中秋節

兩年前0既今日, 有個小妹妹出世, 每年呢個日子, 我地都會諗返佢出世0既情景, 好美妙!!

因為就太太, 我地今年出去黃大仙做節, 妹妹同嫲嫲早D出去黃大仙搵左太太先....

然後去左開心樂園玩陣....

再到黃大仙中心和亭DINNER, 好扺, 九個人食到好飽先至係$800, 仲有甜品食!!

妹妹又忍唔住OWN左個頭落杯雪糕度, 好為食呀!!!

9/14 妹妹生日....

因為慶祝左好多次, 我地正日只買左個生日蛋糕比妹妹切下.....

為食0既妹妹, 未切蛋糕已經偷偷地試食左0刺....

阿媽影相!!

妹妹不嬲都叫我"媽媽"

間唔中會叫"媽咪"

但如果拎住部相機, 就一定係叫"阿媽影相呀!!"

好核突呀!! 邊個教你架?????

返唔到學....

報左8堂PLAYGROUP, 已經有3堂冇返0刺, 好SIDE錢呀, 不過冇辦法, 妹妹仲未好返, 流哂NOSE水, 尋晚又再睇多次醫生, 尹醫生話佢已經差唔多好返, 咁都好D....

妹妹會比人蝦嗎?

雖然妹妹响屋企係個小霸王, 但出到去係兩個樣.....

返playgroup, 妹妹對其他小朋友好nice, 成日詐詐帝帝撩人講野, 通常D小朋友都唔識回應, 擘大個口得個窿咁望住妹妹(因為妹妹有時係講外星話架)....

不過, 都會遇到小數野蠻0既小朋友....

前個星期六, 同一日0既playgroup, 兩個鐘頭內, 我地遭遇三次0既不禮貌對待....

1. 大家响課室玩玩具, 我地只係玩緊三粒唔同顏色0既積木仔, 放响枱度, 有位小朋友行過, 竟然好順手咁拎左, 晨早流流, 我地都未訓醒, 完全唔知做咩反應, 算吧, 人地家長响度, 唔通捉住佢搶返咩??

2. playgroup最後一part就係妹妹最開心0既時間, 因為可以玩sir sir, 除左sir sir, 仲有好多其他野玩架!! 有一下, 妹妹玩緊個波, 有個小朋友走黎想強搶, 妹妹好乖, 咁都冇推開人, 只係博命縮, 側哂身, 同時大叫媽媽!!媽媽!! 其實仲有其他波架, 媽媽即刻比左另一個波個小朋友化解左呢場戰爭, 但, 如果冇家長在場咁佢地會點呢? 好好奇添...

3. 妹妹玩緊個膠圈, 响地下碌, 當個膠圈訓左落地, 有個小朋友又好自然咁執起諗住自己玩, 妹妹見狀大嗌, 人地就放返低0刺(算你識做啦!!)

到上個星期六, 妹妹又遇到唔開心0既事, 其實都係小事, 但見到妹妹唔順氣個樣, 真係覺得好好笑, 可能對佢黎講係大件事呀....

大家又玩玩具啦, 玩玩下, 前個星期六第1件事0既小朋友突然走埋黎, 將d玩具掉哂入個膠盤度, 除左妹妹, 仲有其他小朋友都玩緊, 小朋友同家長都望住佢O哂咀, 因為個小朋友都有家長响度(又係你, 擺明冇家教啦!!), 其他家長真係唔方便出聲囉....妹妹整個過程望住佢, 個樣勁唔順超呀!! 有個比較大0既哥哥, 將個膠盤向自己拉一拉以表示不滿, 個冇家教0既小朋友0既唔知媽媽定賓賓(兩個都唔係香港人, 黑黑地, 都唔知係媽媽定賓賓)就走黎拖佢走0刺.... 妹妹即刻將D玩具拎返出黎玩....

媽媽覺得妹妹好善良, 而爸爸就覺得妹妹比人蝦... 真的嗎? 咁妹妹返學會比人蝦嗎?

