便服日

2014年9月30日

今日係便服日，妹妹要著Elsa裙返學!

奉基銀行

2014年9月23日

 

 

今日學校派左一本奉基銀行存褶, 每個同學都有一本, 每當有好表現時就會有積分, 每個月老師就會幫小朋友加入分數, 當儲夠特定積分之後, 小朋友就可以去指定課室度換禮物0架0刺...

 



第一次英文默書

2014年9月23日

 

今日派左英文默書返黎, 雖然默書內容好淺易, 但係得到100分都十分可喜可賀呀!

 

 

 

以信生日派對

2014年9月20日

 

話咁快以信今日就一歲生日0刺, 小穎舅母安排左船P幫以信慶祝, 喜愛水上活動0既妹妹當然唔會錯過啦...

 

兩表姐弟逼埋响個車車水泡入面...

 

 

妹妹好鍾意釣魚, 好開心!



 

參予呢個船P最高0既難度就係要準備食物, 今朝晨早6點幾我就起身煮瑞士雞亦, 仲要一次過整40隻, 未試過呀, 好彩都清哂, 証明味道還可接受啦!



 

食完野, 妹妹落水游左一陣, 跟住就跟左佢地上快艇, 去睇佢地玩香蕉船....

 

去左好耐都未返, 其實我都有D擔心呀.... 終於都等到... 妹妹竟然有一齊落水玩香蕉船!!! 仲唔肯上返大船, 係要搵人同佢再去玩多轉.. 真係比佢嚇親呀!

 

妹妹六歲生日慶祝

2014年9月14日

 

 

妹妹的生日年年都要慶祝幾次, 今日到正日慶祝0刺...

 

 

一家五口去左妹妹最喜愛0既KITCHEN J...

 

 

妹妹就係為左呢個PIZZA而黎, 佢一個人可以食幾件...

 

甜品, 好味...

 

返到屋企仲有旦糕切呀...

 



 

花花面包

2014年9月9日

 

同事借左呢個整花花面包0既工具比我, 我地就趁中秋節假期响屋企試下啦!

 

方法好簡單, 只要將工具放响白面包上面, 壓出黎再將面包圍返個花花形就可以0刺!

 

整左四個, 有啲靚有啲唔靚... 技術好參差, 哈哈...

 

將牛油同糖掃响面再焗, 變左脆脆花形面包!

 

妹妺讚好味呀!

 



妹妹農曆生日

2014年9月8日

 

今日係中秋節, 亦係妹妹農曆生日...

 

因為我公司放半晝, 所以我索性拎埋朝早半日0刺...

 

湊妹妹放學, 跟住同媽咪响煌府飲茶...

 

黃埔煌府係新開0既, 就响架船上一層...

 

場地幾靚, 但唔知係咪新開0既關係, D食物好耐都未到, 餓親我寶貝女呀!

 

夜晚做節, 姑姨婆買左大家樂盆菜, 味道唔錯喎...

 

我地攞完盆菜返黎, 因為盆菜個盒太似蛋糕盒0刺, 妹妹誤會我地買蛋糕比佢, 當佢知道唔係蛋糕之後, 佢話:"話哂我今日都生日, 唔係冇蛋糕嘛??", 係喎, 我地真係冇為意喎, 爸爸覺得唔好意思, 即刻落去買返個蛋糕返黎, 哈哈....

 



 



妹妹生日慶祝 - 塘廈三正半山酒店兩日一夜之旅

2014年9月6日至7日

 

今年考慮左好耐, 唔知點同妹妹慶祝生日...

 

原本諗住咩都唔攪, HEA過便算, 點知妹妹上個月就開始問, 我會點樣同佢慶祝生日...

 

一直都冇正面回覆佢, 點知過左冇幾耐, 爸爸都開聲, 問我諗住去邊度玩... 似乎今次走唔甩0刺...

 

我竟然安排响開左學先去玩!  哈哈, 因為都仲未返全日, 玩完返黎返多半日又放中秋節假, 我先咁大胆架咋, 哈哈...

 

今次有兩個地點考慮, 1. 新開的珠海長隆  2. 塘廈三正

 

珠海長隆價錢都幾貴, 其實都幾唔化算, 今次仲諗住叫埋老爺奶奶去, 就更加唔化算喎...

 

基本上, 用珠海長隆一家三口0既價錢, 加少少就可以足夠我地一家五口去三正, 橫掂同老人家都係HEA玩, 三正似乎都足夠了, 仲岩哂最喜歡游水0既妹妹...

 

又因為想妹妹再開心D, 老爺奶奶又開心D, 我就叫埋姑仔一PAIR同姑姨婆一齊, 嘩, 好熱鬧呀!

 

原來塘廈三正都好熱門, 出左價錢兩日後我想揀0既親水池溿房已經爆滿, 好誇張, 唯有BOOK半山嗰邊0既親水池溿房, 希望唔會太唔方便啦...

 

妹妹等到頸都長, 終於都出發0刺...

 

去塘廈三正好方便, 我地搭火車去落馬州, 再坐大約45分鐘車就會到達架0刺...

 

 

BOOK車時, 好猶豫究竟BOOK酒店聯繫司機好定BOOK其他旅遊網0既車, 經聯繫司機陳生解釋後, 雖然貴RMB100..我地都決定搵佢地, 安全確係最重要..

 

但係, 最後派黎接我地0既車並唔係佢地所謂安全舒適0既10人車, 原來司機將我地"賣"左比其他街車, 哼! 呢架係7人車, 溶溶爛爛咁, 冷氣又弱, 好嬲呀!

