妹妹上星期開始發燒, 睇左醫生食左藥, 有時退燒, 有時又燒返, 有時有少少傷風, 有時又有少少咳, 好飄忽....
因為唔嚴重, 大家都唔太緊張....
直至尋日, 妹妹開始大傷風0刺, 爸爸媽媽返到屋企, 見到妹妹成日打乞疵, 又鼻涕, 又狂流鼻水, 真係心都痛埋.... 爸爸唔識就力, 抺到妹妹個鼻好痛, 瓜瓜叫, 第二次一見爸爸想幫佢抺就縮(好醒目!!)....
見妹妹個樣冇乜精神, 提早11點沖奶比佢, 順便食埋藥, 但妹妹好頑強, 點都唔肯訓, 仲扭計點都要爸爸同媽媽一齊同佢玩, 前一晚妹妹都係唔肯訓, 媽媽好強硬咁對佢(事後其實都後悔...), 今晚佢唔舒服, 媽媽當然要比多D愛心佢啦, 我地三個又唱歌, 又周圍訓, 但妹妹都係訓唔著, 糾纏左一個鐘, 我頂唔住0刺, 自己走入房決定唔理佢(嫲嫲同爺爺一早就撤退左啦...), 點知妹妹喊住入黎捉返我出去, 要我同爸爸坐响度, 仲逐個整理好我地0既坐姿, 然後自己坐响中間, 拍自己大脾講: "食粉果!!!".... 真係忍唔住大笑囉, 點呀! 咁夜, 熄哂燈, 無端端食咩粉果呢? 今朝同爸爸講起都仲覺得好好笑....
沒有留言:
張貼留言