終於發病了....

妹妹上星期開始發燒, 睇左醫生食左藥, 有時退燒, 有時又燒返, 有時有少少傷風, 有時又有少少咳, 好飄忽....

因為唔嚴重, 大家都唔太緊張....

直至尋日, 妹妹開始大傷風0刺, 爸爸媽媽返到屋企, 見到妹妹成日打乞疵, 又鼻涕, 又狂流鼻水, 真係心都痛埋.... 爸爸唔識就力, 抺到妹妹個鼻好痛, 瓜瓜叫, 第二次一見爸爸想幫佢抺就縮(好醒目!!)....

見妹妹個樣冇乜精神, 提早11點沖奶比佢, 順便食埋藥, 但妹妹好頑強, 點都唔肯訓, 仲扭計點都要爸爸同媽媽一齊同佢玩, 前一晚妹妹都係唔肯訓, 媽媽好強硬咁對佢(事後其實都後悔...), 今晚佢唔舒服, 媽媽當然要比多D愛心佢啦, 我地三個又唱歌, 又周圍訓, 但妹妹都係訓唔著, 糾纏左一個鐘, 我頂唔住0刺, 自己走入房決定唔理佢(嫲嫲同爺爺一早就撤退左啦...), 點知妹妹喊住入黎捉返我出去, 要我同爸爸坐响度, 仲逐個整理好我地0既坐姿, 然後自己坐响中間, 拍自己大脾講: "食粉果!!!".... 真係忍唔住大笑囉, 點呀! 咁夜, 熄哂燈, 無端端食咩粉果呢? 今朝同爸爸講起都仲覺得好好笑....

學大人講野...

呢排成日响妹妹口中聽到我地平時同佢講0既說話, 從佢口中講出黎媽媽覺得特別得意...

- 妹妹攞起條薯條, 自己咬一啖, 然後遞去媽媽個咀度: "咬啖!!", 呢句, 係嫲嫲成日同妹妹講0既...

- 又拎第二條薯條, 自己又咬一啖, 又遞去媽媽個咀度: "試下!!", 哈哈!! 呢句, 應該係媽媽成日講0既....

- 跌左BB公仔落地下, 執返, 攬住, 拍拍BB: "冇事! 冇事!", 當左BB係自己!!

病魔侵襲李家

最近李家被一病魔侵襲, 家裡面5個成員有4個都病倒了.....

最先發病是爸爸, 他是家中最弱的一個, 己經食了起碼三個星期藥.....

然後就是爺爺, 他也看了幾次醫生......

9/14, 即是妹妹生日的大日子, 媽媽一放工便趕回家, 大家正期待爸爸買的生日蛋糕, 同時就發現妹妹發燒了....

因為只有少少燒, 我們決定只給退燒藥妹妹吃.....

第二天 (9/15), 媽媽都發燒了(101度呀!!), 打電話給看開的醫生, 她竟然建議我入醫院!!! 好驚喎!! 不過我都堅持要去她診所.... 看完醫生回家, 燒低了點, 但奇怪的事發生了, 我竟然開始肚疴, 還要很嚴重!!!

跟住, 又發生妹妹高燒了, 差不多102度, 因為我都病, 實在帶不到她去佐敦尹醫生處, 唯有安排去網上最多人讚的張志強醫生, BOOK了6:45, 但因為我不停疴, 只好叫奶奶帶妹妹去....

只有我一個在家, 沒有開冷氣都發冷, 走入被窩, 手腳都不可以掂到自己, 因為全部都是冰的.... 後來妹妹回來了, 我就開始發熱, 己經過了102度, 又是不停疴, 他們都建議我入院, 但被我拒絕了, 我用了妹妹的退熱貼, 希望有幫助吧, 妹妹見到我, 叫了聲"哎也!! 搣!!"....

