尋晚爺爺幫妹妹校水沖涼....
妹妹同爺爺講: Thank you!!! (真係乖!!)
爺爺跟住就行開0刺...
妹妹同爺爺講: Bye!! Good night!!! (Good night?????)
頭先爺爺同妹妹落去食早餐....
妹妹同媽媽講: Bye!! Good night!!! (妹妹你究竟知唔知咩係Good night呢??)
妹妹尋晚突然指住D餅餅話: 盧太!! 哈哈, 都未聽過佢識講盧太, 好好笑, 咁你記住下次見到人地就叫聲盧太0刺, 同埋記住人地比野你食要講謝謝呀!!! (都唔知到時講唔講...)
如我所願，老公今日真係早放工，可以同我去睇唐山大地震，不過···未夠三點就放工，又真係早左d喎，hehe...
我趕哂手頭上d急野，即刻去到apm，先食個板長，我順手拎左老公包紙巾留為己用···
套戲好慘，我由頭喊到落尾，個頭好痛, 老公包紙巾岩岩好比我用哂，成隻豬頭咁離開戲院，我諗d人都知我睇邊套戲····
老公問如果係我，我會唔會嬲我媽媽，我諗我真係會，佢係要犧牲我，比唔要我更嚴重，雖然用自己生命去換細佬條命，但由自己媽媽口講出黎，我諗真係好難受，但其實媽媽都好難受, 諗諗下，又喊左···
但比我係媽媽，要自己決定犧牲邊個，我諗我做唔到，兩個都係自己骨肉，我寧願自己入去換佢地出黎····
唔知如果我未係媽媽睇呢套戲會唔會有一樣0既感覺呢？
尋日麻麻中午就出左去整腰骨，爸爸又要整頭髮，於是我同妹妹0係屋企hea下先····諗住有咁多時間，妹妹又入左房自己玩，我就趁機化埋個妝(而家個頭一唔化妝就勁醜···)，0向呢10-15分鐘期間，妹妹一個人竟然可以將我間房反轉左，將公仔，書，攤到一床都係不特止，仲將我放日用品0既布架0既野摷哂出黎，將d巾巾散哂出黎，有d仲幫我拆埋袋添(OMG!一日都係我，係我今朝見大家無所事事，提議妹妹幫我手執巾巾，希望我唔0向度佢唔會再咁玩啦)，雖然我中間有望過下佢，一次佢0係度將我d cream搽落將床度(我當然馬上阻止！), 第二次就用濕紙巾抺書(算啦, 都係清潔下野啫), 但唔為意原來間房已經變成一個廢墟…
唔知點解, 妹妹同我出街一定唔肯行, 我抱住佢又開住把遮(好猛太陽呀!!!), 行到一半我己經成身濕哂… 唔知點解下晝兩點幾d巴士都咁full架呢? 要企我當然唔上啦, 等多一架都係好多人, 好彩有最後一個位, 不過呢, 有時覺得d人都幾衰, 個男人坐左响出面個位, 我一個女人揹住個袋又抱住個女, 我係咁望住佢佢都唔醒目(or唔願意啦..)坐入去, 好彩我驕小玲瓏, 身手敏捷啫….
因為架巴士太熱, 媽媽抱住妹妹大汗叠細汗, 妹妺好眼訓都訓唔到, 佢索性起身同隔離bb同對面d姐姐打招呼, 到對面姐姐落左車, 我地終於每人有一個位坐, 妹妹終於都訓得到0刺….
原本媽媽計劃同妹妹落車後入去美麗華間pacific coffee比妹妹訓多一陣, 一邊等爸爸0既, 點知可能媽媽落車抱起妹妹時太大動作, 攪醒左妹妹, 入到pacific coffee又冇位, 所以妹妹都冇再訓0刺(對唔住0阿…)
第一站: cowboy seven - 我地上左去THE ONE度睇下有咩地方可以坐低 (响商場妹妹都要媽媽抱, 好攰好攰…), 呢個商場好新, 大部份舖頭都未開, 途經一間boutique, 妹妹見到花呢花碌0既衫(大人衫)好鍾意, 企左响門口睇, 指東指西, 又話靚靚, 我就話比佢知佢要大個先著到啦, 入面個sales好似好有興趣咁, 笑哂咁望住我地好耐, 攪到我都有d唔好意思…我地上到4樓先有間叫Cowboy seven0既coffee shop, 我地叫左杯Banana Chocolate同Chocolate Truffle Cake, but味道一般, 妹妹呢個朱古力怪都唔hou呀….
