STAFFORD約左INTERVIEW0刺!!

6/24

 

今日打去STAFFORD, 佢地岩岩收到我0既APPLICATION, 仲約左星期一下晝INTERVIEW添!! 加油呀李梓丹, 加油呀ADA!!!

 

STAFFORD效率好快, 相反YORK就日日都話未收到, 又話電腦未有紀錄, 話要個幾兩個星期先會發信通知INTERVIEW喎, 唉, 令我好少少唔鍾意囉...

 

希望STAFFORD收我地啦, 亦希望佢地唔會好似YORK咁要我地買債券. HEHE....

發開口夢

6/23

 

呢排妹妹成日發開口夢, 前兩晚突然係咁講hello, 仲要係好快咁連續講, hello hello hello hello hello!!!!

 

今朝我醒左, 望一望佢, 佢突然擘大眼, 望住我講: 不如我地一齊食啦!! 跟住又合埋眼訓返, 好好笑!!

STAFFORD SENT

6/23

 

尋晚研究過STAFFORD, 佢係YORK的姐妹學校, 口啤非常唔錯, 程度深, 小朋友又讀得開心, 所以今朝己經即時寄出application…

YORK

6/21

 

今日同FRANKIE傾過, 佢覺得YORK幾好, 佢個仔讀得好開心...

 

學校算OK, 最重要係超容易入, 可能因為校舍多吧...

 

FRANKIE都係舊年7月先APPLY, 好快就收左...

 

LUNCH冒雨出去寄左方方同YORK, 希望快D有回音啦...

游泳班第三堂 - 唔想去...

6/19

尋晚妹妹咳左成晚, 朝早嫲嫲去睇醫生, 我叫嫲嫲帶埋妹妹去...

返黎食D野, 要準備去學游水0刺...

妹妺話自己好眼訓, 唔去學游水了...

媽媽費左好多唇舌都講唔掂, 爸爸亦心軟話比佢唔去一次, 唉, 咁算啦, 我打電話去請左一日病假...

打完電話, 我同爸爸繼續依依哦哦, 妹妺話: 夠0刺... (????), 夠0刺, 唔夠咁多游架... (哈哈. 原來己經厭左...)

講下講下, 爸爸諗到條好橋喎, 爸爸話陪埋妹妹一齊落水...
嘩, 妹妹即刻勁開心囉, 得返5分鐘時間, 快快準備!!

最後爸爸都冇落到水, 只响池邊standby...

臨走時, 買左NEMO吸水巾, 希望妹妹會有興趣keep住游啦...

開心快樂的星期六

6/18

妹妹要求睇醫生

尋日約左兩個古古（舅父仔）一齊去探太婆... 差不多要準備時，妹妹話個鼻好唔舒服，要去睇醫生...

我：胡醫生要四點先開呀..

妹妹：而家咪四點囉！

我：唔係呀，而家兩點咋.. 我又冇book到尹醫生，冇得睇..

妹妹：咁而家book啦！

我：book唔到今日架喇..

妹妹開始扭計，但一講起可以換麥當勞嘅馬馬玩具，咩都唔記得哂，要快快準備！



做乜唔上車??

搭元朗van, 我地係第一個上車，好想快啲多啲人上車，咁搭車就可以快啲開！

妹妹：佢唔上車嘅？

我：佢唔係去元朗，咪唔上車囉！

妹妹：咁佢去邊呀？

我：我都唔知呀...

有個姐姐上車喇！妹妹問人：你去邊呀？媽媽覺得唔係幾好意思啊：姐姐去元朗囉..



好驚呀! 喊呀!

坐左一陣，妹妹發現個窗有隻蚊，係咁要我噴走佢(點噴走???)..

要更正，呢隻係烏蠅啊！

妹妹一直監視住隻烏蠅, 後來仲喊起上黎, 話好驚, 要落車… 下??? 咁大件事????

事情驚動前面0既姨姨, 姨姨話: 你咁大隻, 佢咁細隻, 駛乜驚呀??? 於是用手撥走隻烏蠅去左再前面0既位置…

妹妹仍然驚, 於是我地調位, 坐到最後0既一排…

妹妹有陰影, 地下0既污糟野都當係蚊, 佢話好驚, 跪左响度, 面向I PAN, 唔肯坐好…

真攪笑, 直至好耐之後, 我一抱佢, 佢就訓著左…



真醒目呀!!

