妹妹就黎有名架0刺!!!

唔知係咪尋日多人黎睇妹妹, 佢尋晚冇再扭計唔肯訓, 到今朝8點先開始唔訓, 阿媽幫我睇住咁我又可以訓多幾粒鐘....

ming哥改左名返黎0刺... 叫李雪婷.... 呢個名好似我地呢輩0既名, 我怕用响妹妹呢一代身上會有d老土呀... 我決定再諗一d再問ming哥....

好多人黎探妹妹呀!!!

今日真係好忙呀! 但好開心! 因為有三堆人黎探妹妹!

首先朝早11點有rachel, Panther, 仔仔, Steven, Una, Cory, Zoe & 佢老公, Rachel個仔仔好靚仔架, 又乖...

到下晝3點, 阿嫲, map, 偉偉, 雅兒姨又黎左....

4點amanda, eddy, 思, 綺玲, 阿珊, 程程, fiona同卓夫又黎埋, 好多人呀! 仲影左好多相添!

多謝各位uncle, untie 0既禮物呀!!! 妹妹會好好善用!!!

妹妹開始怍怪0刺~~

人地話, 初生BB好多時都會响十二朝或二十朝開始作怪, 夜晚唔肯訓覺, 成日扭抱, 叫做"吵百鑼".... 我妹妹尋晚真係開始夜媽媽唔肯訓, 由凌晨兩點開始扭抱扭到天光... 做媽媽0既真係好辛苦呀, 明明己經抱住訓著左, 但一放低佢就即刻醒, 跟住就扭抱, 仲要唔比坐喎, 一定要行住.... 唔係真係咁靈MA???

十二朝LU....

今日係十二朝, 我地開始可以食薑醋0刺....

D薑醋係奶奶由7月中開始煲0既, 夠哂味, D薑己經浸到唔辣, 好好味架~~

原來薑醋係非常補0既, 對女人好好, D豬腳0既鈣溶哂落D醋度, 豬腳又有骨膠原, 雞旦又有優質0既蛋白質.... 可惜我因為餵緊人奶, 唔可以食太多, 又要夾岩餵完奶先可以食...

今日奶奶有幾個朋友黎左, 霞姨個孫好得意架, 9個月己經廿幾磅, 好肥嘟嘟, 食明治奶粉0既BB仔真係比較大隻喎!!

大脾骹位有問題, 好担心~~

今朝去健康院檢查, 醫生話阿妙大脾骹位開得唔係好順, 轉介我地去睇骨科, 好担心呀~~ 我忍唔住响健康院就喊左起黎~~ 醫生話可能會要戴一個揹帶去令個骹位生返岩, 不過所有野都要骨科醫生診斷... 老公不停咁安慰我, 話其實係好小事, 好容易就可以解決, 但我都仲係好担心呀~~ 可憐0既阿妙, 我唔想你受苦呀.....

阿妙突然開哂眼喎....

阿妙雖然條眼線好長, 但總係開到一半, 對眼就好似豆豉咁細, 望野又成日唔知望左去邊咁... 點知今晚突然開大左喎, 好驚喜囉!!! 望野仲要好似好有focus咁, 原來我個女對眼真係唔係咁細架咋! yeah!

 

再去健康院...

今日再去健康院, 妹妹又重返D0刺, 而家3.03KGS...

今日另一個姑娘睇, 佢話我己經上哂奶, 妹妹又食得好叻, 仲話我會成功添! 好開心呀! 信心又返哂黎0刺~~

因為妹妹不停咁疴屎, 我地帶唔夠片去, 有D檢查唯有下次先做, 又約左9/24...

甩左臍帶0刺!!!

今日妹妹甩左臍帶0刺!!! 我當然要影低留念啦!!!




下晝CHRISTINE姨姨黎左探妹妹呀, 傾左好多BB野, 好開心呀!!!

去健康院

尋日打左一日都打唔到去健康院, 今朝終於都打到0刺....

兩點鐘我地去到健康院, 因為收左水, 妹妹由3.045KGS跌到落2.95KGS, 好彩姑娘話係正常0既...

去到示範室, 姑娘話我未上奶, 姿勢又唔正確... 其實我明明尋日己經上左奶, 點解而家又冇左0既?? 都幾沮喪架... 姑娘話要每餐補1.5安士奶粉.... 同埋妹妹有少少黃, 兩日後就返黎再跟住...

返到屋企, 媽咪己經到左, 媽咪都好緊張妹妹, 所以咩都要問, 咩都CHALLENGE一餐, 可能心情唔好啦, 對呢D你一句我一句...我突然覺得好煩呀!!!

妹妹响屋企0既第一晚....