爸爸好快黎到(早知唔食住啦), 哈…爸爸一黎, 妹妹好開心, 即刻又肯落地亂走, 哈, 咩事先?? 係咪蛤我先???
爸爸同妹妹玩, 妹妹扮爸爸0既表情, Q爆呀!! 仲學爸爸用手指撩下人地下巴話”扮野?!”, 哈哈….
第二站: 活方自家烏冬 – 爸爸同妹妹都需要食野, 我地叫左牛肉烏冬, 炸芝士年糕同燒玉子, 三樣野妹妹都食得…. 妹妹太鍾意食紫菜0刺, 燒玉子上面d紫菜絲都比妹妹徒手拎黎食哂, 哈哈….
第三站: Giodano隔離間和式親子百貨 – 睇個名以為好大間, 好多野賣, 點知….. 不過都買左支牙刷比妹妹, 幫襯左$13, 但送左兩支筆同好多包奶粉sample, 好著數喎….
第四站: 隔離書局 – 去唔到書展(今朝同妹妹講, 哎呀, 我地今日去唔到書展買書書添, 點知妹妹答我: 買糖糖!! 個腦只得糖糖同力力, 我服左你0刺!!), 我地唯有行書局啦, 睇下有咩書可以買比妹妹睇, 妹妹自己揀左本唔岩佢0既toy story漫畫(佢識講toy story, 好叻呀!!), 而我就揀左本幼兒字典, 不過最終因為怕重所以冇買….
第五站: B&M – 見學校比妹妹用0既杯比較淺, 媽媽都想買個咁上下淺度0既比妹妹練習, 不過買唔到, Pigeon奶樽刷都買唔到….
第六站: H&M – 上次買左兩條leggings太長, 拎黎換, 但冇野睇岩, 唯有refund啦, 呢d舖頭真係識做生意, buy now, decide later….
第七站: 海運 – 目標係TRU, 但途經太多吸引0既地方, 間間都入一入去, 未到TRU, 爸爸媽媽都己經虛脫左…. 媽媽今日著左對高踭鞋, 行左咁多路, 對腳己經斷斷地…. 妹妹响TRU走埋一張LEGO枱玩, 0個度己經有一個BB响度玩緊, 我一直都冇為意, 玩玩下, 先發現個BB塊面同D手腳都一粒粒, 好似生水痘, 我同爸爸似乎係同一時間發現, 我望一望爸爸, 爸爸即刻抱走妹妹, 雖然我地打左水痘針啫, 但都有機會出架, 好驚嚇…. 大陸人真係冇咩呢D意識, 水痘係空氣傳染架, 真係唔可以走出街架ma….
第八站: 新港foodcourt – 其實唔肚餓, 但都要比妹妹食返餐dinner, 我地order左叉燒包, 鵪春旦燒賣同妹妹最鍾意食0既牛肉, 妹妹都食左好多呀, 爸爸食面, 比左少少蛋妹妹食, 妹妹話”好味蛋蛋!!”
第九站: 大埔 – 妹妹一上車就訓左, 返到屋企爸爸嘗試叫醒佢沖涼, 但最後都唔成功, 算啦, 做隻污糟豬聽朝先沖啦, 媽媽唔介意0既….
P.S. 妹妹都幾肯學, 每次佢講得唔正, 我地再教佢佢都肯再試下講, 妹妹好乖呀, hehe….