我一直抱住隻豬轉車去到朗屏村, 隻豬突然就醒左0刺!! 仲問我到左未, 哈哈, 唔好扮野喎… 我答佢到左0刺, 佢就帶我去麥當當換馬馬…



大突破!

好開心, 今次太婆肯落街散步呀!!! 呢排太婆心情都好好, 我諗係因為大舅公黎左啦, 同埋我地個個都探得佢好密…

去街0既氧氣用哂, 我地試下唔聞住氣落街, 响樓下公園行左幾個字, 婆婆坐輪椅, 有D風, 好舒服啊!!

太婆都好開心, 返上屋企同婆婆講D空氣好舒服!!!

好成功呀, 下次可以再去呀!!!

晚餐 - 炒菠菜 + 洋蔥豬扒 + 蒸水蛋

今晚放工急急腳返屋企接力湊女, 死啦, 好多野都未做哂架...

循例要快, 買餸要快, 煮都要快, 但今晚失敗左....

三個餸煮左一個鐘多d, 仲要煮煮下餸先發現唔記得煲飯, wakakakaka!!!!!! 好彩個飯煲有快煮功能, D飯都仲配合到, 爸爸一返黎岩岩好有得食, yeah!!!

炒菠菜 - 一早諗定今晚要食菠菜, 突然好想食菠菜.... 早知炒哂一斤啦, 攪到得返少少帶飯咋...

洋蔥豬扒 - 差唔多7點, 幫襯開0既豬肉檔已經冇哂梅頭, 於是行左去第二檔.... 同阿伯講要梅頭豬扒(係咪應該咁講呢??), 阿伯問:"住趴??", 呆左, 講多次啦, 佢都仲係"住趴", 咁唯有話係啦, 希望佢唔係玩我啦...

見d豬扒咁細塊, 我買左5塊, 切成15小塊... 食譜指示要用大火先煎熟, 原本我以為好簡單啦, 點知因為我有成15塊, 當我放哂15塊落隻鑊度之後, 第一塊已經就黎lone(可能係我落左蛋白醃0既關係吧), my god!!! 煎完一陣仲要加埋洋蔥再煮架!!!

個食譜, 所有調味料同醃料都冇份量, 我唯有求求其其, 是是但但, 好彩出黎個味道都仲ok...

不過個樣就衰得好緊要.... (仲要用iphone影, 一pat野咁, 哈哈)
同埋老公一食就話唔係梅頭, 只係普通豬扒... 咁我算有比人呃嗎??? 5塊$33啊..

蒸水蛋 - 第一次睇明明未得架喎, 點知炒完個菜就已經老得滯, 只有最上面大約1cm是滑的, 下面好多窿窿啊!!

妹妹响我煮餸時, 已經食左一包粟米百力滋, 兩粒開心果, 一粒芝士同一樽益力多, 結果晚餐佢完全唔想食, 只係幫襯左幾啖....

相反老公就食左兩碗飯(佢話佢好肚餓), 結果我要再蒸一碗飯先有飯帶...

Monster!!!

今晚... 妹妹突然指住爸爸嗌"monster呀!!", 跟住... 大家就玩左呢個遊戲好耐.... 妹妹扮好驚好驚, 爸爸扮monster要咬妹妹pat pat....

爸爸抺地, 妹妹指住佢話"monster抺地喎..."

爸爸响廚房做野, 妹妹走去廚房門口裝佢, 又用手扮槍射佢 (我教的..)

玩左好耐... 妹妹不停monster前, monster後...

終於, 玩完之後, 妹妹仍然好順口咁叫爸爸做monster!!!

換澳洲雪印思敏傑

自從日本出事後, 我地就開始考慮幫妹妹轉奶粉, 入左一箱森永, 飲淨四鑵, 便開始比妹妹試飲澳洲雪印思敏傑, 妹妹冇乜特別反應, 我諗佢主要想有支奶飲下, 咩味可能唔太在意...

每日除夜晚0個餐之外, 而家朝早(或者下晝, 有時妹妹都堅持要飲奶架..

)我都比佢飲雪印...

今日同事報料, 只要用一個水貨日本奶粉0既膠蓋就可以去萬寧用$99換一鑵雪印, 嘩, 咁一鑵咪平成幾十蚊??