尋晚係妹妹响屋企過0既第一晚.... 可以返到屋企訓, 我覺得舒服左好多呀!!! 除左起身餵奶同換片之外, 其他時間我都訓得幾好, 可能因為太攰0刺, 由未生到而家都未有一覺訓得好過... 相反爸爸呢晚就差唔多成晚冇訓, 因為佢怕屋企0既氣溫唔岩妹妹, 所以成晚望住佢睇下會唔會太凍或太熱, HEHE... 呢個真係好爸爸黎架!!!

囡囡出左世0刺!!! 係中秋妹妹 - 于素秋!!!

入左醫院兩日, 9/14終於生左妹妹0刺!!! 等我講下生妹妹0既過程啦!!!

9/12 9:00AM 去到7E病房, 病房出面好多人呀! 原來爆哂棚, 我連床位都分配唔到,  到下晝5點幾先有床位, 連CHECK心跳同塞藥都係响張臨時病床度做, 0個陣真係有少少後悔點解唔去私家醫院生....

11:45AM塞第一次藥, 因為子宮頸唔夠薄, 唔可以催生住, 可惜冇乜反應...

6:00PM 塞第二次藥, 醫生話第二朝8點會再黎睇我, 如果唔得就塞第三粒藥, 但如果都冇反應就要開刀0刺... 有少少担心添...

第二朝即9/13, 醫生冇黎到巡房, 隔離D媽媽話因為星期六係少D醫生返工0既, 所以有排等呀... 但後尾個個都有醫生黎, 仲爭我未check喎.. 姑娘話因為我唔係太急, 所以醫生一陣先會黎睇我...

呢晚有好多人黎左探我, 包括我同老公0既屋企人, 我舅母同表妹, 魚旦仔同PHOEBE... 走下走下, 淨返老公同奶奶响度, 醫生亦都响呢個時候黎睇我, 仲有個好消息, 就係我個子宮頸岩岩好合格可以催生0刺...我排第三個落產房, 真係好開心!!!

老公即刻返屋企沖個涼準備, 我就一路等...等呀等...點解都仲未輪到我呢? 姑娘話因為有好多比較緊急0既要落左產房先, 所以我仲排緊第二, 冇所謂啦, 總之要繼續幫我排就OK...

點知等到凌晨兩點都未有動靜喎, 我再問另一個姑娘, 佢居然話而家冇話排第幾, 總知邊個急D就邊個落先, 我真係有少少火起呀, 有乜理由入左醫院兩日都安排唔到我生架, 我咪話如果安排唔到我生, 咁唔該幫我安排照超聲波, 因為私家醫生一個星期前己經話我胎水少, 我有D担心... 可能佢地怕孭鑊啦, 好快就安排左落去0刺... 我凌晨2:30落到產房, 老公未夠3點都黎到0刺...我一個人响產房張床上面, 冇人理我, 聽到隔離房有個媽媽嗌得好大聲, 好痛苦咁, 生左好耐都生唔到, D助產士都好緊張協助佢, 又駡佢喎... 個氣氛好得人驚, 聽到我心都寒埋...等左一陣, 有個姑娘問左我一D問題就走左, 我又再自己响度等....

4:00AM 終於有人理我0刺... 有個醫生黎幫我種左粒鹽水豆, 跟住抽血同吊鹽水, 嘩~~原來都好痛架~~不過我知一陣陣痛仲辛苦好多倍~~

再等左一陣, 個醫生再幫我穿埋水, 佢好用力同整左好耐, 終於穿左.. 佢0個陣話我開左一度...

陣痛開始強烈左少少, 後尾我先知原來係我自己痛, 同佢之前幫我做0既野係冇關係...

6:00AM 有個姑娘入黎幫我落催生藥, OH...原來而家先落藥喎~~ 我即刻問定攞笑氣, 但被拒絶左... 佢話我要9點幾先開到5-6度, 咁我唯有CALL老公叫佢返去訓一陣先啦, 差唔多先再叫佢黎...

6:30AM 嘩~~己經好痛0刺..姑娘今次肯比氣我聞0刺...

越黎越痛, 又急屎...姑娘話急屎係好0既, 因為代表BB落得快... 但我要忍住唔可以用力疴, 如果唔係BB個頭會腫架...

7:40AM 聞氣對我黎講真係冇乜用, 我要求做無痛分娩, 姑娘即刻幫我安排, 麻醉師要大約8:00先到, 下?? 8:00??? 咪即係仲有20分鐘, 0個陣覺得20分鐘都好難捱呀.... 跟住姑娘建議打支止痛針, 開頭我都拒絶0既, 因為如果BB响4個鐘內出世就可能呼吸得冇咁好同埋要打解藥, 但後尾姑娘鼓勵我打喎, 咁是但啦...打啦....

打完之後, 可能係笑氣同止痛針一齊發揮功效, 我開始唔知痛, 訓著兼且有幻覺...仲好似同左人嗌交添..真係失哂儀態呀...