妹妺才攪笑, 明明在家高燒, 去到醫生便沒有燒了, 回到家馬上再探, 真的沒有燒喎!! 哈哈!! 不過奶奶說這間診所是探加拿大的, 很落後, 又原來不是純看小朋友的, 不次都要考慮下去不去了, MAY BE試試李山河吧....

妹妺沖完涼, 開冷氣, 我又有好轉, 燒退了點, 但依然疴....

半夜都疴了幾次, 唯有一早就去看醫生, 再請多一天SICK LEAVE啦....

第一天疴了18次, 第二天食過藥有好轉, 只疴7次, 下晝都退燒了....

今天返工, 繼續疴, 究竟幾時停呢????

又發現妹妹又有少少燒, 真反覆.... 今朝妹妹喊得很厲害, 但只聽到嫲嫲不斷駡, 於是忍不住過去看看, 原來嫲嫲根本就沒有理她, 只是駡, 我抱起很可憐的妹妹, 發現她有點熱, 應該有少少發燒吧, 真的好可憐, 好嬲呀!!!

攞櫈櫈呀!!!

尋晚, 媽媽餵緊妹妹食飯.....

妹妹食住啖飯: 攞櫈櫈!!

媽媽: 攞蛋蛋??

妹妹: 攞櫈櫈!!!!!

媽媽: 攞蛋蛋??

妹妺:  攞櫈櫈坐呀!!!!

跟住自己行左去拎, 費時再同媽媽講.....

9/12 妹妹TWO YEARS OLD BIRTHDAY PARTY

上星期日舉行左妹妹兩 歲BIRTHDAY PARTY, 我地响玲契契屋企0既CLUB HOUSE舉行, 3:30 - 5:30, 人數不多, 大約三十人, 全部都係同妹妹好CLOSE0既又或者有小朋友0既家庭... 可惜, 兩位舅父要返工不能出席, 思契契去左旅行, DORIS LEE囡囡同老公都病左 (我

好想見下靚女小豬呀!!), 同埋CHERRY突然見紅要養胎 (我都好想見下好乖0既潘朗呀!!), 希望將來有機會見面啦!!

因為SOPHI囡囡欣欣只係細過妹妹三日, 我地响去PARTY前買左份禮物比佢, 係切生果同蔬菜0既煮飯仔SET, 遲D我都想買返套比妹妹, 切下切下好似好開心咁...

响TRU撞到遠哥哥同FIONA, 跟住去到愉翠苑間酒樓門口又撞到DICK CHAN, 嘩, 今日又會撞到咁多人0既!

真係要多謝玲契契, 佢為今次PARTY幫左我地好多呀!! 又幫我去柴灣攞PARTY用品, 又陪我去SUPERMARKET買野, PARTY呢日仲要早起身幫我去第一城站攞蛋糕, 响我地去到沙田買禮物0既時候, 佢已經到達酒樓攞位飲茶0刺, 一個人等左咁耐, 真係辛苦哂....

到PARTY開始之後, 就落起大雨黎0刺, 好彩除左細妹之外, 都冇人放飛機....

估唔到, 原來D人係遲到架, 好彩我地BOOK左3個鐘頭, 唔駛急住走咋.... 不過, 連主角 - 李梓丹小姐都遲到囉, 嫲嫲同佢一直响酒樓到成4點先上黎.....

野食黎到, 嘩! 嚇死我!! 點解咁細盆0既???? 好驚好驚好驚!!!! 我印象中到會D盆應該有而家DOUBLE咁大盆, 失哂預算添!! 唯有買D MCDONALD返黎啦!! 再買多D薯片.... 不過, 原來到最後, 又係食唔哂0既, 哈哈!!!!

搵到好靚0既POOH POOH禮物袋放小朋友禮物, 哈哈, 我都覺得好靚呀!! 真係辛苦左爸爸, 之前响深水埗行左半日都買唔到, 原來上網好容易就搵到哂.... KIDDLE仲好好添, 我訂0既時候係$7.9一個, 到收貨前佢地減左價, 只收我$5.9, HEHE.....