我地總共換左4鑵, 好抵呀!!!

和妹妹一起晚餐 - 蕃茄炒旦 + 媽咪秘製雞亦

今日雪柜除左蛋, 好似冇咩可以正正經經煮餐飯比妹妹食...

LUNCH已經食左蘑菇湯腸仔通粉, 晚餐如果都食冇益野似乎太過份了...

於是, 落街買左雞亦同蕃茄, 煮飯同妹妹一齊食...

看似好平, 但點知買醬料又買左80蚊, 哈哈...

target半個鐘內完成兩個餸+蒸飯, 可惜, 超時足足15分鐘啊....

好懶惰的蕃茄炒蛋 - 原本諗住切粒0既, 但切左幾下又開始冇心機了... 諗住挑走蕃茄核, 等個賣相好少少, 點知又係懶左... 咁少少野又居然用咁大隻碟喎...

媽咪秘製雞翼 - 呢個係跟玲契契之前比我0既食譜, 好簡單, 時間關係, 好心急開飯, 如果唔係可以再煮耐d, 等佢再入味d...

妹妹驚人語錄 - 6/11

呢排妹妹一唔鍾意就話"打你呀!", 我地覺得佢應該係學左學校D小朋友...

今日响屋企, 唔記得咩事, 妹妺同我講:"我就黎打你0刺!!", 呀! 係我呀!! 我有時嬲嬲地就會咁講, 妹妹學左我呀!! 我諗我唔可以再講0刺...

妹妹已經咳左幾日, 今晚, 妹妹突然走埋黎同我講:"我冇事0刺!!", 原來佢手渣住包麥精, 知我實話佢咳唔比飲... 後來大家都破例比佢飲, 但爸爸要求佢要沖完白白先飲, 爸爸嘗試攞左佢包麥精, 佢好緊張咁話:"唔好攞我D野呀!!", 呢句好似有聽過嫲嫲同佢講...

煮飯日

嫲嫲今日plan左0既節目係, 下晝帶妹妹去同朋友飲茶, 放工時間同我交收, 然後去聽粵曲, 咁我地一家三口就食個飯然後返屋企...

點知下晝妹妹唔肯去飲茶, 梗係啦, 大熱天時, 最爽都係攤响張床度睇電視...

於是嫲嫲取消左同朋友飲茶0既環節, 傍晚先出去, 而爺爺就幫我湊住妹妹一陣, 我一放工即刻撲返屋企...

响屋企樓下用左5分鐘時間買左餸, 我要煮三樣好快煮到出黎0既餸呀...

因為妹妹扭計, 仲激嬲左爸爸, 咁0既環境之下忘記左影相...

不過算啦, 都煮得唔靚, 不影也罷...

煎豬扒 - 妹妹都好鍾意食樓下街市醃定0既豬扒, 不過今次比人呃左, 一d都唔淋...

叉燒炒旦 - 為左快, 放棄了蝦仁炒旦... 第一次炒旦, d旦散散地, 豉油好似多左d (但唔咸, 竟然係甜0既??) (後來睇youtube, 發現原來人地炒旦係落好多油架, 而我係冇乜點落油, 呢個係原因嗎?? 但要落咁多油, 我真係一時接受唔到喎...)

炒菜心 - 前幾日煮飯我齋灼菜心, 比老公嫌棄, 今次勤力d, 蒜茸炒, 老公又真係食左好多喎...

雖然樣樣都有待改善, 但妹妹又食得好開心喎, 又話好味, 又要添飯, 真係多謝佢每次都比咁大支持.. 哈哈...

生鐵皇

屋企個鑊係古老0既生鐵鑊, 己經好殘舊, 黑忟忟, 又唔平滑, 洗得乾唔乾淨都唔知...

好想買個新鑊, 但我地又唔係成日煮飯, 所以遲遲都未買...

尋日, 奶奶突然買左喎! 嘩, 我都好開心喎!

以後我應該會有多D心機學煮飯, HEHE...

認字

妹妹返左學己經差不多一年了, 但似乎佢响認字方面仲係一D都唔掂...

係時候要開始努力了...

妹妹驚人語錄 - 6/8

今日爸爸放假, 負責接送妹妹返學放學...

放學後, 爸爸慣例帶妹妹去買美味棒...