直到8點幾, 姑娘可能諗住檢查下我開到幾多度啦, 突然間聽到佢嗌話我生得, 仲叫我唔好等, 痴線咩..梗係唔得啦..我死都要佢打比我老公... 但當然, 而家可以用力疴, 我都係開始左疴...

D助產士一路鼓勵我話我做得好好, 疴下疴下老公就黎左0刺, 真係好彩, 老公响我疴妹妹出黎之前幾分鐘到達...

生左妹妹出黎, 個人真係勁開心呀!!!! 咩痛苦都唔記得LU....

姑娘幫我地影左張全家福...



跟住老公就要出返去0刺... 我疴埋個胎盤出黎, 跟住再縫針, 姑娘又比妹妹過黎飲奶, HEHE...個感覺好SWEET呀....

佢地跟住就推返我上產後病房, 妹妹暫時比佢地照顧住, 所以全部黎探我0既屋企人同朋友都只可以隔住玻璃睇到妹妹咋...

探病時間之後, 姑娘就推返妹妹比我自己照顧0刺... 我不知幾精神, 見到妹妹就開心!!!




第二日, 姑娘問我想唔想出院, 咁我就梗係想啦, 事關响醫院成晚都訓唔著, 又要睇住妹妹, 其他BB又成日喊... 我就寧願返屋企0刺...

JENNY, 青明佢地原本黎醫院探我0既, 而家改左黎屋企...

同埋真係好抱歉, JANET黎左醫院搵我, 點知原來我走左, 真係極度唔好意思呀....

入院前夕...

聽朝9點就要入院0刺, 唔知妹妹幾多點會同我見面呢? 就快做人媽媽0刺! 我一定要加油呀!

突然之間...心情好複雜...

呢幾日都冇乜跡象生得, 我己經叠埋心水等聽日入院催生... 聽日開始我哋就會有一個新成員加入, 生活會完全唔同哂, 唔知點解尋晚臨訓前開始突然有種古怪0既感覺, 悲喜交集, 唔知點形容, 呢個古怪0既感覺令我偷偷地流左幾滴眼淚....

聽日一早9點鐘我就要到醫院, 估計唔到大約幾多點會生到阿妙出黎, 亦都幻想唔到痛楚會去到咩程度, 感覺好似好迷惘咁... 而家就準備交待好呢幾日老公要幫手做0既野, 希望一切順順利利啦....

 

令你地誤會, sorry~~~~

因為呢兩日肚下面條韌帶越黎越痛, 行同訓覺轉身都有問題, 所以今日响MSN度寫住"好痛, 行唔到呀...".  我傾緊電話所以MSN顯示"離開", 好細佬BB以為我生得, 打電話比我又冇聽,  差d同媽咪直接去醫院搵我, 令大家虛驚一場真係唔好意思呀!!

今日仍然冇咩跡象作產, 仲有3日就要入院催生0刺... 

仲未生呀!

每日都收到好多朋友0既電話同msn message關心我生左未, 可惜等到今日小妹妹都係仲未出世, 己經遲左3日0刺! 快d努力啦! 大家都好期待你0既出現架!!

因為上星期醫生同我講bb 0既胎水己經開始少, 就黎會去到唔正常0既水平, 所以我每日都好心急希望可以生得, 好彩小妹妹仲係好活躍, 成日都响肚裡面做運動, 咁個心都定d...

到左預產0刺!!! 但一d動靜都冇...

又繼續等..... 今日都係冇動靜呀....

聽日就到預產期0刺....

聽日就係9月5號0刺... 今日小妹妹仲未肯出黎....

尋晚煲完幾集家好月圓, 兩點幾開始訓, 點知到4點幾個胃突然好痛, 我諗係因為太肚餓啦! 呢排真係成日都覺得肚餓, 但食又唔食得好多喎, 好彩呢排加左0既磅數都响小妹妹度, 我諗佢出黎都應該係小肥妹一名, 哈哈!

距離預產期只有兩天....

仲有兩日就到9月5號0刺, 小妹妹, 你幾時先肯出黎呢?? 今日出去睇醫生都覺得超級吃力, 行都行唔到, 天氣又熱, 真係好辛苦... 好彩生0既係囡囡, 第二時當佢有bb 0既時候, 佢都會有機會感受到我陀左時有幾辛苦...

小妹妹而家有6.8磅, 醫生話係好生0既!

距離預產期只有3日...

2008年9月2日下午11:31

今日係我第一日寫Yahoo Blog, 希望有恆心同時間可以將小妹妹珍貴0既生長過程記低啦...

今日距離9月5號預產期只有3日, 好想妹妹快d出黎呀, 次次去廁所同沖涼都幻想會發現有生得0既跡象, 但每一次都係失望.... 妹妹妹妹, 係咪因為响媽媽個肚裡面太好食好住所以唔肯出黎呢?