尋日朝早咁早就起身, 又全日周圍去, 直至去到阿婆屋企都係訓多個幾鐘, 我諗佢真係幾攰架, 所以响返屋企途中就訓左, 返到屋企我地諗住同佢沖涼啦, 點知叫極都唔醒!! 又黎0刺, 越想佢醒就越唔醒! 最終爸爸勁攪佢, 終於有反應0刺, 不過今次反應勁大囉, 合埋眼喪喊左幾個字, 真係嚇死人! 又係0既, 訓訓下比人攪醒0既滋味一定唔好受... 最後我地都係放棄左, 幫佢換件衫抺抺面就比佢訓... 不過有D擔心, 因為第二朝又係要早起身返PLAYGROUP....
8點鐘開始叫醒妹妹沖涼, 當然又係一樣啦, 叫左幾個字先醒, 而家已經咁樣, 第二時返學都唔知點算呀!! 最終咪遲到囉, 今次我地去左紅磡都會商場0既CECES(幼聯), 原來而家0個度開左好多間PLAYGROUP喎,,, 妹妹依然集中唔到, 開頭都好D, 自從我唔比佢執人地食淨0既半塊餅開始佢就扭計0刺, 成日要爸爸抱, 唔肯返埋位, 不過算啦, 都係試堂啫...
返完學之後, 我地去左黃大仙同妹妹個太嫲飲茶, 太嫲好錫妹妹架, 不過成日太肉緊不自覺地傷害到妹妹, 今次又大力咬左妹妹一啖, 妹妹無端端比人咬, 梗係喊啦, 心痛死我, 我好自然就抱住妹妹行左去, 妹妹好可憐呀! 最後太嫲都走埋黎同妹妹講SORRY, 我諗佢都好尷尬....
沒有留言:
張貼留言