青年空間結業禮表演

2014年8月31日

 

妹妹參加左青年空間0既HIP HOP/JAZZ舞暑期班, 今日被邀請去海逸坊表演...

 

事前, 妹妺攞左隻碟返屋企練舞, 但見佢好似唔多識跳咁喎, 得唔得架?

 

中心姑娘話唔係有問題, 佢地响當日會有時間練習, 咁都好D....

 

我地先將妹妹放低响青年空間, 佢地排練完會有車送過去表演場地, 而家長就可以响表演時間直接去表演場地觀賞...

 

企左一陣, 先發現原來妹妹已經坐低左0刺!!

 

商場冇乜冷氣, 企响度等都幾辛苦呀... 好彩我有帶備芭蕉扇!

 

結業禮終於開始, 首先係一個音樂劇...

 

然後就到妹妹佢地表演0刺.... 出場0刺!

 

雖然只是柴娃娃咁玩下, 但都係一個最好0既經驗吖.... 仲睇得妹妹好認真, 贊!

 



游泳堂 - 有進展

2014年8月30日

 

响海天學左兩個月,  好似都冇乜進展咁, 決定唔繼續參加下季課程了...

 

但就响呢一堂, 突然有新進展!

 

教練除左妹妹0既水袖同浮條, 比佢用浮板(背板冇除), 真令人鼓舞!

 

 

 



預祝你生日快樂!

2014年8月29日

 

 

仲有兩個星期先生日, 但姑姨婆就買左旦糕預祝妹妹生日快樂! 好開心!

 



新生輔導日 - 8/28

2014年8月28日

 

 

今日開始我每日送完妹妹就返工, 哈哈, 可以日日都好早返到公司, SO GOOD!

 

 

妹妹入左學校0刺, 但我仲未捨得走, 望多兩眼先....

 

 

今日係大眾會員折扣日, 去左搵尋日校長推薦0既書, 雖然我仲有好多書未睇, 但好想買左先, 擁有佢先!

 

响學校網頁搵到少少呢兩日0既相, 好珍貴呀! 綠色掛証0既就係妹妺嗰班!

 

 



新生輔導日 - 8/27

2014年8月27日

 

 

今明兩日係奉基0既新生輔導日, 第一日返學, 我真的好緊張, 無錯, 係我好緊張, 妹妹好似冇乜反應咁, 哈哈...

 

我胃酸倒流0既情況已經持續左個幾星期, 每日個心至喉嚨好似著左火咁, 好辛苦, 原本都唔為意, 後來同事問起我為左妹妺升小身體上有冇特別反應, 我先醒覺原來胃酸倒流係因為我緊張開學0既事而起0既.... 真神奇, 開學後呢個情況又真的不再發生了....

 

對不嬲返開下午校0既妹妹黎講, 要早起身真係一個大挑戰... 我6:15am起身, 7:00am叫醒妹妹, 妹妹一叫就彈起, 好叻喎! 從呢個表現我就知你其實都係緊張0既, 哈哈...

 

個樣都算幾精神呀!

 

送妹妹返到學校, 家長們就到一樓禮堂參加家長會... 首先係校長致詞, 校長比我0既感覺係好愛錫學生, 每樣野都以學生為本, 佢講0既野令我感動, 覺得選對了學校!

 

完左家長會, 家長就可以落地下湊返小朋友放學, 好朋友candice被編去另一班, 真可惜, 我地趁放學一齊去Mcdonald食個早餐, 相聚一下!

 

 

奉基校服

2014年8月26日

 

話咁快兩個月0既暑假就結束了, 聽日妹妹就要開始新生活!

 

似乎妹妹冇咩感覺喎... 但我就好緊張, 哈哈!

 

 快快燙左校服先, 奉基0既校服..... 不願置評.... 不過學校好係最重要!

 

ANNE姐姐日本手信 - HELLO KITTY大魷魚

ANNE姐姐去日本0既手信, 好長0既魷魚呀!

好靚, 不過味道比較淡....

魚旦舅父生日- 榕樹澳釣魚樂魚排

放暑假真係好忙, 又MISS左好多野未UPDATE0刺...

 

決定又呢一日開始寫, 之前嗰D有時間再後補啦...

 

今日一大班人慶祝魚旦舅父生日, 大家放棄了只食餐飯0既簡單節目, 改為親親大自然, 游下水, 釣下魚, 雖然我同大自然一直都做唔到朋友, 但為左個女, 我都甘願冒住晒黑0既危險, 去玩一日0既~~

 

今次大家黎到西貢榕樹澳, 朝早10點到達西貢, 再搭的士去榕樹澳碼頭, 沿樓梯行落去, 見到幾幾批人等緊船...

 

好猛太陽, 好彩我地响屋企已經查定太陽油啫...

 

對大家黎講係天公做美, 但對我黎講陰陰地會適合D, 哈哈哈...

 

 

响魚排中間可以打開兩個窿, 一班人圍住釣魚, 個個小朋友都好有興趣, 不過聽D人講話好難釣呀, 因為D魚太細條, 個咀太細好難入到鈎呀...

 

當大家差唔多放棄時, 竟然比妹妹釣到一條喎, 好叻呀你!

 

 

於是乎, 妹妹全日有一半時間响度釣魚, 個個圍住個窿, 好攪笑...

 

 

好驚妹妹唔小心跌落個窿度, 我要抆住佢呀...

 





 

妹妹一時游下水, 一時又上黎釣下魚...

 

 

又釣到0刺!

 

 妹妹好喜歡晴晴姐姐..

 



日落景色都唔錯...

 



 

原本呢個魚排(名叫釣魚樂)都唔錯, 因為有花灑可以沖涼, BBQ食物又OK, 可能始終唔响海中心, D水唔夠乾淨, 不過大家都有落水游, 應該算係接受到... 不過最大缺點係... 到我地走時, 架船响一個"政府公地"0既碼頭比我地落船, 我地又大又細咁要越過D鐵牌, 爛橋, 好恐佈.... 重點都唔係呢個, 最嚴重0既係要出返去搭車, 要行好長好長0既路, 途中冇行人路, 有車經過, 黑忟忟, 太危險了...

 

下次都係唔去呢度0刺...