生日飯@醬缸韓國料理

想試好耐的餐廳，今年生日飯終於試到喇~~

11月中打去，醬缸電話好難打，我都係趁佢地岩岩開舖先打得到咋! 店員話星期五冇得book位，平日就已經book到1/21，好誇張! 佢叫我book定蟹，因為唔book係冇得食架! 5點半到就穩陣有位! 但我5點半先放工喎，點可能5點半到呢？

終於我地趕頭趕命，大約6:05到，門外已經有條隊，不過好多都係未人齊嘅，包括我地，仲有三個人未到，否則可以即刻入去! Oh no... 呢輪入唔到，肯定有排等喇...



奶奶佢地6:40先到，好彩門外有啲位可以比奶奶同妹妹坐住等，妹妹仲訓左添... 最後等到7:25，足足企左一個鐘零三個字，終於有位喇!

醬油蟹一碟有兩隻，每碟$258，我地四個大人每人一隻，好多膏，加埋紫菜飯幾好味呀！啲肉好似啫喱，好得意! 不過又好似冇食評啲人講到咁一試難忘喎！



另外再叫左個王小排比妹妹，可惜佢食紫菜飯已經食飽左，一舊都冇試過!



另一個為妹妹而設嘅係海鮮芝士年糕，特別要求唔要辣，好多芝士，海鮮都算多，味道唔錯但想像到如果正常有少少辣味會再好食好多。



原本諗住食完唔夠先再order其他食物，點知我食完蟹同兩件王小排已經好飽，想試嘅生醃蝦要留返下次先再試喇...