尋晚沖完涼, 我如常搽面準備訓覺, 嫲嫲就响度氹緊妹妹訓, 聽到妹妹玩到格格笑, 好得意.... 仲會心微笑緊0既時候, 嫲嫲突然大聲講: "ADA, 妹妹流鼻血呀!!!!!!" 我嚇一嚇, 即刻衝出去睇下妹妹, 妹妹流左好多鼻血, 佢自己同嫲嫲件衫都有.....
我地要扮鎮定唔好嚇親妹妹, 好彩好快就止左血, 究竟咩事會咁呢? 其實之前妹妹已經成日捽0個邊鼻, 我以為佢有鼻鼻唔舒服啦, 但望過又唔多覺所以冇再多加注意.....
今朝嫲嫲落藥房, 0個個人話妹妹肺熱, 執左包涼茶返黎, 仲話妹妹要戒口, 連朱古力同餅餅都唔可以食呀 (今次慘0刺...)
D涼茶有陣味, 妹妹飲左兩啖就唔再肯飲0刺, 不過都幾得意架, 妹妹用奶樽飲, 試左一啖, 覺得好怪, 跟住佢竟然再試多一啖, 先真係肯定接受唔到.... 比我, 試過第一啖一定會即刻放棄囉....
尋晚爺爺同嫲嫲要出去打邊爐, 我當然唔同意佢地响三號風球之下帶妹妹出街啦, 所以我同爸爸一放工就急急腳返屋企接棒…..
妹妹好乖, 睇碟同少少零食己經可以滿足到佢, 佢一路睇碟, 一路跟住學英文, 雖然話睇碟唔係咁好, 但妹妹真係學到好多野架….
妹妹真係好乖架(又讚, 想死…
) , 食零食不嬲都好闊佬肯分比人食, 尋晚盒朱古力淨返三粒, 妹妹自己食左一粒, 請左我食一粒, 淨返一粒佢當然諗住比自己啦, 响佢拎起想放入口之際, 我問佢淨返最後一粒可唔可以請爸爸食, 我不斷remind佢個盒冇哂, 係得返最後一粒, 可唔可以比爸爸食呢? 見到妹妹個樣係有考慮過的, 佢最後都走入廚房將呢粒極珍貴0既朱古力送左比爸爸, (妹妹真係好乖呀!!!) 不過可惜, 論盡的爸爸接唔住粒朱古力, 跌左落地, 為免妹妹有唔好0既感覺, 爸爸都扮食左....
差唔多到訓覺時間, 妹妹飲完奶仲好精神, 公仔, 貼紙, 望窗 (唔係妹妹發現, 我都唔知原來我地個窗可以望到好遠0既火車架...勁呀!), 睇書都做過, 妹妹依然未眼訓, 呢個時候爺爺同嫲嫲就返黎0刺, 妹妹出去迎接佢地, 我當然即刻訓覺啦, 其實真係好攰0刺, 但妹妹精神到不得了, 不停好大聲咁唱"one two three four five, chup chup chup woo woo....", 又走黎走去, 一時話要同我訓, 一時話要同嫲嫲訓, 一時話要响廳訓, 一時話要入房訓, 我所有野都廳到, 但我好眼訓, 覺得好凍, 喉嚨好痕, 可能作病呀, 所以真係冇力起身理佢0刺....
孩子的心靈純淨得像一面鏡子，他能折射出周圍人對待他的態度和方式。別人怎樣對待他，他就會用同一方式對待別人。
一個具有平等意識，尊重他人的父母是這樣的：
就是在這樣平常，瑣碎的事情中，孩子一天天，一點點長大。這樣長大的孩子會是一個真正懂得尊重他人的人，不僅會有良好的人際關係，還會建立一個真正幸福的家庭。
响圖書館借左呢本書, 有d野講得好中, 要節錄低先得....
我要媽媽
母親放完產假了, 由誰來照管孩子呢? 首先入選的可能是雙方的父母. 有的工作太忙, 乾脆把孩子全托給老人. 家裡有老人可依靠, 這樣的夫妻通常被認為很幸運. 老人會向你保證: 你們放心工作吧, 那麼多孩子我都照顧大, 這一個還不好照顧嗎! 隔代人的痛愛是加倍的. 的確, 老人知冷知熱, 細心周到, 在他們手裡孩子碰撞的機會比在年輕父母的手裡要少得多.