妹妹夾左好耐都夾唔到個美味棒, 爸爸唔知發生咩事...

原來妹妹唔想要前面0個個, 想夾後面0個個: "唔好要咁燶呀!!"

禮貌之星

早幾日睇信毅媽媽個BLOG, 見到信毅攞左秩序之星, 我仲比左妹妹睇... 跟住問嫲嫲妹妹有冇攞過, 原來係有架, 不過嫲嫲又冇影低, 又冇睇係咩之星, 哈哈... 唔係自己湊放學就有呢個唔好處, 好多野都唔知, 老人家一舊雲, 知都未必會樣樣報告, 唯有有時主動聯絡老師...

每個星期五派返黎0既手冊, 正是一個好好0既機會同老師溝通...

我响手冊上寫上我0既問題, 尋日lunch時普通話老師就打比我0刺, 效率真快!!

謝老師話李梓丹係响三月份攞過禮貌之星, 佢仲讚李梓丹好有禮貌, 老師比野佢會大大聲講"謝謝老師!!"... 我睇, 應該係一時時啦, 睇心情啦, 哈哈...

雖然係豬肉獎, 但做媽媽的都覺得開心...

老師話學期尾就會比返張獎狀比各位得獎0既同學仔...

另一開心事, 係老師話妹妹呢排聽話左好多, 長大左好多, 以前會百厭到企上櫈度再跳落黎(嘩嘩嘩, 男仔黎架???), 人地上緊堂佢就响度玩櫈仔(oh no!!), 但呢排專心左好多, 話又會聽..

至於上次老師話會同佢地玩d訓練專注力0既遊戲, 佢話有玩左幾次, 其中一個係兩個人對望住對方0既眼睛, 鬥耐力, 我都會响屋企同妹妹玩下...

朝早妹妹响屋企喊時流左少少鼻血, 我同爸爸都諗唔到係咩原因, 只知小朋友鼻膜比較薄, 係好容易流鼻血... 老師都發現妹妹玩玩具喊0既時候流左少少鼻血, 佢話班上有幾個同學都有呢個問題, 一問之下, 個個都話屋企有開冷氣, 應該係鼻太乾0既原因, 建議夜晚响床邊放杯水或幫妹妹用濕棉抺抺個鼻孔...

SHOPPING日

6/6

 

Long weekend最後一天, 我地去左尖沙咀SHOPPING…

 

搭車途中, 妹妹指住我隻手: 媽媽, 你隻手污糟左…
我: 唔係污糟黎架, 係粒墨, 整唔甩架.. 妹妺有冇架?

妹妹: 我冇呀!

妹妹: 咁呢D呢?

我: 前兩晚訓訓下比蚊咬左兩啖囉…
妹妺LA埋塊面, 好似好戥我痛苦咁...

跟住妹妹指住我塊面, 咁呢粒呢? 呢粒呢? 呢粒呢?

逐粒問, 你知道媽媽好難為情嗎? J

 

去尖沙咀的目的, 其實係為i.t. pre-sale, 可惜, 我睇中0既鞋款全部都話係新貨, 冇折, 真係搵笨, 於是我決定唔買住, hehe….

 

大人掃貨不成, 變左不停買野比妹妹….

 

衫衭鞋祙都買齊, 妹妹收穫好豐富喎…

 
仲去埋樂園同TRU, 買左LEGO, 同埋媽媽買完偷偷地收埋0既TINKERBELL PUZZLE…
 
返到屋企, 好SURPRISE, 盒LEGO, 咁大個盒, 原來D LEGO好細粒, 响個盒底度, 哈哈…
 
大人都難砌啦, 何況小朋友…
 
不過, 妹妹都好有興趣, 我睇住圖一路指導妹妹砌, 佢多數都做到, GOOD!

砌完sister, brother同鴨鴨, 妹妹好開心, 話要影左相...

花花 + 鴨鴨, 妹妹話要同佢地一齊訓...

游泳班第一堂

6/5

終於等到0刺!! 今日係游泳班0既第一堂, hehehehe....

我地揀左史丹福, 因為就响距離屋企5分鐘路程0既泳池, 學完游水返屋企先沖涼都得, wakakakaka....

今朝妹妹仲同我講:"唔駛用泡泡架!! 會有袖袖戴架!! 仲可以咁咁咁架!!! (邊做游水0既姿勢...)"

