊好舊, 入到去行左個圈, 發現無論係比小朋友玩0既滑梯, 地墊, 甚至魚缸, 全部都好殘舊, 雖然我IN0既地方係幼稚園, 而實際返學係幼兒園0個邊, 但印象分己經大打折扣, 況且幼稚園呢度1萬呎地方己經唔太大, 到時幼兒園仲要得4千呎..... 妹妹見到個玩具好想玩, 於是我就比佢坐低玩一陣, 嘩, 我發現個玩具又殘又爛又污糟, D污糟唔係普通比小朋友整到0既污糟, 而係陣年0既灰塵積聚而冇人清潔0個一種, 真係不能接受....

等到10點終於到我IN0刺, 又幾準時喎, 原來INTERVIEW0既過程好簡單, 老師只係比左幾件玩具妹妹玩:

1. 第一個玩0既係一塊木0既板, 上面有唔同形狀0既木塊, 每塊上面有粒的, 老師話妹妹咁細個應該唔會識得認圖形, 只係考下佢係咪運用到小肌肉就OK, 呢樣妹妹冇問題..

2. 跟住老師拎左個波出黎, 妹妹一見到就嗌"波波", 真醒目, 起碼SHOW下比人睇佢係識講少少野先!! 老師同佢拋左幾下波, 跟住叫佢拋比媽媽(即係我), 但妹妹有人玩, 都費時再理媽媽0刺..

3. 再黎老師就拎左個公仔出黎, 問我妹妹識唔識指眼耳口鼻, 真慚愧, 我到呢一刻都仲未教妹妹呢樣野, 老師知道妹妹年紀細, 都體諒佢咩都唔識, 但依然問妹妹邊隻係眼, 妹妹神奇地真係指住公仔隻眼喎, 但到口同鼻, 妹妹都係指住隻眼囉, 哈哈...

好簡單地就考完0刺, 老師跟住就同我講解學校0既教學模式等等0既野, 其實我都冇乜心機聽, 因為對呢間學校印象好麻麻...

離開左之後, 我同妹妹搭的士返大埔準備IN英藝, 妹妹响的士倦極而睡, 我落車之後見時間尚早, 响英藝對面0既茶餐廳食個早餐, 等妹妹醒左先再去IN... 時間岩岩好, 11:15妹妹就醒左0刺, 我地去到學校, 已經有好多小朋友等住IN, 原來大家都係要11:30開始登記然後等面試, 我地好彩排得快, 第8個IN, 一入到個課室, 發現負責IN妹妹0既老師就係上次OPEN DAY幫我抱左好耐妹妹0個位老師, 又會咁岩0既, 老師都認得妹妹呀... 原來係得妹妹一個人IN, 我就要坐埋一邊, 好彩妹妹有得玩就咩都唔理, 見到眼前咁多玩具, 仲不停"0個個, 0個個" 咁指使老師拎比佢玩添...

1, 第一個玩0既係琴, 考下妹妹識唔識用手指禁, 妹妹有時禁有時拍咁啦....

2. 第二個係一個穿住好多膠圈0既玩具, 叫妹妹拎個膠圈出黎, 妹妹扲左一半就放手, 話要玩返個琴....

3. 一盤細細粒0既積木, 老師扲左一個出黎, 叫妹妹放返入個盤度, 妹妹有照指示做.. 跟住老師叫妹妹拎一個, 妹妹拎左即刻塞去老師個口度請老師食, 哈哈! 老師同妹妹講"你請我食呀? 我唔食0刺, 你請妹妹食啦", 好彩, 妹妹即刻比公仔妹妹食, 幾聽話!

IN完之後, 我地一批批家長再入MEETING ROOM同校長見面, 校長講解學校0既特式, 我地就再發問... 完成後我就同妹妹返左屋企0刺...

總括黎講, 我一定鍾意英藝多好多, 英藝好乾淨, 校舍又大, 好舒服, D老師校長都好NICE, 印象十分好!!!

