小一第二次考試成績 - 好失望呀~~

2015年1月23日

 

 

因為有左第一次考試算唔錯0既成績, 我地對今次考試都幾有信心, 雖然預左可能會有D退步但應該不會太誇張吧... 加上妹妹好有信心一定可以攞到好成績禮物(條件係中英數常都有90分以上), 我更加放心左D...

 

星期三派卷當日, 妹妹打電話比我, 通知我數學有184分, 妹妺學校中英數都係200分滿分, 咁即係有92分, OK喎!

 

但原來其他科都冇90分喎, 妹妹响一粥面下午茶緊, 一路喊一路打左好多次電話黎, 叫我照買禮物比佢, 唉, 其實呢份禮物我己經買左成個月0刺, 我都好想可以送比佢, 只可惜.... 我只好同妹妹講叫佢等我返屋企先, 望一望份卷, 如果係因為老師出得深我先再考慮... 不過妹妹繼續打黎, 希望我應承買比佢呀, 我好叻, 竟然冇心軟, 哈哈...

 

其實公司0既野都未做哂, 但我都趕返屋企, 返到屋企之後, 妹妹冇再講禮物0既事0刺, 因為.... 佢自己都知道我睇完D卷實唔會買比佢, 哈哈~~

 

好心痛~~ 一路睇D卷, 其實我真係想喊出黎, 明明係識0既, 但烏龍百出, 有D睇唔到老師比佢揀0既字, 亂作一通, 有D直頭係調轉黎做, 睇得出佢係識0既, 但呢D錯處令佢每PART被扣大部分分數...

 

好暈好暈~~ 明明妹妹英文同常識都有9字頭, 但而家因為不小心變成8字頭, 心痛到不得了呀~~~

 

尋日忍唔住搵左班主任, 好彩班主任覺得妹妹係識0既, 佢話妹妹上堂都一樣咁專心, 答問題都好叻0既, 今次成績係差得嚇死人, 但呢D錯處都係經驗, 下次就唔會錯... 佢話小一學生成績好似過山車咁一D都唔出奇, 只要小朋友考試緊張少少, 發下夢, 成績差二三十名一D都唔出奇... 聽完老師咁講, 我個心都定少少, 幸好今次失敗出現响第二次考試, 我地仲有得努力追返0既...

 

仲有, 聖誕假亦係一個因素, 原來放左十幾日假, 返學之後成個星期D小朋友都係咩都唔記得哂, 跟住就考試0刺, 所以大家成績都比上次差... 唉, 等我仲將每一日假期填滿, 希望妹妹有個開心0既聖誕假, 大錯特錯呀! 我下次唔敢0刺~~