我地三人整裝待發, 大家都準備哂泳衣, 毛巾, 其實只係一位家長陪同下水, 不過大家都準備定, 怕萬一妹妹扭計或者驚驚...

未夠鐘, 影返幾張相先...

真係難掩快樂又期待0既心情呀!!

哈哈... 變左隻豬...

等左好耐, 終於夠鐘上堂0刺!!

爸爸負責陪妹妹落水, 媽媽响家長席觀看...

等緊上堂....

跟住教練黎指示大家warm up一下...

我地呢班只有三個小朋友, 真好, 人少d, 教練就可以focus响妹妹度多d!!

咦??? 點解爸爸唔駛落水0既?? hehe....

首先, 大家踢下水先.... (我地連泳帽都未有, 媽媽又唔記得帶泳鏡, 不過算啦, 打電話問過, 頭兩堂都唔需要泳鏡的...)

大家圍住, 吹下波波... 妹妹似乎一d都唔驚, 仲即刻就融入左咁添....

學下踢水...

嘩! 綁住浮板响背脊, 成個人都浮起左lu, 好玩呀!!!

教練訓練佢地唔好怕水, 用玩具花灑將水淋落小朋友個頭度, 妹妹冇泳鏡都冇問題, 好叻呀....

用完花灑仔, 跟住呢下勁0刺, 成筒水照頭淋, 妹妹都仲ok, 媽媽見到教練豎起手指公讚佢!!

教練教妹妹踢水...

過程中, 妹妹不時會控制唔到自己而飄走左, 有時妹妹會及時捉住教練隻手, 有時就會飄走左少少, 不過仍然係好安全0既, 妹妹亦都唔驚咁...

教練再同小朋友玩吹波波同兜頭淋0既遊戲, 今次妹妹比筒水淋0既時候唔得0刺, 有d驚, 不過都仲被淋左兩筒 (最衰係媽媽, 如果記得帶泳鏡應該會好d), 但妹妹咁都冇喊喎, 好叻呀!!

用對腳夾住浮板學踢水, 妹妹仲未控制到...

响上面見到, 妹妹有時會望向爸爸0既方向笑, 我諗佢真係好開心...

教練企圖令小朋友個頭浸落水度行過去...

一個鐘頭話咁快就過, 妹妹玩得好開心, 仲話聽日又去過, 哈哈....

韓物日

6/4

同魚旦舅父食完飯, 返到屋企又開始準備去太婆屋企0刺...

妹妹一上到車就訓著左, 直至落車都冇醒到, 婆婆同我地响小巴站會合, 然後去田中買鰻魚炒飯比太婆同妹妹做晚飯...

但係... 田中仲有半個鐘頭先開, 唯有周圍行下, 入左間韓國食品舖頭...

買左兩款公仔面同薯粉...

田中終於都開0刺, 妹妹亦都岩岩醒左, 隻手就黎跛, 終於可以放妹妹落地0刺... 但係, 唔夠一分鐘, 妹妹又要抱返....

今日有成十幾人响太婆屋企呀, 好熱鬧, 妹妹開頭好靜侷, 慢慢先開始玩, 同大姨姨玩到癲哂, 不過... 佢誤會左大姨姨叫細姨姨, 佢話最鍾意細姨姨喎..

細古古同小穎姐姐都黎左呀.... 哈哈... 小穎姐姐岩岩响韓國返黎, 當然唔少得手信啦...

同埋幫我買0既護品/化粧品... 哈哈哈...好多好多呀, 好抵好抵呀!!! 真係thank you哂呀!! 實在太太太開心0刺, 好好好想即刻試呀!!

Innisfree

Too Cool For School

Banila

好彩爸爸黎左接我地, 如果唔係我地都唔知點拎呀...

LUNCH W/魚旦舅父

6/4

正在考慮整D咩比妹妹做午餐, 突然電話响起, 原來係魚旦舅父, 佢岩岩响我地屋企附近, 提議一齊食lunch...

好啊, 就近近地, 我地樓下茶餐廳啦...

呢間昇悅, d點心冇樣好食, 妹妹只食左個奶皇包...

食野前, 魚旦舅父話食完野去買玩具, 一食完野離開坐位, 妹妹即刻話: "去買玩具lu!!!!", haha...原來佢一直都記得, 唔怪得知餐飯冇心機食啦!!