出風"難"

由星期日晚開始, 妹妹對腳出左d粒粒, 相信係因為星期日著住條裙玩滑梯所致... d粒粒一日比一日嚴重, 到尋晚沖完涼, 我見到真係嚇一跳, 成對腳都係d好大0既一粒粒, 深紅色, 好多好多, 仲要好痕咁添... 我地決定今日要去睇醫生, 尹醫生好好生意, 要去到我放工先有得睇...

去到醫生度, 見到妹妹對腳己經好返好多, 醫生詳細檢查之後, 話比我地知呢d係風"難"黎, 原來風"難"都會有唔同0既樣, 以我所知係一舊舊0既, 但原來妹妹呢種都係風"難"0既一種... 原因可以係食物物感, 公園花草帶黎0既敏感或者污糟都會架, 我好相信今次係因為滑梯污糟所致....

3步~~

妹妹行到3步0刺, 佢每次都好不經意咁自己行, 真係好神奇, 每個bb去到每一個階段就會好自然去做一d野, 唔會刻意, 亦唔駛逼, 睇住佢每日都有新野, 真係好開心!!

有進步!!!

原本諗住同妹妹去沙田行下, 又可以去snoopy world坐下船仔, 幾個月前坐時都仲on居居, 我諗今次佢會開心d卦...

約爸爸响沙田等, 食完super sandwiches之後我地就諗住去坐船, 點知天公不做美, 竟然落起雨黎, 我地唯有去行下先啦... 行完玩完又訓醒, 仲落緊雨, 我地就行過一田換片+食bb餐, 點知原來餐廳收鬼左, shit! 好驚添! 己經到左妹妹用餐時間, 返唔切屋企煲粥喎, 都係去一田個supermarket度買baby food比佢食啦... 一路行緊去, 我抱住妹妹, 爸爸就幫我揹住個袋, 妹妹突然要玩我個袋條拉鍊, 我地叫佢唔好玩住, 但佢扭哂計要玩, 咁古怪, 於是我叫爸爸試下開左條拉鍊, 哦, 原來妹妹想搵野呀, 佢望住個袋入面講"mum mum", 原來佢肚餓呀! 好開心佢0既表達能力又進步左0刺, hehee.... 我同佢講未有mum mum食, 而家飲住水先, 佢又識得應我"好!", 妹妹好叻呀!!! 

返到屋企, 又發現到另一個創舉呀! 妹妹好似平時咁沿住梳化行, 不過今次行到轉彎位, 竟然冇貼住張梳化轉彎, 佢自己行左出去呀, 佢行左兩步就坐返低, 我全程望住佢呢個動作, 好開心好感動!!

高錕 - 浪漫的愛情

今朝睇報紙, 講述高錕患有輕度老人痴呆症, 呢個病令佢成個人都變左, 由一個好醒0既人變成一個小朋友一樣, 但佢太太並冇因為咁而嫌佢麻煩, 反而仲好無微不致咁照顧佢, 見到呢段新聞我突然個鼻酸左一下, 好感動.... 希望我同老公都可以天長地久, 無論疾病, 貧窮, 都可以拖住手一齊渡過 (當然預住李梓丹一份啦!)...

你好野! 同我嗌交!!

話說尋晚我同李梓丹响房, 小吉上身0既佢突然擰左個鬧鐘黎食, 我當然唔比佢咁做啦, 佢唔肯比個鐘我, 咁我又用隻手掌擋住個鐘等佢食唔到, 佢想咬我隻手, 但我隻手伸直左佢又咬唔到, 哈! 可能我個樣招積左d啦, 佢嬲嬲放低左個鐘, 打我隻手又邊講"打打", 我於是回應佢"你打我呀? 你應該打曳曳0個個嘛! 邊個曳曳呀?", 點知佢即刻指住我, 其實我好surprise, 因為佢反應好快, 但我當冇野, 繼續同佢嗌交, 我話"係妹妹呀!", 點知佢又即刻話"媽媽!!", 於是乎我又一句"妹妹!!", 佢又一句"媽媽!!"咁, 我地嗌左一場交... 哈哈...

