小冬入院

9/23

週年紀念晚餐差不多完結時, 突然接到BB電話, 話小冬好唔舒服, 又肚疴, 己經幾日冇食野... BB估計小冬應該唔係好得, 唔想同佢睇醫生, 因為怕佢要留醫, 會唔開心...

我唔太認同, 又唔知小冬咩事, 點解唔去睇下醫生? 第二日屋企又冇人理, 死左都冇人知呀...

我話食完飯就返屋企一齊去診所, 妹妹聽到之後一直捉住我唔放, 話要一齊去...

最後, 大家一齊上左5號巴士返媽咪屋企...

以前小冬後生, 知道我返去一定走出黎好開心, 而家老左, 反應冇咁快, 但都一定行出黎, 吠下, 擺下尾, 然後就不停叫我攞雞條比佢.... 但今晚, 小冬連擺尾0既氣力都冇...

佢响椅下, 我叫左幾聲佢先行出黎, 想再行多幾步都行唔到, 好唔正常啊...

大家商量左一陣, 決定都係去返小冬睇開0既麥花臣動物診所...

妹妺仲未肯放過我, 但爸爸就一直叫妹妺跟佢返屋企...

哈哈... 落到街截車, 妹妹好快咁上左的士, 仲快過我, 好好笑... 最後留低爸爸自己一個返屋企...

醫生發現小冬顎下有一粒好大0既野, 小穎前幾日先摸過佢, 嗰陣未有架...

醫生話唔知粒野係咩, 一係發炎, 一係CANCER, 但因為唔痛, 似CANCER多D, 叫我地抽組織化驗...

同埋要驗血, 因為唔知小冬身體會唔會有另外0既問題...

小冬只係疴軟便, 又不至於會唔食野喎...

要留院吊塩水同打抗生素, CHECKING我地考慮下再決定...

好担心呀, 小冬咩事呢?