美麗由健康起...

今日口腫面腫, 腫到對眼好想合埋.... 做女仔真麻煩, 每個月梗有d日子會好唔舒服同好醜樣....

 

最近心靈空虛, 所以特別想自己扮靚d (藉口! 哈哈!!).... 要靚, 大前題係要皮膚好同身體健康, 皮膚白滑氣息好, 人望落去就會靚d, (跟住就要買靚衫0刺, 不過好彩呢排太忙, 無閒去shopping...)

 

之前睇過中醫, 醫生話我個人勞氣, 所以有d肝火, 又食得多海鮮同牛肉, 所以好多脂肪胆固醇積左响筋腱同肌肉度, 令我覺得有需要開始改一改我0既飲食習慣....

 

做左一件幾岩0既事, 就係叫AnthonG度買左支tight and tuck, 320蚊, 飲7-8日, 每日飲4次, 每次1安士加水, 期間戒絕肉類同咖啡因, 兼盡量少澱粉質.... 當然我每日都有"食錯野", 例如粟米同栗子都係好重澱粉質0既食物, 有時又食左少少肉 (如雞肉沙律, 又食左少少雞肉), 第8日0既最後一餐, 終於忍唔住, 黎左一杯Mcdonald朱古力新地再加一碗兩溝, 0個陣覺得簡直係人間極品呀!!! 哈哈哈!!! 8日過後, 奇蹟發生了!! 我居然一磅都冇輕到, 只是腰瘦了 (我諗有一至兩吋卦).... 不過呢個唔係重點, 我發現經過呢8日0既地獄生活, 我己經由平日極少蔬果變成而家習慣每日都食下生果同菜, 呢個係一個大進步!!!

 

尋日我又收到响美樂家買0既健康食品, 係傳銷野 (我好抗拒呢d野, 不過朋友極力推介, 唯有試試), 我買左隻叫藍綠海之寶0既野, 入面有綠藻同螺旋藻, 可以平衡身體酸鹼度, 強化肝腸排毒功能, 好似好岩我呢個多食肉同勞氣0既人!!! 不過每日食15粒真係太多0刺, 我尋日食左5粒咋....

 

再買左高纖營養粉同朱古力味0既大豆奶粉(用黎代餐用), 有時間再買埋鈣片, 再加埋阿珍珠粉 (其實會唔會太多呢???), 我會唔會真係變得瘦d健康d同靚d呢?