但是, 時間長了, 你也許會發現, 你的孩子怎麼那麼任性, 似乎他永遠是核心, 一不如意就大哭大鬧, 而且有些膽小, 不敢冒險, 不願主動同人交往, 一旦犯了錯誤, 你們很難管教他, 因為他有靠山. 這是一些心理學家觀察得來的結果...
讓老人代管孩子, 最好在敎管方式上互相協商. 無論多忙, 也要每天抽出一定的時間同孩子一起. 全托是最不可取的, 日後當你們收穫自己親手種植的苦果時, 滋味自知, 後悔莫及.
睇完這段文章之後, 我決定要每日盡早返屋企, 盡量多時間同妹妹一齊.....
爸爸逢星期四都比較清閒, 這個星期四更可獲一天假期, 正呀!!!
雖然爸爸放假, 但媽媽(即是我)都照常返工, 爸爸和太太飲完下午茶便和嫲嫲&妹妹過來MEGA BOX閒逛+晚餐....
6點多我便閃, 趕快與他們共聚天倫....
九樓是兒童天地, 好多動物裝飾, 記得上次來這裡是幾個月前, 妹妹見到咁大隻動物有點怕, 但今次明顯不同了, 妹妹好開心, "嘩!"了幾百次, 好誇張..... 再加上九樓有sir sir, 大眾入面又有很多公仔野, 妹妹玩到唔捨得走.....
後來逛了IKEA, 再到10樓的Sora ti.te.mo Café晚餐, 妹妹一個人便喝了一碗媽媽的至愛忌廉蘑菇湯, 又吃了少少烏冬, 鰻魚PIZZA, 還有媽媽的至愛木糠布甸(又吃了半個!! 冇法啦, 鬼叫你是我寶貝女, 所有野我都願意給你的).....
吃完晚飯, 經過9樓妹妹又要玩, 這樣又玩了半個鐘....
不過我都是喜歡以前的MEGA BOX, 現在多了IKEA及JUSCO, 人流多了, sir sir都多人玩了.....
原本星期四先係最後一堂, 但阿sir話學校要佢上其他堂, 所以我地唯有就佢改為星期一上, 時間改為7點半, 但阿sir最後連7點半都趕唔到, 遲到左成半個鐘, 不過算啦, 見佢响澳門趕返黎, 又成身濕哂, 佢都唔似一個不負責任0既人.....
呢堂我地學皮紋分析, 哈! 呢樣野同NLP好似扯唔上關係喎? 後來我地知道原來佢係有做呢樣生意架, 咁呢堂好明顯就係搵生意, 不過雖然佢奸奸地, 但我又對皮紋好有興趣, 都要多謝佢教左我地呢樣野....
我地用唇膏套取指紋, 但效果唔係好好, 我主要都係睇返自己手指 (後來我發現响陽光下睇係最清楚架)....
古語有云: 一斗窮，二斗富，三斗四斗賣豆腐，五斗六斗開當鋪，七斗八斗坐著走(當官)，九斗十斗享清福. 原來中國响西元前三世紀(即係幾時呢??)已經有研究指紋, 所以民間有呢個說法..... 原來我係七斗架, 我咪做官??? 哈哈哈!! 不過斗之中最好就係正斗紋, 而我0個七斗就全部都唔係正斗, 所以我樣樣都唔係最好0個隻...
阿sir話, 如果一個人有7隻同類0既紋, 就代表0個個人係0個種性格, 我有7個斗紋(雙斗, 螺同囊形都係斗紋), 我覺得都講得幾準:
斗型紋: 認知學習型
行為特徵: 凡事講道理(準), 問由來(準), 獨立性強(準), 充滿活力(一般啦), 具競爭特質(一DD野啦), 學習上較主動(都OK0既), 具開創性格(即係咩??), 但容易形成主觀(係幾主觀架), 固執(有時都幾固執架), 不易溝通(同某D人係溝通唔到架)的個性...