我提醒, 其實呢度冇玩具買架, 於是魚旦舅父話去7-11買...

買左呢隻狗, toy story隻狗....係....電話繩黎....

唔要夾夾

前兩日, 我幫妹妹夾左幾個細夾响個頭度, 夜晚佢同我講, 今日响學校跌左, 老師幫佢搵返…

尋日, 我幫佢夾個大0既BEAR BEAR熊夾, 尋晚發現個夾响書包度…

今朝, 幫佢紮完辮之後, 我話: 夾返個BEAR BEAR夾啦…

妹妹: 唔夾0刺, 會跌左架..

我: 夾啦, 靚D喎..

妹妹: 唔夾0刺…

我: 咁夾兩個細夾夾吖…

妹妹望都唔望我: 唔夾0刺, 會跌左架, 就咁啦!!

我發現, 妹妹講野D態度都幾似响屋企0既我… 哈哈…

又大個女左好多0刺...

6/1

妹妹己經好似好大個女咁…

今朝搭車, 我抱住妹妹, 妹妹挨响我度, 大家都好呆滯…

我: 媽媽好攰呀..
妹妺: 一齊攰啦…
我: 你都好攰呀?
妹妹: 係呀…

放工返到屋企, 妹妹要我同佢玩, 但因為好攰, 根本專心唔到… 於是妹妹嬲左, 訓响地下, 唔應我, 唔比我抱, 後來自己起身去搵爺爺玩…

遺失angry bird

5/29

尋日探完太婆, 今日我地去黃大仙同太嫲飲茶...

妹妹又要飲茶, 又驚d茶葉, 要爸爸幫佢整走哂d茶葉先敢飲... 飲到底, 有d黑色粒粒又驚...

叫左小白兔棉花糖, 妹妹好開心, 不過佢應該麻麻地鍾意食, 只咬左兩啖就跌左落地下...

飲完茶我地响商場度彈波波, 彈左6蚊都冇中獎, 妹妹勁失望... 不過媽媽堅持唔再彈0刺, 大個女0刺, 要嘗試下失敗0既感覺...

爸爸一出現, 就即刻問我攞散紙扭angry bird比妹妹, 哈哈, 妹妹好開心, 扭到隻白黃色0既angry bird....

妹妹一直拎住, 搭車返大埔時仲不停介紹我地屋企比angry bird知...

"我地屋企有barney睇架!!"
"有noddy睇架!!"
"有bulu仔同珠寶一齊玩架!!"

成程車不停咀係咁講, 見到有兩個哥哥訓左, 又話人"佢地做咩訓左架??", 哈哈!!

可惜, 响我地再戰一田時, 妹妹唔知幾時跌左隻angry bird, 我同爸爸返到屋企先發現, 大家都唔敢出聲, 好彩妹妹原來已經唔記得左, 真冇記性...

好有太婆心喎...

5/28

呢一日我個心正在盤算好唔好去探妹妹0既太婆....

突然妹妹問我係咪去太婆度, 咁好啦, 既然妹妹都想去, 準備出發啦!!

去到太婆家, 妹妹自己玩玩下, 突然走入去問太婆有冇唔舒服... 佢真係有好扺錫0既一面架...

食完飯, 妹妹開始眼訓, 要返屋企0刺...

臨走時, 妹妹指住婆婆話: "你煮飯比太婆食!!", 哈哈, 妹妹真細心, 知道太婆唔舒服, 吩咐婆婆煮飯比太婆食, 難怪太婆咁錫你...

一田大減價

5/26

今日係一田大減價0既第一日, 而家大埔店開左, 我地當然唔可以錯過...

主要任務都係買妹妹0既用品...

最重要就係買泳衣0刺...

又想去沙灘玩沙著, 又想著黎學游水, 揀黎揀去, 冇得試又唔知岩唔岩著, 最終响店員提示下, 我地買左三套泳衣, 當中會有一套唔岩著, 等減完價後拎返去退錢, good idea!!

返到屋企, 馬上試下岩唔岩先.... 哈哈, 妹妹好開心呀!!

呢套係夏天不可少0既三點式... 雖然係90碼, 但都有dd鬆...

妹妹知道自己大肚腩, 縮起左個肚, 哈哈...

呢套都好靚呀, 都係妹妹最鍾意0既blue.. 一件頭, 用黎學游水岩哂啦!!