幸好, 我地都有7個小朋友 (最緊要多小朋友呀!!), 雖然D小朋友都冇乜交流, 但感覺上開心D囉...

原來個個小朋友都喜歡玩氣球架, 好彩我買左40個, 最後妹妹都要拎返幾個返屋企...

我地都影左好多相呀....

個蛋糕又靚....又算好味道啦.... 最後都係食唔哂, 咁貴, 我唔想SIDE左, 拎到返屋企, 原來最後都係冇人食.....

全部都係媽媽0既好朋友...

細妹妹三日0既欣欣, 佢仲流緊口水, 好攪笑啊!!

幾位姨婆, 個個都好錫李梓丹....

全家福....

買左個PINATA, 不過玩0既時候都幾混亂, 我又冇講清楚, D小朋友亦都唔會明, 聽聞真正中0個條係好難先抆得到, 如果係李梓丹抆中實唔夠力將D禮物跌到出黎, 好彩係高瑩個仔抆中啫!! 裡面0既禮物有: HELLO KITTY棉花糖, 黑加侖子軟糖同埋妹妹最鍾意0既提子乾, 不過D小朋友好斯文, 個個拎少少就算, 最後我都周圍將淨返0既分比佢地...

其實, 妹妹全程都ON居居, 好似唔知發生咩事咁, 雖然全部人都係佢熟0既, 但佢都無顯得好開心喎.... 直至最後, 魚旦舅父攞左支吹籠出黎玩比佢睇, 佢先開心...

幾開心!!

禮物方面, 媽媽最喜歡0既係PHOEBE姐姐(魚旦舅母)送0既一對MINNIE夾夾, 好靚呀! 我覺得好襯妹妹呀!!

CANON EOS 550D

上星期同老公出去旺角買即影即有相紙, 我趁機睇下相機, 因為最近都影唔到妹妹0既靚相, 傻瓜機capture得好慢, 到未影到妹妹都走左lu....

一路行我一路望, 老公一d興趣都冇, 不過最終我地都响豐澤試左機, 一試, 哈哈, 超開心!! 因為亂影都好靚呀!!!

老公因為呢一次試機, 突然對相機產生左濃厚0既興趣, 於是我地搜集左兩日資料, 星期六就去左dv fever買機....

除左canon 550D之外, 其實Sony NEX-5都係我考慮之一, 因為細機實用D, 可以隨時帶出街, 不過老公就堅持550D, 因為方便繼續玩落去...

星期日去PARTY前, 沿途亂影一通, 火車月台又影下...

一田有兔兔又影下....

同事仲借左本專教用呢部相機0既書比我添! 真好人! 我地又可以研究下0刺...

LA屎喎!!

妹妹: 食BEAR BEAR糖, 一粒!

媽媽: 好啦, 食一粒咋!

妹妹食緊一粒, 又話: 一粒!!

媽媽: 又食? 你個口仲有冇架?

妹妹即刻好快地吞左粒糖...

媽媽: 最後一粒呀!!

妹妹: LA屎(LAST)喎!!

妹妹birthday party (1)

妹妹0既兩歲birthday party會响呢個星期日舉行, 但因為兩位舅父都要返工不能出席, 所以我地尋晚就先响太婆家慶祝....

我放工之後去黃大仙接妹妹, 搭地鐵轉西鐵去元朗, 妹妹冇訓晏晝覺, 去到美孚就訓著左, 我抱左呢個冬瓜, 由美孚地鐵站行去轉西鐵, 妹妹好重, 條路顯得特別遠... 終於上到車0刺, 但放工時間, 冇位坐, 亦冇好心人讓座, OMG!!!

好不容易捱到去朗屏, 我忍唔住响月台坐左5分鐘, 然後再繼續我艱苦0既旅程....

行去太婆家要10 mins, 妹妹醒左, 但唔肯落地, 好辛苦好辛苦, 最後一段路唯有又呃又氹咁要佢行啦....

我地响太婆家樓下0既文具店玩彈波波, 妹妹又中獎0刺, 今次0既獎品係一本公仔支票簿....