阿sir仲話, 呢類人唔輕易放棄(yes!), 諗好多野, 但可能諗極都諗唔掂(係呀, 有時越諗越多, 就係諗得太多呀, 好岩呀!!), 同埋係做leader多(咁呢個我又未係喎.)
我0既結果:
右手拇指 - 代表組織及管理能力 - 雙斗形 (枝節多, 容易諗多左, 要專注d先得)
右手食指 - 代表邏輯及推理能力 - 螺形
右手中指 - 代表操作及理解能力, 小肌肉 - 螺形
右手無名指 - 語及記憶能力 - 螺形 (這對大人影响不大)
尾指 - 閱讀及觀察能力 - 囊形 (這也對大人影响不大)
左手拇指 - 創造及思考能力 - 正箕紋
左手食指 - 空間及想像能力 - 螺形
左手中指 - 藝術及律動能力, 大肌肉 - 正箕形 (我真係冇乜藝術同運動天份喎)
左手無名指 - 音樂及情感能力 - 螺形
左手尾指 - 認知及圖像能力 - 正箕形
阿sir話小朋友响8歲前做皮紋分析會好d, 咁爸爸媽媽就可以根據小朋友0既特質去發展, 我決定會幫妹妹做, 就約7月尾啦!!
尋晚妹妹扭計又打人, 嫲嫲又照例走出黎SUPPORT佢(佢雖然有份話妹妹, 但邊摸摸佢個頭邊話囉, 比我係妹妹我會覺得我冇錯…), 嫲嫲又不停同妹妹講唔可以打人, 做埋打人動作比佢睇, 妹妹跟得好快架, 嫲嫲做一次, 佢又做一次, 最後我忍唔住口叫停嫲嫲, 妹妹先冇再打.... (呢個就係應驗左NLP0既負面說話, 無論對待小朋友or大人, 都唔應該講/做負面0既野, 因為好自然0個樣負面0既野就會入左腦), 我真係嬲嬲地, 谷住谷住今朝5點幾起身沖完奶就訓唔返0刺… 個腦一直諗點先可以唔好縱妹妹, 點先可以叫老人家去配合, 又祈下禱, 典黎典去終於差唔多要起身時先訓到, 所以今日好攰好攰好攰….
今日係升中派位大日子, 雖然未關我事, 但做媽媽0既我已經開始關心呢D事, 幸運地爸爸都有留意, 仲有打電話黎問我升中派位0既機制係點添, 我地傾左一陣, 我又乘機講下縱小朋友0既問題, 又好幸運地爸爸有好平靜咁聽我講出我0既心聲, 佢都好同意, 贊成慢慢同嫲嫲講下….
今日我隔離位同事仔仔升中派位, 我都鄧佢緊張呀!!! 比我睇結果0個一刻真係心都跌埋出黎都似!!! 好開心佢仔仔入到第一志願, 係一間band1尾band2頭0既學校…. 傾下傾下, 佢先發現原來自己未食lunch, 可想而知, 做家長0既壓力幾大…..
我請敎左佢派位0既程序, 而家小五同小六都會將校內考試0既分數呈上教育署, 另外會有一個類似學能測驗0既試要計分, 每間學校己有個ranking, 如果ranking低0既學校就算考100分都唔可以派到band 1學校架, 所以讀一間好0既小學係好最要…. 但點先可以入一間好0既小學呢? 除左運氣之外, 就係要响讀小學之前(即幼稚園期間)參與多d活動, 仲要係公開比賽, 最好就攞埋奬, 學多d野, 讀一間有名d, 好d0既幼稚園, 咁樣到升小時叩門就會容易d0刺…..
講黎講去, 即係我而家就要開始籌備0刺, 先搵一間好0既幼稚園, 再計劃下妹妹可以學咩, 參加咩活動, 一個廿年0既project而家要開始0刺…
可憐的小朋友, 可憐的爸爸媽媽…. 努力加油呀!!!!!!