今晚响一田回程時有趣事, 嫲嫲今晚帶左bb車, 我地搭的士返屋企時唯有將bb車放响車尾箱, 妹妹好擔心, 一路不停叫我攞返, 講左好多次, 個樣好擔心...

落左車, 妹妹同我講好驚, 我問佢驚咩, 佢話好驚會擺低左, 哈哈, 估唔到妹妹會講呢d野...

成功 - 飲藥水...

5/25

妹妹今日傷風咳都嚴重左, 嫲嫲同姑姐下晝帶左佢去睇醫生...

妹妹都大個女0刺, 應該開始試下唔好再用藥水溝奶, 要試下就咁飲...

爸爸同妹妹講係時候要飲藥水0刺, 今次要自己飲, 妹妹離奇地諗到藉口, "唔飲0刺, 我好飽呀~"

到我得閒, 即係行刑時間到0刺, 先氹下佢啦, 同佢講如果自己飲左藥水, 聽日就可以同陳主任講自己好叻女, 因為就咁飲藥水, 大個女呀!!

妹妹好受落, 仲好開心添....

好! 馬上開始!!

三樽藥水, 妹妹揀左黃色先, 味道應該幾可口, 一啖就飲哂, 叻!!!

第二樽妹妹揀左紫色, 呢支明顯差d, 不過都勉勉強強飲左, 好叻!!

到第三樽0刺, 呢樽我唔飲都知一定唔好飲, 就係止咳0既啡色, 妹妹may左一may, 好堅決: "倒!! 倒呀!!", 我笑到手都震埋....

最後出埋darryl, 老師, 妹妹最終都肯飲哂, 算好叻架0刺...

不過.... 成功0既第一次, 亦係暫時0既最後一次...

五月之星生日飯

5/21

行程好緊密, 我地去左太婆屋企之後, 大古古煮飯, 妹妹食左D, 跟住我地就趕去長沙灣大中華飯店食飯...

今次係慶祝牛叔叔生日, 仲有其他幾位五月之星, 鼻屎強叔叔, 菠蘿文叔叔, 同埋牛女添呀...

因為唔飲酒, 妹妹今次都可以參與呀...

妹妹聽到鼻屎強呢個名, 覺得好好笑, 佢一定好奇怪點解鼻屎都係一個名, 哈哈!!

仲有魚旦舅父同妹妹去左買玩具, 妹妹揀左ANGRY BIRD...

煮飯仔

5/21

去到太婆屋企, 原來小穎姐姐買左煮飯仔同妹妹玩呀, 嘩, 好多呀, 好玩呀...

咁樣, 妹妹又可以玩好耐0刺...

第一次失手

5/21

今日下午同妹妹去元朗, 因為妹妹搭車訓著覺, 落左小巴我就諗住搭的士去朗屏村啦, 點知原來要搵架的士都唔容易, 我抱住熟睡中0既妹妹, 越行越遠, 行到去一個街市咁0既地方, 响的士站排隊...

前面0既人一路上車, 哈哈, 下一個到我0刺!! 點知等左好耐都冇車, 條街好多車塞住哂, D人好乞人憎, 唔過黎排隊, 响後面塞住0既地方上車, 有冇攪錯呀???

等等下, 又有兩個十零歲0既細路女, 其中一個踎左响度, D人就圍埋去啦, 原來佢肚痛, 最尾仲幫佢截左架的士添.... 唉, 我等左好耐架0刺, 真係唔好彩...

好灰心, 都己經等左幾個字, 妹妹都己經醒左, 我決定離開呢個地方... 哼!

行返出大馬路0既時候, 開始落少少雨, 唉, 點解咁黑仔架??

行行下, 一時不留神, 比一架停泊响行人路0既BB車TICK到, 人又多, 我都唔知做咩反應, 响跌落地0既時候, 幸好我仲識將妹妹擺响地下, 妹妹企到响度, 冇受傷...

妹妹出世以黎, 我都未試過跌到, 今次係第一次, 失左手...

好痛啊! 但冇人可以幫到我, 我仲要抱住妹妹繼續搵車...

最終都係搭左小巴, 早知就一早搭小巴啦, 好嬲呀....

最嬲0既係, 話比爸爸知佢居然冇反應, 點解做女人做到好似我咁苦架??