小公主七歲生日

眨下眼，我嘅小公主已經七歲喇! 好感恩呢七年黎都無風無浪，小公主可以快樂健康成長!

升左一年級後，少左好多私人時間，所以甚少update blog.. 呢一刻我又黎雄心壯志喇! 希望可以多啲update返同小公主嘅開心時刻，得閒可以睇返回味下，等佢大個啲亦可以睇返!

生日當天，學校會派一張小食卷比壽星仔/女，可以响小息去小食部免費換領燒賣/蘿蔔糕/魚旦一份，仲唔駛排隊添! 舊年學校張小食卷嘅日子印錯左星期六，妹妹唔敢同老師争取返，今年終於可以攞到喇! 恭喜恭喜!

答應左今日正日生日接放學，仲會去反斗城買份shopkin小禮物比佢！ 爸爸亦交帶我買份小禮物！話到明小禮物，我諗價錢係大約50蚊吧，可惜，原來要响反斗城買50蚊嘅野並唔多選擇，行下行下，竟然比佢見到想要好耐嘅Elsa噴雪器同光之美少女嘅粉盒喎，呢位小公主即刻將50蚊嘅事拋諸腦後，哈哈！不過當二選一嘅時候，佢會睇下邊樣平啲就買邊樣，都有進步呀！



返到屋企做埋啲功課，就準備去食晚餐慶祝，妹妹著左舊年嘅飲衫Elsa公主裙，加埋我襯嘅頭cool, 幾靚呀！



點知落到樓下，妹妹突然諗起之前明明plan左今晚會戴皇冠，oh no! 貪靚鬼一定要上去換返，仲攪到差啲喊左出黎!



去左妹妹嘅飛佛Kitchen J, 其實我就已經食到厭，但妹妹仍然好鍾情佢地嘅蜜糖芝士pizza!

最後仲有姑姨婆嘅蛋糕，清清地好好味呀！