驚喜! 孔雀媽媽生BB!

唔知叫做幸運定唔幸運, 買左八條孔雀魚, 有爛尾的, 有病的, 亦有大肚的...

妹妹對生BB呢件事超好奇, 所以佢成日都留意住大肚魚魚的一舉一動...

尋晚, 妹妹留意到大肚魚魚匿左响角落頭, 佢同我講, 我一睇, 原來魚魚响度生緊BB呀! 已經有幾條BB响附近!!

為免BB成為其他魚0既晚餐, 我地即刻將BB撈出黎, 總共有7條!

魚媽媽都幾慘, 生完BB比其他魚公狂追, 睇住佢比人追左足足兩個鐘... 大肚婆生完BB咁攰仲要不停游黎游去避開其他魚公, 真係戥佢辛苦... 越黎越唔對路, 我決定隔開魚媽媽先...

冇經驗0既我, 用一個碗黎裝住魚媽媽, 然後就去訓覺, 好彩妹妹訓上床後仲堅持要落返床飲水, 佢飲完水發現魚媽媽跳左出黎呀!!!

妹妹0既爸爸訓著都跳起呀! 即刻出去執返條魚, 妹妹救左魚媽媽一命! 好利害!

我地將魚媽媽放入一個杯度, 安心睡覺....

第二朝6點幾爸爸醒左, 發現魚媽媽又生左3-4條BB喎! 我一心以為爸爸已經將佢地隔開, 點知原來冇呀! 到10點, 爸爸打黎叫我去睇下, 嘩! 原來生左10條呀! 好勁! 如果魚媽媽冇食到BB, 咁佢TOTAL就生左17條魚仔0刺!!!

魚媽媽你忍耐下, 我地而家去買氧氣珠比你!

撞岩落大雨, 我同妹妺差唔多12點先落到去買BB魚糧同氧氣珠, 但好可惜, 間間水族館都未開, 我地白行一趟~~

返到屋企, 妹妹發現魚媽媽訓左响度, 哎呀! 魚媽媽死左!! 佢生完BB就死左, 好慘呀! 妹妹冇哂心機....

我地下晝再落去買魚糧, 水族館話魚媽媽係缺氧而死, 唉, 我地害左佢....

 而家唯有寄望魚BB快高長大, 我地一定會比心機照顧你地架!

SPADE

家樂坊的SPADE, 依然好好味!

芝士火腿牛角包, 我知妹妹一定鍾意!

原本佢話咩都唔食, 只係飲野, 去到都不知食得幾滋味!

MANGO SMOOTHY, 勁濃芒果味, 正呀!

蛋沙律煙三文魚牛角包, 好多煙三文魚, 勁好味!

MIX BERRY MIKE SHAKE, 妹妹唔鍾意, 咁我覺得都OK0既!

唔記得叫咩名0既炒雪糕, 好花生醬味, I LIKE! 但妹妹已經好飽, 食唔到0刺...

之後去左金魚街買左八條孔雀, 妹妹好開心!

妹妹推介-草莓芭菲 @ 潤一潤

妹妹上次同嫲嫲去過紅磡0既糖水舖"潤一潤"食過草莓芭菲之後, 念念不忘, 今日爸爸早放工, 我地食完牛角LUNCH之後, 妹妹就提議去食草莓芭菲...

不過妹妹唔識路, 佢叫我地帶佢去富臨, 跟住佢就會識行去... 

紅磡有好多甜品舖, 呢間潤一潤雖然唔出名, 但原來價錢又平, 味道又唔錯, 都好多人幫襯呀!

滑滑蒸水旦

今晚終於試左呢個滑滑蒸水旦0刺, 好成功!

 

真係好滑, 妹妺勁鍾意食呀!

 

 

今次用左三隻旦, 加一盒細雞湯..

 

攪勻然後隔渣,  封鍚紙水滾大火蒸3分鐘..

 

熄火焗20分鐘..

 

成功!