唔知佢係咪真係識咁樣回應, 但呢場交真係嗌得好流暢架!!!

2009-10-7

呢排妹妹晚晚都唔肯訓, 要成點鐘先訓, 攪到我朝朝都起唔到身, 尋晚又係咁, 但當我地0係度糾纏緊時, 嫲嫲突然出現, 妹妹見到救星梗係即刻喊哂要嫲嫲抱啦, 既然係咁, 我都唔理咁多, 自己訓先啦...

我覺得佢突然呢排夜左訓一定有原因, 唔知係因為夜左沖涼呢, 好, 等我再觀察下先...

尋日放工0係護協買左罐餅比妹妹食, 個罐上面寫明12mth+, 諗住實岩佢食啦, 點知原來呢隻餅對佢黎講好硬, 開頭兩啖都仲咬到, 但到第三啖, 咬極都咬唔到, 嬲到喊呀....

 

其實妹妹都幾容易發脾氣, 睇過"窮富翁大作戰", 入面有個小朋友患有過度活躍症, 情緒起伏好緊要, 上一分鐘仲好開心, 下一分鐘就突然大發脾氣, 同妹妹會唔會有少少相似呢? 我地妹妹又係經常為小事發脾氣, 脾氣臭到爆... 所以今朝我用搭車0既時間嘗試上網搵下過活躍症0既資料:    

• 過度活躍的特徵
  臨床心理治療師郭迪舜博士指出，過度活躍症的孩子有一半個案可以在4歲前發現。
  歲幾兩歲的小孩子雖然是坐不定，但對自己有興趣的事上，都能有較持久的專注，但是過度活躍的孩子則連自己有興趣的事情也不能專注。
  別人跟他說話時，他看來會心不在焉，很少跟人有眼神接觸。通常小朋友聽故事時會很感興趣，但過度活躍的孩子卻未必。
• 歲幾兩歲的孩子通常都會因外物影響而分心。例如本來正玩某件玩具，看見一件新玩具便會轉移注意力，不過如果3、4歲仍然如此父母便要留意。
  過度活躍的孩子在日常生活中亦很善忘。例如洗澡後抺身穿衣，但他會因為突然受其他東西吸引，忘記日常程序，未穿衣就跑了出來，因為這類孩子十分衝動，一有任何刺激便會立刻有反應。
• 專注力薄弱
  過度活躍的孩子專注力十分之弱，這與生理因素有關，原因眾說紛紜，有說是基因、遺傳的影響。近年過度活躍症愈來愈多，有人懷疑是因為媽媽懷孕時工作壓力大，當媽媽精神緊張時，血管會收窄，以至輸送給胎兒的營養減少，因而影響了腦部發育，不過，此說尚未證實。 
• 影響專注力因素
  導致寶寶專注力弱的，與3種能力不逮有關，不過就未必3種能力同時出現問題，可能只是以下其中一種有問題：
  視覺：不能處理視覺影像，看見的東西不能停留在腦海內，影像會隨看隨忘。
  聽覺：對聲音有過度敏感或非常不敏感，過度敏感的會突然聽到某些聲音便立刻分心；若是非常不敏感的，則別人跟他說話卻聽不見。
  動作：與小肌肉與大肌肉有關，有些會笨手笨腳，單腳跳時表現笨拙，抄黑扳時，雖然看見黑扳上的東西，視覺接收到訊息，但訊息卻傳遞不到手部肌肉，以致不懂抄寫。

似乎阿女只係頑皮同脾氣臭, 而家個個都縱佢, 要教好佢真係要比心機諗下辦法先得.....

 

今日開始海港城bazaar又做BB展銷0刺, 好開心, 又係時候大掃貨0刺! 因為lunch約左同事食飯, 見放工橫掂爸爸未同得我會合, 趁機落去睇下, 見到vtech laptop好想買, mickey積木又好想買, bb first book又好想買, 唔好衝動, 睇哂先決定買咩啦, 行到sanrio counter, 先發現原來銀包裡面得100蚊, 只係夠買兩條冬天褲.

