母親節=兒童節？

今日妹妹好乖喎，佢話佢會同爸爸夾份請我食晚飯，我諗唔到想食咩，佢仲提議食pepper lunch, 咁我都冇所謂，因為我胃又痛，肚又痛，都冇咩特別想食..

點知一出門口，佢突然叫我地每人再提議一樣我鍾意食嘅野，佢竟然講kitchen j... 好古惑，我覺得比人呃左呀！

去到黃埔美食坊，周圍都要等位，妹妹趁我去廁所時攞埋kitchen j嘅飛，仲話好快有位，其實佢已經決定左，搵我笨嘅！

不過咁，kitchen j嘅mother's day set真係好抵，$358有好多野食喎，仲有妹妹一定要食嘅蜜糖芝士pizza添……



最後有段小插曲，話說我地揀嘅甜品其中一款係一個朱古力波，波裡面有雪糕，我地只需將朱古力醬倒响個波上面，個波就會慢慢溶，咁我地食嘅時候，又有朱古力，又有雪糕，又有底層嘅脆片，幾個層次，我估大約係咁啦… 不過好神奇嘅事發生左，妹妹將個朱古力醬（其實似熱朱古力奶多啲，好稀架咋，同埋係淺啡色，同相片不一樣）倒落個朱古力波度，個波立即溶哂，連雪糕都溶哂，妹妹好趕咁嘗試用匙羮筆起啲雪糕，但15秒都冇，成碟野變左朱古力奶，哈哈哈...

就係呢個樣..



問waiter點解會變成咁？ 佢嘅答案係“吓？咁唔係點呀？” 即係就咁食？於是再問經理，佢都話係咁，佢地係模仿外國嘅設計.... 但..真係咁樣食嗎？我再三問佢，咁而家係咪用匙羹筆起黎飲？經理仲比個餐牌我睇，上面講解個朱古力波會slowly melt, 但而家係immediately melt喎。講真，我未食過呢道甜品，但個甜品响間變成朱古力奶，咁佢應該係飲品，唔係甜品喎。經理解釋，應該係今日比較忙，雪柜成日開，令啲雪糕唔夠凍，於是溶到變左咁。最終經理都好好，換過另一個甜品比我地。

經理行開左之後，妹妹問係咪佢倒得唔岩，似乎將責任歸疚落自己身上，我地解釋比佢知，佢依然接受唔到喎，仲覺得我咁樣問人係唔岩添，其實我只係問清楚我認為唔make sense嘅野，並冇同人嗌交呀...

Anyway... 呢個母親節並冇特別快樂，希望下一年會好啲啦！