Robin i-pen

 之前响大眾睇過一次, 可以試0既得本字典, D字對妹妹黎講有D淺, 所以我都冇諗住買...

 

去迪士尼嗰日同JOEY MA傾開, 原來JOEY都有睇佢地0既故事書喎, 仲話都唔錯, 攪到我又心思思...

 

尋日朝妹妺朝早狂喊, 我氹佢話買公主LOOK & FIND比佢, 點知佢話要發聲書, 原來佢偷聽到我同JOEY MA0既對話, 玩緊都偷聽到, 勁呀!

 

今日終於買左比佢0刺! 大眾會員日支筆有八折, 好抵!!

 

再揀多兩套書, 希望妹妺真係有心機睇啦!

 

妹妹見到好開心! 佢話: 我等左發聲書好耐0架0刺!!

 

迪士尼畢業禮

今日係妹妹0既大日子, 似乎我呢個做媽媽0既仲緊張過個主角喎...

朝早6:30就起身準備, 妹妹又竟然可以同我地同一時間起身, 好勁呀!

食個MCDONALD早餐, 大家正式出發!

去到迪士尼門口就見到幾位同學仔, 手拖手一齊行, 可愛!

最好的朋友仔 - JOEY

著左件畢業袍, 個個都好靚女呀!

MISS LEUNG話妹妹條辮太高, 怕頂住畢業帽, 臨時轉LOOK..

等左大半個鐘, 終於可以入去0刺!

只有迪士尼攝影師可以影到正面, 我地家長只可以响側邊影咋... 聽其他家長講, 今年迪士尼安排0既位置好差, 除左米奇老鼠之外, 都睇唔出呢度係迪士尼呀~~

影完相會同米奇握手, 妹妹係第一個...

出左黎, 大家想點影都得啦!

 自由活動時間開始, 首先同公主影左相, 個個都好嬌俏喎...

一路玩妹妹一路講住要玩過山車, 哈哈, 個個雄心壯志咁去玩SPACE MOUNTAIN, 個個爸爸媽媽都為佢地担心呀! 最後好彩都OK!

真多謝柔柔媽好細心咁BOOK定位去飲茶, 飲完茶我地再玩埋史迪仔就差唔多去睇巡遊0刺... 

 CANDICE發明的愛心抱抱, 佢地行幾步就抱一抱, 好攪笑! 睇得出佢地真係好好朋友, 好開心今次學校安排呢個畢業禮, 比佢地有愉快0既一天...

未夠時間, 買雪條食下先...

响巡遊前, 有同學仔可以上巡遊車度, JOEY好彩被抽中, 真幸運啊!

小朋友有無限精力, 但大人就頂唔住了... 最後响放煙花前就離開0刺...

妹妹的至愛 - 碎花裙

前幾日接妹妹放學前路過H & M, 順便入去搵下有冇佢0既至愛碎花裙, 竟然又比我搵到幾條喎, 最後買左呢兩條, 原本諗住比妹妹揀一條, 點知佢兩條都鍾意喎, wakakakaka!

posted from Bloggeroid

玩具圖書館

想帶妹妹黎玩具圖書館好耐, 今日終於都黎左!

BOOK左5:00, 妹妹先帶我地去皇室堡食個和千拉麵再慢慢行去...

都好多人去玩架, 不過發現妹妹五歲太大個了, 問職員有咩岩玩, 職員提議煮飯仔, 呢D屋企都有喎, 最後揀左一間屋, 自已設計傢俬擺放位置嗰一類, 原本都幾悶, 好彩突然有個小朋友話同妹妹一齊玩, 咁先好D....

不過有個不足之處, 每節只有45分鐘, 入得去攞玩具, 玩一陣職員就响30分鐘開始叫咪, 叫大家準備, 一直叫到真正散場為止, 太短同埋職員咁樣幾分鐘叫一叫都好擾民啊!

種豆

今日阿佳帶埋呢副BOARD GAME黎玩, 我覺得好好玩呀! 

不過玩左兩舖都輸, 下次我應該會叻D架0刺! 哈哈!