好努力報學校

今朝妹妹7點起身飲奶, 我沖完奶比佢諗住訓多幾個字啦, 點知又係0個隻, 過左8點先起身, shit.... 刷完牙洗完面妹妹就醒左, 見到我响到度就笑, 好得意...我諗佢都訓夠0刺, 佢好精神, 即刻起身攞野玩, 攞左我本日記(之前有時會寫响日記簿度), 睇左兩睇發現冇公仔喎, 於是比返我.... 我好攰好攰, 妹妹又得意, 個心勁掙扎好唔好攞半日假陪下佢, HEHE...最後當然都係天使羸左啦, 不過見到妹妹想跟埋我出去個樣, 真係好唔捨得呀...

今日得一間廠開左工, 好清閑, 岩哂啦, 可以繼續幫妹妹報N1, 而家總共報左幾間:-

大埔:

明雅 - 報左國際班, 大約出年5月先考

英藝 - 都係國際班, 個人鍾意呢間多D, 因為校舍大D, 不過就遠少少

沙田:

嘉德麗 - NURSERY一定係國際班, 聽人講NURSERY0個邊校舍好細, 10/24去考就知0刺

榮光 - 呢間只係報黎做下SPARE, 未必讀, 因為唔係國際, 冇乜英文讀

會報埋帝堡城啟思

九龍塘:

迦南 - 金巴倫道0個間, 有幾個朋友0既仔女都返緊, 口諀幾好, 但前兩日收到信, 話因為妹妹未夠歲數入學, 所以會响開學之後有位先通知收唔收, 出獅不利, 好失望添

方方 - 聽聞校舍好舊, 算啦, 報左先算

九龍灣:

德福 - 唔知好唔好, 上網都唔多見人提過, 不過九龍灣區似乎冇乜其他選擇, 見佢有國際班, 報埋先算...

藍田:

會報迦南, 啟思

點解我會報咁多間, 又報唔同地區? 因為我唔知自己會住邊囉~~~ 其實都好徬徨0架, 為左遷就屋企人0既意願, 我地暫時決定唔搬去沙田, 所以我每日LUNCH都會上網搵學校, DOWNLOAD FORM, 好忙, 好頭痛呀~~ 做媽媽真係好辛苦, 為左個女心力交瘁, 但有邊個知呢? 而家只希望幫妹妹搵間好學校, 打好個底, 鋪好條路比佢...

久違了....

嘩...己經好耐冇掂過呢個blog0刺, 响呢一年, 妹妹成長得好快, 而家己經識好多野0刺, 無奈呢個媽媽每日連訓覺時間都唔夠, 只有能力將一d特別0既事寫低响日記簿或者save左pc度, 仲要非常雜亂.... 其實一個bb0既成長過程裡面真係有好多野值得回味, 希望我由今日起可以用心做好呢個blog, 比妹妹大個以後可以睇返啦... 

嘩...己經好耐冇掂過呢個blog0刺, 响呢一年, 妹妹成長得好快, 而家己經識好多野0刺, 無奈呢個媽媽每日連訓覺時間都唔夠, 只有能力將一d特別0既事寫低响日記簿或者save左pc度, 仲要非常雜亂.... 其實一個bb0既成長過程裡面真係有好多野值得回味, 希望我由今日起可以用心做好呢個blog, 比妹妹大個以後可以睇返啦...

點解會由今日起呢? 因為今日係妹妹0既舊曆生日, 妹妹係個中秋bb黎, 以後响呢個人月兩團圓0既日子, 除左做節之外, 我地都會同妹妹慶祝生日, 對我0既意義非常之大呀, 哈哈, 令我又諗起妹妹出世0既情景0刺, 好sweet.....

今日我地一家三口去左九龍城食lunch, 呢餐响下晝三點幾先食0既早餐, 我地選左咖喱牛腩拌面, 牛肉餅同京燒羊腩, 三樣都好好味, 價錢合理, 免收加一, 只係比左117蚊咋!!