好耐冇見細舅父0刺, 妹妹好似唔記得佢咁, 以後要見多d0刺...

影返張相先....

妹妹收到好多禮物呀.....
1. 太婆同婆婆0既利是 (好妒忌呀!! 仲大封過我生日!!)

2. 細舅父0既貓貓手袋, 太婆比左2蚊妹妹放入去...

3. 小穎姐姐0既筷子..

4. 大舅父&舅母0既衫仔..

食完野已經差唔多10點, 我地切旦糕0刺...

細舅父怕唔夠食, 買左兩個蛋糕, 兩個都好好食!!

吹爉燭, 咦??? 點解有嫲嫲0既?? 因為嫲嫲同爺爺咁岩約左朋友响元朗食飯, 於是上黎切完蛋糕先一齊返屋企....

切蛋糕...

臨走前, 同太婆影返左相先....

講說話的進步

妹妹今日突然進步左好多喎!!

媽媽响的士同妹妹講: 媽媽一陣出去食飯, 你乖乖地, 好唔好?

妹妹: 好!

媽媽: 咁妹妹同嫲嫲响屋企, 好唔好?

妹妹: 好! 响屋企!

返到屋企, 見妹妹眼訓, 媽媽比左支水妹妹飲, 一齊响張床度傾下偈....

媽媽: 你訓一陣啦, 跟住嫲嫲就煮飯比你食...

妹妹: 食蛋蛋!!

媽媽: 好呀! 媽媽叫嫲嫲一陣整蛋蛋比你食...

妹妺: 媽媽出去食飯, 嫲嫲整蛋蛋!! (嘩! 突然講到咁長呀!! 叻!!!!!!)

(再黎) 爸爸返工, 媽媽食飯, OH NO!!! (哈哈, 講得好好笑呀你!! 錫哂你呀!!)

英藝playgroup第一堂

今日我請左半日假帶妹妹返英藝第一堂playgroup，時間係2-4pm，我返到大埔已經1：30，急急响麥當勞買左野食就返去搵我嘅小公主...

點知阿小公主居然訓緊覺，冇辦法喇，媽媽食完野就要摷醒您喇！

不過...妹妹好乖呀，完全冇扭計，仲好開心有得返學添！

我地飛的去，遲左十分鐘呀！不過都不太蝕底嘅，因為通常一開始都係玩玩具..

介紹下先，我地有兩個老師，外藉老師叫elizabeth，普通話老師我地只用普通話叫佢做老師....

開頭0既半個鐘都係玩玩具時間, 玩玩下, 有個小妹妹拎左餅餅出黎食, 個為食鬼响隔離話"餅餅呀!", 於是個妹妹就請左一塊佢食, 我當然喝住要佢講多謝啦, 個為食鬼將塊餅塞左入口先講"THANK YOU"....

跟住就係勞作時間, ELIZABETH教左小朋友ELEPHANT呢個字, 不過基本上個個小朋友都識架0刺...

勞作好靚呀, 我覺得....




跟住排隊去洗手, 返課室時, 老師要大家跟住地下0既綠色線行, 不過係冇小朋友理0既...

返黎, 有茶點食呀!! 一個提子麥包&一杯水, 妹妹一開始就飲哂成杯水, 然後先食包包, 相信個包唔太好食, 妹妹食食下成個包跌左落地!! oh!!! 好彩elizabeth再比多半個我地, 然後老師又每人派一條百力滋, 正呀!! 之後, 妹妹再將0個半個包都跌埋, 唉! 我地要多訓練佢食野先得...

故事時間, 先由elizabeth講個救貓貓0既英文故事, 意外地, 妹妹好留心, 睇唔到本書仲企起身行過一步務求睇到為止... 然後到老師講秋天的故事, 妹妹仍然好留心, 叻叻!!!