 

車箱內籠好殘好爛....

 

因為唔夠坐, 阿女被迫要坐大脾, 好危險囉...

 



 

旅程開始就不順利, 希望之後冇其他不愉快事發生吧...

 

先去攞房, 聽聞假日三正攞房要排好耐架喎, 點知我地12點去到即刻有房, 真好運!

 

我要求三連房, 但最後酒店只安排兩間連房, 另一間比大套房隔左, 不過都可以接受0既...

 

房間都算幾乾淨, 但我竟然唔記得影相, 哈哈...

 

要去飲茶, 要搭GOLF車落返主樓, 好彩都好容易搭到車, 車程大約兩分鐘吧...

 

 

酒樓食物好一般, 價錢同香港差不多, 7大1細唔係好飽食左四百幾蚊, 不過算啦, 目的只係醫下肚啫...

 

 

 

池溿親水房有個小露台, 打開露台0既門就可以跳落水0刺, 好開心!

 



 

BOOK房時, 我叫酒店安排方便去大池0既房我, 佢地回覆係全個酒店都可以通去大池, 似乎唔會幫我安排囉... 好彩最後佢地有做野, 我地間房好近落山嗰條長滑梯...

 

因為有老有嫩, 可以玩0既野唔太多, 我地主要都係游下水就算0刺...

 

玩左三個鐘頭, 梳洗準備去食BUFFET, 當中發生左件小插曲, 話說我地一家三口先行去攞枱, 一路行我就一路搣啲BUFFET COUPON出黎, 叫妹妹幫我拎住先, 到搣哂D COUPON, 正好就收到阿MAP電話問我地行到邊, 呢個時候我就已經唔記得左D COUPON0刺...

 

 直至响餐廳坐低, 有WAITRESS黎收COUPON, 先發現有兩張唔見左! MY GOD!

 

酒店都好好人, 佢地確定COUPON冇人用左, 都補返比我地, 不過連搵連去主樓攪, 都用左好多時間呀...

 

BUFFET唔錯, 好多野食, 海鮮又新鮮...仲有香檳, 紅酒, 白酒, 啤酒任飲... 可惜冇我至愛0既生蠔...

 

 

 BOOK左房食BUFFET後去打乒乓波同篤波, 妹妹好開心...

 

我就兩樣都唔識, 唯有做下攝影師啦...

哈哈, 唔識都扮下野影張相啦...

 

 

姑姐教妹妹玩...

 

 

打完波返酒店房, 大家梳洗後响房打左一陣遊戲機就訓覺0刺...

 

第二朝一早起身去食早餐, 都尋晚一樣去左池溿西餐廳, 都係好多野食, 唔錯!



 

然後再玩一陣水, 就要準備CHECK OUT0刺...

 

 回程我地唔再用酒店司機0既車0刺, 臨時臨急搵517FREE, 好彩可以安排到...

 

車未到時, 我地打下波, 換下酒店送0既朱古力, 估唔到D朱古力又整得幾靚喎..

 

臨走前門口合照一張...

 

 

517FREE 0既車舒服好多, 司機又準時, 又好人, 價錢又平, 下次我都會再搵佢地...

 

BOOK左大漁鐵板燒, 質素麻麻, 冇下次....

兩日一夜0既活動就結束了, 妹妹應該覺得好開心吧!

 

 

 

 





正式開學

2014年9月3日

 

今日响學校交書費比書商, 順便就可以拎埋書走, 都幾方便喎...

 

知道有書派返黎, 我都不敢怠慢, 一放工就返屋企包書0刺...

 

仲有N張通告, 呢幾日因為D通告都攪到好夜先訓, 做媽媽真辛苦...

 

 

直至9月8日, 妹妹都係返半晝, 每日都係中英數常...

 

 

雖然D字唔算好靚, 但起碼知佢寫咩...

 

 



想盡辦法都要得到的DR. KONG涼鞋

2014年9月2日

 

雖然已經開左學, 但而家都係返緊半晝, 連書都係聽日先買, 所以一樣功課都未有呀...

 

有見及此, 嫲嫲今日就帶妹妹去太嫲度飲茶0刺...

 

飲完茶, 經過DR. KONG, 妹妺見到櫥窗有對超靚涼鞋, 叫嫲嫲買比佢, 但嫲嫲冇即時應承, 佢地於是上左太嫲屋企先...

 

我接到妹妹電話, 佢同我講好想買涼鞋, 仲話一對只係50蚊, 好抵, 好彩嫲嫲即刻澄清, 應該係買兩對平50蚊, 好大分別喎!

 

呢件事我一定反對啦, 因為今季都唔知買左幾多對鞋比佢0刺, 又買, NO WAY LA!

 

到我放工, 行到巴士站搭車, 妹妹電話又黎, 叫我去黃大仙接佢地, 下??? 唔係卦! 你地自己返啦! 妹妹好堅持, 但我當時不以為意, 冇理佢...

 

返到屋企諗諗下先估到妹妹梗係想我去黃大仙跟住叫我買鞋, 哈哈! 好彩我冇上當啫!

 

點知, 原來妹妹响DR. KONG門口喊左好耐, 一見人入去就嗌:"冇0刺冇0刺! 人地入去買嗰對鞋0刺! 仲唔買就冇得買架0刺!" 笑死人了, 呢個時間人人入去都係買返學鞋啦!

 

糾纏左好耐, 嫲嫲最後都輸左, 買左對鞋比佢... OH NO!