跟住我地去左寨城公園玩滑梯, 打韆鞦, 妹妹玩滑梯好開心, 未坐定就自己要sir落去, 佢真係一d都唔驚架... 反而打千秋就唔鍾意, 玩左幾下就想走...

玩住我地就去福佬村道食豆腐花, 妹妹第一次食, 好味到係咁un, 又笑哂, 跟住再去對面0既曲奇四重奏買曲奇餅, 姐姐比左一件佢試食, 嘩, 又係食得好開心, 今日佢真係有口福呀...

最後我地去左ceces度買旦糕, 我地買左一個1磅0既朱古力橙味旦糕, 同一個細0既朱古力mousse旦糕, 一包芝士方飽(比妹妹)同一個橙味面包比嫲嫲...

我地只係用左兩個鐘頭就做左咁多野, 效率驚人呀!!!! 妹妹都因為完成任務所以安心bok响我度訓左, 訓到返到大埔吉之島先醒返呀, 岩哂啦, 又有機會去玩具部玩具0刺.... 我地去吉之島主要係因為要買返個消毒煲, 今朝突然發現個煲壞左, 著到燈但冇熱到喎, 死啦, 其實都唔知壞左幾耐, 妹妹可能己經用左d冇消毒0既奶樽0刺....

返到屋企, 等埋姑姐佢地就開始做節, 然後切旦糕, 再趕落去海濱公園玩燈籠, 行程超級緊密.....

祝妹妹生日快樂, 中秋節快樂!!!

開始認人0刺...

今日妹妹好乖呀, 都冇乜點扭計, 同埋開始認人0刺…真係大個女0刺…HEHE…


下晝同左妹妹去佢太婆屋企, 因為知道太婆見到妹妹就好開心, 所以決定以後都多d去探佢。爸爸載我地入去, 佢跟住做完野再自己入黎… 去到太婆度, 太婆梗係第一時間要抱下妹妹啦, 但係妹妹可能覺得生藹, 成日望住太婆但又唔笑, 好似好奇怪咁, 佢反而想舅公抱過, 真攪笑… 後來訓左兩個鐘 (因為我全程抱住佢先訓到咁耐咋…), 醒左之後就開始唔想比佢地抱0刺, 望住我扁哂咀咁喊, 其實我好鍾意佢扁咀個樣, 因為好女仔, hehe….

不要輕易放棄餵母乳

一直都覺得餵母乳係好辛苦, 冇哂自由兼且非常疲倦, 呢項工作比返工更辛苦, 但因為知道對BB身體好, 唯有頂硬上, 成日諗, 都係餵6個月啫, 好快過....

BB今日就5個月0刺, 照理應該仲有一個月我就任務完成, 重拾自由, 但有時上BK度睇其他媽媽講野, 又會令我想繼續餵, 有時又會問自己, 點解可以繼續餵都要停呢? 點解唔繼續比最好0既野自己0既BB?

响我心大心細之時, 今日又見到一篇文章, 令到我又再次有繼續呢項工作0既衝動, 唔知最後我0既決定會係點呢?

"當寶寶身體被病菌侵襲時, 藉著吸吮媽咪的乳房將寶寶可能生病的訊息傳達到母體中, 接下來的8HR內母體會製造抗體並進入母奶內, 當寶寶再次吸吮媽媽乳房喝下母奶後也將抗體吃下去, 幫助寶寶對抗病菌."

又講下D開心野先, 尋晚放工去左食飯, 返到屋企, 奶奶抱住妹妹黎門口等我開門入黎, 妹妹見到我好興奮, FING手FING腳咁, 好開心, 明明已經好眼訓0既我都精神哂呀!!

尋晚繼續同妹妹訓, 佢繼續訓訓下轉到成個打橫左, 我都冇力再去移返佢0刺, 直至飲奶先放返佢响正確位置, 點知又係咁碌埋黎, 攪到我得返少少位訓, 而家周身骨痛添呀~~

係喎! 講左咁耐都未同大家講聲: 情人節快樂!!!!