講完故事, 大家過去舞蹈室唱歌跳舞, 又好意外地, 妹妹勁投入, 雖然唔識d歌, 但都跟足老師跳舞, 其他同學有d走黎走去, 有d on居居企响度, 得妹妹一個跳足全程, elizabeth一望到佢就忍唔住笑, (呢個時候, 我都有笑, 但係好感動0既笑, nose又酸左一下..) 連專教跳舞0既miss lui都讚妹妹跳舞好叻呀!!

最後, 當然係玩妹妹最喜愛0既sir sir啦, 妹妹好獨立, 自己玩, 自己sir, 突然覺得佢又大個左0刺....

妹妹呢堂playgroup返得好開心呀!!

不過... 有家長話我知, 呢間學校d老師成日轉, 令我又試有d担心, 希望會有改善啦~~

石澳玩玩

我不喜歡陽光與海灘..  

- 每次去沙灘都是太陽猛烈的日子, 我又是個極度易晒黑的人, 去晒一晒, 之前的美白精華, 面膜和珍珠末都浪費了, 去沙灘 = 掉左錢落咸水海…

- 每次去沙灘都一袋二袋, 回到家整個袋裡都是沙, 又洗餐飽, 執餐飽…

- 害怕沖身的地方, 沒有門, 核核突突的.. (幸好, 今次因為妹妹, 我們選擇付錢到附近士多沖身, 因有熱水供應, $25一位, 好貴啊!)

- 就算回家正式沖完涼, 仍然覺得很不自在, 頭髮和皮膚都”鞋”了, 不知是真的鞋還是自己玩完沙手指的皮膚”鞋”了, 總之..不好受!!  

雖然不喜歡這活動, 但為了給喜歡玩水妹妹接觸不同種類的活動, 昨天我仍然很積極的一早起床和妹妹去一個很遙遠的地方 – 石澳..  

早上9時, 妹妹仍不肯起床, 爸爸跟妹妹說: “哦, 你不去沙灘了嗎? 我和媽媽自己去了!!”, 妹妹聽到後立即彈起: “我去呀!!”  

我們大約12:30到達石澳, 妹妹未見到海灘, 一望無際的沙, 妹妹有點驚驚啊!! 無問題, 媽媽抱住妹妹經過整個沙灘一直走到bbq的地方…  

幫妹妹換了泳衣, 塗了太陽油, 魚旦舅父和妹妹落地玩沙, 妹妺開始好開心呀!! 哈哈!!

爸爸買了玩沙的玩具, 妹妹坐著玩了很久, 很專心地玩, 而大人就bbq...

很來我們出去玩水, 因為之前打風, 很多樹葉, 樹枝和垃圾在海, 很污糟... 因為很大浪, 妹妹有點害怕, 說要回去玩沙…  

後來爸爸再帶她出去一次, 這次妹妹很開心, 玩了很久也不肯回來, 其他人都回來了, 直至媽媽出去找他們, 沿路便見他們兩父女, 原來突然一個大浪蓋過了妹妹的頭, 妹妹嚇一嚇, 便說要回來, 但妹妺在沿路見到媽媽, 又示意媽媽再和她去玩水, 又忘記驚驚了, 哈哈…  
玩完水便回去再玩沙, 妹妹突然拿起兩個玩沙玩具就自己向海出發, 真大膽, 媽媽一直跟住她, 她頭也不回, 直至媽媽問她: “又去玩過呀?”, 她才轉了半個頭答:”玩過呀!!”, 失敗了, 應該教訓一下她, 怎可以自己一個走出去???  

妹妹顧住玩, 只吃了很少很少, 見有汽水便自己拿來勁飲, 很放肆呀!!!  
臨走, 幫妹妹留點倩影…

由12點半玩到6點半, 妹妹一直玩, 未停過, 上到小巴仍然要玩電話, 不過突然哭了兩聲, 要媽媽抱, 不需一分鐘便在媽媽膊頭上睡了…  

而媽媽, 因為做了一天保母兼保鏢, 累極了, 累到竟然失眠, 2點多才睡得著....

百厭!!

真的未見過咁百厭0既細路女….

 

妹妹尋晚叫我拖住佢兩隻手, 跟住佢自己數一二三, 然後跳高企圖扮樹熊鉗住我對腳, 點解佢會自創到呢個遊戲呢? 我相信唔會有人教佢咁玩囉… 我細個係咪都係咁百厭呢? 見到媽咪要問下先得…

 

尋晚開始教妹妹唱:

Happy Birthday to you~~

Happy Birthday to you~~

Happy Birthday to Kaylee!!

Happy Birthday to you~~

妹妺好開心, 我地連續唱左好多次, 拍住手咁唱, 妹妹開始跟到d0刺!!

維記咖啡粉麵

難得午夜12時全家人都睡著, 就趁這個自由時間寫寫blog吧...

星期三晚, 是我和李智恆第二天到深水埗搜索小禮物, 沒有新發現, 我們最終買了閃球, 相信小朋友會喜歡的...

正考慮吃什麼的時候, 李智恆突然見到維記還沒有打烊, 我知道他喜歡吃豬膶面, 所以馬上走進去....

我不喜歡膶的味道, 兒時經常為了被爸爸迫吃雞膶而哭起來, 現在長大了每次見到膶我仍然會記起這些事(有點無聊...), 而豬膶水又會令我想起一件傷心事, 所以對膶我真的沒有一點好感, 傷心事過後, 我再沒有喝過豬膶水了 (碰巧也沒有機會給我喝..)

今晚, 李智恆點了豬膶牛肉面, 這是他的飛佛, 他當然說好吃!!

而我, 則要了一碗餐牛面.... 不要看它樣衰衰的, 我首先喝了一啖湯, 這個牛肉湯真的很有牛肉的精華, 好味道!  我不喜歡裡面夾雜住有實肉的午餐肉,  媽媽以前常常煎給我們吃, 但其實我麻麻鍾意.... 因為有點累, 又吃得太急, 所以吃了一半便飽到吃不下了, 剩下的牛肉又是李智恆幫我清了, 有這個清道夫真好, 起碼不用泿費食物...HEHE...

妹妹兩歲生日會的準備

最近很忙碌, 為了妹妹的生日會, 不停上網找資料, 到會, 蛋糕, 小禮物, 佈置, 遊戲及邀請來賓…. 還有其他的事, 個心很忙很忙, 生日會後, 便要開始妹妹上學的準備了…

 

基本上, 所以事項都決定了, 時間只剩下12天, 今天要開始訂了….

 

到會 – 決定了蘭香園:

雜錦迷你三文治 – 40 pcs

鮮果大蝦沙律 – 3 lbs

煙鴨胸拼香茅雞中亦 – 5 lbs (因為怕雞亦唔夠食, 所以特別加大呢個)

醬燒豬頸肉拼牛油雞中亦 – 3 lbs

越式春卷拼咖喱角 – 各24 pcs

芒果布甸 – 3 lbs

蜜汁燒大鱔 – 3 lbs

燒汁什錦丸 – 3 lbs

 

另加了 kiwi sweets的椰絲啫喱糖 (2 lbs)

 

蛋糕 – Kiwi Sweets

今次特別d, 選了Winnie the pooh的相片蛋糕, 他們特定那張相片不是太靚, 所以我會嘗試找一張美一點的…

 

佈置, 裝飾都是幫襯Box of Fun及Kiddle, 基本上所以東西都可以在這兩間公司找到, 不用煩…

 

小禮物 – 深水埗玩具批發 及 Kiddle

深水埗福榮街有很多玩具批發, 我和爸爸行了兩次, 最終買了燈籠及閃球…

其他則在Kiddle訂購…

 

遊戲

Pinata – 在kiddle買的, 預算會放一堆糖果入內, 希望小朋友喜歡吧…

即影即有 – 也算是遊戲之一??

Playroom – 有波波池, 有滑梯….

還要努力想想有什麼其他遊戲…

 

為了保持神秘感 (???), 我這篇blog決定在party後才公諸於世….